Ulangan 24:15 - Eipomek

¹⁵ Ato nang ati ara, pil apia donmaca ani, keting kum upmalye talak aniryuk, sik pil dona ati arin yo bok do, yuk arin ning do, adiparyuk arepnamlulume. ‘Yuk sum aryuk arepnamne,’ tenena meme. Anang ara, pia bona utotoa kum ninye ati, kum arepmunyopura, sik patan ning doproptingce, kum diptinge. Abona utotoa kum nang arye, ‘Anye birye arepniliba, dekuka diptinye’ tenen, pil donmalya ati, anggunce anye biti, kum arepmunyopura, anang arye Allah el si Yahweh ati, ‘Se, sik akunum arepmasitinge. Yata ati do?’ nyabuka, Allah morobikce deice arye, Allah arye anggun Israel ninye ati, ‘Malye wininmake,’ tenepnamsile.” Musa birye nyabuk.

Ulangan 24:15 Referans Kwoze

Imamat 19:13

“Ton ning ara, anggun yala nang babye, anggun damak unyak nang babye ati, tilila yupu nyana deice arye, minina yupu nyana ap, tenepce arye nyana ap, sik ning ubula dolona ap ara, pia meme. Tonda sikce, ‘Anggun melina ati, pil dobibiba, dekna ning dopropnamabe’ tenen, pil melibuka dosinyak ninye nirya ara, malye ulina kume. Sik pil akunum dobikcopura, asum aryuk, sik dekna ning arepnamlulume. Anggun pil donmasica ati, dekna dolon ning ara, mapmamunya ani, beren tam arye arena meme. Pil donmace sumuk, arenamlulume.

Yakobus 5:4

Anggun moubuka tenepnululume. Anggunce, “Nun wa wipdeipsululume,” nyalilamlum ati, anggun wa wilamsiak bukni, wa wina ati dekna yo bok ara kum arilamlumce, anggun aikuk moubuka deililamluma deice arye, si sekelisulule. Anggun wa wibuka kouamik ning libuka, sirya dakuka yangalamik nang arye, malye nyabuka engelamik yupu ara, Allah nun Weik Deiyoknye damak biyukbuk kekebuke. Allah ara, aning-aning nirya talina deiyoknye ululce, moupbuka disilirya anye arye, anggun ara bicoe. Ikin weik upnamsile.

Yeremia 22:13

Raja Yoahas, el weit koproba Raja Yoyakim, el babye malye weik winilamuk. Ati, anye bira bicoe. Ikin ning, el dam yanamlarya! Yoyakim el aik tonap, aik tabakuka dobuk talak ara, weik aik, pia urasin teleb ubuka dobuk bukni, el dana-dana tam ulamik nang ati, sik pil dona ati, arena kumce, anang ati pia mikip arye, ikin pil dilamukba, pil dolamik. Yoyakim el alip aik, tabakuka domuk ning babye, elce apil dolamik nang, sik dengna ara, kum arebuk. Elce sikti, ‘Pil talye dopnululume!’ nyabuka, ikin ning, sik deice deiamukba, el pil ara, talyeuk pil dolamika ati, Yoyakim birye, winilamuka deice arye, pia malye winibuk.

Ulangan 15:9

Tonda, anggunce, ‘Aning ara, kum arepnamabe,’ tenebuka batakmunce, tamubuka el anye biti, tilila yupu deice arye, ‘Kume, tia dopropmince ning, dekelina ati, keting tamun tekbarye ara, nunce tia ati arepmapye ning, dekelina bataknamap keting tamun, akunum dam kipmala ati, anggun patapmasil ning ara, kum arepnamkiyabe,’ kum nyapnamlume. Atonun, malye kanye teninmalum ning ara, batakmunyeba, adiparyuk anggun kanye pum tam kum wekenamsile. Anggunce, anggun kayapu bona utotoa kum nang ati, dobuka kum arepmamunyeba, el ikin upliba, anye birye anggun ni Allah ati, ‘Se, na patanmanuba, na kwit biti moropmanu ning ara, kum arepmanile,’ nyabuka, Allah moroplyopura, anggun dam malye kilinamsile.

