Aning atonun winipmunyopura, Allah arye, ‘Amutuku unamne. Winipnyopura, amutuku uk, na si erenamniyake,’ tenyamuk mutuku, lak nyapsilyopura, asukumuk binuka umunce, Allah el si erena ati, el arin ning bobuka, elti, arepnamlulume. Arup arye nyapnusin ning nirya ara, amutuku uk, boyanamlulume. Boyamunyopura, anggun ni koproba Allah ati, arenamlulume. Ara, ‘Nun malye wininyap ning, Allah arye namin kipnamsil’ tenen, Allah ati arenamlum ning ara, ani. Ara, kam ulul ning sapi do, domba do dobuka opmunce, uku dongopmunba, uku dipnamle. Ton ning ara, aupnamle. Tonda, anggun wa linamlum ning ara, nirya bokuka, sepuluh persen (10%) deipmunce, tonok ning ara dobuka, Allah ati arepnamlulume. Ara, sepuluh persen mitik tonun ati nyapne. Tonda, anggun kanye koproba arye, ‘Aning ton, na ni Allah ati arepnamne,’ tenepmunce, kintinipnamlum ning ap, tonda Allah ati, ‘Dipkoprop wininamne ati, amambul ning dobuka Allah ati arenamne,’ nyabuka, nyalin yupu nyamlum ning ap, Allah atibuk arenamlume. Ara, aning-aning nirya ara, Allah el si erena ati, elce nyapnamsil mutuku, asukumuk arenamlume.
Ulangan 12:5 - Eipomek5 Amutuku ninye winilamak touk kum bukni, anggun Israel ninye ara, Allah arye el si erenak ati, ‘Asukum binuka wekenamlulume,’ nyabuka, laka nyapnamsilak anyuk, amutuku uk binuka, el si erenamlulume. Allah arye, ‘Aunamnak anye’ tenyamukce, wibuka nyapnamsilak ara, amutuku unamle. Asukumuk anggunce binuka wekmunce, elti, kibuka, el si diamuk erenamlulume. Yuk ning ati si erena pia meme. Gade chapit la |
Ulangan 12:5
50 Referans Kwoze
Daulamunya ani, wa wiamunya min yuma mouplye ning ara, yuma ning nirya ara, libukapmunce, Allah ati arelbanamlulume. Allah arye arepnamsil mutuku noutam koupmunba, moupnamle yuma ning nirya ara, aling arye libuka arepnamlulume. Arepnamlum sukum ara, Allah el si Yahweh arye, ‘Asukum ara, na si seknamne. Na si eren aik ara ani,’ nyabuka wiamukce, nyapnamsilakuk, arelbanamlulume.
Winibuka, aik sirya dobuk talak ara, Allah si Yahweh arye asum lukunyan noutam arye, Salomo damak yayukce lak nyabuk. Allah Yahweh arye nyabuk yupu ara ani. “Salomo ance nati moronilyam ning ara, akunum kekepkisirye, ance moropnulum touk, akunum melipmakine. Milipmakin ati, ance doplum aik ara, yuk wibuka kentinepdeipnirye, asukum ara, nati kam ning obuka, uku dalyangan sukum akunum kipdeipmane.
Allah arye, ‘Na si erena ati ara, asukumuk na si deipnamna anya arye, anggunda asukumuk, na si erenamnulume,’ teneplirye, kintinip deipnamsil mutuku ara, asukumuk binuka, kwalinamlume. Amutuku uk, bimunyopura, anggun adiparyuk Allah si erena ati, anggunce kambing basam do, domba basam do, sapi basam do, tonok-tonok bobimunce, obuka Kaplina Kwalina kwalinamlume. Ara, ‘Nunda Allah elce Mesir mutuku noutam lukunyan noutam, nunti lyebuka boyanamsuke,’ tenepmunce, Kaplin Kwalina ati, kwalipmunce, Allah el tibuk si erebuka kinamlume.
