Anggun awipdeipnamlum nang arye, ‘Aning ara dipkoprob malye ninge. Aning ara, dipkoprob teleb ning,’ tenebikirye, yupu bokeipnamsiyake. Anggunce, ‘Anye na kwit ulula anya arye, dauaplye,’ kum tenenamake. Sik kanye aryuk, ‘Aning ara, winipnamabe,’ tenebikce touk, ubuka yupu lipsisikuka kum bokeipnamsiyake. Tonda, ‘Tonye bitibuk, ikin ning kum deipnuyabeʼ tenen, elce uang areplyopura, elce malye winibuk ning, lubuka, namin kum kipnamake. Tonda, malye ning arebice ning ara, kum dolonamnyake. Deiyok ara, amalye ning arepmacopura, kel weik bikilirye, dipkoprob teleb winin ninguk wililamlanye babye, tamubuka malye ninguk wininamle. Malye ning ati, kum winilule. Teleb winin ning ati, wenelula anya arye, asing kum nang atonun unyake. Adeice arye, malye pil donyake. Dipkoprop ning ton, kum pil donyake. Ati ara, malye ning dopropmanto nang ara, kum wipdeipnamlume.
Ulangan 24:17 - Eipomek17 Nyabukce, ayupu ton nyabuk. “Anggun mutuku noutamak unyak bukni, tikilyangan nang ap, kwaknamne nang ap ati, diksukumuk wininamlulume. Tonda, youwak kilapu arye, sik patan ning kum upliba, yuk nang ning, tia dopropnamake ati, anggun ning tia arepmunce, ‘Dipkoprop tamubuka, na ning arepnamnil’ tenen, youwak kilapu, sik nong deice ongolamak baju dolona meme. Ato ninye nirya ati ara, ‘Meme, sik talye nang ati, dauplye, sik ning ubula doproptibya babye, yata nang arye nyapsiting do?’ tenen, sik ning ubula dolona meme. Anang nirya ati ara, diksukum ubuka yupu lipsisikuka peterenamlulume. Gade chapit la |
Ulangan 24:17
39 Referans Kwoze
Tonda, yatanye do nirya, ninye asik nang ap, tonda mitik winiryuk nenmakce nang ap, yuwak kilapu ap, sik ning ubula doproplinye ap, yupu lipsisikuka bokolin talak ara, deiyok kum upmalibuk, malye yupu nyaplyopura, aning ara, “Teleb kum unamle,” nyabuka, sun yupu nyapnamlume. Ara, anye biti ara, “Allah arye ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyanamlume.
Anggun mutuku noutam arye, bona utotoa kum ninye ati, yupu bokolin nang dam bobikiba, ‘Yupu lilsisikna deiyok nang arye, teleb ubuka yupu lipsisiknamakʼ tenen, sikce abona utotoa kum ninye ati, dipkoprob yupu dem, nyapmunce melinamlume. ‘Kume, sikda bona utotoa kum ninye ati, dauplule,’ kum tenenamlulume.
Aning wininyaka deice arye, malye winin ninguk, kel kibikirye talinyake. Ara, ninye deiyok nang kibikirye, talibuka unyak ninye ap, malye winibikiba yupu lipsisikuka, bokolina deiyok nang ap, sik nirya arye, “Nun mapu anggun malye winipmalum nang ara, nunti, ‘Ninye opdeipsululume,’ nyabuka arin yo bok arepsilyame,” nyanyakba, Israel ninye arye, arenyakba, adeiyok nang arye dolonyake. Tonda ninye deiyok talibuka, unyak nang arye, ‘Nun tenepmap ning ara, adiparyuk doproptibye’ tenen, mikip arye nyanyakba, sik tenepmakce touk, dalubuka dolonyake. Winibikca deice arye, pia tuba-tuba malye yupu nyalanyake. Diksukum ubuka, ninye yupu kum bokolinyake.
Sik amalye wininyak nang ara, telebuk kibuka ukirye, sik nong pou weik unyake. Sik urasin babye, pia teleb unyake. Bukni, sik anang arye, malye wininyak ning ara, pia tenipmanto kum ning wininyakce, pia kum batakmanto unyake. Pia malye-malye aupto babye, sik tenepce touk, talye luparabuka wininyake. Sik anang arye, talye kwaknamne mapu ati ara, ‘Aminyan ara, amapu teleb kibuka unamakʼ tenen, diksukum kibuka, teleb winin ning arye kum melinyake. Amapu ati, yupu bokikce talak ara, diksukum kibuka kum nyanyake. Tonda, aning atonun, talye kankan uk unyak nang, aning-aning kum talenyak nang ati, yu nang arye malye winipnuce talak ara, anang arye, ‘Anggun bataksue, akankan nang ati, malye kilina kume,’ nyabuka, yupu kum sekenyake. ‘Sikda, dauplye,’ tenebikirye, yupu nyabuka, kum melinyake.
