An ni koproba Allah, Yahweh arye, an dam menekuka tiklirye, batakna kum, tuba pia melipkiliba, neika banamlume. Elce anggun nirya ati, pia kum bataknamsile. Tonda, ‘Anggunda daupmalye’ tenen, pia kum namin kipnamsila anya arye, anda, ‘Se, yata wiriptinye do?’ pia tenena meme. Ati ara, anda ilil upkiliba, kanye talima bokoltona meme. Pia teleb kanye bobuka unamlyame,” Musa birye, Yosua biti nyabuk.
Ulangan 20:1 - Eipomek1 Anggun mal olan talak upliba, anggun mal olan nang ap, mal olalbanamlum talak ara, anggun mal olan nang ara, yin talin nang pia weika arye, kuda basam balye deice bukuka, yanganamak ning ap, ninye arye kuda basam tapu kirikikiba, libuka tuku deice balamak ning, el si ara kereta kuda perang, aning deice bukikirye, anggun dam olyangasikiba eipmunce, anggun ilil una meme. Aning kum bukni, minop talak anggun ni koproba Allah Yahweh, Mesir mutuku ninye noutamak arye melibuka boyanamsuk Allah arye, anggunti melinamsile. Ati asum-asum nirya, el tibuk pia diba tenebuka unamlume. Gade chapit la |
Ulangan 20:1
45 Referans Kwoze
Winida na akunum kel bikse. Allah arye, ‘Anye bira, ninye deiyok kiplirye, na mapu koproba, Israel yala nang nirya ara, taliplirye, sik rajanye unamle’ tenen, wipdeiamnuka ati, dipkoprob melipnilirye, pia lyelonamnile. Allah ara, im deice arye, Pia Teleb Lekak arye, na moronun ning kekepnilirye, melinamnile. Allah, el mikip weik, sirik taruk deice melinamnila deice arye, na mal olana ati, yu nang nirya obuka, sirya daknamnarya!
Nyabukce, ayupu ton nyabuk. “Ati ara, anggun kanye talima pum tam ap, nong ap mikip kipdamunce, ilil kum asa aniryuk, ormutuku unyak nang ati, malye kibuka bisinauk wininamlume. Anggun banamlum sukum nirya ara, anggun ni koproba Allah, el si ara Yahweh arye, anggun dam melipsilyopura, neikauk banamlulume. Tonda, Allah pia kum bataknamsile. Ati ara, otam mutuku ninye ati tenepmunce, ilil pia kum unamsile,” Musa birye nyabuk.
Arup talak, “Allah arye akunum teleb kipdeipsuk ning ani,” nyabuka laka nyapmasin yupu ati ara, yata yupu ton tabakuka nyaptibye do? Kume, Allah arye akunum bico tenyamsukce, nunti wipdeipsukce, melibuka pil dosulula anya arye, yatanye ap, yata ikin ning ap arye, malye kipsutu do? Aning nirya ara, malye kum kipsutue.
“Ati, anggunce weik mek koubuka banamlum bukni, mek noutam banumunye talak babye, narye melipnamsina deice arye, amek optua babye, mek koubuka banmamunye talak arye, kum dopnamsile. Tonda, weik uku buk pakanmalyak banamlum bukni, uku buk noutam banmamunye talak babye, narye melipnamsina deice arye, auku weik arye diptua babye, uku noutam bamunyeba, auku arye kum dipnamsile. Atonun ton, yuk asilen ning nirya anggun dam yangasilya babye, malye kum kipnamsine.
Allah arye nyapdeibukba, nabi Yesaya birye sekeipsuk. ‘Yuk mutuku nang arye olyanamsiyak talak, nun melibuka lyepnamsiyak’ tenen, Mesir mutuku nang dam morolbanyak nang ara, pia bicoe. Sikce utenenyake. ‘Se, Mesir mutuku yin talin nang ara, yuk ninye olana ati kuda basam deice bukikirye, minopce bikbik abuka bana ati, mikip dobuka banyaka anya arye, sikda weik mambule. Tonda, se, Mesir mutuku yin talin nang pia weik tonun unyake. Sik kuda tuku deice libuka banyak ning ara weik mambule,’ tenenyake. Bukni, winibuka tenenyak nang ara, Allah Yahweh aning-aning nirya talibuka deice tam ulirye, Pia Diksukumuk ulirye Israel ninye melibuka kalikilinye biti, ‘Nun ton melipsilyame,’ nyabuka kum moroninyake. Winibuka unyak ara, walwal arye wininyake, nyapsine. Allah arye nyabuk.