Allah arye, Efraim yala nang ulamik mutuku kum wibuk bukni, sik batakuka, Israel mutuku iknapnye tam ulamik nanguk, sik ulamik mutuku wibuk. Ara, Yehuda birye deiamukba, sikce dadeipdanin yangalamik nang arye ulamik mutuku ara, ‘Na si eren aik ara, sik mutuku uk dopnamne,’ tenebuka ati, sik mutuku wibuka erepdeibuk. Allah arye amutuku wibuka deiyok ara, Sion mutuku awamuka ati, Allah arye amutuku ati, kanye deiamuka ani, ‘Na si eren aik ara, asukumuk aunamle’ tenen, amutuku wibuka erepdeibuk.
Musa birye nyabukce, ayupu ton dukdongobuka nyabuk. Arup akunum nyapmasin yupu ara, moubuka teninauk unamlume. Ara, ‘Nun malye wininyap ning, namin kipnamsil’ tenen, anggun kam ning obuka, uku dongona ati, bobanamlum ning ara, anggun bidamang kanye arye tenepmunye sukumuk, arena meme. Ara, talye lo upliba, eipmunyakuk dipre bana meme.
Morobukce ayupu ton nyabuk. “Bukni, dipkoprob Allah anda atukwak mutuku noutamakuk ulamtum do? Kume, im deice babye weik mutukue. Tonda im deice pia eitam babye, dinap weik aulul bukni, Allah anda amutuku babye, kum suktalipnamtume. Anda weik mambulnye biti nyapkine. Ati ara, aning atonun, na dopse aik ara, pia mitik aik dopse ati, anyaik pum tam babye kum uptume. Anda tonok sukumuk kum ulyama ati nyapne.
Nyabukce ayupu ton nyabuk. “Ati ara, narye nyapsine. Nun ni Allah el si Yahweh arye, na ni koproba Daud biti, ‘Wininamne,’ nyapdeiamuk yupu dipkoprob nong akunum uple. Allah el si Yahweh arye, ‘Winipnamle,’ nyabuka nyalin yupu nyapdeiamuk touk, na ni koprop Daud el bulamukak akunum punupsirye, Israel ninye nirya talina ati, sik weik deiyoknye, Raja akunum unune. Tonda, Allah arye nyapdeiamuk touk, narye Allah el si Yahweh, el si eren aik akunum dopse. Anyaik pum tam ara, ninye weik arye Allah si erenamake. Nun ni Allah, elcuk el mapu Israel ninye ati, tuba kalikuka melilule.
“Na mapu Israel ninye, Mesir mutuku noutam ulamik bukni, narye lyepsirye anang bobise. Aninye bobise talak arye dipdongobuka, anoutam nirya ara, yuk mutuku si ton kum dopse. Ara, ‘Na si eren aik dopnamniyakak ara, ani, ani ton,’ pia kum nyalamse. Israel yala ninye, anggun yala ap, anggun asik si ap ara, weik aupmal bukni, aning nirya ton kum wipse. Deiyok ara, na mapu Israel ninye ati, ‘Sik weik deiyoknye kiplirye, na ning koproba tenyamse ninye talinamle,’ tenyamsinye bira, Raja Daud el uka. Ati ara, yuk mutuku noutam ton, ‘Na si eren aik dobikiba, anyaik pum tam na si erenamne’ tenen, pia kum wipdeiamse. Yerusalem mutuku uk wipdeiamse. Allah arye nyabuk. Ati, el si eren aik ara, amutuku uk unamle,” Salomo birye nyabuk.
Ura, na kayapo. Sik minop talak ulamik Israel ninye, asing eipmanto ning dam yangalamik bukni, anggun wini talak ululum ninye ara, pia yuk nang dam yanmalume. Anggunda, Sion mutuku, Pia Kam Una Deiyoknye Allah, el ulul mutuku, im deice Yerusalem asik dam yanganmalume. Anggunda, weik yupa weik kum nukmanto, im deice pil don nang teleb kanye deibuka, malaikat beribu-ribuan bulubuka, weklamak dam yanganmalume.
