Ulangan 28:1 - Eipomek

¹ Musa birye, sik Israel nang nirya ati, nyabuk. Anggun Israel nang ara, anggunce si erelulum Allah, el si Yahweh, el tibuk mikip arye talimunce, elce, “Aning ara, wininamlume. Aning ara, pia kum wininamlume,” nyapdeibuk yupu, moubuka kekepmunce, wininamlume. Ati ara, arup narye anggun kekenak laka nyapdeipsin yupu, moubuka talimunce, aninguk dipkoprob winimunyeura, anggun si erelulum Allah, el si Yahweh arye, anggun erepdeipsilyeura, mutuku-mutuku nirya unyak nang arye, anggun si biksikirye, si erenamsiake. Anggunda, yuk mutuku nang nirya ara, sik deice tam unamlume. Sik yuk mutuku unyak nang ara, anggun amu tamuk unamake.

Ulangan 28:1 Referans Kwoze

Yesaya 1:19

Tonda, anggunce nati, ‘El yupu kekebuka, el amu tam dobolbanamabe,’ tenepnumumnyopura, anggun amutuku ulul ning pia teleb ning ara, weik tonun arepsinyopura, aning talibuka dinalume.

Keluaran 23:22

Bukni, anggunce el yupu pia moubuka kekepmunce, aninguk talibuka winipmunce, tonda, narye anggunti, “Aning ara, wininamlume, aning ara, pia kum wininamlume,” nyapsise ninguk kekebuka, winipmumyopura, narye anggun melina ati, anggun mal olan nang yanganamak talak ara, na yu upniliba, anggunti unirye, sik anang nirya obuka, sirya daknamne. Aning atouk, dan mutuku nang do nirya, yuk mutuku ninye arye, ‘Israel nang sik nong deice ikin ning delinamabʼ tenen, yanganamak talak babye, narye aninye nirya ati, sik nong deice ikin ning arepnamna deice arye, amutuku nang nirya malye kipnamne.

Yohanes 15:14

Narye anggunti, “Aning wininamlulume, aning ara kum wininamlulume,” nyalisinye yupu, dipkoprop kekebuka winipmunyopura, narye, “Anggunda na weitcapu nang koprop,” nyanamsine. Narye nyasinye yupu kum kekepmunce, batakmunyopura, ‘Anggunda na weitcapu nang,’ nyabuka kanye kum delinamsine.

Lukas 11:28

Nyabukopura, Yesus arye akil ati tamubuka nyabuk. “Kume, yata ninye do nirya ara, Allah yupu moubuka kekebikirye, diba tenebuka, diksukumuk unyakce Allah ati dobolbanyak ninye ara, sikda pia mambule. Aninye ara, Allah arye teleb ulinamle,” Yesus arye nyabuk.

Keluaran 15:26

Atalak ara, Allah, el si Yahweh arye Israel ninye ati ayupu nyabuk. “Anggunda na Yahweh arye nyapnusin ning nirya ara pia wininamlulume. Ara, narye nyasunun yupu moubuka kekepmunce, na tenenye touk diksukumuk winipnamlulume. Ara, narye anggunti, ‘Aning ara winibuka-winibuka unamlume,’ nyabuka deipnirye, aresunun yupu nirya, moubuka kekepmunce, dobolbanamlume. Aning atonun narye anggunti, ‘Aning kum unamlume’ nyasunun yupu mem yupu nirya kekepmunce, aning nirya kum winipmunyopura, narye melinamsine. Ara, Mesir ninye anggun ona ati, weik kanye imun ning ap, uk deiyok ning ap arepse touk, anggun Israel ninye ati ara, pia kum arepnamsine. Auk ara, aning-aning nirya kum dipnamsile. Ara, nara anggun ninye deiyoknye, Allah ununa ati, na Yahweh arye anggunti kwetepsinirye, lyebuka kam bukuka deipnamsine,” Allah el si Yahweh arye Israel ninye ati nyapdeibuk.

