Ulangan 10:14 - Eipomek

¹⁴ Anggun ni koproba Allah, el si Yahweh arye, im deice tam babye, im deice noutam ulul ning nirya babye, el aryuk talilule. Aning atonun, tukwak tam babye, tuku deice ulul ning nirya babye, elce kwepdeibukce, talibuka ulule. Anggun ni koproba Allah, el si Yahweh arye, aning-aning nirya babye, el dem arye talibuka ulule.

Ulangan 10:14 Referans Kwoze

Keluaran 19:5

Ati ara, anggunce na arepsise yupu moubuka kekepmunce, talipmunyopura, narye anggunti ara, “Na tenen ninye tenepsinirye, pia kalikuka melinamsine. Ara, narye, ‘Wininamlulume, aning ara kum wininamlulume,’ nyalisinye yupu kekebuka dobolbamunyopura, narye pia talinamsine. Mutuku im sirya, mutuku sirya nirya ara, na ninguk ulule. Tonda, tukwak mutuku noutamak ara, yuk mutuku ninye weik aunyak bukni, anggun uk ara, na mapu atonun unamnulume.

Mazmur 24:1

Tukwak mutuku ap, tukwak mutuku noutamak ulul ning ap nirya ara, Allah Yahweh el ning anya arye, elcuk aning nirya talilulba, pia darabuka ulule. Aning atonun, im sirya, mutuku sirya nirya noutamak unyak ninye nirya babye, Allah Yahweh arye talilulba, el amu tam unyake.

Mazmur 115:16

Im deice ara, Allah Yahweh el babye, ‘Naʼ tenen, ninguk, kwepdeibukba, ulule. Bukni, tukwak mutuku ara, nun tukwak ninye, ‘Talibuka unamak’ tenen, kwepdeipsuke.

Nehemia 9:6

Tonda, sik Israel ninye arye, nyabik. Yahweh an tonok ara, dipkoprob Allah ulyame. Yuk ton kum ulule. Ancuk im deice kwepdeiplume. Ancuk im deice ulul ning kurya ap, wala ap, keting ap, aning-aning nirya kwepdeiplume. Tonda, laut mekwen ap, laut mekwen noutamak ulul ning ap, tukwak mutuku ap, tukwak mutuku noutamak ulul ning ap, nirya ara, ancuk kwepdeiplume. Winiplumce, aning-aning nirya kam una ati, isin areplumce, meliminba, tuba kam unyake. Ati ara, im deice yin talibuka unyak malaikat nirya arye, an si erena ati, kisok kanupdongobuka si erekinyake.

Mazmur 148:4

Se, im deice itam erepdeiamuk ning nirya arye, Allah el siuk erebuka, kibuka donamlulume. Tonda im deice alip tam deibuk mek ap, dua ap nirya arye, eluk si erenamlume.

1 Raja-Raja 8:27

Morobukce ayupu ton nyabuk. “Bukni, dipkoprob Allah anda atukwak mutuku noutamakuk ulamtum do? Kume, im deice babye weik mutukue. Tonda im deice pia eitam babye, dinap weik aulul bukni, Allah anda amutuku babye, kum suktalipnamtume. Anda weik mambulnye biti nyapkine. Ati ara, aning atonun, na dopse aik ara, pia mitik aik dopse ati, anyaik pum tam babye kum uptume. Anda tonok sukumuk kum ulyama ati nyapne.

Mazmur 50:12

Nara, din kum patanulul bukni, din patapnutua babye, anggun tukwak nang nirya ati, kum laka nyabuka moropsitinye. Deiyok ara, yata ning do, yala nirya ara, na ninguk akunum ulule. Ara, tukwak mutuku sirya, im sirya nirya ap, tukwak mutuku noutam ulye ning yala nirya ap, na ninguk akunum ulule. Aning-aning nirya ara, pia kum patanulule.

2 Tawarikh 6:18

Morobukce ayupu ton dukgobuka nyabuk. “Bukni, Allah anda atukwak mutuku noutamuk ninye ap neika uptum do? Kume, im ap, im deice bukni, pia eitam im alip tam bukni, eitam deice tam babye, pala weik mutuku ulul bukni, aning noutam babye, kum uptume. Anda pia weik mambulnye ulyama ati im tam babye, tukwak tam babye, dipkoprob suktaleptue. Ati ara, atonun narye dopkise aik babye, pia mitik aikuk dopsa ati, anyaik noutam babye, dipkoprob suktaleptuba, asukum pia kum uptume. Ara an tonok kum ulyamnye biti nyapkine.

Keluaran 9:29

Musa birye tamubuka, Firaun biti nyabuk. “Na minopce amutuku weik kota noutamak arye binuka, yukak binirye, na taruk erebuka, narye Allah ati moropnyopura, liman ap, dekne duk-duka purwu mok ap, adiparyuk kum danamale. Winiplya deice arye, an kel biknamlame. Ara, ‘Diba mutuku-mutuku nirya ara, Allah el si ara Yahweh, elcuk talibuka ulule’ tenen, kel kipnamlame.