Ura, Allah Yahweh arye, Musa biti, “Asum-asum nirya ara, na dam yaminyeba, narye yupu nyapnamkine,” nyapdeiamuk touk, asum akunum kibukopura, Musa bira, Allah Yahweh ap, ninye ap el dan ati, dolamik aik pum tam wekelbalamukce, Allah Yahweh ap, sik neika yupu sisiklamdik. Atalak nirya ara, Musa birye, Allah el nong kum elilamuk bukni, Allah Yahweh arye, yupu nyanman ning ara, Musa adiparyuk kekelamuk. Ara, Allah anyaik pum tam yupu nyalilamuka ara, Allah el yupu nyapdeipnaba, Musa birye kekelamuk. Ayupu kekelamuka ara, min talak Allah arye, “Aning ara wininamlyame, aning ara pia kum wininamlyame,” nyabukabukce, keil pala deice sekuka, Musa biti arebukba, Musa birye akeil bitinye boyanuka, lideiamik marikna pum tam, Amarikna deice ara, malaikat urasin atonun, el si Kerub bitinye puturubuka deiamikce deice tam arye, Allah arye nyalilamuk yupu nyalamukba, Musa birye kekelamuk. Tonda, amarikna yo, el deice tam bublan ara, Israel ninye ara, ‘Allah arye nun malye unyap ning ati, wenepsilirye adiparyuk opsutu bukni, aning kumce, nunti pia bico tenesilirye, nun malye un ning kum daneipsilirye, teleb winilisulula ara, ani,’ tenebuka nyalamik.
Atalak aryuk ninye deiyoknye Raja Daud birye, “Nun ni koproba el siuk erenyapnye bira, Allah Yahweh ulule. Asukumuk, el si erena ap, el arena ap ati aik dopnamabe. Tonda, nun Israel yala nang arye, ‘Allah ara nun malye unyap ning namin kipdeiplirye, kum kipdeipnamsilʼ tenen, keil pala boyanuka taplakuka yangapdeibibirye, mesba dopnamabe. Dobibyopura, aning deice uku sekibirye,sapi ato ning obuka uku dongobibiba, uku dipnamla deice arye Allah ati arenamabe,” nyabuk.
Ura, Israel tam taleamuknye, Yerobeam el mi Nadab, eitam mutuku taleamuk talak ara, Salomo el mi Rehabeam, utam Yehuda mutuku noutam nirya, ninye deiyoknye Raja tikukce, taleamuk. Winibuka deiyok koubuka, Yehuda tam taleamuk talak ara, el Rehabeam bira, keting tamun, empat puluh satu (41) tahun ubuk. Rehabeam elce taleamuk keting tamun nirya ara, tujuhbelas (17) tahun deice arye, Yerusalem mutuku noutam ulamukce, amutuku taleamuk. Ara, yuk Israel tam noutam ara, yuk yala Israel ninye arye, weik asik ton dolamikba, aulamuk bukni, Yerusalem mutuku uk, kintinibuka dolamikba, Allah Yahweh arye, “Amutuku noutamuk na unamne. Na si erena ati, amutuku noutamuk dopnamniake. Amutuku ara, na tenyamse mutuku ati wipne,” nyapdeiamuk. Ura, Rehabeam el lin bira, Amon yala kil, el si ara, Naama ulamuk.
Allah arye Israel nang ati, “Amutuku nirya arepnamsine,” nyapdeiamuk mutuku, akunum binuka doprobik talak ara, sik Israel yala nang nirya bulubuka, Silo mutuku uk wekik. Winibikce, amutuku noutam ara, Allah ap, ninye ap epdanuka, Allah el si erena ati, tenda arye dolina aik kintinibuka deibik. Atalak ara, Kanaan noutam nirya ara, anyasik nirya, akunum obisibikce, amutuku nirya akunum dopromika ati, yuk tam nang ton, tonok nang babye, ton kum yanuka warikik. Talya urdem ulamik.
