Aning winipnuce talak ara, Lewi yala nang, imam pil dolamice nang arye, melibikiba, sik neika asukumuk binamnyake. Ara, sik anang arye, malye winipmace ning ara, bikikirye, “Aning ara, winipnamlume,” nyabuka, lipsisikin nang unyake. Sik Lewi yala nang ara, anggun ni koproba Allah Yahweh arye, ‘Na si eren aik pum pil donamakʼ tenen, wipdeiamuk nang unyake. Tonda, Allah arye, ‘Sik anang ara, na talinun ninye, sik teleb ulina ati, sik aLewi yala nang arye, na si deice arye teleb yupu nyanamnyake. Tonda, ninye arye yu yupu deice arye walana ap, ura olana ap, ura yu upliba, derelana arye malye yupu nyalana ap ati, ‘Apil donamakʼ tenen, Allah arye, teleb kibuka kintinip deibuk nang, unyaka anya arye, anang aryuk alilsisikin pil donamnyake.
Ulangan 10:8 - Eipomek8 Amutuku noutamak biyik talak ara, Allah el si Yahweh arye, Lewi yala nang ati wipdeibuk. Ara, Allah nyalin yupu yo lakase marikna, el si Peti Perjanjian pum tam deiamuk ning ara, anang arye bobuka banamika ati, anang wipdeibuk. Tonda, Lewi yala nang arye, Allah el si eren aik binuka wekikirye, el pil dopnamik ning ap, tonda, ‘Allah arye Israel ninye ati, teleb kipdeipnamsile,’ nyanamik ning ap, tonda, Allah el si erepnamik ning ap ati, Allah arye Lewi yala nang wipdeibukba, wini talak tuba sikce deibikba, dadeipdanin yangalamik Lewi yala nang ara, tuba apil dobuka unyake. Gade chapit la |
Ulangan 10:8
39 Referans Kwoze
Adobuka arelyanganamlum ning ara, urdem ati kume. Deiyok ara, na anggun ni koproba Allah Yahweh arye, anggun Israel yala ninye nirya umunya noutamak noutam arye, Lewi yala nang akunum wipdeiamse. Ara, na Allah Yahweh arye, ‘Lewi yala nang arye, na si eren aik pum tam talibuka, pil donamak talak nirya ara, na si deice arye, pil dobuka unamak’ tenen, ayala nanguk wipdeiamse. Aning ara, sik Lewi yala nanguk, na Allah si eren aik noutamak talibuka ubikirye, pil pia dopra banamake. Ati, anggun yuk yala Israel ninye nirya arye, anyapmasin ning dobuka, sik Lewi yala nang ati, arelyanganamlulume.
Allah Yahweh arye, Musa ap, Harun ap ati nyabuk. Na ap, ninye ap eldana ati, donyak tenda aik ulubuka bobanukce talak ara, arup nyapmasin touk, min yuma ara, Harun ap, el mapu anyapce, na si eren aik buru tam ning ap, anyaik pum tam ulye ning nirya ap, kintinip deibikirye, teleb ning arye siknipdongobikirye, kitipnamnyake. Winibicopura, sik Israel ninye bisik banukce talak ara, Harun ap, el mapu ap, sik minopce anyaik noutam delilamak ning ap, anyaik pum tam una ati, kintinip deiamikce ning nirya ap, minopce kintinip deibikirye, kalulongonamnyake. Akunum kintinip deibicopura, sik Kehat yala nang, sik pil ati, ayala nang yakirye, aning nirya bobanamyake. Bukni, sik Kehat yala nang arye, ‘Aning ara, nun ton eiptibyeʼ tenen, dilina ap, tonda anyaik pum tam delilamak ning dam bana ap, aning bol pina ap ara, kum winipnamnyake. Aning nirya ara, na Allah Yahweh ninguk unamle bukni, aning sik anang ton eibikirye, ‘Nun ton winiptibye,’ tenebicopura, atenebice nang nirya ara, dibinamake.
Anggunce nati kum wipdeiamnulume. Aning kum bukni, narye anggunti, ‘Aninye ara melisiniba, pia teleb ubica deice arye, duk moupnamle ning ara, pia unamle’ tenen, wipdeiamsise. Ati anggunce anyapmasin touk akunum winipmunyopura, anggunce na si deice arye moropmunyopura, na ni koprop kekepsilirye, aning-aning moropmunye touk arenamsile.