Mazmur 91:14

Allah el si Yahweh arye nyabuk. Dipkoprop, na wipdeiamsinye birye, natibuk kanye deilinulula ati, narye el anye bira, lyelonamne. Lyepropniba, elda na amu tamuk uliba, nara el damuk, pia unamne. Ara, el anye birye, na siuk erenulula anya arye, narye elti, pia melibuka kalikinamne.

Ulangan 15:5

Ati ara, arup na Musa birye, anggun dam, ‘Aning-aning wininamlume,’ nyapdeipsin yupu ara, moubuka bikmunce, aninguk talibuka winimunyopura, tonda anggun ni koproba Allah Yahweh, el tibuk, talipmunyopura, elce anggunti, pia teleb kipdeipsiliba, pia teleb kibuka unamlume.

Ulangan 11:13

Ati anggunda, arup arye, ‘Aning ara, wininamlume. Aning ara, pia kum wininamlume,’ nyapman yupu nirya, Allah arye nyapdeipmanuba, narye nyapmasin ning ara, kekepmunce, moubuka talipmunce, wininamlume. Tonda, anggun si erelamlum Allah, anggun ni koproba Allah Yahweh atibuk, kanye delina ap, el si erena ap umunce, anggun kanye pum tam nirya, el deiceuk delinamlume.

Roma 2:7

Aning tonap laka nyapnusine. Yata ninye do nirya sikce, ‘Kume, Allah arye nunti, pia teleb una deiyok ning ap, kam pia una deiyok ning ap arepsutuba, elti, pia si erenamep’ tenen, patalyeba batakna kumce, pia pi dobuka, teleb winin ninguk talibuka wininyak ninye ati ara, Allah arye bol koplobuka, pia kam una deiyok ning arepnamle. Anyaripnamle ninye ara kam pia unamake.

Yesaya 3:10

Ati, sik diksukumuk unyak nang ati, nyapnulyame. “Anggunda, kanye deipnululume. Allah arye anggunti, lyepdopnamle. Ara, sik anang teleb kibuka, pil donyaka deice arye, apil donyak ning ara, nong ning ton doropnamaka atia. Pil teleb kibuka dolonyak touk, dekna ning, pia teleb ning dopropnamake.

Mazmur 111:10

Yata nang do nirya, sikce, ‘Kume, Allah arye nyasulul yupu atonun kibuka, pia teleb wininamne. Pia teleb, weik kelnye wininamne,’ tenenyak nang nirya ara, minop weik mambul unamak ning ara, ani. Ara, Allah ati, ilil tenebikirye, elce nyasulul yupu moubuka talinyakce, dobolbanamake. Wininamaka deice arye, weik kel nang unamake. Allah arye, “Aning ara, wininamlume. Aning ara, pia kum wininamlume,” nyapdeiamsuk yupu moubuka talikirye, dobolbanyak nang ara, yata ning do nirya, nong noutam ning moubuka tenebikirye, telebuk wininyake. Dipkoprop teleb ning ara, ninye tukwak nang nirya arye, Allah ati, “Anda pia telebuk ulyame,” nyabuka, el si erenauk wininamake. El si erena ara, pia kum batakanamake.

Galatia 3:10

Winisulul bukni, yata ninye do nirya, sikce, ‘Kume, Musa sekamuk yupu, mem yupu kekebibirye, ayupu moubuka talibibirye, teleb kibuka dobolbanyaba deice aryuk, Allah arye kanye deipnamsile,’ tenenyak ninye nirya ara, sikda bicoe. Allah arye anang ati diksukum kum kilinamle. Aninye ara wenepnamle. Aning deiyok ara ani. Allah yupu sekeiyamik yupu noutamak ara ayupu ton aubuk. ‘Musa sekamuk buku noutamak, mem yupu nirya ara, tonok ning babye batakna kum arye, pia teleb kibuka kekebikirye, kum dobolbanyak ninye nirya ara, Allah arye wenebuka oplopnamle. Allah arye nyabuk.’ (Ulangan 27:26) Allah arye nyabuka ati, ‘Musa yupu kekebuka diksukumuk dobolbabya deice arye, Allah lyepnamsile,’ tenenyak ninye ara, sikda bicoe. Ara, amem yupu nirya moubuka talipnirye, tonok ning babye batakna kum arye, diksukum una ara kum winipmanto ati, Allah arye aninguk talinyak ninye ati wenebuka oplopnamle.