Peti Perjanjian dopmunce, el deice tam bublan tirikina ati, Penutup Perdamaian moubuka deipmunya deice ara, malaikat urasin atonun ning, el si ara Kerub, bitinye kintinibuka deipmunyak, asukumuk anoutam yaniba, na ap, an Musa ap, elanamname. Asukum elanamnam talak ara, narye na mapu Israel nang ati, an dam yanuka yupu nyapkinirye, “Aning wininamlume, aning kum wininamlume,” nyapdeipkiniba, ance sik Israel nang nirya, sik dam binuka nyapmimba, adiparyuk na yupu kekebuka unamake. Allah arye Musa biti laka nyabuk.
Kum oplobik bukni, Yosua birye nyamuk touk, aninye ara, pia ati pil melina ninye uk kipdeibukba, yo touna ap, mek kwebuka delilyangana ap, un ninye uk kipdeibukba, ulamikce, Israel nang melina ati, pil dolamik. Tonda, sik Israel nang malye ulamik ning kilina ati, Allah Yahweh el arena ati, memelamik mesba dam, uku dan yo ap, mek ap delilyangalamik. Aninye ara, atalak arye dipdongobuka, winilamik touk, wini talak abuku sekenyak talak babye, apiluk donyake. Allah Yahweh arye apil dona ati, kintinibuka delilul mutuku nirya ara, apiluk dopra banyake.
Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe.
Min nyapmasin ning eipsopura, na Yohanes arye aminyan eipse ning ton laka nyapnusine. Ara tonok weik mutuku dup, el si ara Sion mutuku, Domba Mi Atonye ap, elce akunum lyebuk ninye ap, sik yupa weik 144.000 ninye ap, amutuku dup deice tikmeka, eipse. Sik 144.000 ninye nirya ara, Domba Mi el si ap, el Li Kopropa Allah el si ap, sik asok deice sekdeiyamuk ning ara, eipse.
Nyabukce, ayupu tonap dukdongobuka nyabuk. Na Allah, na si erena ati, kam ning obuka uku dongonamlume. Wininamlumak ati, anggun minopce tuku dobuka, taplak deipmunyeura, na si erena ati, kam ning obuka arenak kintinipnamlume. Winipmunyak ara anggunce, domba basam ap, sapi basam ap, obuka boyamunyeura, ‘Nun malye wininyap ning ara, Allah arye namin kipsilirye, teleb kilinamsil tenen, uku dongolyanamlume. Tonda, ‘Allah ap, nun ap teleb kibuka neika uberye, el uk melinamsil tenen, kam ning obuka, tuku arye kintinepnamlum ning deice uku dongopmunba, uku diplirye siltong teleb ning na damak welebiliba kekepnirye, anggunti, na kanye delinamsine. Ara, narye anggunti, ‘Aning ara, anggunce na si erena ati, kintinip deipnalumak ara, aninguk deipnamlume,’ nyapnyeura, amutuku nirya ara, na siuk tuba teninamnulume. Anyapmasin touk akunum winipmunyeura, nara, anggun damuk yanganirye, anggunti teleb kilinamsine.
Anyapmasin ning nirya ara, Allah el arena ati, kintinipnamlum ning ara, anirya el ninguk ulule. Ati aning ara, anggun aik pum diamuk, dina meme. Ara, anggun ap, anggun mapu ap, anggun kilmapu ap, anggun melin kilapu ap, anggun melin nang ap, ura, anggun aik dam unyak Lewi yala nang ap, anggun nirya anyapmasin ninguk, anggun aik pum tam ara, dina meme. Allah el arena ati, kintinipnamlum ning ara, Allah el si Yahweh tenyamukce, wipdeibuk mutuku, aminyan nuknamsilakuk, dipnamlulume. Ara, el si erenakuk dinamlulume, nyapne. Allah arye, nuknamsilakuk, el arin ning ara, dipnamlulume. Yukak meme. Tonda, yata pil do nirya, anggunce pil donamlum talak nirya noutamak ara, anggun ni koproba Allah, ati, pin-pin asa arye, Yahweh el si erenamulume.