Ura anggun Yerusalem mutuku talibuka ululum ninye deiyok nang nirya ara, na yupu bisimunce, ubula don nang ap neika ululume. Anggunce ninye ati, yupu lipsisikuka bokolin talak ara, malye wininyak diparyuk, ‘Nun patasilye ning ara arepsitingopura, sik tenenyak touk, yupu lipsisikuka bokeipnuyabe,’ tenemunce, winilulume. Utenemunya deice arye, youwak kilapu ap, kwaknamne mapu kilmapu ap ati, sik ikin uplya babye, diksukum yupu kum lipsisikuka bokolilulume. Anggunda, ‘Nun patasilye touk arepsitinge’ tenen, winimunya ati nyapsine.
Anggunce ton tam nanguk, teleb ubuka, ton tam nang ati, malye kina kume. Angguncuk pia teleb ninguk wininamlume. Aning nirya ara, weik nang babye, mitik nang babye, atonunuk, amalye winipmakce touk, yupu lipsisikuka bokolinamlume. Mitik nang yuk, weik nang yuk, tenebuka, sik yupu yuk-yuk kum bokolinamlume. Tonda, yata nang do nirya ara, anggunce sikti, ilil kum tenenalume. Ara, ayupu lipsisikuka bokolinamluma nirya ara, yupu nyanamlum bukni, dipkoprob weik deiyoknye bira, Allah elce arenamsil ninguk nyabuka yupu bokolinamlume. Bukni, amalye upmakce ning ati, yupu lipsisikuka peterepmunce, ‘Se, yata nyaptibye do?’ tenepmunce, pia kum winipmanto ning winipmunyopura, angguncuk na dam asilyanamnulume. Aning na dam boyamunyopura, narye aning lipsisikuka, teleb kiplinamne, nyapsise.
Anggunce ninye asik nang ati, ikin ning, sik nong deice kum deipnamlume. Aning ara, talye ati kum nyapsine. Deiyok ara, anggun babye Mesir mutuku ulalum talak ara, amutuku nang arye, ikin pil dilamsikba dolamlumba, pia mambul kanye bomlum ning ara, anggun akunum bikamlume. Minop talak ikin ulamlum ning ara, luba kina meme. Ati ara, anggun mutuku noutam unamak ninye asik nang ati, teleb ubuka melinamlume. Ikin ning, sik nong deice delina meme.
Sikda, malye unmace nang weika arye wininmakiba, epmunyopura, ‘E, nun babye amalye wininmak touk, nun babye malye unamabe,’ tenebuka, kum wininamlume. Malye nang arye malye wininmace touk, anggun ton melibuka kum wininamlume. Tonda, sik anang arye, malye winipmace, yupu lipsisikuka delina deiyok nang arye, ‘Amalye winipmace nang wenepnamakʼ tenen, bulupmace dam bimunce, ninye weik arye, “Kume, anang ara, malye kum winipmangu,” nyabuka, talye yupu nyabica babye, anggunda na mapu koproba anya arye, aning atouk melibuka kum nyanamlume. ‘Tilila yupu deice arye, teleb ning ara, malye kipdeipmuyakʼ tenen, ati nyapsine. Malye ning ara, ‘Aning ara, malye diamuk,’ nyanamlume. Teleb ning ara, ‘Aning ara, telebuk ulule,’ nyabuka, diksukum yupu dem nyanamlume. Minina yupu nyana meme.
Kankan ninye wibuk bukni, anggunce, ‘Kankan ninye mambul kume,’ tenepmatum deice arye, anang sik nong deice malye yupu nyaplulume. Ton tenipdelulume. Sik bona weik talin ninye arye, anggun nong deice ikin ning deipsikirye, anggun ning dobuka malye ulisinyak ara, kum tenipmalum do? Tonda, sik sisin ninye bona weik talin ninye arye, ‘Anggun talipdongobuka, sik ning dalubuka dopropnamap’ tenen, yupu bokolina deiyok nang dam bobasinyak ara kum tenipmalum do?
