“Anggunda, ‘Pia dipkoprob unamap’ tenen, diksukumuk wininamlulume. Ara, ‘Teleb upmak do, kum do?’ tenen, yupu talina ap, yupu bokolin talak ap nirya ara, diksukum yupu uk talibuka wininamlulume. Atalak ara, bona utotoa kum ninye ati, ‘Se, bicoe, sik malye ning daupmalye,’ tenebuka winina kume. Tonda, ‘Sik weik tonun melipnamabe,’ tenebuka winina meme. Aning atonun, bona weik talin nang babye ati, ‘Malye winipnamak bukni, sikda bona weik talin nang ati, daupmalye’ tenen, anang ati, ilil tenena pia meme. Bona utotoa kum nang babye, bona weik talin nang babye, diksukum ubuka, yupu teleb kibuka, lipsisikuka bokolinamlulume. Sik malye winibice nang ati, ‘Na kwit capu awinipmace,’ tenebuka, ‘Sik malye ning daupmalye’ tenena kume. Yuk ninye nirya ati, diksukum yupu uk, talibuka lipsisikuka bokolinamlulume,” Allah arye nyabuk.
Ulangan 16:19 - Eipomek19 Anggun awipdeipnamlum nang arye, ‘Aning ara dipkoprob malye ninge. Aning ara, dipkoprob teleb ning,’ tenebikirye, yupu bokeipnamsiyake. Anggunce, ‘Anye na kwit ulula anya arye, dauaplye,’ kum tenenamake. Sik kanye aryuk, ‘Aning ara, winipnamabe,’ tenebikce touk, ubuka yupu lipsisikuka kum bokeipnamsiyake. Tonda, ‘Tonye bitibuk, ikin ning kum deipnuyabeʼ tenen, elce uang areplyopura, elce malye winibuk ning, lubuka, namin kum kipnamake. Tonda, malye ning arebice ning ara, kum dolonamnyake. Deiyok ara, amalye ning arepmacopura, kel weik bikilirye, dipkoprob teleb winin ninguk wililamlanye babye, tamubuka malye ninguk wininamle. Malye ning ati, kum winilule. Teleb winin ning ati, wenelula anya arye, asing kum nang atonun unyake. Adeice arye, malye pil donyake. Dipkoprop ning ton, kum pil donyake. Ati ara, malye ning dopropmanto nang ara, kum wipdeipnamlume. Gade chapit la |
Ulangan 16:19
35 Referans Kwoze
Sikda, malye unmace nang weika arye wininmakiba, epmunyopura, ‘E, nun babye amalye wininmak touk, nun babye malye unamabe,’ tenebuka, kum wininamlume. Malye nang arye malye wininmace touk, anggun ton melibuka kum wininamlume. Tonda, sik anang arye, malye winipmace, yupu lipsisikuka delina deiyok nang arye, ‘Amalye winipmace nang wenepnamakʼ tenen, bulupmace dam bimunce, ninye weik arye, “Kume, anang ara, malye kum winipmangu,” nyabuka, talye yupu nyabica babye, anggunda na mapu koproba anya arye, aning atouk melibuka kum nyanamlume. ‘Tilila yupu deice arye, teleb ning ara, malye kipdeipmuyakʼ tenen, ati nyapsine. Malye ning ara, ‘Aning ara, malye diamuk,’ nyanamlume. Teleb ning ara, ‘Aning ara, telebuk ulule,’ nyabuka, diksukum yupu dem nyanamlume. Minina yupu nyana meme.
Ninye arye malye ubikiba, ‘Ninye deiyok nang arye, yupu bokipnamak’ tenen, wenena aik delilbanyak bukni, amutuku ninye deiyok nang, kanye talima malye nanguk, ucopura, sik malye upmace nang, sik kayapu arye, yo bok weik arelyanganyake. Aning weik arye, dungnubuka arebicopura, amutuku deiyoknye birye, aning lipsisikuka yupu bokolina kum diparyuk, arepmace yo bok uk dungnubuka dopdoplirye, yupu moubuka kum lipsisikuka bokolilule. Winipliba, amalye winipmace nang arye, talye lukparabuka weik arye tonap malyeuk upnin banyake.