Anggun ni koproba Allah Yahweh arye, ‘Asukum ara, na si deipnamneʼ tenen, el si erena asik wipdeipnamlak ara, anyasik dam ara, el urasin damuk, elce kintinililyakuk, anggun nirya arye, Allah el aren ning noutam, bokuka boyanamlum ning nirya, asukumuk yanuka delinamlume. Ara gandum do, anggur mek do, minyak zaitun mek do, aning nirya noutam bokukapmunce, Allah ati arelyanganamlume. Tonda, sapi basam do, kambing basam do, domba basam do, ayala basam nirya ara, sik mi winiryuk min yuma deipnamle ning ara, anirya boyamunce, Allah ati arelyanganamlume. Aning nirya dina ati, Allah el arena ati, kintinip deipnamlumak ara, asukumuk yanuka dinamlume. Winipmunya deice arye, anggunce tuba-tuba teninamlume. Ara, ‘Se, nun ni koproba Allah Yahweh, elda weik mambulnyeʼ tenen, ilil upsiliba, el si erena ati, biknamlume.
Winipmanto ara, anggun ni koproba Allah arye anggunti pia teleb kipdeipsiliba, anggun talelulum ning weik tonun arepsilyopura, arepnamlume. Allah arye, “Na si erena ati, na si asukumuk deipnamneʼ tenen, kintinp deipnamlak ara, asukumuk arelbanamlume. Bukni, anggun unamlum dam kum bukni, pia yukak kintinip deiplyopura, anggunce wa wibuka koulamlum ning ara, noutam bokuka dopropmunce, bobuka, ‘Allah ati arelbinamane,’ tenepmamunye bukni, pera mutuku bana ati ara, binmanto kum upsilyopura, teleb uka.
Aketing tamun, aketing tamun nirya ara, anggun min yuma ning ayala-ayala nirya, adiparyuk Allah Yahweh el damuk arelyamunce, sapi basam tup bokuka tuba aupmalye ning ara, anggun ap, anggun mapu silip ap arye, aning neika dinamlume. Ara, anggun ni koproba Allah Yahweh arye, ‘Na si erebuka kina ap, na si erena ap arena ati ara, asukumuk atup ning arelyanganamnulume. Tonda atup ning dina ati ara, asukumuk dinamlume,’ nyabuka kintinip deiamnyak uk, yamunce dinamlume.
Tonda, winipmanto ara, anggun yupu deiyok talin nang arye, amutuku noutam unyak nang arye, malye un ning talibuka winibicopura, ninye yupu ton lipsisikuka bokeipnamlume. Bukni, ayupu kekepmamunye talak ara, ‘Se, nun mitik tonun walwal upmasile. Walwal upmasila anya arye, yata wiripnamap do, dipkoprob winipmak do, kum do?’ tenen, teniltona kipsilyopura, bataknamlume. Ara, tonye birye, tonye biti opnun do, kum do? Tonda, nong bol deiceuk opdakiba dila sakana do, kum do? Tonda, ninye dipkoprob opnamak ning ap, mangkau arye opnamak ning ap, tonda, yuk nang taleamikce ning ati, yupu nyabuka yeb-yeb an ning ap, aning-aning nirya ati, anggun yupu deiyok talin nang arye, kum sirya dakmanto upmakce ning ara, anggun adiparyuk, anggun ni koproba Allah Yahweh arye, ‘Na si eren mutuku ara ani,’ nyabuka, elce kintinip deibukakuk binamlume.
Wini talak ara, Allah el si Yahweh arye, ‘Asukumuk bulupnamlulume,’ nyapnamlak anyuk, Israel ninye nirya kintinibuka bulupnamake. Asukumuk, sik nirya yakiba, ayupu bobuka, tuba tonap anggun dam nukuka delinamlulume. Winipmunba, Allah arye, ‘Aning wininamlulume. Aning ara, kum wininamlulume,’ nyapdeiamuk yupu ara, Israel ninye nirya kekenamake.