Ayub 35:9

Tukwak mutuku unyak nang ara, yuk yu nang arye, ikin weik sik deice delinyakba, dolonyak nang ara, sik nirya arye, ‘Seʼ tenen, malye nyabuka ngalukuka, ‘Melipsilyame,’ nyabuka, sik kwit capu ati moronyake. Ara, yuk yu nang ara, sik mikip weik deice arye, yuk talye bona utotoa talina kum daunyak nang ati, ikin dobuka, sik deice deibikiba, malye kanye bobikcopura, sik kwit capu ati, ‘Se, anggunda nun dam yanuka melipsululume,’ nyabuka moronyake.

Ayub 34:28

Sik anang arye, ninye deiyok kibuka talinyaka mikip deice arye, Allah nyasulul yupu yaninyaka ati, sik amu tam talye bona utotoa talina kum nang ati, ikin weik, sik nong deice deibikceba, ‘Se, aning-aning winiptibyeʼ tenen, ikin kanye bobikirye, engenyak ning ara, Allah akunum kekelula ati, sik deiyok nang ati wenelule. Imun kanye bobuka engenyak nang ara, Allah kekeplirye, sik dam yanuka, lobuka lyelolule.

Markus 10:19

Tonda, Yesus arye abona weik talinanye biti ayupu nyabuk. “Allah arye, ‘Winamlulume, aning ton kum wininamlulume,’ nyapdeibukura, Musa arye mem yupu sekeiamuk ara, an akunum kel kiplume. Ayupu ara, ani. ‘Ninye ona ap, yuk kilapu talye ubula yona ap, yuk nang ning ubula dolona ap, yuk nang ati minina yupu nyana ap, talye tilila yupu nyana ap, tenebuka, arye talye yupu nyaplobuka dolona ap, anirya ara, pia meme. Tonda anggun ni yapu ap, anggun nin yapu ap, si erebuka melinamlume.’ Ayupu nirya ara, Musa sekiamuk yupu noutamak aupmal ati, nyapmakine,” Yesus arye nyabuk.

Matius 20:8

Anang nirya arye pil donmeka ani, akunum inibukopura, adeiyoknye birye el melinanye biti nyabuk. “Apil donmak nang ara, sik pil kunumna ati dekna ning arepnulam ning ara, aminyan tabakuka pil donmak nang arye deiyok koubuka, arepnin banmaminya ani, beren tam talak arye deiyok koupmangu nang binuka sirya dakdongobuka areplyame. Ati anang yukulbilyame,” nyabuk.

Yesaya 5:7

Adomon yupu nyapmasina deiyok ara ani. Anggur wa deiyoknye bira, Allah aning-aning nirya talibuka ulye deiyoknye, Allah Yahweh ulule. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. El anggur wa ara, Israel yala ninye unyake. Tonda, teleb wa tuku ati kanye delilul ning ara, sik Yehuda yala ninye unyake. Israel ninye ap, Yehuda yala ninye ap, ‘Teleb kibuka unyak do?’ tenen, dililamuk bukni, aninye nirya ara, olanauk ulamik. ‘Diksukumuk unyak do?’ tenen, dililamuk bukni, ton nang arye, ton tam nang ati, ikin ning weik, sik nong deice delilamikce, malye nyabuka, ngaluklamikba, kekelamuk. Ati, Allah arye aninye nirya ati, malye kanye bolamuk.

Mazmur 86:4

Anda, aning-aning nirya talimince, deice tam erebuka, mikip weiknye deiyoknye ulyama ati, diba tenekinirye, na kanye talima nirya ara, an deiceuk delikunune. Ati ara, ance melipniminyeba, pin-pin kanye deibuka, telebuk unamne. Nara, an amu tam unun ati, ance, ‘Winipnamlame,’ nyapniminye yupu dem, talibuka unune.