“Amalye unyak ning weik aulula anya arye ance, ‘Aning wininamlulume, aning ara, kum wininamlume,’ nyamsulum yupu ara, yaniltanyake. Ayupu ara, dipkoprop kum tenenyake. Ati, ninye yupu bokolin aik noutam nirya ara, teleb kibuka yupu diksukum arye, kum bokolisinyake. Tilila yupu uk nyanyake. Adeice arye, tilila yupu dib tenen nang yakirye, diksukum unyak nang ati, warekil yanganyake. Wininyaka deice arye ance, ‘Aning ara, wininamlulume. Aning ara, pia kum wininamlume,’ nyapdeiamsulum yupu ara, talibuka kum dobolbanyake. An yupu batakuka, sik kanye aniryuk, malye-malye weik wininyake.” Nabi Habakuk birye, Allah ati nyabuk.
Nyabukce, ayupu ton nyabuk. “Anggun mutuku noutamak unyak bukni, tikilyangan nang ap, kwaknamne nang ap ati, diksukumuk wininamlulume. Tonda, youwak kilapu arye, sik patan ning kum upliba, yuk nang ning, tia dopropnamake ati, anggun ning tia arepmunce, ‘Dipkoprop tamubuka, na ning arepnamnil’ tenen, youwak kilapu, sik nong deice ongolamak baju dolona meme. Ato ninye nirya ati ara, ‘Meme, sik talye nang ati, dauplye, sik ning ubula doproptibya babye, yata nang arye nyapsiting do?’ tenen, sik ning ubula dolona meme. Anang nirya ati ara, diksukum ubuka yupu lipsisikuka peterenamlulume.
Ara, talye ati kume. Deiyok ara ani. Anggun ni koproba Allah, el si ara Yahweh bira, el tonok ulule. Yuk Allah ton kum ulule. Aning-aning nirya ap, ninye nirya ap, aning-aning nirya ap ara, pia el Allah atonun kum unyake. Allah ara, aning-aning nirya talibuka ululce, aning-aning babye, yuk ninye deiyok nang babye, el amu tamuk unyake. Allah ara, mikip weik deiyoknye ulirye, ninye nirya babye, aning-aning nirya babye, elcuk talilule. Ninye nirya arye elti, ‘Se elda pia mambule,’ tenenyake. Tonda, ninye urasin kum elilulce, kanye talima kum wililule. Tonda, ninye urasin elilulce, ‘Bon ninguk arepnicopura, doproptinye,’ kum tenelule. El kanye talima diksukumnye biti, kanye delilirye, yupu bokolilule. Allah ara, pia telebnye ulule. Allah elda, malye ning tonoknye babye pia kum winilule.
Winipmunyopura, teleb ninguk winipra banamlume. Ara, diksukum un ninguk, kel bikra banamlulume. Ninye ati yupu lipsisikuka bokolin nang babye, diksukumuk nyanamlulume. Tenepce arye, tilila yupu nyabuka, kum nyanamlulume. Winipmunyopura, youwak kilapu do, kwaknamne mapu do, yuk nang arye, sik nong deice ikin ning delinamak talak ara, angguncuk lipsisikilinamlulume. Sik bidamang arye kum melipdanmanto ninye ati, melipnamlulume.
Dipkoprob yupu nyapsine. Kel weik bikamik nang unyak bukni, sikce tilila yupu nyabikcopura, sik babye, akunum walwal nang atonun unyake. Sikce yuk nang ati, sik nong deice ikin ning dobuka deibikcopura, awininyaka deice arye, sik bidamnye arye, sik bidamang ati, walwal kililanyake. Tonda, yata nang do nirya, malye una ati, namin kin yo bok arebikiba, doprobicopura, adeice arye, sik talima noutam nirya ara, malyeuk kililanyake. Ati dortalak ara, dipsukum ninguk teleb ubuka kum tenenamake.
