Ulangan 21:18 - Eipomek

¹⁸ Winipmanto yupu ton nyapnusine. Ura, anggun deiamlum mapu arye, anggun ni yapu ap, anggun nin yapu ap, anggun yupu kum kekepsikcopura, el li, el lin birye, ‘Teleb winipnamleʼ tenen, obuka weneprikibuk, amapu pia mandipna dobikirye, sik yupu kum kekepmanto ubikcopura, ubuka wininamlume.

Ulangan 21:18 Referans Kwoze

Imamat 19:3

Tonda, ninye nirya adiparyuk, anggun nin yapu ap, anggun ni yapu ap ati, ‘Sikda mambule’ tenen, kinamlulume. Winipmunyopura, tekbarye sum nirya ara, pil dona kumce, asum deice na Allah arye nyapdeamsi touk, na siuk erebuka, si erenamnululume. Nara, anggun ni Allah Yahweh unune. Anggun ni Allah, na tonok unune.

Keluaran 20:12

“Anggun ni yapu ap, anggun nin yapu ap, ‘Sikda mambule’ tenen, sik yupu moubuka kekemunya deice arye, teleb winipmunyopura, keting tamun weika arye tonap arepnamsine. Pia teleb mutuku arepsinyopura, kam tuba unamlume,” Allah el si Yahweh arye nyabuk.

Yesaya 1:5

Anggunda yata ati tuba-tuba malye ninguk winipra balulum do? Winipmanto ara, anggun kisok ap, anggun kanye talima pum tam ap ara, pia weik uk akunum disulule. Ati ara, yata deiyok ati, anggunce, ‘Nun wenena ati, ikin weik ning tonap deipsutue’ tenen, se tenemunce, winilulum do?

Yesaya 1:2

Nabi Yesaya birye nyabuk. Se, Allah Yahweh arye, mambul yupu akunum nyapmasila ati, anggun nirya kekenamlulume. Anggun tukwak mutuku umunce, malye winimunye ninye nirya ara, moubuka kekenamlulume. Anggunda pia bicoe. Im deice ululum ninye nirya ara, moubuka kekenamlulume. Se tukwak mutuku ululum ninye nirya ati, Allah el si Yahweh arye nyabuk yupu ara, ani. Se, sik Israel ninye ara, ‘Na tenen ninye unamak’ tenen, wipdeiamsirye, pia melinun bukni, mitik mapu arye, talye-talye yupu nyaltakalamak touk, sikce nati batakaninyake. Sikce nati yaniniyake.

Amsal 30:17

Ninye ton el li koproba ap, el lin ap, sik akunum wisi dadikirye, aik bukdikce talak ara, sik bitinye ati, akutubuka malye yupu nyalulnye bira, aminyan talak Allah arye, anye bira wenebuka oploplirye, bai tam donokliba, Gagak maka ap, Rajawali maka ap arye, anye bira el asing ara, lukuka dipnamdake.

Amsal 29:17

Tonda, anggun mapu nirya ati, teleb ubuka peterepmunya deice arye, teleb ubuka kel bikicopura, aminyan talak telebuk upnin balamikiba, eipmunce, kanye deibuka unamlume. Anggun mapu arye, teleb ninguk talibuka ulamicopura, sik ni yapu ap, sik nin yapu ap arye, ‘Se, nun mapu ara, yatato ninguk unamak do? Malye unamak do, teleb unamak do?’ tenen, ilil kum unamake. Kanye deibuka sik nirya telebuk unamake.

Amsal 20:20

Winipmanto ning ara, lukunyan talak noutamak weisa tangaplirye kuna dakliba, aning nirya kum elilamak touk, yata ninye do nirya, sik nin yapu ap, sik ni yapu ap ati, malye yupu nyabuka suplinye bira, Allah arye aninye ati, minopce wenebuka oplomliba, dipnamake.

