Ulangan 26:17 - Eipomek

¹⁷ Arup sum arye anggunce nyapmalumba, na akunum kekepmasine. Ara anggunce, ‘Kume, nun ni koproba Allah ara, elcuk Yahweh ulule. Yuk talye ning nirya ati, si kum erenamabe. Allah arye nyapdeipsuk yupu nirya ara, wenena yupu ap, ‘Aning ara, wininamlulume. Aning ara, kum wininamlulume,’ nyabuka, elce nyapsuk ning nirya ara, moubuka kekepnamabe. Allah arye, ‘Abisikuk binamlume, nati dobolbanamnululume,’ nyapdeiamsuk touk, wininamabe.” Anggunce ayupu nyapmalumba kekepmasine.

Ulangan 26:17 Referans Kwoze

Yesaya 12:2

Dipkoprob, Allah elda nun Lyena Deiyoknye ulule. Nunce el tibuk, diba tenenamabe. Nunda, ilil kum unamsil bukni, wini talak ara, ‘Allah elcuk, nunti melibuka lyedopnamsilʼ tenen, diba tenenamabe. Aning ara, talye ati kum bukni, deiyok ara, nun ni koproba Allah, el si Yahweh, elce nun mikip kilisulule. Ati ara, mot sena deice nunda el siuk erenamabe. Tonda, “Nun Lyena Deiyoknye bira, Allah eluk ulule,” nyabuka, Allah el si erenamlulume.

Keluaran 24:7

Winibukopura, Allah arye ‘Wininamlulume, aning ara kum wininamlulume’ nyapdeibukba sekamuk buku doprobukce, Israel nang kekenak nyabukba kekebikce, sikce tamubuka nyabik. “Telebe, Allah el si Yahweh arye nyapsuk ning nirya ara, aninguk wininamabe. El yupu talibuka dobolbanambe,” nyabik.

2 Korintus 8:5

Nunce sik Makedonia tam ninye ati, ‘Winibuka wininamake,’ tenelamubu touk kum winibik. Kume. Sik Makedonia ninye arye, minop talak sik bidamang kanye talima ap, sik badamnye nong ap bobuka, ‘Allah el amutamuk unamap’ tenen, Allah ati arebik. Sikce nong Allah ati arebik, aminyan talak ara nunti arepsik. Aning nirya winibuka winibik ning ara, Allah arye, ‘Amutuku nang arye wininamake,’ tenyamuk touk akunum winibik.

Roma 6:13

Tonda, anggun kanye tenen ning ap, anggun taruk ap, anggun nong nirya ap arye, malye winin ning aning-aning nirya talibuka kum wininamlume. Aning kum bukni, ‘Allah aryuk talinamsile’ tenen, anggun kanye talima ap, nong nirya ap, Allah ati arenamlulume. Ara anggunce anggun bidamang ati, ‘Kume, nunda akunum diamupa ani, Allah arye kam bukeipsukce, winiryuk ninye atonun kibuka, akunum teleb kipdeipsuke’ tenen, anggun nong nirya ara, Allah ati arepmunyeba, Allah arye anggunti melipsilya deice arye, diksukumuk wininamlume.

Rasul 27:23

Ara na ni Allah, elce talipnukba, el si erebuka, el pil dobuka unun Allah ara, elcuk el im deice melina pil donanye malaikat, ambusum lukunyan arye dopkwetepmanuba, na dam yanuka tikmoe.

Yesaya 44:5

Teleb ubuka ukiba eibikirye, aninye nirya tonok-tonok, ‘Nara Allah el tamnye unune’ tenen, na siuk nyanamake. Ton nang ara, ‘Yakub el yalanye unune,’ tenebikcopura, sik aninye ara Yakub ance deipminba, dadeipdanin banamak ninye tam uk kilyanganamake. Winibicopura, anang sikce seknamaka ara, ‘Nara, Allah Yahweh el tamnye unune,’ tenebuka, sik taruk deice arye sekenamake. Tonda sikce sik bidamang ati, ‘Nara Allah el tamnye, el tenenanye unune,’ tenen, Israel si nyanamake.

