Ulangan 27:10 - Eipomek

¹⁰ Ati ara, arup anggun ni koproba Allah, el si Yahweh elce, ‘Aning ara, wininamlume. Aning ara, pia kum wininamlume. Tonda, teleb winina ara ani,’ nyapdeipsuk yupu nirya, narye boyanuka, anggun dam akunum nyapmasin yupu ara, moubuka kekepmunce, diba tenepmunyopura, anyapdeipsuk touk, ubuka wininamlume.

Ulangan 27:10 Referans Kwoze

Matius 5:48

Aning ati ara, anggun ni Allah im deice ululnye birye, ninye nirya ati, bico tenebuka kanye talima talibuka melilul touk, anggun babye ninye nirya ati, kanye talima arenamsile. Anggunda, Allah el mapu ululuma anya arye, anggun ni Allah malye una kum, diparyuk diksukumuk ulye touk, anggun babye atonun, malye winina kum, diparyuk diksukumuk wininamlulume. Yesus arye nyabuk.

Mika 6:8

Kume, aning-aning nirya, akunum winiptibya babye, adeice arye, pia kum lyepnamsile. Bukni, nun ni Allah Yahweh arye, nun tukwak mutuku unyap ninye nirya ati tenesilya ara, ‘Na kanye delina ati ara, wininamake,’ tenesulule. Utenesilya ati, el minop talak akunum laka nyapdeiamsuk ara, ani. Yata ninye do nirya, pia diksukum teleb kibuka unyakce, yuk ninye nirya ati, bico tenelakirye, kanye talima, amu tam nimalyap asa kanye deibuka, telebuk unamake. Wininyakce, Allah el amu tamuk unyakce, kanye talima erena kumce, Allah ap, kanye talima dukdongobuka, neika ubicopura, Allah arye aninye ati, kanye delinamle. Aning ara, ‘Wininamake,’ tenesulule.

Ulangan 11:1

Musa birye, sik Israel nang nirya ati, nyabuk. “Anggun ni koproba Allah Yahweh atibuk, anggunce kanye pia delinamlume. Tonda, Allah elce, ‘Aning wininamlume. Aning ara, pia kum wininamlume,’ nyamuk yupu ap, ‘Teleb winina ara, ani. Aninguk wininamlume,’ nyamuk yupu ap, ayupu nirya nyapdeiamsuka nirya ara, ayupu uk, tuba-tuba moubuka talipmunce, wininamlume. Pia kum batakanamlume.

Mika 4:5

Yuk mutuku-mutuku nirya daunyak ninye nirya arye, ‘Aning ara, nun ni yapu’ tenen, isa el siuk yuk-yuk si nyabuka, erenyake. Bukni, nun Israel ninye uk ara, diksukumuk teleb ubuka ubirye, na ni Allah Yahweh, el siuk erebirye, el amu tamuk pia aunamabe. Nun ni koproba Allah ati, pia kum batakanamabe.

Imamat 19:2

Ance Israel ninye nirya ati, nyapnamlyame. “Anggunda, malye winin ning nirya batakuka, diksukumuk winimunce, telebuk unamlulume. Nara, Yahweh unune. Nara, anggun ni Allah, malye ning ara, tonok babye kum uniliba, diksukumuk winibuka, teleb unun touk, anggun babye, malye ning nirya batakuka, diksukumuk winibuka, teleb unamlulume.

Ulangan 27:9

Musa ap, Israel sik deiyok talibuka ulamik nang ap arye, ayupu akunum nyabikopura, ayupu ton dukdongobuka nyabik. Ayupu nyabik nang ara, Musa ap, tonda Allah el si erena ati, domik aik noutam pil don nang, sik Lewi yala nang bukni, imam pil talibuka dolamik nang ap arye, sik Israel yala nang nirya ati, binuka nyabik. “Nun kayapu, anggunce, yupu nyana kumce, moubuka kekemunce, moubuka kel biknamlume. Arup arye, anggunce si erelulum Allah, el si Yahweh, el mapu koproba atonun, akunum kipdeipmasila ati, anggun yupu ton kum nyanamlume.

Ulangan 27:11

Arup aryuk Musa birye, sik Israel nang ati, ayupu nyabuk.

Ulangan 26:17

Arup sum arye anggunce nyapmalumba, na akunum kekepmasine. Ara anggunce, ‘Kume, nun ni koproba Allah ara, elcuk Yahweh ulule. Yuk talye ning nirya ati, si kum erenamabe. Allah arye nyapdeipsuk yupu nirya ara, wenena yupu ap, ‘Aning ara, wininamlulume. Aning ara, kum wininamlulume,’ nyabuka, elce nyapsuk ning nirya ara, moubuka kekepnamabe. Allah arye, ‘Abisikuk binamlume, nati dobolbanamnululume,’ nyapdeiamsuk touk, wininamabe.” Anggunce ayupu nyapmalumba kekepmasine.

Ulangan 26:18

Nyaplumba, Allah akunum kekepmasilce, anggun Israel ninye ati, arup arye nyapmasile. “Ura ‘Naʼ tenen, ninye ara, Israel ninye uka. Na mapu atonun unamak,” nyapmasile. Aning ara, min arye, Allah el si Yahweh, akunum anggunak nyapdeiamsuk touk, tuba tonap nyapmasile. Tonda, elce, “Aning ara, wininamlulume. Aning ara, ton pia kum wininamlulume,” nyapdeiamsuk yupu nirya, ‘Kekebuka wininamlum’ tenen, nyapmasile.