Winibuka akunum winibikopura, yuk nang arye eibikce, lake nyalbikopura, sik Israel yala nang kekebik. Ara anang arye, “Kume, sik Ruben yala nang ap, Gad yala nang ap, tonda Manasye yala nang bukni, dana tam nang ap, sik mutuku ara, Yordan mek koubuka, otam keting yangan tam mutuku nang unyak bukni, nun mutuku tuku wililonak, asik si ara Gelilot, Yordan mek duman keting kumulban tam, nun mutuku noutam, weik mesba yanuka dopmake,” nyanmekba, ton tam Israel nang kekebik.
Ati ara, akunum deiyok koupnuyika ati, Yosadak el mi Yesua bira, Allah el aik pum tam pil melibuka dona deiyoknye ulamuka anya arye, el ap, el kwit capu nang ap, tonda Sealtiel el mi Zerubabel ap, el kwit capu nang nirya ap, sik nirya arye pil deiyok koubik. Sik minopce dobik pil ara, Israel ninye ati bico tenebuka pia meliamuk Allah, el si erena ati, keil yangapdeibik. Aning deiyok ara, ‘Allah ati si erebibyeba, nun malye winin ning namin kipnamsil’ tenen, kam ning obuka, akeil pala kibuka yangeiamik deice, uku sekuka dongonamikak ati kintinibikce, ila tamubuka dobik. Akeil pala kibuka yangapdeibik ning ap, akeil yangeibik deice uku sekuka kam ning obuka dongobik ning ap ara, minop talak Allah el pil dolamuknye Musa birye, “Allah el si erebuka arena ati, keil pala yangeipmunce, el arin ning aning, aning arenamlulume. Tonda, Allah el arena ati, winibuka-winibuka arenamlulume,” nyabuka sekeiamsukce, el buku noutamak deiamuk touk winibik.
Ati ara, Yerusalem mutuku ara, Allah arye wipdeiamukce, ‘Amutuku uniba, na si kibuka si erenamniake,’ tenyamuk mutuku anya arye, na patapnil ning ara, nyapnune. Ara, ninye deiyok nang, Raja nang do, yata mutuku nang arye do, yata yala nang arye, ‘Lik,’ tenebuka, ayupu yaniplobikirye, yuk yupu nyabicopura, Allah arye wenebuka opnamle. Aning atonun, ‘Yerusalem mutuku Allah el si eren aik binuka uluplobicopura, Allah arye, anang nirya obuka, sirya daknamle’ tenen, nyapsine. Na Raja Kores birye nyapsine. Nyabukce, surat sekeiamuk ningak yinibik. Ayupu akunum yinibikopura, Raja Darius birye nyabuk. “Na Raja Darius birye nyapmasin yupu uk, kekebuka winipmunyopura, aning ara, teleb uka. Ati, adiparyuk pia pi dobuka, kanye deipmunce, ayupu kekebuka, pil moubuka dopnin banamlulume, nyapsine. Na Raja Darius birye nyapsine,” nyapdeibuk.
Arebik ning dekna weik ning ara, ance pia moubuka tenipmince dolonamlyame. Winipmince, anggun ni koproba Allah arena ati, aning-aning weik deknamlulume. Ara, yim sapi ap, yim domba ap, domba basam mitik yim ning ap, tonda gandum do, jagung do, ato ning ap, Allah arena ati, anggur tapu duk mek ap, kintinipmince, Yerusalem mutuku bobinamlyame. Yerusalem mutuku bimince, anggun ni koproba Allah, el si eren aik dam, keil pala yangapdeibik ning deice arye, asukumuk Allah ati arelbanamlulume.
Ati ara, ‘Na Allah si erenamniak’ tenen, anyaik deice, na si deiamse aik ara, bataknamne. Ara, narye, ‘Amutuku talibuka, pia unamak’ tenen, sik deipkirikdop nang ap, anggun wini talak ululum ninye ati, arelamse mutuku babye, bataknamne. Tonda, na si eren aik ati, anggunce, ‘Kume, anyaik tuba wekibirye, Allah ati teleb ning tuba arepipyopura, adeice arye, ikin kum upnamsile. Tonda, Allah arye kum wenepnamsile,’ tenelulume. Bukni, tuba malyeuk winimunya ati ara, Silo mutuku ap, Silo mutuku ulamik ninye nirya ap ati, wenepsirye, obuka sirya dakamse touk, anggun wini talak ululum ninye, anggun mutuku ap, na si eren aik dolulum ning ap, anggun wenena ati, kum kipdeipnamne. Ara, na si eren aik, Silo mutuku ninye arye domikba, kum kipdeiamse touk ubuka, anggun ning babye, kum kipdeipnamsine.