Narye akunum nyapkise touk, pia teninamlyame. Ara, an adiparyuk, dib tenebuka, ilil pia kum aryuk, mikip arye unamlyame. Ilil una meme. Pia kanye lamapdongobuka unamlyame. Tonda, ikin upkiliba, ‘Se, na tuba kum winiptinye’ tenen, kanye mitang upkiliba, kanye talima lik una kume. Anggun binamlum mutuku nirya ara, nara Yahweh, anggun ni Allah, na si Yahweh arye melipsinirye, pia kalikinamsina ati, anggun ilil una ap, lik tenena ap, meme. Allah arye, Yosua biti nyabuk.
Allah Yahweh arye, ninye tukwak ninye nirya ati nyasulule. Anggunce, ngalukuka malye yupu nyamunye ning nirya ara, tunim aplulume. Nara, Allah Yahweh ununa ati, na siuk kel kipnululume. Yata ninye do, mutuku-mutuku nirya, daunyak ninye nirya arye, na siuk kel biknumunce, na siuk erenamnulume. Tonda, mutuku-mutuku nirya ululum ninye arye, na siuk erebuka, si erenamnululume.
Tukwak mutuku-mutuku nirya unyak ninye arye, mal olanmakirye, weik lelim nyapliba, ngaluklamak touk, winibuka ngalukunyake. Ton tam ninye arye, yuk tam ninye ati, obuka sirya dakikiba, kum danalule. Allah arye tenepsilye sum, akunum kiplyopura, el yupu weik arye nyapliba, tukwak mutuku nirya, atu atonun ubuka kum danamle.
Wininmarik talak ara, Yudea mutuku ninye deiyoknye Asa birye,el si erelamuk Allah, Yahweh ati morobukce nyabuk. “Se, na ni koproba Allah Yahweh, ancuk ninye mikip kum nang ati melisilyame. Nun babye, mikip kum nang unyap bukni, otam mikip weik nang dam binuka opdanuyap ati, ancuk nunti Melipsimince, mikip arepnusilam tenen, moropkine. Ati wini talak ara, nun melipsilyame. Ara talye ati kum nyapne. Nunce an tonok, ‘Allah Yahweh aryuk melipsutueʼ tenen, unyaba ati moropkine. Tonda, nun ni koproba Allah Yahweh, wini talak ara, nunce ‘Ancuk melipsutumʼ tenen, dinauk ukinyaba ati, nun ni koproba, an si deice arye yanuka, otam yin talen nang, mikip weik nang, sik yupa nukmanto kum arye kintinibuka, otikmakce, kama ap, yuk ninye olan ning nirya ap bobuka tikmake. Ati, Allah Yahweh, anda nun ni koproba ulyama ati, ‘Naio, otikmak nang arye, obuka malye kipsicakʼ tenen, tonda an tenen nang ap, an ap ati, ‘Malye kipsitingce, obuka sirya kum daksitingʼ tenen ati, moropkine. Tonda, ‘Ance mikip arepsiminyeba, nunce anang obuka sirya daktibyeʼ tenen, moropkine na nie.” Raja Asa birye nyabuka morobuk.
Se, nun ni koproba Allah, an siuk erekinyabe. Ati, anda nun ni koproba Allah, nun mikip mitang nang unyaba ati, sikda yin nang yupa weik yanganmakce, ‘Israel nang obuka kum daneipnamab tenen, yanganamaka adano. Ati, ance wenebuka, ikin ning sik nong deice deipnalame. Nunda, nun mikip deice arye yata winiptibye do? Aning ara, nun walwal upsile. Bukni, ‘Allah arye yata wiripsilya deice arye lyepnusil do?’ tenen, antibuk dinmabe. Nun melina ati, yanuka moropkiyabe. Raja Yosafat birye, sik Israel yala nang bulubuka tikmekak arye tikukce, Allah ati yanuka morobuk.
Yosua birye, sik aninye nirya ati, Allah Yahweh arye nyapdeipmok touk, akunum winibuk. Winibukopura, Yosua birye el mal olan nang, sik ning kuda yan amu tam parang ya arye, milmil moubuka, akuda basam asukum batakukce, sik ninye olbana ati kereta ara, ninye buknarye olbalamik ning nirya ara, uku dongobuka, sirya dakuk.
Musa birye, Israel ninye ati nyabuk. “Allah arye, ‘Teleb mutuku arepnamsine,’ nyapdeiamuk touk, melipsilyopura, amutuku binuka unamlulume. Amutuku bimunyopura, amutuku noutamak unyak nang, anggun mal olan nang nirya eipnamlume. Bukni, Allah el melipsilya deice arye, aninye ati, obuka sirya dakmunce, aninye ati yakmunyeba, yuk mutuku bindopnamake. Aninye ara, yala yuk-yuk, tekbarye unyake. Anggun Israel ninye, anggun mikip ara, mitik tonune. Atekbarye yala nang ara, sik mikip weik nang unyake. Atekbarye yala nang, sik si ara ani. Het yala nang ap, Girgasi yala nang ap, Amori yala nang ap, Kanaan yala nang ap, Feris yala nang ap, Hewi yala nang ap, Yebus yala nang ap nirya ara, anggun Israel nang arye binuka opmunce, amutuku noutamak arye, yaknamlulume.”