Aning atonun, weik kel bikna deiyok ning, akunum moubuka kel bikamik nang arye, nyalamkik yupu ton ani. Ninye yupu lipsisikuka bokolina talak ara, sik malye winipmace nang ati, ‘E, anye bira, malye upmal bukni, na kwit koprop ulula anya arye, kum wenepnamne,’ tenena kume. Aning atonun, ‘E, anye bira, na ka koprop pia kum ululnye anya arye, elce malye upmal ning ati, weik ikin ning deibuka wenepnamne,’ tenena kume.
Tonda, yatanye do nirya, ninye asik nang ap, tonda mitik winiryuk nenmakce nang ap, yuwak kilapu ap, sik ning ubula doproplinye ap, yupu lipsisikuka bokolin talak ara, deiyok kum upmalibuk, malye yupu nyaplyopura, aning ara, “Teleb kum unamle,” nyabuka, sun yupu nyapnamlume. Ara, anye biti ara, “Allah arye ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyanamlume.
Bokdonokikbuk, Paulus arye, “Katum boklulume,” nyapmoknye ati nyabuk. “Allah arye, an wenebuka opnamkile. Anda, pun danamuk yo bukni, ‘Urasin teleb kipnamle’ tenen, kurun mek liklamak abilinga atonun ulyame. Ara, nong bol deice ara, urasin teleb atonun ulyam bukni, an kanye talima noutamak ara, malye ning weik aupmakile nyapkine! Allah arye nyabukura, Musa arye sekamsuk yupu, mem yupu nyasilya atonun, ‘Anye bira, yupu bokdeipnun’ tenen, abukmalam bukni, ance ‘El katum boklulume,’ nyapmalama deice arye, an babye, Allah el yupu yanipalama atia!” Paulus arye nyabuk.
Nyabukura, Paulus arye amutuku deiyok nang sik melina nang arye, yupu laka nyalyanmek nang ati nyabuk. “Kume. Nun bitinye nang ara, talye nang kume. Roma mutuku weik deiyok nang arye, sik yupu nyapdeipsika deice arye, Roma mutuku ninye atonun nang kipsike ati, ‘Sikda Roma ninye ururake,’ tenesinyake. Nunda Roma mutuku nang unyam bukni, sik anang arye, ‘Amalye winipmarum deice arye wenepnamsiape,’ kum nyapsik. Sikce yuk ninye dinmasikak talye kama arye opsikce nun dobuka wenena aik pum tabu koubuka dongopsike. Winira sikce talye tunim abuka, ‘Anang dungnubuka dopkwetepnamap,’ tenepmasiak ara, kume. Ara, kum winipmanto. Sik anang aryuk yakirye ninye dinmasicak laka lopdeipnamsiyak atia,” Paulus arye nyabuk.
Nyabukura, Peterus birye deiyok koubukce nyabuk. E, winira na bikmane. Dipkoprop Allah arye nunti nun mutuku ap, nun urasin ap, ato ning disilya elisilya deice arye, ‘Na mapu kopropa,’ kum tenesulule. Allah arye, ‘Ton yala nang ara telebe, ton yala nang ara pia malye ati, na mapu kum unamake’ tenen, bokuka yuk-yuk kum kilisulule. Allah arye tenesilya ara, ‘Ninye mutuku-mutuku nirya ara, atonunuk unyaka ati ara, yata mutuku ninye do nirya, na mapu uptinge,’ tenesulule.