Na Allah Yahweh arye nyapkine. Na Allah Yahweh ati, na si erena ap, na kina ap ati, aik domikcak bimince, anyasik dam tikuka ayupu nyanalyame. Ara, sik Yudea tam noutamak unyak ninye nirya ara, ‘Nun ni Allah, el si erenamap’ tenen, na si eren aik yakce ninye ati, narye, ‘Winibuka nyanamlyame,’ nyapdeipnukin yupu nirya, laka nyapnalyame. Tonok yupu babye, ‘Se, ayupu ara, bataknun,’ tenena kume. Tonok yupu babye, kum bataknalyam bukni, na nyapmakin yupu nirya ara, aninye kekenak binuka, laka nyapnulyame.
Bukni, yatanye birye do nirya, anyapmasin kam ning, domba ato ning opmace bukni, aning boyanuka, na si eren aik, sapi bol arye doltakna tenda aik bublan dam kum boyaceura, malyeuka. Dipkoprob, “Wininamlume,” nyapsin ning ara, ani. Na Allah Yahweh ap, ninye ap, ansinilina aik bublan dam, domba ato ning obice ninguk, bobuka yakirye, na Allah ati arelnamniyake. Bukni, winipmanto ning ara, sikce akam ning, Allah arelyangana ning ati ara, talye yukak arye obiceba, aning el ining banmalye ning ara, na Allah arye, “Aning ara, winibuka winimunce, onamlume,” nyapdeipsise touk kibuka, kum opmace ning ati, winibiceura, na yupu akunum yaninyak ati, ara pia malye wininyake. Deiyok ara, domba ato ning, el ining yukak bai tam saka banmalya ati, nyapne. Tonda, aning boyanuka, na Allah ati kum arepnamninyake. Ati ara, aning atonun winiplinye bira, na mapu Israel nang kan-kan ton, pia kum unamle. Anye dobuka, anggun ululumak batakuka, bai tamak uk kwetepmunce, bataknamlume. Anye bira, bataknamna ati, na mi kum unamle. El dipnamlarya.
Ati, anggun ni koproba Allah Yahweh arye, elce kintinip deiamlyakuk, pia teleb kanye deibuka umunce, aning dinamlume. Ara, anggun ap, anggun mapu ap, anggun kilmapu ap, anggun pil don nang ap, kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, sik ni ap akunum dibikba, batakik mapu ap, kwangnamne nang ap, anggun nirya ara, teleb kanye uk bobuka ulamunce, kil-kil asa arye neika unamlume.
Tonda, like tekbarye sum nirya ara, akwalina kwalibuka dipmunce, anggun ni koproba Allah Yahweh atibuk kibuka, si erenamlulume. Ara, talye sukum arye kum wininamlum bukni, Allah elce kintinip deipnamlakuk, asukumuk yambul Bai Aik Kwalina, akwalina kwalibuka dinamlume. Winipmunyopura, anggun ni koproba Allah Yahweh, elcuk, anggun wa wibuka koupnamlum ning babye, anggunce pil donamlum ning ayala-ayala nirya babye, pia teleb kipdeipsiliba, nong weik tonun arenamsile. Winipsilyopura, anggun nirya arye kanye deipmunce, el tibuk arenamlumce, el siuk erenamlulume.
Sik Lewi yala nang nirya ara, dan mutuku do nirya, sik mutuku koproba batakikirye, Israel ninye dabinuka ulamice mutuku noutamak ara, sik Lewi yala nang babye, abinuka ubikirye, ninye asik nang atonun, kibuka kum unamake. Aunamak mutuku noutamak nirya babye, na si eren piluk donamake. Tonda, ‘Na mapu koproba Israel yala ninye unamak’ tenen, na Allah Yahweh arye wipdeiamse mutuku uk, ubikirye, apil nirya talibuka donamake.
