Ulangan 16:16 - Eipomek

¹⁶ Tonda, sik Israel nang nirya ara, Allah Yahweh ati, si erebuka kinamnyake. Ara, Allah elce, ‘Aning ara, wininamakeʼ tenen, kintinip deiamlyakuk, tonok keting tamun noutam bukni, like winilye deice arye, sik Israel nang nirya ara, keting tamun 20 tahun deice, akunum nemik nang, bulubuka yakirye, el si erepnamnyake. Allah el si erena ati, bulupnamak talak ara, ani. Ara, Kaplin Kwalina Kwalin talak ap, wa wibuka kouamikce ning nirya ati, kwalya kwalipnamak talak ap, tonda yo arye bai tam aik dobikirye, Bai Aik Kwalya kwalinamak talak ap, aning like winilye deice arye bulubikirye, Allah el si erenamnyake. Atalak ara, amutuku unyak nang nirya ara, talye ati kum yangnamak bukni, Allah ati aren ning ara, yuk-yuk boyanuka arelyanganamake.

Ulangan 16:16 Referans Kwoze

Mazmur 96:8

Allah el ap, el si ap, weik mambulnye winilula anya arye, nun tukwak mutuku noutamak unyap ninye nirya arye, el si erena atibuk, el si adiparyuk erenamabe. Tonda, Allah el si erena ati, nun nirya arye, teleb arin ning dobuka, el si erena ati aik damak, boyabirye, arenamabe.

Hagai 1:9

Anggun wa wilulum ning ara, ‘Nong weik upsiliba lipnamabe,’ tenelulum bukni, atenebuka wa wiamunye touk, kum lilulume. Tonda, anggun wa wiamunyak arye, nong liplipbanmamun talak ara, na Allah arye, ‘Aning nirya kum uptu’ tenen, pong nyapnyopura, kumanya atonun ubuka yalirye, bopdakuka balolamsile. Adeice, anggun lipmamunye ning nirya ara, kum usulule. Anirya kum kilosulule. Nara Yahweh, aning-aning talibuka, deice tam unirye, yin talibuka unyak malaikat nirya ara, sik deiyoknye unune. Narye asipdese. “Aikin ning aresunun ning ara, yata ning deiyok ati, narye winisunun do? Aning ara, ani. Anggunce na si eren aik ara, tamubuka kum dopnulumba, aik oldem ubuka ati, usunune. Adeice arye anggunda, anggun damnye un aik ara, pia pi deibuka, mikip arye domunce, anggun aik wekuka, mangkau kanye bobuka ululuma ati, nyapsine,” Allah arye nyabuk.

Matius 2:11

Weik arye kanye deibikce, anyaik wekuka Maria ap, el mi Yesus ap eibikce, ami el kina ati, sik nirya arye, gutam tuku diprongobukabikce, tonda, Yesus el si erenmek. Erenmekce, sik mambul ning, lin ning pum torokukabikce, dekna weik ning Yesus ati arebik. Sikce Yesus arebik ning ara, ani. Yo pia akunum mikamuk ning, el si kemenyan uku dongobikba, ‘Teleb nintong nyapnamle’ tenen, arebik. Aning el si ara, kemenyan. Tonda, dekna weik ning emas arebik. Ton ning ara, dekna weik yo pia teleb nintong nyalamuk ning, el si ara, mur arebik.

Keluaran 34:20

“Keledai basam mi min yuma deiplye ning ara, ‘Kum opnuyabe,’ tenepmunyopura, akeledai mi pununa ati, adiparyuk domba basam mi dobuka opmunyopura, arenamnululume. Akeledai basam mi nati, deken ning kum arepnumunyopura, adiparyuk akeledai mi, ngang kotokuka onamlulume. Anggun sal mi min yuma deipnamlum ning nirya ara, na ning koproba anya arye, anggun nong pununa ati, dekna ning arenamnululume. Na tenen ning pununa ati ara, na dam yangana ara, urdemuk kum yanamlulume. Deken ning libuka boyanamlulume,” Allah arye nyabuk.