Aning wininyaka deice arye, malye winin ninguk, kel kibikirye talinyake. Ara, ninye deiyok nang kibikirye, talibuka unyak ninye ap, malye winibikiba yupu lipsisikuka, bokolina deiyok nang ap, sik nirya arye, “Nun mapu anggun malye winipmalum nang ara, nunti, ‘Ninye opdeipsululume,’ nyabuka arin yo bok arepsilyame,” nyanyakba, Israel ninye arye, arenyakba, adeiyok nang arye dolonyake. Tonda ninye deiyok talibuka, unyak nang arye, ‘Nun tenepmap ning ara, adiparyuk doproptibye’ tenen, mikip arye nyanyakba, sik tenepmakce touk, dalubuka dolonyake. Winibikca deice arye, pia tuba-tuba malye yupu nyalanyake. Diksukum ubuka, ninye yupu kum bokolinyake.
Aninguk kum bukni, yuk nang, anggun Yerusalem mutuku ululum nang kan-kan arye, “Ninye opdeipsululume,’’ nyabuka, dekenyak uang arebikceba doprobikirye, ninye ton onyake. Tonda, yuk nang arye, yo bok patan nang ati, “Anggun yo bok tia arepnusiap, bukni, min yuma ara, winibuka yo bok ton tabakuka arepnamnilyame,” nyabuka arinyake. Winyamikca ani, anye el uang kum upmalye buk, tamubuka min kum areptu talak ara, ila tamubuka, anggunce “Ati, wini talak aryuk, yo bok ton ap, weika tabakuka areplulume,” nyabuka, mikip arye moronyake. Tonda, anggun yala nang atibuk, “Uang ton arepsilyame. Kum arepsiminyopura, ikin ning weik, anggun nong deice arenamsine,” nyabuka, mikip arye moronyake. Winiluluma deice arye, anggun nirya arye, na Allah ati, akunum lubakinululume. Nara Allah Yahweh, aning-aning nirya deice tam erebuka, Pia Mikip Weik Deiyoknye ununye birye akunum nyapsine.
Sik amalye wininyak nang ara, telebuk kibuka ukirye, sik nong pou weik unyake. Sik urasin babye, pia teleb unyake. Bukni, sik anang arye, malye wininyak ning ara, pia tenipmanto kum ning wininyakce, pia kum batakmanto unyake. Pia malye-malye aupto babye, sik tenepce touk, talye luparabuka wininyake. Sik anang arye, talye kwaknamne mapu ati ara, ‘Aminyan ara, amapu teleb kibuka unamakʼ tenen, diksukum kibuka, teleb winin ning arye kum melinyake. Amapu ati, yupu bokikce talak ara, diksukum kibuka kum nyanyake. Tonda, aning atonun, talye kankan uk unyak nang, aning-aning kum talenyak nang ati, yu nang arye malye winipnuce talak ara, anang arye, ‘Anggun bataksue, akankan nang ati, malye kilina kume,’ nyabuka, yupu kum sekenyake. ‘Sikda, dauplye,’ tenebikirye, yupu nyabuka, kum melinyake.
Na Allah arye nyasunune. Yata ninye do nirya, sikda teleb kibuka ubikirye, tilila yupu nyana kum diparyuk, dipkoprob yupu uk nyabuka, diksukumuk unamak ninye ara, amutuku noutamak unamtinge. Tonda, sikce, ‘Aning-aning nirya kum talinyakce, talye bona utotoa talina kum ninye ati, ‘Dauplye’ tenen, yaniltanyaka deice arye, nun dem aryuk amutuku ning nirya dobuka taleptibye,’ kum tenenyak ninye ara, amutuku noutamak unamtinge. Tonda, ninye yupu lipsisikuka bokolina talak ara, ‘Malye winipmakibuk, yo bok weik arepsitingba, aninye kum wenepnuyabe,’ kum tenenyak ninye ara, amutuku unamtinge. Tonda, yuk nang arye, ‘Ninye optibye,’ tenena ap, ‘Yuk malye ning winiptibye’ tenen, ning ap, yuk malye nang arye malye-malye wininyak ning ati, ‘Kum eipnuyabe,’ tenebikirye, sik bidamnye arye asing kulongonyak ninye ara, amutuku noutam unamtinge.