Nyabukba, Allah el si Yahweh arye, Yeremia biti tamubuka nyabuk. “Dipkoprop nyapkine. Ance na damak tamubuka yaminyopura, narye an dopropkinirye, melipnamkine. Winipkiniba, anda na damak tonap umince, na pil donanye unalame. Narye anti, weik mambul yupu nyapkiniba, ance ayupu kekebuka dopropmince, ‘Ayupu ara, deiyok aupnamle,’ nyabuka nyanamlyame. Talye tilila yupu ara, kum nyanamlyame. Ati, sikce, malye yupu nyapnamkiyake ning ara, kum kekenamlame. Winipminya deice arye, na yupu nyaipneba, na yupu laka nyana deiyoknye, nabi tuba unalame. Winiminyeura, sik Israel ninye nirya ara, tamubuka an damuk yakirye, ance nyanalam yupu kekenamake.
Sik imam nang ap, sik pil don ati melin nang, Lewi yala nang ap, sikce Allah ati, “Se, nun ni Allah, ance amutuku unyak nang nirya ara, teleb kipdeiplyame,” nyabuka morobik. Nyabuka morobikura, pia teleb sukum, im deice pia teleb lek pia teleb ululnye Allah arye, sik anang patabuk ati, morobik ning ara, akunum kekebuka melibuk.
Winibikopura, sik Lewi yala nang arye, aning erebuka bobana ati, Allah arye anang sik pil dona ati meliamukba, Allah Yahweh, elce nyapdeiamuk yupu sekeiamikba, deiamik Peti Perjanjian, nyalin yupu liamik yo marikna bobuka, Yerusalem mutuku tamubuka yanganmek. Yanganmek talak ara, Allah el arena ap, el si eren ap ati, yim sapi basam tekbarye (7) ap, yim domba basam tekbarye ap obikce, weik kwalya kwalibuka, Allah el si erebik.
Harun birye, aning nirya winibuka akunum arebukura, el taruk erebuka, Israel nang, sik abulupmekak urasin tam erebukce, ‘Allah Yahweh arye, Israel nang kalikuka melinamleʼ tenena ati, teleb yupu nyabuka morobuk ning ara, el taruk erepmok ning ara, batakuk. Winibika deice arye, ‘Allah arye sik Israel nang teleb kibuka delinamsilʼ tenen, pil dobuk. Tonda, asum arup talak ara, Allah el aren ning yala-yala nirya, akunum arebuka ati, mesba dam arye, mitik yukak koulukuk. Harun birye akunum Allah ati arebuk ning ara, ninye malye wininyak ning kilina ati, kam ning obuka arebuk. Tonda, ninye malye wininyak ning ati, Allah arye adiparyuk wenebuka oplotu bukni, sik pununa ati, kam ning obuka uku dongona ati, mesba deice arebukce, uku dongobuk. Tonda, ‘Ninyeʼ malye wininyak ning namin kiplirye, Allah ap, ninye ap, teleb kanye arye ton ap, teleb kibuka neika unamap,’ tenena ati, akunum nyabuk. Harun birye, anye aren ning yala wilye akunum arebukopura, mesba dam arye, koulukuka yayuk.
Winibuka daulamse bukni, atalak noutamak ara aning kum tenelamsibuk, Allah ara na nin deipnuk talak arye, ‘Anye bira na ning,’ tenyamnukce, wipdeipnuke. Winipnuka anya arye, elce bico tenyamnukce, el kanye aniryuk yukupnukce, lyepnuke. Tonda, Allah arye nati, ‘Anye bira, na yupu dobuka, Yahudi yala kum ninye ati peterelbinamle’ tenen, el mi kopropa Yesus pil dopnuka deice arye, winiryuk kanye talima arepnuke. Winipnuk ati, el mi kopropa Yesus arye winilul ning ara, laka nyalamnukce, na talima noutamak arye pil dolamnukba, na winilamse ning deice arye laka kipdeipnuk. Winipnukopura, narye, ‘Se, yatato pil donamne do? Tonda, yatato yupu peterenamne do?’ tenen, yuk nang dam binuka kum asilamse.