Ati anggunda moubuka tenipnamlulume. Anggun pil dolamlum talak noutam nirya ara, anggun ni koproba Allah Yahweh arye, teleb kibuka kintinyamsukce, anggun patan ning yala-yala nirya yamubuka arelamsuke. Tonda, Allah elce, amek kum mutuku, kata weik mutuku noutam, bisik balamlum talak ap, banamlum talak ap ara, elcuk kalikuka melilamsuk touk, tuba melinamsile. Tonda, keting tamun yupa empat puluh (40) tahun noutam ara, pia kata mutuku balamlum talak ara, anggunce el si erelamlum Allah Yahweh, elce erebuka ulamukce, anggun patalamsuk ning nirya ara, apatalamsuk touk, ubuka arelamsuke. Talye patalansukba, kum bataklamsuke. Allah arye Musa biti, nyapdeiamukba, Musa birye, sik Israel nang ati nyabuk.
Yakub birye deibukba, dadeipdanin yanganyak ninye ara, Allah tuba kanye delilula anya arye, sikti malye kipdeipliba, imun kanye bon ning kum dopropnamake. Aning atonun, Israel ninye ara, Allah tuba kanye delilula anya arye, sik nong deice, ikin ning kum deipnamle. Sikda ikin kum unamake. Ati, Allah el si Yahweh ara, Israel ninye sikti, pia ululce melilule. Tonda Allah ara, sik ninye deiyoknye, sik noutamak ulamuk touk, tuba ulirye melilula ati, sik pin-pin asa arye, kanye deibuka, yupu mikip deice arye, el si erenyake.
Ati, Gerar mutuku, asukum unmalamakuk, mitik anun ton tuba unamalyame. Narye melipkinya deice arye, telebuk unalame. Deiyok ara, narye an ni koproba Abraham biti, ‘Dipkoprop winipnamkine,’ nyabuka, nyalin yupu nyapdeipse touk, dipkoprob winipnamne. Ara, an ap, ance deipminyeba, dadeipdanin balamica ani, dortalak nirya unamak ninye ati, mutuku-mutuku nirya arepnamsine.
Elce nyanamsile. “Amapo, anggun nirya kekeplulume! Anggun Israel yala ninye ara, arup arye nyapmasin yupu ara, moubuka kekeplulume. Wini talak anggun mal olana ati, anggun mal olan nang dam bimunyopura, ilil una ap, kanye talimauk dina ap, ‘Se, yata wiriptibye do?’ tenen, walwal kanye bobuka, sirim talina ap, pia kum wininamlulume.
Wini talak aniryuk, Daud birye, ayupu kekebukce, Saul biti nyabuk. “Anye bira, ‘Sik kanye mitang upnamle do?’ tenen, ayupu nyapmasile. Malye kibuka, ayupu nyanmasil ning ati ara, nunda Pilistin nang ati, ilil una kume. Nara, an amu tam talye pil donanye ununa ati ara, ance teleb ur nyapniminba, anye biti, narye binuka, el opnamane,” nyabuk.
Yahasiel birye nyabuk, “Na deiyoknye Raja Yosafat ap, na kayapu nang, anggun Yehuda tam ululum nang ap, Yerusalem weik asik noutam ululum nang ap, anggun nirya ati nyapsine. Wini talak ara, nun ni koproba Allah Yahweh arye nyapsile. Ara anggun ona ati yin talin nang yupa pia weik arye yanganmacak, eipmunyakarye ilil una ap, kanye bokoltona ap, una kume. Deiyok ara, ayanganmak nang ona ati ara, anggun mikip deice aryuk, kum opnamalume. Allah aryuk, anang opnamale.
Aning ati ara, na mal olan nang arye, na opmanto winipnamniak talak ara, nara imun kanye bobuka, kunukna atonun, mutuku binamne talak babye, na ton ilil kum unamnile. ‘Se, yata malye ning, na nong deice upniliba, ikin unamne do?’ tenen, pia kum tenenamne. Ara, talye ati kume. Deiyok ara, Allah ance na dam yanuka umince, nati tuba melinilyame. Na dam pia neika ulyame. Tonda, winipmanto ara, domba basam weina deiyok nang arye, sik domba ati, ‘Nun domba basam, yuk tam, opmanto mutuku bicak’ tenen, kama bobikirye, sik domba basam nong deice yakuka teleb bisik noutam kilamak touk, Allah ance nati, kalikuka melinilyamce, peterenilyame. Winibuka wininilyama ati ara, nara ilil asa una kumce, teleb kanye deibuka unune.