1 Raja-Raja 9:25

Salomo birye, Allah Yahweh el si eren aik akunum dobuka kintinibuk. Winibukopura, tonok keting tamun noutam ara, ‘Nun malye un ning kilibuka, teleb kilinamsilʼ tenen ati, like winilye deice arye, kam ning obuka, mesba dam boyangalamukce, imam nang ati arelamukba, sikce aning boyanuka uku dongolamik. Tonda, tonok keting tamun noutam ara, like winilye deice arye, ‘Allah ap ninye ap, ansinipdabirye, teleb ubuka neika uptibyeʼ tenen ati, yuk kam ning ton oyanuka arelamukba, imam nang arye uku dongolamik. Atonun tonda, Allah si erena ati siltong teleb ning yanuka arelamukba, imam nang arye uku dongolamik. Aning-aning nirya Salomo birye, akunum winipnin balamuka ani, sirya ara, Allah el si eren aik ara, akunum sirya dakuka dobukce, aning winilamuk.

Yesaya 23:18

Bukni, atalak arye dipdongobuka, dowinipnamle talak nirya ara, Tirus mutuku nang arye, yo bok weik dekuka dolonamak ning nirya ara, sikce sik ning ton kum moubuka delinamake. Ayo bok wekenamle ning nirya ara, Allah Yahweh el ninguk upnamle ati, Allah el tibuk bobuka arelyanganamake. Tonda, Tirus mutuku nang arye yo bok dolonamak ning ara bobuka, Allah Yahweh el tenen nang, el dam tuba unamak nang ati sik ak arenamake. Winiceura, Allah el mapu koproba, sikda teleb din weik tonun ap, teleb ongon baju ap, tuba dolona uk unamake. Allah arye na Yesaya ati, aning nirya laka nyapnuke.

Markus 12:3

Biyukura, awa tuku tia talak ati talyamik nang eibikce, ayanmoknye el nong talibuka weik arye obik. Obikce aning arena kumcuk, “Tamubuka bilyame,” nyabikura, biyuk.

Yohanes 7:2

Bukni, sik Yahudi yala nang arye, weik sum tenebuka kwalilamik ning, el si ara, Bara Asik dopnarye, Kwalina Sum dam akunum ubuk.

Keluaran 34:24

“Narye nyapsinye touk, tonok keting tamun noutamak, like winilye talak na dam bimunce, na si Yahweh erepnumunyopura, narye wininamsine. Tonok ning ara, yuk mutuku yala ninye nirya yakuka donoknyeba, amutuku ara anggun Israel ninye uk talinamlume. Bitinye ning ara, anggun talinamlum mutuku, weika arye tonap tabakuka arenamsine. Winilye ning ara, na kaliksinyeba, yuk mutuku ninye nirya arye, anggun Israel ninye unamlumak nirya, ‘Se aning ara nunda doproptibye’ tenen, kum patapnamle. Na nyapse touk, na si erepnumunyopura, aning nirya ati, melibuka arepnamsine,” Allah el si Yahweh arye nyabuk.

Imamat 23:34

Israel ninye ati nyapnamlyame. Wala tekbarye ning, akunum uplirye, awala noutam tanggal 15 deice ara, Barasik Dolin Aik ati kwalina sum upnamle. Aning babye, na si erena ati, weik sum upnamsile. Asum deice deiyok koupmunce, anirye tekbarye sum deice ton, tabakuka pia upra banamlulume.

Ulangan 16:15

Tonda, like tekbarye sum nirya ara, akwalina kwalibuka dipmunce, anggun ni koproba Allah Yahweh atibuk kibuka, si erenamlulume. Ara, talye sukum arye kum wininamlum bukni, Allah elce kintinip deipnamlakuk, asukumuk yambul Bai Aik Kwalina, akwalina kwalibuka dinamlume. Winipmunyopura, anggun ni koproba Allah Yahweh, elcuk, anggun wa wibuka koupnamlum ning babye, anggunce pil donamlum ning ayala-ayala nirya babye, pia teleb kipdeipsiliba, nong weik tonun arenamsile. Winipsilyopura, anggun nirya arye kanye deipmunce, el tibuk arenamlumce, el siuk erenamlulume.