Lukas 9:48

“Yatanye do, yata kil do, amitik mi atonun ninye ati, bico tenebikirye, na si deice arye telebe nyabuka mililamicopura, ara nati melinamniyake. Nati, melinamniyak nang ara, natibuk kume. Nati, milipnicopura, ara na dopdeipnuknye, Allah ati melinamake. Yatanye do, yata kil do, ‘Na weiknye upnamne,’ tenenyak nang ara, ninye amu tam unyakce, yuk ninye nirya ati, bico tenebuka melinauk unamake. Atouk uplinye bira, Allah el kanye ara, ‘Anye bira pia mambulnye,’ tenelule,” Yesus arye nyabuk.

Yeremia 17:24

Anggun apu yapu winilamik bukni, narye nyapsine. Na Allah arye nyapdeipsise yupu nirya ara, moubuka talipnamlume. Tonda, Sabat sum ara, Yerusalem mutuku bisik bublan arye bona bobuka, abisik wekelbana kum wininamlume. Aning kum bukni, Sabat sum noutam ara, ‘Naʼ tenen sum ati, na si eren sum ulula ati, anggunce talye pil nirya ara, asum deice arye, pil kum donamlume. Winipmunyopura, teleb ning ton arepniba, anggun dam yanamle.

Ulangan 26:19

Anggunce el nyapdeiamsuk yupu moubuka kekepmunce, pia winipmunyopura, anggun Israel ninye ati ereipsiliba, ninye nirya arye, ‘Se, anang ara, sik mambul weike. Allah elda pia telebe,’ nyabuka, Allah el si erenamake. Allah arye, ninye ayala-yala nirya, weika arye kwepdeibuk bukni, yuk yala ninye im sirya, mutuku sirya nirya ara, mitik mambul unyak bukni, anggun Israel ninye ara, Allah arye ereipsiliba, weik mambul ninye unamlume. Wininamla ara, talye ati kume. Ara, ‘Israel ninye, ‘Naʼ tenena ninye unamaka ati, sikti, wipdeipnamne. Sik ti konop nang nyanamake. ‘Sik ti, yuk mutuku nang arye si dopnamake’ tenen, Allah el si Yahweh arye wiamsuke. Aning nirya ara, Allah arye, anggun apu yapu ati kunum, “Wininamne,” nyabuka, nyapdeiamuk touk, winipnamsile. Musa birye Israel ninye ati laka nyabuk.

Yeremia 11:4

Narye nyalin yupu nyapnusina ara, winiryuk yupu kuma. Ara narye minop talak Israel nang sik apu yapu mesir mutuku ulamik talak ikin weik asa ulamik buk narye bobuka yanamse talak arye sik dam akunum yanuka nyapdeiamse. Sik Mesir mutuku ulamik talak ara, pia ikin weik ulamika ati, winipmanto ara, ninye arye besi ning ati, ‘Teleb kipdeipnamapʼ tenen, uku weik dilamlirye pia buppu ulamle sukum besi dongobikiba, abesi deice malye ning palipmalye ning uku arye dipliba besi teleb kililamle touk, Israel ninye ati Mesir mutuku ulamik talak arye sik nong deice ara, ikin ning areamse. Atalak ara, narye sik apu yapu ati, nyapdeiamse ninguk, ‘Anyapsin yupu nirya moubuka kekepnumunce aninguk talibuka diksukumuk unamlume,’ nyapdeiamse. Narye sikti, ‘Aning ara wininamlume, aning ara, pia kum wininamlume,’ nyapdeiamse touk dipkoprob winipmunyopura, narye anggun Israel yala nang ara, na mapu koproba unamlume. Tonda nara, anggun ni koproba Allah unamsine,” nyalin yupu deice arye nyamse.

