Ulangan 18:15 - Eipomek

¹⁵ Ati, aning kum bukni, nun ni koproba Allah Yahweh arye, minop talak na Musa wipdeiamnuk atonun, nun ni koproba Allah, el si Yahweh arye, nun Israel ninye noutamak arye, na unya atonye, tonok ton wipdeipnamsile. Ara, Allah el nyalye yupu kekeplirye, sikti, laka nyanamla deiyoknye wipdeipnamsile. Wini talak, na Musa unye atonun, aminyan talak anye bira, Allah el yupu laka lena deiyoknye unamsile. Anye akunum wipdeiplyopura, anye nyaplye yupu kekebuka, unamlulume.

Ulangan 18:15 Referans Kwoze

Rasul 7:37

Anyapmasin Musa ara, elcuk Israel ninye ati ayupu ton nyabuk. ‘Nara, Allah el yupu laka nyananye nabinye ulamse touk, Allah el yupu laka nyanamsilnye, anggun yala nang kan-kan arye anggunti arepdeipnamsile,’ Musa arye nyabuk. (Ulangan 18:15)

Yohanes 1:45

Pilipus birye el kwit koprop Nataniel biti, enmoka ani, eipdarikopura, nyabuk. “Nataniel, Allah arye, ‘Wininamlume, aning ara kum wininamlume,’ nyabukba, Musa sekeiyamsuk yupu, el mem yupu noutamak arye, ‘Anye yanamle,’ nyabuka laka nyabuka sekamsuknye bira, nun ap akunum eipdanmabe. Tonda, Allah yupu lak nyalamik nang, sik nabi nang arye, yupu sekamik ning noutamak arye mambulnye nyalamiknye bira, akunum eipdanmabe. Anyapmakin anye bira, ara Yusuf birye deibuk mi Yesus, Nasaret mutukunye biti nyapkine,” Pilipus birye nyabuk.

Lukas 9:35

Adua kan-kan ara, Allah arye ayupu nyabuk. “Aunmalanye bira, na Mi Koprop ulule. Narye el wibuka deiamsa ati, el yupu pia moubuka kekenamlulume,” nyabuk.

Matius 17:5

Peterus arye ayupu tuba nyanmok talak ara, sik amutuku dup unmek bukni, dua arye siktikmek mutuku nirya palibuka lelipdongobukura, adua kan-kan arye, Allah arye ayupu nyabuk. “Aunmalanye bira, na Mi Koprop ulula ati, elti, na kanye pia delinune. Anggun nirya ara el yupu pia moubuka kekenamlulume,” Allah arye nyabuk.

1 Timotius 2:5

Allah ara, el tonok. Yuk ton kum ulule. Atouk, Allah danatam, ninye nirya danatam, noutamak ulirye, kanye dukdongobuka melisilya deiyoknye bira, el tonok ulule. Yuk ton kume. Anye el si ara, Yesus Kristus. El aryuk nun ap, Allah ap neika kilisilirye, kanye dukdongobuka derisulrye.

Yohanes 6:29

Asipdeyikba Yesus arye, “Kume, Allah arye, ‘Wininamake,’ tenyamsuk ning ara, yuk pil ton kume. Ara, elce wipdeipsuknye biti, dib tenenamlulume. Anggun wininamlum ning ara, aninguka,” nyabuk.

Lukas 24:19

Nyabukura, Yesus arye tamubuka, “Yata ning ati nyapmanilam do?” nyabuka asipdeyuk. Asipdeyukura, sik bitinye nang arye tamubuka nyaprik. Kume Nasaret nang arye deiyamiknye, el si Yesus ati nyapname. Yesus ara talinye kume. Elda Allah yupu laka nyalamuknye nabi ulamuk. Tonda, Allah nyapdeibukura, Yesus arye nyalamuk yupu ap, pil dolamuk ning ap ara, weik mikip deice arye winilamuk. Ninye nirya arye aning nirya elilamuburye, ‘Anye bira mikip weiknye’ tenen kel bikamubu.