Allah arye nyabuk. “Aning ati ara, talye ninye, dib kum tenenyak ninye kan-kan una batakuka, yukak kilonamlulume. Amalye wininyak nang ap, anggun ap neika ansinibuka una pia malye weik ati, anggun yuk-yuk unamlume. Na Allah arye nyapsine. Narye anggunti, ‘Aning ara, malye ning anya arye, talina meme,’ nyapdeiamsise ning, tonok ning babye kum talibuka winimunyopura, nara anggun dam yanuka dopdopsinirye neika unamabe. (Yesaya 52:11; Yehezkiel 20:34, 41)
Telebe, na kayapo. Na Paulus birye, anggun Roma mutuku diba tenelulum ninye ati, teleb nyabuka, asurat sekeipsene. Na Paulus ara, Yesus Kristus el amu tam bukuka, el pil melibuka donanye, Rasulnye unune. Allah arye nati, ‘Paulus ara, na laka teleb yupu, ninye lyena yupu dobuka peterelbinamle,’ tenen wibuka deipnukce, el laka teleb yupu dobuka peterelbana ati, deiyok kouna deiyoknye, Rasulnye kipnuke. Ati, elcuk wipdeipnukba, apiluk donune.
Sik anang ara, ‘Allah si erepnamabe’ tenen, din dina kum arye, din si tebuka Allah siuk erelamikura, Allah El Dib Kanye arye nyabuk. “Anggunce Barnabas ap, Saulus ap, wibuka deipnululume. Na tenepse pil ‘Sik anang arye dopnamdak’ tenen, wiamsa ati, winira anggunce abitinye nang wibuka deipnululume,” nyabuk.
Nara, Allah Yahweh, aning-aning nirya talibuka, deice tam erebuka, mikip weik deiyoknye birye, ayupu nyapkine. Israel yala nang, talye daulamik nang weik tam ara, minop talak bataklamnikce, malye weik ulamik bukni, Lewi yala nang kan-kan, ton tam nang ara, kum bataklamnikce, na si eren aik pum tam, pil tuba melilamik. Ara, ninye el si Sadok, elce deiamukba, dadeipdanin yangalamika ani, deibikba unyak nang ara, na si erena ati, Israel nang arye arebikceba, kam ning dobuka obikirye, Israel nang, sik malye winin ning kum danalina ati, mesba deice uku dongonamake. Ara Lewi yala nang bukni, sik tuba teleb unyak imam nang ati nyapne. Minop talak, sik Sadok tam nang ara, Israel yala nang nirya arye, nati batakamnikce, malye weik ulamik talak ara, anang arye tuba teleb ulamikce, na si eren aik pum tam uamuk ning nirya kaliklamik. Ati ara, wini talak ara, sik Sadok tam imam nang arye, na dam yanuka, na si eren aik noutam pil donamake. Ara, Israel yala nang, ‘Nun malye unyap ning, Allah arye namin kibuka kilipsutueʼ tenen, kam ning arebikceba, Sadok yala imam nang arye, opnopura, sikcuk mesba deice uku dongonamak pil talibuka donamake. Israel nang arye, akam ning arebikceba, Sadok yala imam nang arye, aning kalebuka, meta ap, ining ap, doprobikirye, na Allah ati, arenamninyake.
Lewi yala nang weik tam nang ara, winibuka malye winilamik bukni, minop talak ara, ‘Na si eren pil donamakʼ tenen, sik Lewi yala nanguk wipdeiamsa ati, sik ayala nang aryuk, na Allah si eren aik pum noutam pil don nang ara, ayala nanguk bukni, bokuka mitik tonunuk, apil talibuka donamniake. Tonda, sik Lewi yala nang aryuk, na si eren aik, ‘Talye nang wekekicakʼ tenen, anyaik el si gapura, bublan dam kalikina ap, tonda na si erena ati aren pil don ning ap, Israel nang arye malye wininyak ning kum danalina ati, sik anang aryuk, apil talibuka donamake. Ara, kam ning obuka, arepnikirye, mesba deice uku dongonamak pil ap, sik Lewi nang aryuk tuba-tuba, talye daunyak Israel nang nirya ati, melinamake.
Ara, Allah Yahweh el si eren aik pum tam tikmunce, ‘Allah arye, nun malye winin ning kilipnamsilʼ tenen, el arena ati, kam ning obuka, ining arelamlum nang, anggun imam-imam nang ara, anggun babye Allah el si erenamlume! Diba, nun si erenyab Allah ati, nun nirya arye elti, “Allah anda, pia telebnye ulyame,” nyabuka, el siuk erenamabe!