Mazmur 106:3

Yata nang do nirya, Allah arye, “Aning ara, wininamlume. Aning ara, pia kum wininamlume,” nyapdeiamsuk yupu dobuka, ayupu nyasilye touk, ninye yupu lipsisikuka bokolina deiyok nang nirya ara, pia kanye deibuka, telebuk unamake. Ara, adeiyok-deiyok nang nirya arye, pia diksukumuk unyake. Ara, Allah arye, “Wininamlume,” nyasilye touk wininyake. Tonda, yuk nang ara, telebuk wininyake.

Lukas 1:6

Zakaria ap, el kil Elisabet ap, Allah yupu nyalilye atouk ubuka diksukumuk ulamrikce, Allah arye, “Wininamlulume, aning kum wininamlulume,” nyapdeiamuk yupu, moubuka talyamrikce, dolbalamrik. Ayupu nyalul touk ning nirya atonun, sirya dakuka pil dolamdik, malye una deice tenebuk ning ababye, kum winilamrik ara, Allah arye sikti, kanye deiamuk.

Mazmur 148:14

Allah elcuk im sirya, mutuku sirya unyak ninye ati, tenelule. Tonda, elce awamuk ninye, sik Israel yala ninye ati, mikip deiyok ning arelamukba, sikda mikip weik ninye ulamik. Ara, Allah arye, “Aning ara telebe, aning ara malye,” nyabuka laka lelamuk touk, ayupu moubuka talinyakce, diksukum unyak ninye ati, kanye delilirye, aninye dobuka, ‘Sikda ‘Naʼ tenen, ninye’ tenelirye, el damuk delilule. Ati, aning-aning nirya arye, Allah el siuk erenamake. Nun nirya arye, Allah Yahweh el siuk erenamabe. Sisinanye Raja Daud arye, mutuku deice arye nyabuk.

Mazmur 119:128

Aning ati ara, na kam unamne talak nirya ara, ance, “Winibuka wininamlume. Aning ara, pia kum wininamlulume. Teleb winina ara, ani,” nyabuka, nyalisiminye touk, na babye, ‘Ayupu ara, pia dipkoprob teleb yupu,’ tenenirye, aninguk talibuka wininamne. Tonda, malye winin ning ayala-yala nirya ap, malye wininyak ninye arye, malye wininyaka ap ati, ‘Na like,’ tenebuka unamne.

Mazmur 119:6

Se, na ni Allah, ance nyapdeiamsulum yupu nirya, moubuka talepnirye, teleb winin ninguk, winipnin banamne. Winibuka unyopura, nara ilil una ap, alye dakna ap ara, pia kum unamne.

Yeremia 12:16

Winipnyopura, sik dana-dana tam unyak yuk-yuk yala nang, yuk mutuku unyak nang nirya, sik talima noutam arye, moubuka tenebikirye, na mapu koproba, sik Israel nang, sikce nati, si erenikirye, teleb kibuka unyakce, dipkoprob bisik balamak touk, bikikcopura, ayuk-yuk yala nang babye, teleb kipdeipnamne. Ara, na mapu koproba, ‘Naʼ tenen nang arye, ‘Nun ni koproba Allah Yahweh, el si deice aryuk wininamabe,’ nyalin yupu arye nyapne touk, sik yuk yala nang arye, aning bikikirye, talibuka winibikopura, narye anang babye melinamne. Tonda, sik yuk-yuk yala nang arye, minop talak, na mapu koproba, Israel nang ati, ‘Nun ni koproba isa Bahal, el si deice aryuk nyalin yupu nyanamlume. Eluk talibuka unamlume,’ nyabuka petelamik touk, sikce isa Bahal batakikirye, na siuk erepnikcopura, ayuk yala nang babye melinamnarya. Ara, sik nirya arye, “Allah Yahweh anda, kam una deiyoknye pia ulyame,” nyapnamniake. Nyapnikirye, na siuk erepnikcopura, narye sik anang babye, na mapu Israel nang kan-kan uk, boyanuka tabakdeipniba, neika unamake.