Amsal 19:18

Anggun mapu ap, anggun ap neika unamlum talak nirya ara, sik malye ubicopura, moubuka peterebuka wenenamlulume. Wininalum talak ara, wenepmunce, lipsisikuka peterenamlume. Winipmunyopura, anggunce, ‘E, aminyan talak nirya ara, nun mapu teleb ubuka unamak’ tenen, kanye deibuka, dinauk unamlume. Bukni, anyapmasin touk, kum upmunyopura, malye winin ninguk ukirye, dipna damuk bicopura, amapu sik nirya dipnamaka deiyok ara, sik ni yapu deice uk unamle. Winipnamle ning ara, lipsisikuka kum peteryaminya deice arye, talye lukparabuka malye winin ninguk talibuka, unamaka deice arye, dipnamaka ati nyapsine.

Yehezkiel 24:13

Ura, adomon yupu nong ara, nyapnusine. Anggunda, moubuka kekepnululume! Yerusalem mutuku ululum nango, anggunda pia malye un ning weik, malye winilamlum bukni, ‘Anang ara, tonap teleb kipdeipnamne,’ tenepsirye, pi dobuka piripdese bukni, anggunda mandipna kanye bobuka, umunya deice arye, anggun nong deice akunum malye kililamunyeba, narye anggunti kum teleb kipdeipsitinye. ‘Aning kum winipmanto,’ tenepse ati batakse. Bukni, anggun nong deice tuba malye dem usulule. Winisulula ati, sik malye ulamika ati, na weik yu arye, pia weik tonun wenepnamne. Ikin deice arye wenelamnya ani, na yu arye, ‘Winibuka anang wenepnamne,’ tenyamse ning, anggun deice deipnirye, ayu ning akunum kum kipyeura, sirya tam ara, narye tamubuka tonap, teleb kipdeipnamsine.

Yehezkiel 22:7

Tonda, anggun Yerusalem mutuku ululum nang ara, anggun ni yapu ap, anggun nin yapu ap ati, ‘Telebe,’ nyabuka, sik yupu kum kekemunce, sikti kum kanye delilulume. Tonda, ninye asik nang, yuk karin mutuku arye yanuka, anggun mutuku noutam, sik ap neika ululum nang ati, ikin ning weik, sik nong deice delilulumba, ‘Seʼ tenen, imun kanye bobuka unyake. Tonda youwak kilapu ap, sik ni yapu dibikba kwaknamne mapu yanuka unyak mapu ap ara, anggun dam unyak buk, talye yupu nyaplopmunce, kum melilulume. Batakalulume.

Yeremia 31:18

Nyabukce, ayupu ton dukdongobuka nyabuk. Na mapu Israel ninye, sik kanye imun upliba, moronyak ning ara kekenune. Ara, nyanyake. “Se, nun ni Allah, nun malye ulamupuba, ance nun wenena ati, ikin ning weik arelamsulumba, awenen ning nirya dololamupu. Winipmanto ara, nunda ninye arye delina kum ning, bai tam talye kam ulamak ning atonun ulamupu. Bukni, winira ance, ‘Diksukum winin ninguk winilamting’ tenen, peteresilyame. Adeice, ‘Nun malye wininyap ning batakuka, an damuk tamubuka yanamap’ tenen, kintininyabe. Ati ara, nun ni koproba Allah, anda Yahweh, ancuk nun dobuka, an dam boyasilyame,” nyabuka morobik.

Yeremia 5:3

Nyapnukba, na Yeremia birye tamubuka nyapse. “Se na ni Allah Yahweh. Na kele, ance, ninye ati, Yata wirinamak do?’ tenen, patakulul ning ara, anti diba tenebuka, pia dib yupu nyana ap, diksukum winin ning ap, yupu. Anda Allah arye, sik malye wininyak nang akunum wenebuka opsi bukni, sikda, ‘Dipkoprop Allah arye winisululeʼ tenen, ikin kanye bobuka kum unyake. Tonda, sik wenena ati, ikin ning weik deipsulumce, opsulumba, ninye weik akunum diamik bukni, aning babye sikce kel kum bikinyake. Sikda, kama weik tuba abuka deice arye, ance, ‘Aning wininamlume, aning ara pia kum wininamlume,’ nyapsuluma babye, aning kekena kum aryuk, sik malye wininyak ning ara, kum bataknamake. Winipmanto ara, sik urasin ara, kat keil atonun kibuka unyaka ati, ance nyasilyam yupu pia kum kekenyake. Sik malye wininyak ning batakuka, tamubikirye, diksukum winin bisik kum banyake,” nyapse.