1 Yohanes 3:23

Ara Allah arye, “Wininamlulume,” nyalul yupu ara ani. Tonok ning ara, Allah arye, “Na Mi Koprop Yesus Kristus diba tenenamlulume,” nyasulule. Ton ning ara, Allah arye nyapsuk touk, “Anggunce bico tenebuka melilanauk unamlulume,” nyasulule.

Yohanes 1:25

“Ance, ‘Nara, nabi Elia kume. Ninye Lyena Deiyoknye Kristus kume. Tonda, Musa arye nyapdeiamukba, Israel ninye arye, ‘Weik mambul Allah yupu laka nyalamuknye, nabinye tonok ton yanamlarya’ tenen, kintinililamiknye kume. Anang kum unune,’ nyapmasilame. Ati ara, yata deiyok ati yuk ninye dobuka mek dongolyam do?” nyabuka asipdeyik.

Lukas 10:16

Nyabukce, el mapu 70 nang ati nyabuk. “Aning ati ara, na dipkoprop nyapsine. Anggunce na yupu dobuka peterepra banamlumbuk, kekenamak nang ara, nati kekenamake. Aning atouk, anggun peteremunyebuk kekebikirye, yaniltanamak nang ara, nati yanibuka batakanamniake. Tonda, na yanibuka bataknamiak nang ara, natibuk kume. Na dopkwetepnuknye Allah ati, yanibuka bataknamake.” Yesus arye wipdeibuk nang 70 nang ati, nyabuk.

Ulangan 34:10

Musa ara, Allah ap mining dam arye, yupu talilamdiknye ulamuk. Israel ninye noutamak arye, Musa ulamuka atonye ton, tonap pia kum ulamik. Musa el tonoka. Allah yupu laka nyalamik nang ton, Israel ninye noutamak ulamik bukni, Musa atonye ton, pia kume.

Yohanes 1:21

Nyabukba, sik Yahudi yala deiyok nang arye Yohanes ati asipdeyik. “Ati anda yatanye ulyam do? Minop talak Allah yupu laka lelamuknye, nabi Elia ulyam do? Minop talak Musa birye, ‘Amenyan talak weik mambul nabinye yanamlarya,’ nyabuka nyapdeiamsuknye ulyam do?” nyabuka asipdeyikbuk, Yohanes arye, “Na kume,” nyalamuk.

Ulangan 5:5

Ayupu nyanmok talak ara, weik uku buk dinmokba, anggunda aning eiplumce, ilil weik wamsuka anya arye, anggunda amutuku dam kum binamlume. Bukni, anggunda atam bulubuka kekenmalum buk, Allah otam tikuka, weik uku buk dimoka kan-kan arye nyanmoka ani, anggun dana tam, Allah dana tam, anoutamuk tikmasirye, naryuk Allah arye nyanmok yupu kekenmasirye, anggunti laka nyanmasise. Allah Yahweh arye, nyapdeiamsuk yupu ara, ani.

Lukas 2:32

Weisa dirina uplibuk ninye teleb ubuka elilamak touk, alyena deiyoknye bira, Yahudi yala kum ninye kekena ati, Allah dipkorop yupu laka nyalamlyeura, dib tenebuka kekepnamake. Kekebiceura, sik talima noutam ara dirina uplyeura, anti moubuka biknamake. Tonda, mutuku-mutuku ninye nirya arye, ‘Se, Ninye Lyena Deiyoknye, Allah arye Israel ninye noutam arye wipdeiamuka ati, Allah el mapu Israel ninye ara, pia mambul unyake,’ tenenamsiyake.” Ayupu ara, Simeon arye Maria ap, Yusuf ap, sik mi Yesus winilnamuk ning ati nyabuk.

Matius 21:11

“Ayanmalanye el si ara, Yesus. Galilea tam noutamak bukni, Nasaret mutuku arye, Allah yupu lakak nyalulnye, nabi yanmal ani,” nyabik.