Keluaran 23:25

Aning ara, si kum erenamlum bukni, anggun Israel ninye arye, nara anggun ni Allah Yahweh atibuk, si erebuka ulamnumunyopura, narye anggunti, kanye deibuka, teleb ulinamsine. Ara, anggun dinamlum ning nirya ap, mek dinamlum ning nirya ap ara, telebuk deipsiniba, amutuku noutam unamlum talak nirya ara, narye kalikuka melipsiniba, uk disilye ning aning-aning nirya, anggun dam kum unamsile.

Ulangan 11:27

Arup narye anggunti, ‘Teleb winin ninguk wipnamlume,’ nyapmasin ning ara, ani. Anggunce el si erelamlum Allah Yahweh arye, anggunti, ‘Aning wininamlume. Aning ara, pia kum wininamlume,’ nyapdeiamsuk yupu dobuka, anggunti arup arye akunum nyapmasin yupu uk, aninguk moubuka talipmunyopura, Allah arye anggunti, pia teleb kilinamsile.

Ulangan 28:13

Anggun ni koproba Allah arye, ninye deiyok nang kipdeipsiliba, ninye yala yuk-yuk ulamikce noutam, talibuka unamlume. Ati, anggunda yuk nang ati, sik amu tam talye melin nang kum unamlume. Anggunda, weik deiyok talibuka unamlulume. Yuk mutuku nang ara, anggun amu tamuk unamake. Ati ara, anggun adiparyuk Allah arye, “Aning ara, wininamlume. Aning ara, pia kum wininamlume,” nyapdeipsuk ning, arup arye nyapsin yupu ara, moubuka talimunce, pia dobolbanauk winimunyopura, anggun unamlum mutuku nirya ara, pia telebuk unamlume. Ton kisikdakuka, yukak kum binamlume.

1 Tawarikh 14:2

Aning nirya winibuka deice arye, atalak ara, el Daud bikukce, ‘E, aning nirya ara, Allah el si Yahweh arye, teleb kipdeipmanile. Ara, Allah arye, ‘Anye ‘Naʼ tenen, nang talibuka, weik deiyoknye Raja unamle,’ tenelamnuk touk, ‘Ninye deiyoknye kibuka erepdeipnuke,’ tenebuk. Tonda, Allah arye, ‘Israel yala nang nirya ara, pia telebuk unamakʼ tenen, ninye deiyoknye Raja keipnukce, na talenun ning nirya, pia teleb kibuka delinulule. Awinibuk nirya ara, na dem ati kume. Deiyok ara, Allah Yahweh el ‘Naʼ tenen nang, sik Israel yala nang melina ati winipnuke,’ tenebukce, Daud birye bikuk.

Ulangan 26:18

Nyaplumba, Allah akunum kekepmasilce, anggun Israel ninye ati, arup arye nyapmasile. “Ura ‘Naʼ tenen, ninye ara, Israel ninye uka. Na mapu atonun unamak,” nyapmasile. Aning ara, min arye, Allah el si Yahweh, akunum anggunak nyapdeiamsuk touk, tuba tonap nyapmasile. Tonda, elce, “Aning ara, wininamlulume. Aning ara, ton pia kum wininamlulume,” nyapdeiamsuk yupu nirya, ‘Kekebuka wininamlum’ tenen, nyapmasile.