Amsal 30:11

Ton ninye ara, sik ni yapu dorapce, deipdanin yangalamik ninye nirya ati, supnin yangalamik. Winipdanin, yangalamik ani, sik nin yapu nirya babye, pia teleb kanye ton bobuka kum ulamik. Winibuka ulamikce, sikti, “Telebe,” nyabuka kanye kum delilamik.

Amsal 28:24

Yatanye do nirya, el li ap, el lin ap, sik ning ubula dopdoplirye, minin yupu deice arye, “Aning ara, na deipnirik nang bitinya, sik ninguk dopropmana anya arye, aning ara malye kum wininune,” tenebuka pililamlanye bira, dipkoprob pia weik malye ulule. El li ap, el lin ap talilamdeice ning, talye lukparabuka ubula dololula anya arye, yuk nang arye, aning-aning talye lukparabuka ulultaklamak nang atonun ulule.

Amsal 22:15

Aning atouk, sik mitik mapu arye, ‘Kume nunda malye un ning atibuk winiptibye,’ tenebuka unyak ning ara, sik talima pum tam palibuka ulule. Bukni, sik ni yapu ap, sik nin yapu ap arye, ‘Kume, nun mapu sik malye ulamak ning batakikirye, teleb asa arye unamak’ tenen, kama deice arye debuka wenepmunce, lipsisikuka peterepmunyopura, amapu, sik malye winilamikce ning batakuka tamubikirye, ila tamubuka teleb winin ninguk talibuka unamake.

Amsal 15:5

Walwal kanye bobuka unyak nang ara, sik ni yapu arye, wenena yupu ap, lipsisikuka peterena yupu ap, nyanyak ning kekebikirye, moubuka kum dobolbanyake. Yaniltana uk unyake. Bukni, ninye ton sik ni yapu do, yuk nang do, sikce nyabice wenena yupu ap, lipsisikuka peterena yupu ap, moubuka kekenyak nang ara, pia weik kel nang unamake.

Amsal 13:24

Tonda, yata ninye do nirya, sik mapu malye winibice talak ara, ‘Kume, nun mapu kum wenenamabe,’ tenebikirye, sik mapu malye wininyak ning aupmalebuk, talye mangkau kilongonyak ninye ara, dipkoprob sik mapu ati, bico kum tenekirye, sikti, kanye kum delinyake. Bukni yata ninye do nirya, sik mapu malye ubice talak ara, adiparyuk, “Aning ara malye unmaluma ati, bataklyame,” nyabikirye, sik mapu ati wenenyak ninye ara, dipkoprob sik mapu ati, bico tenekirye, kanye delinyake. Sik nin yapu ap, sik ni yapu ap arye, sik delinyak mapu ati, wenenyak ninye ara, dipkoprob sik mapu ati, bico tenebuka kanye delinyake.

Amsal 1:8

Na mapu nirya ara, anggun ni yapu arye peteresikce yupu nirya ara, moubuka kekepmunce, talinamlulume. Aning atouk, anggun nin yapu arye, nyasinyak yupu nirya babye, moubuka kekepmunce, pia kum batakanamlulume. Ayupu nirya ara, talibuka unamlulume.

2 Samuel 7:14

Winipnyopura, nara, el Li Allah unamne. Elda na mi unamle. Winibuka unanam bukni, el mitik malye ton uplyopura, wenen ning mapu, sik ni yapu ou tapu arye, litukuka wenelamaka atonun wininamne. Ara, narye arepnibuk, yuk nang arye, elti, wenebikirye, el nong deice ikin ning dipnamake. Aning nirya ara, narya.

