Anggun nirya ara, moubuka kekepnululume. Kekepmunce, anyapdeipnusin yupu ati, mambul kanye bobuka, pia moubuka talipmunce, unamlume. Na ap, na si ap ati, ‘Allah Yahweh ara, pia mambule’ tenen, teleb kibuka, si erenamnululume. Na Allah Yahweh im deice yin talin malaikat nirya, sik weik deiyoknye ununa ati ara, narye nyapsin yupu ara, moubuka kekepnululume. Anggunce na kibuka, si kum erepnumunyopura, narye anggun deice, malye yupu nyabuka sunamsine. Aninguk kum bukni, tonda narye anggunti, teleb ning ton arisinye ning babye, malye nyabuka sunamsine. Aning nirya malye ninguk arepsinyopura, dolonamlulume. Narye anggunti, ‘Wininamlulume, aning kum winipmunyopura, ikin ning arenamsine,’ nyapsise yupu nirya ara, anggunce, ‘Aning ara, mambul kum ati ara, daupmalye’ tenen, batakanululuma ati, dipkoprob narye anggunti, akunum deiyok koubuka sunamsine. Winisununa deiyok ara, anggunce na nyapdeiamse ning ara, batakluma ati susunune.
Ulangan 28:15 - Eipomek15 Bukni, anggun ni koproba Allah Yahweh elce, “Aning ara, wininamlume. Aning ara, kum wininamlume,” nyapdeipsuk ning, arup arye nyapsin yupu anyak, anggunce moubuka talipmunce, pia kum dobolbamunyopura, anggun unamlum mutuku nirya ara, ikin pia weik ning, anggun deice yanganamsile. Asum, narye anggun dam laka nyapse ning, diba tenebuka, kum talipmunyopura, anggun dam ara, ikin-ikin ning yaliba dopropmunce, kanye imun unamsile. Kanye ikin unamsil ning ara, ani. Gade chapit la |
Ulangan 28:15
31 Referans Kwoze
Min talak dodarapce, Allah arye, ‘Malye winibikceba, narye sik wenena ati winipnamne,’ tenebuka kintinyamukce, “Anggun dam ati winipnamne,” nyabuka, laka nyalilamsuk ning ara, wini talak akunum winipsuk. Allah elce nunti, bico tenena kum aryuk, dakuka bataksukce, atu buklopsuke. Ara, Allah elce nun mal olan nang, sik deice mikip arebukba, yan obuka bisipsike. Allah elce nun mal olan nang ati, ‘Kanye teleb kipdeiplirye, lo arepnyeba, Israel nang obikirye, malye kipnamake,’ tenyamuk touk, elce mikip arebukba, nun mal olan nang arye, nun ulamupu mutuku nirya ara, dakuka atu buklopsikce, teleb kanye bobuka ukirye, dipdanuka karye onyake. Elce, sik mal olan nang deice, mikip weik areamukba, sikce nunti, obuka malye kipsikce, nyek-nyek nyabuka nalisikirye, kanye delinyake.
Anyalin yupu akunum kekepmalya babye, yata nang arye do, malye un ning winiplinye bira, Allah arye, ‘Anye bira, namin kiplirye, teleb kipdeipnune,’ pia kum tenenamle. Bukni, atouk winiplinye bira, Allah yu weik uplyeura, ikin ning tamubuka, el nong deice delinamle. Ara, “Anggunce, malye winipmunye nang ara, aikin weik ning, anggun dam yanganamsile,” nyapdeipsiba, abuku noutam sekeibik touk, ubuka yasiliba, donamlume. Adeice arye, amalye winin nang nirya ara, Allah arye sik malye winin nang ati, namin kina kumce, obuka sirya daknamle.