Lukas 2:25

Sik Yerusalem mutuku birik talak ara, tonoknye el si ara Simeon, Allah pia talibuka diksukumuk ulamuknye aunmok. Simeon ara, Allah lyepsilirye, nun talima ap, nun Israel tam nirya ap, pia talinamsil talak ara, ‘Wini talak yanamle do, yata talak do?’ tenen, pia kintinibuka dilamuk. Winilamuka anya arye, Allah El Dib Kanye arye Simeon ati, el mikip weik areamukura, ulamuk.

Lukas 7:16

Yesus arye ami kwetebukopura, abulubuka wekmek nang nirya mambul nyanmekce, Allah si erenmek. Allah si erenmekce, ayupu tonap nyabik. “Se, Allah yupu laka nyananye nabi atonye, nun kan-kan noutamak kunum kutukuka unmale. ‘Allah arye wibuka deibuk ninye ati, melipnun’ tenen, Allah arye dopkwetebukura, akunum yanmasile,” nyanmek.

Yohanes 4:19

Nyabukura, akil arye tamubuka Yesus ati nyabuk. “Ura, ayupu nyapmanilama anya arye, adeice arye anda, aminyan winipnamle ning laka nyananye, nabi ulyama ara, winira akunum kel kipkine.

Yohanes 9:17

Kanye yuk-yuk bobuka unmek bukni, sirye ara asing kwetepmoknye biti asipdeyik. “An dan do? An asing kweteipmakilba, akunum teleb elinmalama anya arye, ance el Yesus ati, yata tenepmalam do? Aning ara laka nyapsilyame,” nyabik. Nyabikura, anye birye tamubuka nyabuk. “Kume, na kanye ara, anye bira, Allah el yupu laka nyana deiyoknye, nabinye ulule, tenepne,” nyabuk.

Bilangan 12:6

Birik talak ara, Allah el si Yahweh adiparyuk sik bitinye ati nyabuk. Kekenurume! Anggun noutamak nara Yahweh, na yupu laka nyalulnye ton aulyopura, el kel kina ati, kum mapmalye talak ara, el kanye talima noutamak laka nyaniba kekelule. Tonda, lengdar maplya deice arye, na wininye ning laka nyaniba, eibuka kel bikilule. Tonda, kum mamlye talak bukni, mambul yupu nyapnyopura, kekenulule. Tonda, yuk talye nang nirya ara, aning nirya kum eibuka kel biksiting bukni, narye arepneba, na pil donye birye mambul ning dilyalirye, narye elti, na yupu laka nyalinune.

Bilangan 12:8

Winilula ati ara, Musa ap, na ap nun neika epdanimirye, yupu sisikinyame. El ti ara, narye yupu laka nyalinune. Musa biti, domona yupu ning ton kum nyalinune. Tonda, yuk nang nirya kum bukni, na yupu tanmanye talak ara, Musa el uk ara, na nong urasin kum dilinulul bukni, kanye dem ara, elinulule. Aning nirya ati ara, anggunce Musa elti, malye yupu nyapmarum ning ara, yata ati ilil kum upmasil do? Yata deiyok ati, el deice malye yupu nyarumunya arye yanirurum do? Musa ara, na pil dolulnye ulula atia, nyabuka, Allah el si Yahweh arye, Harun ap, Miryam ap ati wenebuk.

Hosea 12:14

Yakub birye deiamukba, dadeipdanin balamik nang ara, Mesir mutuku binuka ulamik. Daulamika ani, Allah Yahweh arye, nabi tonok, el si Musa dopdeiamukba, Israel nang melibuka bobana ati, sik Israel nang, Mesir mutuku noutam binuka, Mesir mutuku arye batakuka tamubikce, sik mutuku koproba yanamik. Tonda, atalak ara, sik Israel nang moubuka kalikina ati, nabi Musa kintinip deibukce, wipdeiamukba, Israel nang kalekuka melilamuk.