Ulangan 27:16

Tonda, “Yata nang do nirya, sik wisi nang ati, bico kum tenebikirye, anang ati, si erebuka kina kumce, batakikiba, talye kankan uk ulamikcopura, epdakca menenga ara, Allah arye arepliba, anang sik mapu dam, ikin ning yalyeba, dolonamake. Adeice arye dipnamake,” nyabuka, yupu deice arye, sun yupu nyanamake. Ayupu ara, anggun Israel nang nirya kekepmunyopura, anggunce tamubuka nyanamlum yupu ara, ani. “Yo, dipkoprob nyapmasuluma ati, nunce, “Aninguk winipnamleʼ tenen, ‘Akunuma,’ nyababe,” nyapnamlume.

Ulangan 8:5

Moubuka bita teneipdelulume. Anggun kel anya arye, anggunce moubuka biknamlulume. Nun ni yapu arye sik mapu ati, moubukua peterelamsikibuk, malye winibipyopura, wenelamsiaka atonun, nun ni Allah el si Yahweh arye, moubuka peteresulul bukni, malye winibipyopura, wenesulule. Musa birye nyabuk.

Imamat 21:9

Tonda, Imam nang ton, kilmu deiamikibuk, akilmu ‘Yo bok arepnamniyakʼ tenen, talye daunyak ninye ap, epdakirye, talye-talye yolamiceura, awinilamice deice arye, el nong ati malye kilalule. Tonda, el li koproba, imam kiamlye buk, el kilmu arye, pia malye kililule. Ati ara, imamnye birye deiamlye kilmu, talye-talye yolamiceura, adiparyuk akilmu tongobuka, obikiba diplyeura, uku danamake.

Keluaran 21:17

Yatanye do nirya, el anye birye, el li do, el nin do, sikti, ‘Ikin uptueʼ tenen, malye yupu nyabuka wenelamlinye bira, adiparyuk anye el wenena ati opmunyeba, dipnamlule.

Keluaran 21:15

Yatanye do nirya, el li ap, el nin ap ati, opliba dipdicopura, anye el babye adiparyuk wenebuka obiceba dipnamlule.

Ulangan 21:19

Sik mapu mandipna dobikirye, yupu kum kekepmanto upmakcopura, sik ni ap, sik nin ap, wisi nang arye, ami bobinuka, amutuku nang talibuka ukirye, pia moubuka unyak ninye deiyok nang nirya, sik dam bobanamnyake. Ara, sik asik dana-dana antanap dongobuka domik keil poka noutam bukni, weik bublan kintinip deiamikak, asukumuk ami bobikirye, sik mutuku deiyok nang ati, “Nun ni yapu, anggunce nun mi ninye yupu kum kekelul ati, anggunce wenebuka, teleb kipdeipsululume,” nyabikirye, binuka moronamnyake.

1 Samuel 3:13

“Narye, Eli biti, nyapse ning ara, ani. Ara, Eli el mapu arye, sik pia malye ning winililamnirika deice arye, nati yanibuka, pia malye winililamnirike. Winilamnirik talak ara, sik ni birye, el yupu si bam bol aryuk, ‘Batakdurume,’ nyabuka, mikip asa arye, kum wenelamukce, sikti, yupu kum sekelamukba, sik anang tuba malyeuk winilamdik. Ati ara, Eli el yala ninye nirya ati, wenen ning pia arenamne.

Yeremia 5:23

Bukni, anggun Israel nang ara, mandipna kanye bobuka, malye weik winilulume. Winipmunce, anggun kisok ara, kat keil bulamle atonun nang ululume. Anggun kanye talima noutam ara, ‘Kume, Allah arye nyasilye yupu, pia kum kekenamabe,’ tenelamukce, mandipna kanye weik bolulume. Tonda, na Allah arye, ‘Aning wininamlume. Aning ara, pia kum wininamlume,’ nyalisunun yupu ara, kum kekelulumce, ayupu yanibuka winilulume. Aning winimunya deice arye, pia malye winilulume.