Bukni, lubakina meme. Anggun si erelulum Allah Yahweh, elce nyalin yupu deice arye anggunti, “Teleb-teleb ning nirya arenamsine,” nyapdeiamuk touk, akunum winipdeipsuke. Aning atouk, Allah Yahweh elcuk anggunti, “Na yupu yanipnumunce, malye weik umumyopura, narye weik ikin ning, anggun deice deipnamsine,” nyapsuk touk, winipnamsile. Winipsiliba, ikin ninguk, anggun dam tuba-tuba yangalamliba, ikin kanye uk bobuka, ulamunya ani, sirya ara dipnamlume. Ara, anggun si erelulum Allah Yahweh arye, pia teleb mutuku areamsuk noutam ara, ikin kanye bobuka, dipnamlume. Ara, elcuk opsilirye, sirya daknamsile.
Winisulul bukni, yata ninye do nirya, sikce, ‘Kume, Musa sekamuk yupu, mem yupu kekebibirye, ayupu moubuka talibibirye, teleb kibuka dobolbanyaba deice aryuk, Allah arye kanye deipnamsile,’ tenenyak ninye nirya ara, sikda bicoe. Allah arye anang ati diksukum kum kilinamle. Aninye ara wenepnamle. Aning deiyok ara ani. Allah yupu sekeiyamik yupu noutamak ara ayupu ton aubuk. ‘Musa sekamuk buku noutamak, mem yupu nirya ara, tonok ning babye batakna kum arye, pia teleb kibuka kekebikirye, kum dobolbanyak ninye nirya ara, Allah arye wenebuka oplopnamle. Allah arye nyabuk.’ (Ulangan 27:26) Allah arye nyabuka ati, ‘Musa yupu kekebuka diksukumuk dobolbabya deice arye, Allah lyepnamsile,’ tenenyak ninye ara, sikda bicoe. Ara, amem yupu nirya moubuka talipnirye, tonok ning babye batakna kum arye, diksukum una ara kum winipmanto ati, Allah arye aninguk talinyak ninye ati wenebuka oplopnamle.
Bukni, sikce malye ninguk, talibuka winilamice nang ara, nyapnamlulume! “Anggunda bico, anggun wenena ati, ikin ning ton dopropnamlume. Anggunce yuk nang ati, ikin ning delilalum touk, anggun babye, ikin ning anggun dam yalyopura, dopropnamlume. Tonda, anggunce malye-malye pil dolamlum touk, anggun dam ara, ikin pia ning yanuka, anggun nong deice deipsilyeura, doropnamlume,” nyabuka wenepnamlyame.
Ati ara, Allah el si Yahweh arye, akwatima ati nyabuka wenebuk. “Ninye weilamak ning ap, talye buru mutuku balamle ning ap, ayala-ayala weik daunyak bukni, anda weik ikin ning bobuka, an nong deice deipkine. Wini talak arye, dipdongobuka, doyanamle talak noutamak nirya, kam unalam talak nirya ara, an mun deice arye tuku deice banmaminyeba, kal-kal alamle tuku, buta ara, an si bam bol pum bisik pia wekenamkile.
Tonda, dan mutuku do nirya, tukwak mutuku nirya, wa wibuka koupnalam bukni, paplirye el nong pia kum upnamkile. Aning-aning nirya kum papnamkilba, talye diamuk pil donalame. Wini talak arye, dipdongobuka doyanamle talak nirya ara, ‘Amutuku binun do, omutuku binun do?’ tenen, teniltonauk upkiliba, tukwak mutuku im sirya, mutuku sirya nirya noutamak arye, pia balsusunuk unalame,” nyabuka wenebuk.
Aning atonun bukni, malye winipmanto ning ara, anggun si erelulum Allah, anggun ni koproba Allah Yahweh arye nyapdeipsuk yupu, moubuka kum talipmunce, aning batakuka, talye ning isa si, kum bikamlum ning, yuk mutuku nang arye si erenyak ning ati, ‘Aning ara, nun deiyoknye,’ nyabuka, atalye ning ati, si erepmunyopura, adeice Allah arye, anggun dam supsiliba, ikin ning anggun dam yaliba, kanye imun unamsile. Tonda, supsilya deice arye, malye ninguk dopropnamlume. Ayupu ara, akunum nyapmasine.” Musa birye, sik Israel nang ati, nyabuk. Nyabukopura, ayupu ton dukdongobuka nyabuk.