Tonda, yin talin nang arye asipdeyik. “Nunda, yata wiripnamap do?” nyabuka asipdeyik. Asipdeyikura, Yohanes arye nyabuk. “Anggun deiyok nang arye, anggun pil dona ati, dekna ning arepsikce ninguk, kanye deibuka dolonamlulume. Yuk talye urdem ninye sik ning ton dalubuka doldona meme. Tonda, sik malye kum upmakibuk, telila yupu deice ‘Anggun malye winipmalume,’ nyabuka luluna meme.” Yohanes arye ayin talin nang ati nyabuk.
Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine. Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.
“Tonda, anggunce, sik yuwak kilapu ap, kwaknamne mapu ap, tonda ninye asik nang, yuk mutuku nang bukni, anggun dam yanuka ulamice nang ap, tonda, anggun kwitcapu aning-aning nirya kum daliba, imun kanye bobuka, ‘Seʼ tenen, unmalinye ap, anang nirya ati ara, ikin ning dobuka, sik nong deice pia kum delinamlume. Anang nirya ati, bico tenebuka, teleb kibuka melinamlume. Tonda, anggun ap, neika ululum nang nirya ara, yu kanye tenibuka, anggun kanye talima noutam arye, ‘Sikti malye ning winipnamabe,’ tenebuka, pia kum wininamlume,” nyapdeiamsise. Allah arye nyabuk. Allah arye, nun Israel yala nang nirya ati, nyapdeiamsuke.
Tonda, anggun Israel mutuku noutam ululum nang arye, amalye winin ning ton winilulume. Ara, ton nang arye, ‘Bona talibuka unamapʼ tenebikirye, yuk nang ati, ‘Anggun adiparyuk, yo bok weik arepsilyame. Kum arepsiminyeura, ikin ning weik, anggun nong deice delinamsiabe,ʼ nyabuka, ubula aryuk uang weik dolonyake. Tonda, sik anang ara, talye yupu deice nyaplobikirye, yuk nang talinyak ning ubula dolonyake. Sikce, bona pia kum talinyak nang, talye kankan unyak nang ati, melipting bukni, aning kumce, anggun deice ikin ning deibuka, daralongona deice arye, yo bok ton ubula dolonyake. Tonda, karin mutuku arye yanuka, ninye asik nang ara, sik Israel mutuku noutam unyak nang ati, ‘Anggun adiparyuk, yo bok weik arepsululume. Kum arepsumunyeura, ikin ning weik, sik nong deice deilinamsiabe,ʼ nyabuka, ubula aryuk uang weik dolonyake. Sik anang ara, ninye asik nanguk unyaka ati, yata yupu ton nyaptingba, sik ning tamubuka dopropting do? Kume, aning ara pia kum winipmanto.
Tonda, anggun Yerusalem mutuku ululum nang ara, anggun ni yapu ap, anggun nin yapu ap ati, ‘Telebe,’ nyabuka, sik yupu kum kekemunce, sikti kum kanye delilulume. Tonda, ninye asik nang, yuk karin mutuku arye yanuka, anggun mutuku noutam, sik ap neika ululum nang ati, ikin ning weik, sik nong deice delilulumba, ‘Seʼ tenen, imun kanye bobuka unyake. Tonda youwak kilapu ap, sik ni yapu dibikba kwaknamne mapu yanuka unyak mapu ap ara, anggun dam unyak buk, talye yupu nyaplopmunce, kum melilulume. Batakalulume.
Na Allah Yahweh arye, anggun nirya ati nyapsine. Anggunce, yuk nang sik dam ara, diksukum teleb piluk donamlume. Ara, narye, ‘Aning wininamlum. Aning ara, pia kum wininamlume,’ nyapdeipsise yupu atouk winibuka, pia diksukumuk wininamlume. Tonda, ninye yupu bokolin talak ara, dipkoprob sik winilamak touk bikmunce, teleb kibuka yupu nyapmunce, wenepnamlume. Talye-talye winina kume. Mikip unyak nang arye, anggun amu tamuk unyak nang ati, ikin ning, sik nong deice deibikcopura, anggun deiyok nang arye, aikin unyak nang ati, lobuka melipmunce, lyelinamlume. ‘Teleb mutuku noutamuk uptibyeʼ tenen, yuk mutuku arye, anggun mutuku yanuka, tikilyangan nang ap, tonda winiryuk nenmace nang ap, yuwak kilapu ati, ‘Sik ning alubuka doproptibyeʼ tenen, pia kum moronamlume. Tonda, ‘Anang ati, yanipdongobuka optibyeʼ tenen, sik dam ikin ning kum delinamlume. Tonda, yata nang do nirya, sikce deiyok kum ati, malye kum winipmace buk, anggun deiyok nang arye, anang ati, talye lukparabuka, kum opnamlume. Sikda, malye kum wininyak nang ati, amutuku noutam arye, ninye kum onamlume.