Ura anggun Yerusalem mutuku talibuka ululum ninye deiyok nang nirya ara, na yupu bisimunce, ubula don nang ap neika ululume. Anggunce ninye ati, yupu lipsisikuka bokolin talak ara, malye wininyak diparyuk, ‘Nun patasilye ning ara arepsitingopura, sik tenenyak touk, yupu lipsisikuka bokeipnuyabe,’ tenemunce, winilulume. Utenemunya deice arye, youwak kilapu ap, kwaknamne mapu kilmapu ap ati, sik ikin uplya babye, diksukum yupu kum lipsisikuka bokolilulume. Anggunda, ‘Nun patasilye touk arepsitinge’ tenen, winimunya ati nyapsine.
Tonda, anggun ap neika ulamunye ninye ati, deiyok ton kum upmalibuk, ninye yupu lipsisikuka bokolin talak ara, “Sik wininmace ning eipmunya ara, ani-ani,” nyabuka laka kum nyanamlulume. Atonun anggunce ton, anggun kayapu nang kum winipamce ning ati, talye minina yupu pia kum nyanamlulume. Tonda, yata yupu do nirya, anggun si bam bol deice arye, talye yupu pia kum nyanamlulume.
“Ati, wini talak ara, na anggun dam atikmane. Tonda, nun ni koproba Allah, el si Yahweh arye, dinmasile. Tonda, nun ninye deiyok talina ati, Allah arye wipdeipmasilnye, Raja Saul ap arye dinmanile. Sik bitinye dinmasiraka ati ara, winipmanto, narye anggun dam malye winipse ning ton, auplyopura, adiparyuk laka nyapnamlulume. Winipmanto ara, narye yatanye sapi basam ubula dopromse do? Tonda, yatanye el keledai basam ton, ubula dopramsise do? Tonda, anggun dam tilila yupu ap, malye yupu ap, duknubuka nyapsisa deice arye, namin kilongona yo bok ap ton dopromsise do? Yatanye anggun nong deice, ikin ning deiamsise do? Tonda, malye nang ulamik ning, yupu lipsisikuka bokolina deiyoknye, ulamse talak noutamak ara, yatanye birye, yo bok arepnuka deice arye, malye nang ati kum wenepse. ‘Ninye arye, malye wininyak ning kum eipnamne’ tenen, na asing pia kum kuamnuke. Dipkoprop yupu bokolilamsirye, malye nang ati, wenelamsise. Anyapmasin ning tonok ning babye, winyamtinyopura, awinyamsa ati, anggunce ‘Aning ton winiplume,’ nyapnumunba, narye wini talak aryuk tamubuka punupnamasine,” nyabuk.
Bukni, sikda sik ni birye, pil teleb kibuka dolamukce, diksukumuk ulamuk touk kum ulamdik. Yuk nang arye, “Malye winibibye ning ara, wenena kum diparyuk, namin kipsurumunyopura, dengna arepnusiyabe,” nyabuka morolamik. Winilamikba, Yoel ap, Abia ap arye, kekelamdikce, yo bok dololamdika deice arye, amalye un nang kum wenelamdik. Tonda, tilila yupu nyana ap, tenepce arye, duknuna yupu nyana ap, yupu kekelamdikce, dekna ning duknubuka dololamdikce, Israel ninye ati, teleb kibuka kum talilamdik. Tilila ninguk talibuka ulamdik.