Ati na kayapu, wini talak ara, anggun imam-imam nang ap, anggun Lewi yala nang ap ara, ‘Yo, dotalak-dorace, aning ara winipnamap ca,’ nyabuka, talye nyaltakna kume. Dipkoprop Allah arye areamsuk piluk moubuka donamlume. Allah arye anggun dem wipdeipsiliba, el yupu kekena ap, el si eren aik pum tam pil dona ap, Allah moron talak siltong teleb nyan ning uku dongona ap, tonda anggunce Allah el si erena ati pil don ning nirya ara, amutuku unyak nang ati, ‘Allah el yupu kekepnuyap,’ nyamunyeba, kekenamaluma ati nyapsine,” Raja Hizkia birye, nyapdeibuk.
Wini talak ara, yuk mutuku nang olana uk kum unyaba ati ara, sik Lewi yala nang arye, Allah Yahweh el si eren aik, sapi bol arye doltakne tenda aik domupu ning ara, tuba dakuka kum bobanamake. Atonun, anyaik noutam deiamik ning nirya ap, anyaik pum tam mambul pil don ning ap, sik Lewi yala imam-imam nang arye, tuba-tuba bobikirye, yuk pera mutuku ton kum bobanamake. Asukumuk unamabe.
Allah el si Yahweh arye nyabuka sekeibuk yupu, yo lakase arye domik marikna pum tam, Musa birye akeil dobuka ayo lakase pum tam dongamuk ning ara, sik imam nang arye, ayo lakase memamik marikna dobukabikce, Allah el si eren aik pum tam, pia Kurun aik nyalamik aik pum tam deibik. Anyaik ara, pia Kurun aik, talye nang ap, talye ning ap, pia kum binmanto aik nyalamik. Tonda, ayo lakase arye memamik marikna ara, Allah el si Yahweh arye, ‘Wininamlume, aning winipmunyopura, narye anggunti winibuka melinamsine,’ nyapdeiamukba, ninye arye kekebuka sekeiamik yupu aubuk. Ayo lakase arye memamik marikna deipmeka ara, anyaik Pia Teleb Koprop aik pum tam bukni, im deice pil don nang, malaikat urasin atonun kibuka puturupdeiamik, amalaikat bitinye, sik pol amu tamak amarikna binuka deibik.
Tonda, anggun ni koproba Allah Yahweh, el si eren aik pum pil don nang, sik imam-imam nang ap, hakim yupu lipsisikuka bokolina deiyok nang ap, wipdeipmaliba, sik anang arye, ‘Aning ara wininamake,’ nyabuka, nyapmace ning ati, yata nang do nirya, sik yupu malye kibuka yaniploplinye bira, adiparyuk wenebuka opnamlume. Ara, aning winipmunya deice arye, anggun Israel nang unamlum noutam ara, amalye winin ning winipmalinye ap, elce malye winipmalye ning ap, kum kibuka kilinamlume.
Sik anang pil don ning ara, ani. Allah arye nyapdeiamukba, Musa birye sekamuk yupu, libuka deiamik marikna yo, el si ara, Peti Perjanjian bobana ap, aning kalekina ap ati, pil talibuka dolamik. Tonda, Allah si eren aik pum tam uamuk yo lakase, meja ap, upna lana ati, delilamak ning ap, Allah el arena ati, anyaik pum tam uamukba, imam nang arye talibuka, pil dolamik ning ap, Allah arena ati, mesba delilamik ning nirya ap, ‘Aning nirya telebuk unamleʼ tenen, kaliklamik. Tonda, cang kain bola arye, ninye nirya talye wekna kum aik, pia teleb aik pum tam wekelbana ati, wililamik ning kintinilin nang ulamik. Sik Kehat yala nang arye, anyaik pum tam uamuk ning nirya ati, ilil kanye bobuka, apil talibuka dolamik.
Tonda, Harun el kisok kouna ati, cang kain, el si serban koupdongobuk. Aserban deice ara, dekna weik kat ning, el si emas arye, urasin teleb kibuka, memebuka deiamikak, bobinuka kitipdeibuk. Aning ara, el si hiasan emas bukni, el deiyok ara, ‘Aning kinikmalinye bira, Allah el koproba ululeʼ tenen, tenelamikce ongolamik. Tonda, aning winibuka, ongopdeibuka deice arye, ‘Harun bira, Allah Yahweh el tia tenda aik pum tam pil don nang, sik deiyoknye unamleʼ tenen, laka kina ati, kintinideibuk. Aning nirya ara, Allah arye Musa biti, “Winibuka pil dopnamlyame,” nyapdeiamok touk, apil dobuk.