Ulangan 16:17

Abobuka arelyanganamak ning ara, Allah elce, sik yuk-yuk ati, teleb kipdeibukce, aning-aning weik tonun tabakuka areamuk touk ubuka, teleb arin ning boyanganamnyake. Musa birye, sik Israel nang ati, nyabuk.

Ulangan 31:11

Wini talak ara, Allah el si Yahweh arye, ‘Asukumuk bulupnamlulume,’ nyapnamlak anyuk, Israel ninye nirya kintinibuka bulupnamake. Asukumuk, sik nirya yakiba, ayupu bobuka, tuba tonap anggun dam nukuka delinamlulume. Winipmunba, Allah arye, ‘Aning wininamlulume. Aning ara, kum wininamlulume,’ nyapdeiamuk yupu ara, Israel ninye nirya kekenamake.

1 Samuel 1:3

Atalak ara, aketing tamun, aketing tamun nirya, Elkana birye, ‘Na ni Allah el si Yahweh, aning-aning deice tam ululnye, el si erenamne’ tenen, Ramataim mutuku arye, Allah arena ati, el weilamuk kam ning tonok-tonok dobuka, Silo mutuku balamuk. Atalak ara, Allah Yahweh el si eren aik pum tam pil dona deiyok nang ara, Eli el mapu bitinye, Hofini ap, Pineas ap ulamdik.

1 Samuel 6:3

Asipdeyikba, sik amutuku noutam ulamik imam-imam nang ap, asing keten nang ap nirya arye, tamubuka nyabik. “Allah arye, mem nyapdeiamukce, yupu sekamukba, sik Israel nang arye aning dobuka, marikna pum dongamik ning ara, ‘Sik Israel yala ninye unyak mutuku bobinuka, apeti pum tam deiamik ning ara, talye urdemuk, tamubuka bobibirye, omutuku uk dadeipnuyabe,’ tenena pia meme. Aning kum bukni, anggun ap, neika ansinibuka, malye umunye ning dekena ap, kum danalina ap ara, amarikna ap, Allah el arena ati, yuk deken ning ap, dekena teleb ning ap, bobinuka arenamlume. Aning akunum winipmunyopura, Israel ninye, sik ni Allah arye, nun Pilistin nang ati, malye ubupu ning namin kipsilirye, nun amutuku unyap ninye kwetebuka, teleb kipdeipnamsile. Tonda, anggun biknamlume. Ara, Israel ninye arye, si erenyak Allah ara, elce tuba-tuba pia ikin ning, nun deice deilisulula ara, ‘Deiyok aniʼ tenen, biknamlume,” nyabuka, sik imam-imam nang arye nyabik.

2 Tawarikh 8:13

Akam ning obuka yana uku dongolamuk ning nirya ara, minop talak Musa birye mambul yupu deice arye, “Winipnamlume, aning ara winibuka aremunyakarye, Allah ati si erenamlume,” nyapdeiamuk touk, winilamuk. Tonda, Musa birye, “Pia weik sum ara awala ap, atanggal ap unamle,” nyamuk touk Salomo birye winilamuk. Ara, weik sum, pil dona kumce, didik sen sum, Sabat sum ap, winiryuk wala tikin talak ap, tonda yuk weik sum ara, keting tamun nirya noutam, weik sum winilye ning ton awamuk. Ara, Nena Kum Roti kwaning kwalina sum ap, ninye Koulamik Ning weik tonun Lin Sum kwalina ap, tonda Mitik Bar Asik doltakna aik don sum ap, aning nirya ara Musa birye nyapdeiamuk touk, Salomo birye aninguk talebuka winilamuk.

Nehemia 8:15

Tonda ayupu ton uamukba kekebikce kel kibik. Ara, Allah arye nyabuk, “Yerusalem mutuku noutamak ap, anggun unamlumak nirya ap ara, ayupu bobuka lak nyalbinamlume. Ara, bai tam bimunce, yo kan-kan arye, yo taruk sekuka boyanamlume. Ayo taruk yala ara, ninye arye kouamik zaitun yo taruk ap, talye bai tam palamle zaitun yo taruk ap, kepyal yo taruk ap, palma yo taruk ap, tonda yo bok weik ulamle yo taruk ap, yo bata ap kakapmunce, boyanamlulume. Yamunba, talye bai tam asik atonun aik, mitik doltakne aik dopnamlume. Dopmunyopura, tekbarye wala noutam nirya ara, anyaikuk tia unamlume. Aunamluma ara, Allah nyalamukba, Musa sekeiamsuk yupu noutam anyapdeipsuk touk wininamlume,” Esra birye yinibuka nyabuk. Ayupu uamuk ning ton kekebuka kel kibik.