Mazmur 25:1

Raja Daud birye, Mazmur yupu sekukopura, Allah ati amot nyabuk. Daud birye nyabuk, “Se, na ni Allah Yahweh, na talima nirya ara, an deiceuk delikunune. Na ikin unulul ning ap, na patanulul ning ati, narye antibuk morokunune.

Mazmur 24:4

Allah el dam binmanto ninye ara, nyapnune. Sikda, sik taruk arye, malye winin ning talibuka, pia kum wininyake. Tonda, sik talima pum tam, malye ning tonok ning babye kum ululba, pia diksukumuk wininyake. Tonda, talye ning ap, isa ap ati, ‘Nun ni ani,’ nyabuka, talye tilila ning ati, si kum erenyake. Tonda, aninye arye, tilila yupu deice arye, ‘Dib yupu nyanyabe,’ nyabuka, tenepce arye, tilila yupu pia kum nyanyake. Ato unyak ninye ara, pia diksukumuk wininyaka ati ara, Allah el dam yatinge.

Ayub 31:38

Tonda, na taleamse mutuku ap, tuku ap ati, teleb ubuka wa kum wilamse bukni, awa tuku ati, malye updeiamtinyeura, malye datuba, koulamak ning ayala-yala nirya teleb ubuka betekturye, kum paptuopura, Allah arye wenepnutue. Allah arye wenepnutuba, na wa winyak nirya, malye uptue.

1 Timotius 5:18

Weik arye si erebuka anang erelinamlyame nyapmakina deiyok ara, ani. Allah yupu deice sekeiyamsik yupu ani. ‘Beras atonun ning lana ati, sapi basam arye beras deice yanibuka balamle talak ara, ‘El ton bulubuka diplyak’ tenen, el si bam bol tapu koulongona kume. El babye, ton bulubuka dina telebe.’ (Ulangan 25:4) Tonda aning atonun. ‘Yata pil don nang do nirya, pil dobicopura, sik pil domikca deice arye dekna ning, adiparyuk arenamlulume.’ (Lukas 10:7) Ayupu nirya ara, aubuka ati ara, anggunce anggun ning bokuka, sik peterena deiyok nang ap, sik Allah yupu aik deiyok nang ati, melibuka arenamlulume.

Imamat 25:35

Anggun unamlum mutuku noutam ara, anggun yala nang koproba noutam ap, anggun weite-du nang arye, tonoknye ton, aning-aning nirya kum uplyeba, talye bona talina kumce ulirye, kankanye uplyopura, el nong mikip kum upmanto upliba, ikin ning weik, el deice yalyopura, anggunce elti, adiparyuk melibuka arenamlume. Akan-kan nye bira, anggun ninye asik nang do, anggun mutuku noutam tikilyangan nang do, melibuka winilamluma atonun, anggunce aning-aning nirya, weik tonun talye arepmunyeba, anggun aik pum tam nang ap neika unmunce, pia teleb kibuka melipmunce, kanye doubuka, neikauk unamlume.

Ayub 31:13

Tonda, na amu tam pil melibuka don nang ap, na amu tam pil don kilapu ap, sik nirya arye nati, “Ance nun dam malye winipmasilame,” nyapniting bukni, aning kekebuka, kum lipsisiktinyopura, ara diba na malye uptinye.

Ayub 7:2

Yo bok deice arye dekuka deiamikiba, ikin piluk talye dolamikce nang arye, mitang ubikiba, ‘Se, beren tam talak yakcopura, apil bataktibirye, tamubuka aikuk bitibyeʼ tenen, weik tonun patalamle touk unyabe. Tonda, ikin pil donyak nang arye, sik deiyok nang ati, ‘Nun pil akunum dopmaba ati, nun yo bok bokuka delilamak nang arye, nun yo bok areptingba, teleb uptibye. ‘Nun pil donmap ning ara, arepnusiakca!’ tenelamak touk unyabe.

Maleaki 3:5

Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine. Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.