Ati, atalak-atalak nirya, Israel ninye arye, sik mal olan nang ati ‘Olbinamabe,’ tenelamikce, binuka olalbalamik bukni, kum opmanto ulamikba, sik yu nang arye Israel ninye ati obuka sirya daklamik. Aning winilamik ning ara, minop talak Allah arye Israel ninye ati, ‘Anggun malye winipmunce, na bataknumunyopura, anggun wenena ati, anggun mal olan nang mikip arepneba, anggun Israel nang dam yanuka oplopnamsiyake,’ nyabuka nyalilamuk touk winibuk. Yu nang arye sikti, ona uk ulamika ati, sik Israel ninye ara, malye kanye weik bobuka ulamikce, ‘Se,’ tenebuka ikin kanye bolamik.
“Winipnamabe,” nyabikba, sik nirya kintinibikce, Pilistin nang ap, Israel ninye ap, mal olanmeka ani, Pilistin nang arye Israel ninye nirya, obuka sirya dakik. Sik Israel ninye yin talin nang ara, pia weik, tiga puluh ribu (30.000) nang oplobik. Winibuka obikce, tuba batakdongobik nang nirya ara, tamubuka sik baju bol doltakna tenda aik yuk-yuk ulamik touk, bikbik abuka yandobik.
Bukni, an ap, ance deipminba, deipdanin banamak ninye nirya arye, na si bataknumunce, yuk isa siuk erepnin bamunyopura, wenepnamsine. Aning atonun, narye, ‘Aning ara wininamlume, aning ara pia kum winipnamlume nyapdeiamse yupu ap, ‘Aning ara mem ning nyapdeiamse yupu ap nirya, yanipmunce eibuka batakmunyopura, wenenamsine.
Atalak ara, Yehuda tam ninye deiyoknye Raja Rehabeam ap, Yehuda mutuku noutam ulamikce, ninye deiyok kibuka ulamik nang ap, Mesir mutukunye birye, oplopsilyak tenen, Yerusalem mutuku noutam bulubuka tonokak yanuka ulamik. Winilamik talak ara, Allah el yupu lak nyalamuknye, el si nabi Semaya bira, sik anang dam yayukce nyabuk. “Allah el si Yahweh arye nyabuk yupu ara ani. ‘Anggunda adiparyuk nati kunum batakanulume. Winipnuluma ati ara, narye anggun babye bataknamsine. Winibuka bataksiniba, Mesir mutuku ninye deiyoknye Sisak birye opsilirye, anggun Yehuda tam ululum nang nirya talinamsile Allah arye nyapsile.” Nabi Semaya birye nyabukba kekebik.
Ara ani, Allah Yahweh arye nyapsile. ‘Israel nang, sik apu yapu nang arye, si erelyangalamiknye, nara Allah arye winipnamne. Yerusalem mutuku ap, amutuku noutam tuba unyak nang ap, ati supnirye, sik nirya ara, weik imun kanye bon ning, sik dam deipnamne. Ara, narye minop talak nyamsiba, abuku sekeiamik noutam arye, ‘Allah nyalye yupu kum talebuka ubicopura, supniba, weik imun kanye bon ning, ayala-yala nirya, sik deice yanamlarya,’ nyamse. Ayupu nirya ara, anggunce abuku dobuka, sik Yehuda tam talibuka deiyoknye dam nyapdeipmalumba, anggun Raja Yosia akunum kekemoke.