Mazmur 84:7

Allah an si erena ati, sik anang bisik kabul deiyok koubuka, banmakca ani, minop talak Israel nang arye, engelamik mutuku, Baka mutuku bisik bikirye, amutuku noutam bikca babye, ance anang melipminyeba, amutuku urasin tamuplirye, mek pukuka balamle atonun kibuka, deipnamlame. Tonda, amutuku noutam bacebuk, Allah arye mok areplyeba ceplirye, aminyan datalak, amutuku mekwen weik deipnamle.

Mazmur 122:4

Amutuku ara, Israel nang yala-yala nirya yanganamake. Tonda, Allah el si Yahweh arye wipdeiamuk nang, Israel yala nang ati, “Winibuka winipmunce, anggun nirya ara, na siuk erenamnulume,” nyapdeiamuk touk yangakirye, Allah ati telebe nyabuka, si erenamake.

Esra 3:1

Ura, Israel ninye Babel mutuku noutamak arye batakuka, sik mutuku koproba Yudea mutuku tam tamubuka biyikopura, Israel ninye sik yuk-yuk ulamik mutuku tamubuka biyikce, aik dobuka daulamik. Winilamika ani, wala tekbarye akunum ubukopura, awala uk tanggal satu akunum ubukopura, sik nirya bulubuka nikak, Yerusalem mutuku binuka wekikce, “Wini talak ara, Allah el si erenamabe,” nyabik.

Mazmur 84:8

Sik anang, Sion mutuku bana ati, bisik banmakce talak ara, nun ni Allah, ance mikip arepminyeba, mikip kibikirye, mikip uplyeura, Sion mutuku dam binamake. Sion mutuku bikce talak ara, Allah el dam wekelbinamake.

Yesaya 33:20

Asyur mutuku ninye ila tuba tonap kum elinamlum bukni, Sion mutuku uk, teleb kipdeipnyopura, amutuku uk elinamlume. Nati, diba tenenyak ninye nirya ara, Sion mutuku yangakirye, na si erena ati, weik kwalya kwalibikirye, pin-pin kanye bobuka, nati si erenamniyake. Winibikiba, elinamlume. Ara, Yerusalem mutuku teleb kipdeipniba, amutuku unamak ninye nirya ara, teleb kanye bobuka lamapdongobuka unamake. Yuk mutuku nang arye, kum benbenenamake. Winipmanto ara, ninye arye baju bol doltakna aik dopnamakca ati, tapu birin yo kat ning moubuka ikikiba, kum lulukmanto ulamle touk winipnamle. Tonda, tapu kum bulukmanto kat tapu kirikikiba, lulukna kumce kat ulamle touk, Sion mutuku babye atonun kipdeipnamne. Winipniba, anggunce elinamlume. Allah arye nyapdeibukba Yesaya birye sekeibuk.

Yehezkiel 36:38

Winipmanto ara, minop talak na si eren ati, weik sum uamukba, na si eren ati ninye yuk-yuk danirye domba basam, pia weik bobuka, Yerusalem mutuku uku dongolyangalamikba, domba basam nukmanto kumce, pia weik ulamik touk, narye Israel ninye yupa pia weika kipdeipnamsine. Ninye yupa weik akunum ubikirye, minop talak yuk mutuku yu weik nang, yin bon nang arye, sik asik nirya uluplomikba, oldemuk ulamuk bukni, wini talak ara, amutuku nirya, ila tuba aik punubuka dobikirye, unamake. Ara, ninye yupa weik, kum nukmanto kibuka ulamikirye, amutuku aik nirya, ninye aniryuk langdipnamake. Winipnyopura, yata mutuku ninye do nirya, dipkoprob na Allah Yahweh ati, biknamniyake. Allah arye nyabuk.