Bukni, wininamlam talak nirya ara, ‘Na yupu nyan pil ati, na melin nang unamakʼ tenen, ance dipdebuka, ninye ara, yata wiribuka nang do? Ninye ton wipdeipnulyame. Sik anang ara, kanye moubuka tenebikirye, yupu nyapmanto nanguk wipnamlame. Ara, ‘Teleb arye pil dopmanto nang ara, anye tenepmince, ananguk wipdeipminba, yupu lipsisikin pil talibuka unamake. Ara, sik anang noutam arye bokdeipminba, ton deiyok nang arye, ninye yupa ara, pia weik seribu (1.000) nang ati, yupu lipsisikuka talinamake. Ton deiyok nang arye, ninye yupa ara, 100 nang ati, yupu lipsisikuka talibuka unamake. Atonun, ton deiyok nang arye, 50 nang melina ati talinamake. Ton deiyok nang arye, ninye 10 nang melina ati, yupu lipsisikuka talibuka unamake. Ance, ‘Yupu lipsisikin pil talibuka donamakʼ tenen, adeiyok nang wipdeipnamlyame. Tonda, ance awipdeipnalam nang ara, talye nang kum wipdeipnamlyame. Anang ara, ‘Malye ubibya ati, Allah arye wenepsilyakʼ tenen, Allah ati, ilil kanye bobuka, elti, dib tenibuka unyakce, tilila yupu talye kum nyalamak nang ap, tonda ‘Sikda, yo bok weik dopropnamapʼ tenen, namin kin yo bok ton, pia kum dolonyakce, telebuk unyak nanguk wipdeipnamlyame. Tonda, yuk nang arye, sik anang ati ara, ‘Sikda, telebuk unyak nang ati, anang ati dipkoprob tenepnamap,’ tenenyak nanguk wipdeipnamlyame.
Tonda, talye bona utotoa kum talenyak ninye arye, dipkoprob malye winipmace nang ati, yupu lipsisikuka bokolina deiyok nang arye, ‘Sik malye winipmace ning ati, yupu lipsisikuka bokolinamapʼ tenen, aik boyacopura, na mapu anggunce bico tenepmunce, ‘Kume, amalye winipmace nang ara, kankan nang unyaka ati, daupmalye, malye dem wininamakeʼ tenen, anggunce “Kume, anang ara dipkoprob malye kum unmake,” nyabuka, tilila yupu deice arye melibuka kum nyanamlume. Yata nang do nirya ati, sik malye winipmace atouk ubuka, yupu lipsisiknamlulume.
Sik Israel yala ninye nirya ati, ‘Sik amutuku noutam unamakʼ tenen, Allah arye arepsukba, asik dobuka ululum mutuku nirya ara, aululuma atonun, anyasik noutam arye, anggun yupu lipsisikuka bokolina deiyok nang ton, yuk-yuk wipdeipnamlume. Tonda, Israel nang, anggun unamlum noutam arye, malye upmunyeba, adeiyok nang arye, ayupu kekebikirye, lipsisikuka bokolina pia teleb dipkoprob yupu nyapsikirye, tamubuka tonap teleb kipdeipnamsiyake. Ati, ‘Ninye yupu lipsisikuka bokolina deiyok nang melibuka yupu bokolinamakʼ tenen, adeiyok nang ton wipdeipnamlume.
Winilirye, uang yo bok dobuka, yuk nang ati areplirye, ‘Sikce ton tabakuka arepnamniak,’ kum tenelulnye bira, Allah un dam yatue. Tonda, malye kum winipmace nang ati, ‘Anye opdeipnamnile’ tenen, dekna arin ning arebikceba, kum dololulnye bira, Allah un dam yatue. Ateleb pil donyak ninye ara, pia pi dobuka, telebuk wininamake.
Yatanye do, ‘Yo bok weik arye koproptinirye, bona weik talinanye kiptinye’ tenen, tilila yupu nyabuka ubula dololulnye bira, aning-aning nirya, winibuka dololya deice arye, el ap, el mapu silip nirya ap ati, malye kililule. El malye ulya deice arye, bona ning weik dolonamle bukni, adeice arye, el mapu silip nirya malye winililulba, ikin ning weik unamake. Ton nang ara, ‘Ubula dopropnamne’ tenen, mambul ning bokuka arepmantonye ati, morolbalule. ‘Anye bira kanye deipnilirye, kum arepnamnutu ning bukni, dungnubuka arepnamnil’ tenen, amorolbalulnye birye, teleb ning dobuka, weik deiyoknye ati dungnubuka arelbalule. Winilul bukni, Allah arye amalye ululnye ati, aminyan sirya talak, wenebuka oplopnamle. Ati ara, yatanye do, ‘Ayo bok ara dungnubuka dolona na like,’ teneplirye, binuka moroplirye, kum dolbalulnye bira, teleb ubuka kam pia unamle.