Ati ara, narye nyapsise. Anggunda ilil una meme. Nara anggun dam unirye, pia melinamsine. Nara, anggun ni koproba Allah ununa ati, anggun kanye teniltona kum unamlume, Imun kanye bobuka kum unamlume. Nara anggun ni Allah unirye melinamsine. Na aryuk mikip arenamsine. Tonda nara, malye ning tonok ning babye ton kum ununye birye, na sirik taruk deice arye, pia talinamsine. Winibuka melipsinya deice arye, aning-aning nirya malye kum kipnamsine.
Winipmanto ara, anggun mutuku koproba noutamak bukni, yuk mutuku nang arye, anggun Israel ninye ati, ‘Anang obisibirye, ikin ning sik nong deice delinamabe,’ tenepsicopura, anang olbinumunye talak ara, cang pong-pong ana, el si terompet deice arye, weik arye nyapmunyopura, nara anggun ni koproba Allah Yahweh arye, kekepsinirye, anggun mal olan nang dam arye, melibuka lyenamsine.
Aning ati, anggunce mutuku-mutuku nirya unyak ninye ati, eipmunce ilil upsiliba, yok sirim talina kume. Anggun ni koproba Allah Yahweh ara, anggun noutamak aulirye mikip weik ap, weik mambulnye ulula anya arye, anggun ilil una meme. Allah elda, weik mambulnye. Elda aning-aning nirya talibuka ululnye biti, ninye tukwak nang nirya arye, elti, ilil ulule.
Winibuka nyanyak bukni, wini talak ara, tuba tamubuka teneipdelulume. Anggun ni Allah, el si Yahweh arye, el menekuka balirye, weik uku buk dilamle touk ulirye, anggun dinmamunyak, Allah arye aninye nirya ati, opnin baliba, sik nirya alye weik dakdakiba, obuka sirya daklirye, anang nirya bobuka, anggun Israel ninye, amu tam deipnamle. Allah arye wininamle talak noutamak ara, anggunce Anakim mutuku ninye ati, minopce malye kibuka onamlulume. Anakim ninye malye kibuka opmunyopura, anang kan-kan bukni, ton nang ara, Kanaan mutuku noutamak arye yaknamlume. Ton nang ara, obuka sirya daknamlulume. Anirya ara, Allah arye min yuma talak nyapdeiamsuk touk winipnamle. Musa birye, Israel ninye ati nyabuk.
Bukni, nun ni Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. Allah ara, Weik Erebuka Eitamnye ulirye, nun ap neika unyabe. Ara, Yakub birye deibukba, dadeipdanin, yangalamik ninye, pia kalikuka meliamuk touk, tuba melisulule. Ikin ning, nun dam yangasulul talak ara, Allah ance tuba lelilongosilyame. Akunuma nyana ati, Sela nyapne.
Allah arye ayupu akunum nyabukce, ayupu ton dukgobuka nyabuk. Ati ara, na Allah Yahweh arye, ayupu nyapdeipsine. Pia dipkoprop, nyapsine. Aminyan talak ara, na tenepse talak akunum kiplyopura, yuk mutuku nang arye, anggun Israel yala nang ati, nyalamik ning ara, batakdopnamake. Min talak ara, sik Israel yala nang ati, nyalamik. ‘Kume, Allah Yahweh, kam pia ululnye bira, el mapu koproba Israel nang ara, Mesir mutuku noutam ikin weik ulamik buk, lobuka lyepdobukce, anang dobuka boyanamukce, tonap teleb kipdeibuk,” nyalamik. Winibuka nyalamik bukni, aminyan talak ara, ayupu tonap pia kum nyanamake.
Yehuda yala nang wipdeipnirye, mikip arepneba, sikda mal olan deiyoknye birye deiyok kiplirye, yuk nang ap mal olalamica ani, ninye nirya obuka, sirya daknamake. Aoplobice nang, sik nong deice ara, talye bental deice yanibuka balamak touk wininamake. Ara, na Allah Yahweh arye sik Yehuda yala nang ati melipniba, sik mal olan nang ati, nirya obuka sirya dakanamake. Aning atonun, yuk mutuku ninye, sik yin talin nang arye, kuda basam balye deice bukuka yanganmace nang babye, ayin talin nang ara, nirya obuka, sirya dakanamake.
Piblisite