Ulangan 24:12 - Eipomek

¹² Tonda, el ‘Naʼ tenen, ning arepkilinye birye, bona utotoa kum uplyopura, el baju ap, el selimut ap, ato ning ara, dolona meme. El tenen ning, weik arye, ‘Seʼ tenepnamla ati ara, tia talak ati, tonok lukunyan babye, ato ning dobuka pililongona meme. Ara, ‘El ning dopropmanya ani, ambusumuk tamubuka arepnamane,’ tenena meme. El ‘Naʼ tenen ning, dolona pia meme.

Ulangan 24:12 Referans Kwoze

Ulangan 24:17

Nyabukce, ayupu ton nyabuk. “Anggun mutuku noutamak unyak bukni, tikilyangan nang ap, kwaknamne nang ap ati, diksukumuk wininamlulume. Tonda, youwak kilapu arye, sik patan ning kum upliba, yuk nang ning, tia dopropnamake ati, anggun ning tia arepmunce, ‘Dipkoprop tamubuka, na ning arepnamnil’ tenen, youwak kilapu, sik nong deice ongolamak baju dolona meme. Ato ninye nirya ati ara, ‘Meme, sik talye nang ati, dauplye, sik ning ubula doproptibya babye, yata nang arye nyapsiting do?’ tenen, sik ning ubula dolona meme. Anang nirya ati ara, diksukum ubuka yupu lipsisikuka peterenamlulume.

Ayub 24:9

Tonda, pia malye winin nang arye, sik ni ap, sik nin ap, pia kum ulamdiceba, kwaknamne mapu ara, alubuka dolonyake. Ara, yuk kilapu arye, kwaknamne mapu ati, moum yung tuba arebice talak ara, mikip arye amapu dolonyake. Tonda, aning-aning kum talenyak nang, talye bona utotoa kum nang arye, yo bok pataplyopura, malye nang dam binuka, “Tia ati arepsutume,” nyabuka morobikiba, arebikcopura, dolonyake. Bukni, aminyan talak, sik bona utotoa kum nang, ayo bok tamubuka arepmanto kum ubikcopura, sik malye winin nang arye, sik mitik mapu ara, alubuka dolonyake. Ara, sik ning doprobicopura, abona utotoa talina kum nang arye deibikce mi ara, aning pununa ati, alubuka dolonyake.

Ayub 24:3

Sik ni yapu akunum dibikirye, batakiceba kwaknamnanye, el bidamnye weilul keledai basam ati, sik malye unyak nang arye, alubuka doprobikirye, libuka bobanyake. Tonda, amalye nang aryuk, youwak kil ati, “Anda nunti, “Yo bok arepnutume,” nyabuka, moropsulumba, arebupu ning ara, tamubuka min kum arepmasila ati, amoropmasulum ning enamsilam talak ara, nunce arepkupu ning pununa ati, nunce an sapi basam dobuka, nun aik dam deipnamabe,” nyabuka, alubuka doprobikirye, delilbanyake. Aning wininyaka ara, pia malye wininyake.

Ayub 22:6

Ara, minop talak dodarapce dipdongobuka, winipnin yangalamika ani, wini talak babye, ance an kayapu koproba ap, an yala nang koproba ap, yuk nang ap ati, nyalamlume. “Anda patapmakila ati, na yo bok ara, tia talak ati arepsine. Bukni, ‘Anggunce na yo bok tamubuka, kum arepnamnulumʼ tenen, anggun talilulum teleb ning, baju do, yuk dengna weik ning do, aning dobuka, arepnumunyeba, narye aning nirya talinmanya ani, aminyan talak, anggunce namin ning yo bok tamubuka arepnumunyopura, anggunce arenamnulum dengna weik ning ara, tamubuka arepnasinarya!” nyalamlume. Nyalamluma deice arye, an tam nang, sik nong deice ara, ikin weik ning delilamlume. Tonda, anang arye, winilamikba, an yo bok kum tamubuka arepman kumto upkikopura, ance sik anang baju ap, yuk bona ap, adiparyuk ubula alubuka dololamlume. Winilamluma deice arye, pia malye ulamlume.

Ulangan 24:11

Aning kum bukni, el aik bai tamuk binuka, darapdongobuka tikmamunye buk, el bidamnye arye, el teneplye ning yanuka arepnamsile.

Ulangan 24:13

Bona utotoa kum ninye arye, sik ning tia doprobikirye, ‘Dipkoprop tamubuka arepnamne’ tenen, sik ‘Na’ tenen ning, anggunti arebice ning ara, lukunyan noutam deibuka, mandipna dona meme. Inipnulye talak ara, ‘Naʼ tenen ning, tia ati arepmasice ara, adiparyuk tamubuka, arenamlulume. Winipmanto ning ara, el baju do, el selimut do, tia ati dopropmamunya ani, inipnulye talak akunum uplyopura, el ‘Naʼ tenen ning, tamubuka arepnamlulume. Arepmunba, ongoplirye, alukunyan noutamak, kanye namin asa arye maplirye, kanye deipnamle. Kanye deipkilirye, anti, ‘Telebe,’ nyaplirye, Allah ati, “Na ni Allah, se, na kwit ati melinamlyame,” nyabuka moropnamkile. Tonda, anggun ni koproba Allah arye, anggun winipmamunye ning eipsilirye, ‘Sik winipmaka ara, diksukum wininmake,’ tenebuka, kanye deipnamsile. Musa birye nyabuk.

Ayub 24:7

Sik talye bona utotoa kum nang ara, lukunyan talak, buppu kibuka manyak ning, el si ara selimut, pia kum ati, lukunyan noutam nirya, buppu kibuka kum maptinge. Arukna unmalibuk manyake. Tonda, teleb buppu baju ton kum talinyaka ati, nong bananguk unyake.

Ayub 24:10

Bona talina kumce, talye bona utotoa kum talinyak nang ara, sik baju kum ati, talye nong bananguk banyake. Tonda, sikda din patanmalibuk, din dina kumce, sik adiparyuk, yuk nang arye talenyak gandum wa windam bikirye, gandum duk binuka dakicak arye, gandum duk teikuka bobanyak bukni, aduk babye, sikda kum diptinge.