Tonda aninye winibikirye, Allah el si Yahweh, el si eren asik Yerusalem mutuku arelbanamake. Ara, Yerusalem bikirye, sik malye winipmace ning namin kina ati, kam ning obuka, Allah arebikirye uku dongolbanamake. Wininamaka ara, Yerusalem mutuku uk bobanamaka ati ara, winibikce deice arye, sik ni Raja Rehabeam biti, ‘Nun ni,’ nyabuka el tam kipropnamake. Rehabeam bira, Yehuda yala nang, sik ninye deiyoknye Raja ulule. El ulyak uk melibuka binuka si erebikcopura, aninye arye, na yanuka opnamniyake,’ Yerobeam birye utenelamuk.
“Aning atonun, yu deibukabikirye, ‘Kume, nun ni Allah el si Yahweh arye, melisilya deice arye, Asyur mutuku deiyoknye sirya bisipbuka yaniptibye. Ati Allah el deice uk nun kanye delinamabe,’ tenepmunce, aning nyapnutum toura, aning ton nyapnusine. Allah babye elce ton kum melipsutue nyapsine. Anggun tenipdelulume. Anggunce si erelulum Allah el si Yahweh ara, el si erena ati mutuku deice aik domikce, ‘Kam ning obuka, el si erena ati arenamabe’ tenen, pala keil yangapdeiamik bukni, ninye si Hizkia birye asi erena aik, talye ning nirya uluplobukce, apala keil yangapdeiamik ning nirya dalubuka, kum daneibuk. Winibukce, anggun Yehuda tam ululum nang ap, weik asik Yerusalem noutam ululum nang ap, ati nyabuk. ‘Kume wini talak ara, yuk-yukak nirya ara, Allah el si erebuka kam ning obuka el si erena ati kum arelyanganamlulume. Yerusalem mutuku noutamakuk, pala keil taplakuka yangeibubkak, asukumuk kam ning obuka Allah ati arelyanganamlulume,’ nyapdeibuk. Ati ara, anggun se tenebuka, ‘Allah ati morobibiba, Allah arye, melinamsilca,’ tenepmunyopura, Allah ati nyana teleb do? Kume, el babye kum melipsutue, nyapsine. Nyabuka atalak ara, Asyur mutuku ninye deiyoknye Sanherib birye, sik Yehuda yala ninye ap, Yerusalem noutam ululum ninye ap, ati nyapsile.” Asyur mutuku yin talin nang sik weik deiyoknye birye nyabuk.
Bukni, winipnamsina babye, anggunce tamubuka na dam yamunce, narye, ‘Aning ara wininamlulume, aning ara kum wininamlulume,’ nyapse atonun kekebuka winipmunyopura, yuk mutuku nang arye obisipsikirye, pia yukak bobinamsitinga babye, anggun kwit capu mutuku sirya, im sirya, daunamting nang babye, narye bulubuka, tonokak deipnamsine. Ara, ‘Aunamlume,’ tenen, wibuka kintinip deiamsisak uk umunce, na si erenamnulume. Ara, ‘Na si asukum unamle’ tenen, ‘Kintinipse mutuku ati nyapsine,’ nyabuka, nyapdeipsulum yupu ati nyapkine na nio.” Nehemia birye nyabuk.
Anggunda luba kinauk winilulum ninye ati ara, nyapsine. Minop talak ara, na Allah arye Silo mutuku ati, wibuka kintinyamse mutuku ara, ‘Na tenena ninye arye, na si erepnamniak’ tenen, na Allah arye, na mapu koprop Israel ninye ati, wibuka deiamseba, anggun si Israel nang, anggun apu yapu arye, amutuku ulamik talak ara, malye weik winilamikba, sik wenena ati winipse ning ara, tuba tonap tenenamlulume. Ati, anggunda minopce tamubuka, Silo mutuku bimunce, adiparyuk dipdenamlulume.”