Na Allah arye nyasunune. Yata ninye do nirya, sikda teleb kibuka ubikirye, tilila yupu nyana kum diparyuk, dipkoprob yupu uk nyabuka, diksukumuk unamak ninye ara, amutuku noutamak unamtinge. Tonda, sikce, ‘Aning-aning nirya kum talinyakce, talye bona utotoa talina kum ninye ati, ‘Dauplye’ tenen, yaniltanyaka deice arye, nun dem aryuk amutuku ning nirya dobuka taleptibye,’ kum tenenyak ninye ara, amutuku noutamak unamtinge. Tonda, ninye yupu lipsisikuka bokolina talak ara, ‘Malye winipmakibuk, yo bok weik arepsitingba, aninye kum wenepnuyabe,’ kum tenenyak ninye ara, amutuku unamtinge. Tonda, yuk nang arye, ‘Ninye optibye,’ tenena ap, ‘Yuk malye ning winiptibye’ tenen, ning ap, yuk malye nang arye malye-malye wininyak ning ati, ‘Kum eipnuyabe,’ tenebikirye, sik bidamnye arye asing kulongonyak ninye ara, amutuku noutam unamtinge.
Anggunda, yata deiyok ati, anggunce na mapu koproba ati ara, sik nong deice, kanye ikin ning deiplumce, ikin kililulum do? Tonda, anggunce na mapu koproba bukni, talye kankan nang, sik ning alubuka dololulumce, anggun urasin ara, tuku deice buta noutamuk singnilongolulum do? Nara Allah Yahweh, aning-aning nirya, eitam erebuka, mikip weiknye unune. Tonda, narye sik im deice unamak yin talin malaikat nirya ara, sik deiyoknye unune. Narye anggunti, ayupu akunum nyapsin ati, anggun nirya ara, dipkoprob wenepnamsine!”
Tonok mutuku noutam balamlumce, dipdebuka, mikip weik deiyoknye birye, sik talye bona utotoa kum nang nirya ati, sik nong deice ikin weik ning deiplirye, sik anang ati dopropnyopura, aning ara anggunce, ‘Seʼ tenen, Yata upmal do?’ tenen, kanye teniltona kume. Deiyok ara ani. Amalye ulamlye ninye deiyoknye, el deice tam ton, ninye deiyoknye yuknye ton aulule. Atonun, anye el deice tam babye, yuk deiyok nang ton daunyake. Sik nirya arye, amalye ulamlanye ulul ning nirya ara, elikirye akunum bikinyak bukni, sik nirya ara, ‘Yo dauplye,’ tenebikirye, luba kinyake. Ati, sik nirya ara malyeuk unyake.
Ayupu ara, talye ati kum nyapkine. Deiyok ara ani. Ara, ninye deiyok nang, Raja arye yu weik mek weik dibikcopura, sik pil dona deiyok ning nirya luba kinamake. Winibicopura, bona utotoa talina kum ninye do, mikip pia kum ninye do, ikin kanye bobuka unyak ninye do, ninye arye, ‘Aninye ara mambul kum ninye anya arye dauplye’ tenen, yanildongonyak ninye ap, sik amu tam unyak ninye nirya ati, teleb ubuka kum meliptinge. Tonda, yu mek dibice deice arye, sik kanye wangapliba, ninye yupu teleb ubuka kum bokipnamake. Sik amu tam unyak ninye ati, yaniltana uk ubikirye, aninye nirya ati malye ulinamake. Ati, Raja nang ara, kanye wangalamak mek weik arye dina kume, nyapkine.