Allah arye, “Aning wininamlulume. Aning ara, kum wininamlulume,” nyapdeibuk yupu nirya ara, Musa birye ayupu akunum sekukopura, Allah el si eren aik pum tam pil dona deiyok nang, sik Allah ap, ninye ap, ansinilina deiyok nang ati, ayupu nyabuk. Ura, anang ara, Allah el si erena deiyok nang ara, Lewi yala nang arye delilamikba, Lewi yala nang ulamik. Tonda, anang ara, Allah el si Yahweh arye, “Wininamsine,” nyabuka, Israel ninye ati nyalilamuk yupu libuka, bobalamik yo marikna, el si ton bobalamik. Tonda, Israel ninye sik wisi-wisi nang, yupu lipsisikuka bokolina deiyok nang ati arebuk.
Aweik tenda aik akunum kintinibuka deibukopura, Daud birye nyabuk. “Allah arye nyabuk yupu sekekuka, Peti Perjanjian pum tam deibik ning ara, Lewi yala nanguk erebuka bobanamnyake. Yuk yala nang nirya ara, apil kum doptinge. Deiyok ara, Allah Yahweh arye, ‘Sik Lewi yala nang ara, amem pil dona ap, aik ning bobuka bana ap, kalikna ap, moubuka deipnarye dina ap ara, Lewi yala nang aryuk pia tupa-tupa, na si eren pil talibuka donamakʼ tenen, Allah el si Yahweh arye, Lewi yala nang ati akunum wibuka deiamuk.” Daud birye nyabuk.
Nun ni Allah, el si Yahweh, el amu tam umunce, el si eren aik pum tam, pil dolulum nang nirya ara, Allah Yahweh ati, “Nun ni, anda pia telebuk ulyame,” nyabuka, el siuk pia erenamlulume. Ara, lukunyan noutamak bukni, Allah si eren aik pum, Allah ati, teleb ning arebuka, elti, kibuka, si eremunya deiyok nang nirya arye, Allah Yahweh ati, “Nun ni, anda pia telebuk ulyame,” nyabuka, el si pia erenamlulume.
Mining dam asik kunum kiklimunce, pia dam asikak akunum bikikcopura, sik anyasik dobuka ulamikce nang ati, sik talibuka ulamice nang binuka nyabikiba, sik amutuku nang arye, anye sik min bikamikce nang arye, el opmek ning ati, teleb aren ning dobuka, Allah ati arepnamnyake. Winipnamnyaka anya arye, sik anyasik talibuka ulamikce nang binuka, nyapmunyeura, sapi basam kil winiryuk nepnin banmalye ning tonok, kintinip deipnamanyake. Tonda, asapi basam kil ara, pil don ning, el ngang dam deibikiba, ikin ning kirikuka bobalamle ning ara, aning kum winyamica ati, pil kum dolamlye sapi basamuk, kintinip deipnamanyake.
Kehat birye deiamuknye Amram birye deiamuk nang ara, bitinye ulamdik. Ara, Harun ap, Musa ap, deibukba daulamdik. Ati, Allah arye Harun biti ara, ‘Na aik pum tam pia teleb mambul pil donamleʼ tenen, wipdeibuk. Winibuka anya arye, Harun birye deibukba, dadeipdanin balamik nang nirya ara, ‘Pia mambul pil, teleb lek piluk talibuka donamakʼ tenen, Allah si eren aik pum tam pil dona deiyok ning ara, ayala nang sik deice deibuk. Harun el yala nang aryuk, ‘Israel nang sik malye un ning ati, Allah arye namin kiplirye, kum kipdeipnamsilʼ tenen, kam ning obuka, Allah Yahweh dam bukni, mesba deice uku dongolamik. Tonda, ‘Allah arye, sik Israel nang teleb kipdeipnamleʼ tenen, sik ayala nang aryuk, Allah el si deice arye, teleb yupu nyabukabikce, Israel yala nang deice delilamik.
Piblisite