Na walwal bukni, ayupu nyapnalam sum ara, kekebikirye, ‘Se, nun dipkoprob malye unyabe’ tenen, sik aninye malye wininyak ning nirya bataktingce, Allah ati moropnamak do, kum do? Ara, sik aninye nirya arye, ‘Se nun ni Allah, nun malye wininyap ning batakikirye, an damuk tamubuka yanamabe. Ance nun malye ning kilipsutumce, lyepsutum tenen, moropkiyabe,’ nyabuka, Allah ati, moropnamak do, kum do? Nun walwal bukni, dinauk unaname. Ara, urdem ati kum nyapkine. Sik Israel ninye ap, Yehuda yala ninye ap arye, pia malye weik wininyaka ati, Allah el yu weik upliba, ‘Sik wenena ati, ikin weik ning, sik nong deice deipnirye, sikti, opnamne,’ nyapdeibuk ning ara, mitik kume. Weik wenen ning kintinipmala ati, nyapkine. Ati ara, Allah arye nyapdeipnukba, laka nyapmakinba, ance sekmalam yupu dobuka, Allah el si eren aik binuka yinipnalyame, nyapkine,” Yeremia birye, Baruk biti nyabuk.
Aninguk kum bukni, an ap, ance deipminba, dadeipdanin banamak mapu ap, tonda an taliplumba, an amu tam pil yuk-yuk talibuka donyak ninye ap, anggun nirya ara, malye winimunya anya arye, wenebuka opnamsine. Ara, anggun deiyok kibuka, amutuku taliplum nang arye, malye winimunyeba, Yerusalem mutuku unyak ninye ap, Yehuda mutuku noutamak daunyak ninye ap, malyeuk wininyaka ati, narye amutuku noutamak, ikin weik ning, anggun nong deice deipnamsine. Winipnamne ning ara, yata talak arye, “Anggunce tuba malyeuk winipmunyopura, anggun malye winilulum ning dekna ati, kanye weik imun ning arepsinirye, mikip arye wenepnamsine,” nyalamsise. Bukni, amutuku ninye nirya arye, na nyalamse yupu kum kekelamnik. Ati, ‘Aikin ning nirya ara, dipkoprob anggun nong deice deipnamsine,’ nyapne. Allah arye nyabukba, Yeremia birye, kekebuk.
Sikce yuk mutuku nang ati bitingce, ‘Melipsululume,’ nyabuka moroptinga babye, narye aning nirya kum kipdeipnamne. Sik Israel nang arye, yuk mutuku nang ati, tuba bakirye morobikcopura, narye sik Israel nang youna ati ara, el si jaring tapu wepnamne. Winipniba, ninye arye talye maka youlamle touk, anang youpnamle. Winipmanto ara, ninye arye, ‘Maka youpnamapʼ tenen, tapu welamak touk upnamne. Ara, narye sik Israel tam unyak nang arye, malye unyak ning nirya ara, akunum bikse ati, aning ara sik Israel nang wenena ati ara, akunum kintinipse.
Musa birye Israel nang nirya ati, “Anggun nirya bulubuka weklulume,” nyabukba, bulubikopura, anang ati nyabuk. “Se, na kayapo, anggun Israel nang nirya ati, na nyapnusin yupu ara, moubuka kekenamlulume. ‘Aning ara, winibuka-winibuka unamlume,’ nyan yupu ap, tonda ‘Aninguk wininamlume,’ nyan yupu nirya ara, arup arye nyapnusine. Ara, anyapmasin ning nukuka, bikmunce, ayupu uk, pia ati moubuka talipmunce, winipnin banamlume.
Winipmunya deice arye, tuba-tuba ikin ning, anggun deice yaliba, dolomunya deice arye, anggun nirya kum kipnamsile. Deiyok ara, anggun ni koproba Allah Yahweh arye, “Aning wininamlume. Aning ara, pia kum wininamlume,” nyapdeipsuk yupu ap, “Teleb winina ara, ani,” nyapdeipsuk yupu ap ara, batakluma atia. Tonda, elce nyapdeipsuk yupu, kum kekebuka winiluluma ati, ubuka winipnamsile.