Bona utotoa kum ninye arye, sik ning tia doprobikirye, ‘Dipkoprop tamubuka arepnamne’ tenen, sik ‘Na’ tenen ning, anggunti arebice ning ara, lukunyan noutam deibuka, mandipna dona meme. Inipnulye talak ara, ‘Naʼ tenen ning, tia ati arepmasice ara, adiparyuk tamubuka, arenamlulume. Winipmanto ning ara, el baju do, el selimut do, tia ati dopropmamunya ani, inipnulye talak akunum uplyopura, el ‘Naʼ tenen ning, tamubuka arepnamlulume. Arepmunba, ongoplirye, alukunyan noutamak, kanye namin asa arye maplirye, kanye deipnamle. Kanye deipkilirye, anti, ‘Telebe,’ nyaplirye, Allah ati, “Na ni Allah, se, na kwit ati melinamlyame,” nyabuka moropnamkile. Tonda, anggun ni koproba Allah arye, anggun winipmamunye ning eipsilirye, ‘Sik winipmaka ara, diksukum wininmake,’ tenebuka, kanye deipnamsile. Musa birye nyabuk.
Tonda, anyapnusin ning ton, kum wininamlulume. Anggun kwit capu nang arye, anggun yo bok tuba tamubuka doprobikcopura, gandum do, jagung duk do, sik teikin keil dolona meme. Ara, ‘Sik mambul ning talipniba, sik tuba tamubuka, dobikce yo bok, dipkoprob tamubuka arepnamniak’ tenen, sik teikin keil, deice tam delinyak keil babye, amu tam delinyak keil babye, kum dopropnamlulume. Ato ning dopropmunyopura, ninye arye, yuk mutuku nang ubula dobuka, tapu koubuka talinyaka atonun anya arye, winina meme. Anggun kwit capu nang, sik teikin keil dopropmunyopura, ‘Mambul upliba, pil kum dobikirye, din kum dibicopura, dibicak’ tenen atia. Ati, yuk nang, sik weik mambul ning ara, dolona meme.
Tonda, tuba tenepnamlulume. Mesir mutuku ulalum talak ara, ikin pil weik dilamsikce, anggun nong deice delilamsikba, talye pil don nang ulalum talak ara, anggun ni koproba Allah arye lyepdomsuke. Ati ara, arup nyapmasin yupu nirya, moubuka kekebuka, diksukumuk wininamlulume.” Musa birye nyabuk. Nyabukce, ayupu ton nyabuk.
Ara, minop talak dodarapce dipdongobuka, winipnin yangalamika ani, wini talak babye, ance an kayapu koproba ap, an yala nang koproba ap, yuk nang ap ati, nyalamlume. “Anda patapmakila ati, na yo bok ara, tia talak ati arepsine. Bukni, ‘Anggunce na yo bok tamubuka, kum arepnamnulumʼ tenen, anggun talilulum teleb ning, baju do, yuk dengna weik ning do, aning dobuka, arepnumunyeba, narye aning nirya talinmanya ani, aminyan talak, anggunce namin ning yo bok tamubuka arepnumunyopura, anggunce arenamnulum dengna weik ning ara, tamubuka arepnasinarya!” nyalamlume. Nyalamluma deice arye, an tam nang, sik nong deice ara, ikin weik ning delilamlume. Tonda, anang arye, winilamikba, an yo bok kum tamubuka arepman kumto upkikopura, ance sik anang baju ap, yuk bona ap, adiparyuk ubula alubuka dololamlume. Winilamluma deice arye, pia malye ulamlume.
Sik ni yapu akunum dibikirye, batakiceba kwaknamnanye, el bidamnye weilul keledai basam ati, sik malye unyak nang arye, alubuka doprobikirye, libuka bobanyake. Tonda, amalye nang aryuk, youwak kil ati, “Anda nunti, “Yo bok arepnutume,” nyabuka, moropsulumba, arebupu ning ara, tamubuka min kum arepmasila ati, amoropmasulum ning enamsilam talak ara, nunce arepkupu ning pununa ati, nunce an sapi basam dobuka, nun aik dam deipnamabe,” nyabuka, alubuka doprobikirye, delilbanyake. Aning wininyaka ara, pia malye wininyake.
Yata nang do nirya, na Allah Yahweh ati, na si erena ati, kam ning obukamunce, uku dongonamlume. Bukni, yata nang do nirya, anggunce talye ning ati, “Na ni koproba,” nyabuka, atalye ning ati, si erena ati, ining ning obuka areplirye, aning ati si ereplinye bira, adiparyuk opnamlulume. Ara, na Allah Yahweh ati, batakanululnye ulula ati, adiparyuk, elti, opnamlulume.