Ninye arye malye ubikiba, yuk nang arye wenena aik bobice talak ara, ninye yupu bokolina deiyoknye birye, ‘E, anye bira, na ka koprop,’ teneplyopura, el malye wamlye ning awamli bukni, ‘El winipmal atonun dipdenirye, yupu lipsisikuka bokeipnune,’ kum tenelule. ‘Na kwit’ tenen, “Dauplye,” nyaplirye, amalye wamlinye batakalule. Aning ara, pia malye weik ulule. Aning atonun, yuk nang ara, malye kum upmace bukni, yuk nang arye, minina yupu deice arye, “Sik malye wininmak ning ara ani, ani,” nyabuka, lululina yupu sik nong deice delinyake. Deiyok kum upmale bukni, yupu bokolina deiyoknye bira, malye ululnye birye, “Diba, anggun malye upmalum ning ara ani, ani,” nyabuka taruk pukdongobuka nyalya deice arye, aninye wenebicopura, pia malye weik ulule. Allah el kanye ara, ‘Ninye yupu lipsisikuka bokolina deiyoknye arye, malye unyak ninye talye lolilamak ning babye, teleb unyak ninye bukni, deiyok kum upmale bukni, wenelamak ning babye, pia malye weik ulule,’ tenelule.
Ayupu ara, talye ati kum nyapkine. Deiyok ara ani. Ara, ninye deiyok nang, Raja arye yu weik mek weik dibikcopura, sik pil dona deiyok ning nirya luba kinamake. Winibicopura, bona utotoa talina kum ninye do, mikip pia kum ninye do, ikin kanye bobuka unyak ninye do, ninye arye, ‘Aninye ara mambul kum ninye anya arye dauplye’ tenen, yanildongonyak ninye ap, sik amu tam unyak ninye nirya ati, teleb ubuka kum meliptinge. Tonda, yu mek dibice deice arye, sik kanye wangapliba, ninye yupu teleb ubuka kum bokipnamake. Sik amu tam unyak ninye ati, yaniltana uk ubikirye, aninye nirya ati malye ulinamake. Ati, Raja nang ara, kanye wangalamak mek weik arye dina kume, nyapkine.
Tonda, yatanye birye do nirya, tonoknye birye, malye kum winipmalinye biti, deiyok kum upmalibuk, el kwit yuknye birye, yu upliba, bul kin ning dobuka areplirye, ‘Opdeipnilyame,’ nyapliba, ayupu kekeplirye oplyopura, ayupu nyapmalirye, arukun ning arepnamlanye bira, ‘Elda teleb kum unamle,’ nyabuka, yupu deice arye, sun yupu nyapnamlume. Ara, anye biti ara, “Allah arye, ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma,’ nyababe,” nyanamlume.
Tonda, teleb ululnye birye, yuk ninye sik patana ati, uang yo bok areplye talak ara, elce aning kum laka nyalule. “Na yo bok dopropmunce, nati tamubuka min kum arepmanumunye talak noutamak ara, uang yo bok ton, tabakuka nyapnamasin touk, yo bok ton tabakuka arepnamnulume. Anggunce, na ning dopromnumunye ninguk kume. Nara, weik tonap dolona ati, weik tabakalona ati, uang yo bok ton tabakuka, weik arye arenamnulume,” pia kum nyalule. Tonda, anye birye, ‘Malye un ning winipnyak’ tenen, kalikdalirye, malye kum ulule. Atonun anye birye, yupu bokolina deiyoknye ulul talak ara, ton tam nang arye, ton tam nang ati, “Winibuka malye upmasiyake,” nyabice ning ara, moubuka kekeplirye, dipkoprob yupu uk, sikti, lipsisikuka bokolilule. Tilila yupu nyana kumce, teleb yupu uk, nyalule.