Yosua 22:5

Tonda, Allah Yahweh, el pil dolamuknye, Musa birye anggun nirya ati, mambul weik yupu deice arye, “Aning ara, pia luba kum kinalulume. Aning ara wininamlume. Aning ara, pia kum wininamlume,” nyabuka, sekeiamsuk yupu dem, aning nirya moubuka talipmunce, kalikuka unamlume. Allah Yahweh arye, nyabuka sekeiamsuk yupu ara, ani. “Anggun ni koproba Allah, na Yahweh atibuk tuba tenemunce, anggun kanye ap, talima ap nirya ara, dobuka, na Allah deice uk deipnamnulume. Tonda narye, ‘Wininamlume, aning ton, pia kum wininamlume,’ nyapdeiamsise yupu, moubuka talipmunce, unamlume. Na Allah arye, nyapdeiamsise yupu, dem moubuka talipmunce, dukdongobuka unamlume. Tonda, anggun diksukumuk teleb umunce, narye nyapdeiamse ninguk, moubuka talipmunce, tonda natibuk talipmunce, anggun kanye ap, anggun kanye tenen ning ap arye, pia teleb ubuka unamlume. Narye tenenun touk, aninguk moubuka wininamlume.” Allah Yahweh arye, nyapsuke.

Ulangan 30:16

Aning ara, talye ati kum nyapsine. Deiyok ara, ani. Arup ara, narye anggunti, ‘Teleb ning ara, ani. Aninguk wininamlulume,’ nyabuka, akunum nyapdeipsine. Ara, anggun ni koproba, Allah el si Yahweh ati, kanye deibuka, el nyabuk ninguk dukdongobuka, wininamlulume. Tonda, Allah arye, ‘Aning ara wininamlulume. Aning ara, kum wininamlulume,’ nyapdeipsuk ning ara, “Allah mem buku deice sekeibuk ninguk, talibuka winimunce, dukdongobuka amu tam unamlulume,” nyapsine. Ara, winipmunya deice arye, anggun tuba unamlume. Tonda, anggunce deipmunyeba dadeipdanin binamlum nang nirya ara, weik upnin banamle. Aning akunum winipmunyopura, talye kum nyapsine. Anggun ni koproba Allah arye, ‘Arepsiniba binamlum,’ nyapdeiamsuk mutuku bana ati, wini talak akunum dam kipmala ati, amutuku binuka umunyopura, anggun ni koproba Allah arye, teleb ning arenamsila deice arye, telebuk unamlume.

Ulangan 15:5

Ati ara, arup na Musa birye, anggun dam, ‘Aning-aning wininamlume,’ nyapdeipsin yupu ara, moubuka bikmunce, aninguk talibuka winimunyopura, tonda anggun ni koproba Allah Yahweh, el tibuk, talipmunyopura, elce anggunti, pia teleb kipdeipsiliba, pia teleb kibuka unamlume.

Ulangan 13:18

Ara Allah Yahweh arye, anggunti, “Aning ara, wininamlume. Aning ara, pia kum wininamlume,” nyapdeiamsuk yupu uk, arup babye, narye anggun dam lak nyapsine. Ati, anggunce aninguk moubuka talipmunce, Allah el tenelye touk winimunyopura, anggun yala nang tabakuka, weik tonun upnin banamsile.” Musa birye nyabuk.

Keluaran 20:19

“Ancuk nun dam nyapsiminba, kekepnamabe. Bukni, Allah arye nun dam sisikna ara kume. Elce nyapsilyopura, ‘Nun dibipyak’ tenen, ilil unamsile,” nyabik.