1 Korintus 10:28

Wininamlum bukni, min kum diamunye talak ara, tonoknye birye, “Adipnuyap domba tup ara, yuk nang arye, ‘Isa si erepnamap’ tenen, arepmangu ning ak kwalibuka deipmabe,” nyabuka laka nyabikiba, kekepmunyopura, aning kum dipnamlulume. Ara, anggunce talye kanye bobuka diptum bukni, arup laka nyapmasilanye biti tenena ati ara, ‘Malye updeibibyak’ tenen, isa ati arepmace ning ara, kum dipnamlulume. Tonda, ‘Se, aning dibibnyopura, ayupu nyapmanunye bira, eipnilirye, malye kanye boplyak,’ tenena ati, isa ati areamunye tup ning ara, kum dinamlulume nyapsine.

Yesaya 66:1

Na Allah Yahweh im deice bukuka ununye birye nyapsine. “Winipmanto ara, tukwak mutuku ninye deiyok nang arye, weik bun ning deice bukikirye, yupu bokolilamak touk, nara, im deiceuk, pia bukuka unune. Im deice ununa anya arye, tukwak mutuku ara, yan dikdik sena ati delilamak touk, unune. Ati, yata wiribuka aik doptumba, anyaik pum tam dikdik sebuka uptinye do?”

Kejadian 14:19

Melkisedek birye, Abram biti, ‘Teleb kideipnamne’ tenen, teleb yupu nyabukce, ayupu ton nyapdeibuk. “Aning-aning deice tam ulirye, mikip weik ubuka ululnye ara, nun ni Allah, elce aning-aning ap, im deice ap, tukwak mutuku nirya ap kwepdeibuk. Nun ni Allah arye, an Abram ati, pia teleb kipdeipnamkile.

Rasul 17:24

Ura, mutuku sirya im sirya nirya ap, aubuk ning nirya ap, minop arye kintinipdeibuk Allah ara, elcuk alip tam nirya ap, tukwak tam nirya ap, talibuka ulule. Allah si erena ati, ninye sik taruk deice arye talibuka donyak aik pum tam nirya ara, pia kum ulule.

2 Korintus 12:2

Allah arye winipnuk ning nyapnune. Diba tenebuka Kristus ap talima dukdongobuka ulamse talak, men keting tamun yupa weik odeikin tahun akunum ubuk bukni, winipnuk ning tuba tenenune. Allah arye na dobuka, im deice winilye ning noutamak deipnuke. Dobuka eidipnuka ara, nong kipman dobuka bobinuk do? Na kanyeuk dobuka bobinuk do? Na walwal bukni, Allah eluk ara, dipkoprop kele.

Ulangan 10:13

Allah arye, ‘Aning ara wininamlulume. Aning ara, kum wininamlulume,’ nyalisilye yupu nirya, arup sum arye nyapmasin yupu ara nirya, moubuka kekepmunce, wininamlulume. Winipmunyopura, Allah arye aning-aning nirya teleb kipdeipsiliba, telebuk unamlume. Ati, arup sum arye dipdongobuka, dotalak nirya, telebuk upra banamlume.

Ulangan 33:26

Nyabukopura, ayupu ton nyabuk. Israel ninye ati kalikuka melilul Allah ara, el atonunye ton, pia kum ulule. El tonoka. Sik yuk yala ninye yuk-yuk Isa Mutuku Dongonye si erenyak ning ara, talye ninguk. Israel yala ninye, sik si erenyak Allah, elda pia teleb, mikip weiknye ulule. Sik ni koproba Allah arye, ‘Israel ninye melipnamne’ tenen, im ap, dua ap, deice arye, yanuka melisulule.

Ayub 41:11

Im amu tam ulul ning nirya ap, tukwak mutuku noutamak ulul ning nirya ara, na ninguk ulula anya arye, yata nang arye, nati, ‘Nun ning tia dopropsulum ning ara, tamubuka arepsilyame,’ nyapniting do? Aning ara, pia kum nyapnitinge. Aning nirya ara, na ning uka. Allah arye nyabuk.

Mazmur 68:33

Anggun yuk-yuk mutuku sirya, im sirya nirya, talibuka ululum ninye deiyok nang nirya ara, buluplumce, Allah ati, “Anda pia telebuk ulyame!” nyabuka, el si erenamlume. Diba, aning-aning nirya talibuka, mikip weik ulya deiyoknye ulula ati, nun nirya arye, Allah ati, “Anda pia telebuk ulyame!” nyabuka, el si erenamabe.

Kejadian 14:22

Nyabuk bukni, Abram birye, Sodom mutuku taleamuk deiyoknye biti, tamubuka nyabuk. “Kume. Na ni koproba Allah, aning-aning deice tam ulirye, mikip weik ubuka ululnye ara, nun ni Allah, im deice ap, mutuku ap nirya, Kwelina Deiyoknye biti nyapse.