Anggun ayan bukuka kekenmalumak, Allah elce, “Malye ning si erebikce nang ara, ikin ning dopnamake,” nyabuka, nyalin yupu deice arye, ‘Aninguk wininamakʼ tenen, mikip arye nyapsuk ning nirya ara, anggunce kekeplume. Anyalin yupu akunum kekeplum nang ara, ‘Nunda, ayupu akunum kekebabe ati, aminyan talak ara, nun babye patapsilye touk, talye malye wininamabe. Aning ara, teleb uka,’ pia kum tenenamlume. Anggun mining kanye tenepmunye ninguk, dekmunyeura, anggun dam babye, ikin ning yalyeura, dopropnalume. Ara, Allah arye, sik malye wininyak nang ati, weneplirye, deken ning arepsilyeura, teleb un ning babye, malye winin ning babye, ikin ning yalyeura, sik nirya ikin ning dolonamake. Atouk, malye winin ninguk talibuka winilamlinye bira, ikin ning yalyeura, dolonamle.
Winipmanto ara, Israel nang anggunce, Allah Yahweh arye nyapdeipsuk yupu moubuka kum talipmunce, ayupu batakuka, yuk talye isa si erepmunce, yuk yala nang arye, talye si erenyak ning do, yuk mikip ning do, anggunce, ‘Aning ara, melipsitingeʼ tenen, sik dam binuka, sik si erena ati, kutam tuku dinik dongobuka, kipmunyopura, nun ni Allah Yahweh arye, anggunti yu upleba wenepsilirye, ikin ning anggun nong deice deipnamsile. Ara, akaren aryuk, Allah arye anggunti, “Teleb mutuku unamlume,” nyapdeiamsuk mutuku, akunum arepsuk bukni, aululum mutuku noutamuk, Allah Yahweh aryuk, wenebuka opsilirye, kum kipdeipnamsile. Yosua birye, sik Israel nang, yala-yala nirya ati, ayupu nyabuk.
Ura, min talak arye dipdongobuka, wini talak babye, tuba nyasunune. Aning nyasunun bukni, anggunda, na yupu moubuka kum kekenululume. Tonda narye anggun dam nyasunun yupu ara, kum talibuka winilulume. Bukni anggun apu yapu babye, anggun asukum ululum nang babye, na yupu moubuka kum kekebuka taliplumce, kum winilulume. Aning kum bukni, anggun apu yapu arye, pia mania kanye bobuka, malye winilamik touk, anggun asukum ululum nang babye, ‘Kume, nun mining kanye aryuk tenenyap ninguk, malye tuba wininamabeʼ tenen, malye tuba ululume. Aning ati ara, narye sik wenena ati, “Ateleb ning nirya kum winipmunyeura, narye ikin ning dobuka anggun nong deice delinamsine,” nyabuka, nyalin yupu deice nyapdeiamse nirya ara dobuka, sik anang deice akunum deiamse. Tonda, anggun wini talak ululum nang babye, anggun deice delisunune. Allah arye nyabuk.
Ance, nun apu yapu ati, atam tuku nirya areplumba, amutuku wekuka, talibikce ulamik. Bukni, sik anang arye, amutuku tuku dobuka, unyak talak ara, ance, sikti, “Aning-aning talibuka, unamlume. Aning ara, pia kum wininamlume,” nyapdeiamsulum ning ara, aning nirya kum talibuka ulamik. Tonda, ance, “Aning-aning wininamlume. Teleb winina ara, ani,” nyapdeiamlum ning ara, kum talibuka winilamik. Tonok ning babye, teleb kibuka kum winilamik. Sikce malye-malye weik winilamika ati ara, ance sik anang deice, ikin weik ning ap, kanye imun ning ap, nirya dopdeipminba, sik deice yalyeba dolokirye, imun kanye bobuka unyake.