Zakaria 13:9

Winipnamne talak ara, ayupa winilye ara, tonok bokuka seper tiga, ‘Naʼ tenen deipnamne ning ara, lyebuka deipnamne. Sik alyebuka deipnamne nang ara, pia teleb lek nang kipdeipnamne. Winipnamne bukni, winina ati ara, ‘Teleb unamak do, kum do?’ tenen, ikin ning arye, anang nirya piripdenamne. Winipmanto ara, dekna weik kat ning, el si perak dobuka, ‘Malye ning kum uplyeba, teleb ninguk lak upnamleʼ tenen, uku dongobikceba, uku diplyopura, pia teleb ninguk lak ulule. Aning atonun, dekna weik kat ning emas ati, ‘Malye ning kum uplyeba, teleb ninguk tuba unamleʼ tenen, uku arye pirilelamle touk, sik anang babye, ‘Teleb wininamak do, kum do?’ tenen, piripdenamne. Winipnyeba, sik anang nirya arye, nati “Nun ni Allah melipsilyame,” nyabuka moronamake. Winikceura, narye sikti, tamubuka nyanamne. Narye sikti, tamubuka nyanamne yupu ara, ani. “Anggunda, na mapu koproba ululume,” nyapnamne. Winibuka nyapnyeba, sikce tamubuka nati, nyapnamniake. “An Allah Yahweh ara, nun ni Allah ulyama ati, an siuk erenamkiabe,” nyabuka, natibuk si erebuka kinamniake.

Keluaran 15:2

Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe.

Keluaran 19:8

Nyabukura, Israel ninye nirya arye, “Telebe nun Ni Allah, el si Yahweh arye nyapmasil yupu nirya ara, aninguk wininamabe,” nyabikba, Musa birye tamubuka anyabik ning ati, Yahweh el dam nyalbiyuk.

Mazmur 48:14

Tonda, anyasik noutam donyaka dana-dana tam, antanap dongobuka, domik cang keil poka ara, dipdelulume. Tonda, sik Yerusalem mutuku nang arye, ‘Nun mal olan nang arye, yanuka opsikcak’ tenen, domik keil aik nirya ara, moubuka eipmunce, dilbinamlulume. Aning nirya winipnamluma deiyok ara, ani. Ara, anggun asukum ululum nang arye, aminyan talak unamak mapu, anggunce deiplumba, deipdanin banamak mapu ati, aning nirya, laka nyanamlume.

Ulangan 27:10

Ati ara, arup anggun ni koproba Allah, el si Yahweh elce, ‘Aning ara, wininamlume. Aning ara, pia kum wininamlume. Tonda, teleb winina ara ani,’ nyapdeipsuk yupu nirya, narye boyanuka, anggun dam akunum nyapmasin yupu ara, moubuka kekepmunce, diba tenepmunyopura, anyapdeipsuk touk, ubuka wininamlume.

Ulangan 29:12

Ura, anggun nirya awekmaluma deiyok ara, talye ati kume. Deiyok ara, anggun ni koproba Allah Yahweh arye, anggunti nyalin yupu nyapdeiamsuk ning ara, talibuka wininamluma atia. Ati abulubuka wekmalum nang nirya ati, nyalin yupu deice arye sekdongopsila ati, Allah elce, “Aning-aning nirya talibuka winimunce, apil dobuka unamlume,” nyapdeipmasil touk, anggunce, “Dipkoprob, aninguk talibuka wininamabe,” nyapdeipmunce, Allah Yahweh, elce nyalin yupu nyapsilye touk, ubuka wininamlume.

Yosua 24:22

Nyabikba, Yosua birye tamubuka, sikti, nyabuk. “Anggun bidamang aryuk, akunum laka nyapmalumce, wipmalume. Tonda, anggun nirya arye, akunum kekepmalume. Anggunce, ‘Nunda Allah el si Yahweh, el siuk akunum erenamabe,’ nyapmalumba, elce kekebuka dinmasila ati, anggunce Allah el siuk erenamlume,” nyabuk. Nyabukopura, aninye arye, “Diba nun bidamang, ‘Wininamabe,’ akunum nyapmap deice arye nyapdeipmap ara, Allah akunum kekepmasile,” nyabik.