Sik minop talak pil dolamik ning ara, mitik mambul pil, nong bol deice ning uk, mitik teleb winilamik bukni, Kristus el bidamang ining deice arye, nun kanye talima dipkoprop teleb kilisilya ara, mambul weik ulule. Kristus ara, pia diksukumuk ulamukba, Allah El Dib Kanye, pia aunamlanye bira, el mikip melyamuka deice arye, Yesus arye Allah ati, el bidamang el nong kopropa arepdayuk. Nun kanye talima noutamak, malye ning usilya deice arye, malye winibirye dibinyabe. Ati, Kristus el ining deice arye, nun kanye talima noutamak malye ning dipsuka deiyok ara ani. Ara, ‘Tukwak ninye arye, Pia Kam Una Deiyoknye Allah, el amu tam ubikirye, el pil donamak’ tenen, pil dopsuke.
Titus 2:14 - Eipomek14 Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke. Gade chapit la |
Titus 2:14
54 Referans Kwoze
Allah el kanye aryuk lyepsukce, teleb kipdeipsuka ati ara, Kristus ap, talima dukdongopsuka deice arye, winiryuk ninye atonun kipdeipsukba, unyabe. Lyepsukce, winiryuk ninye atonun kipdeipsuka deiyok ara, ani. Ara, minop talak Allah arye, nun dib tenenyap ninye ati, ‘Teleb winin ning yala-yala nirya pil dobuka unamake,’ tenyamsuka ati, Kristus deice arye, winiryuk ninye kipdeipsukba, unyabe. Na Paulus arye, nyapsine.
Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.
Wininamluma ara, talya ati kume. Deiyok ara, anggun kele, Yesus deksukce, lyepsuk ning ara, talye ning, kum winipnamle ning perak ap, emas ap, atonun ning deice arye kum deksuke. Anggun apu yapu nang arye, “Wininamlulume,” nyabuka, talye-talye peterelamsikbuk, ulalum ning talyamsuka noutam arye, Yesus arye min kum winipmanto ning deice arye, dekuka lyepsuke.
Anyapmakin yupu ara, pia dipkoprop ulula ati ara, ayupu diba tenebuka talinamlyame. Tonda, ance peterenaminye ninye ati, ayupu dem dobuka, mikip asa arye peterenamlyame. Ara, ‘Allah ati akunum dib tenelamik kili sal arye, yuk talye ning nirya batakikirye, teleb un ninguk pia patapliba, moubuka talibikirye, pia pi dobuka, diksukumuk wininamak’ tenen, nyapkine. Anyapmakin yupu nirya ara, pia teleb yupu ulul ati, yata ninye do nirya, aninguk kekebibirye, talibuka wininamyaba deice arye, ayupu arye, telebuk kilisulule. Ninye nirya ati, nyapkine.
Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.
Allah arye nyapdeibukba, Musa arye sekeiyamsuk yupu, mem yupu nirya moubuka talibikirye, diksukum kibuka kum dobolbanyak ninye ara, “Allah arye weneplirye, oplopnamle,” nyalamuk yupu aupmale. Bukni, Kristus arye nun tukwak mutuku ninye ati, el bidamnye nong arepdayukba, yu nang arye obikba, nun malye ulamubu ning lyepnamsuka ati dibuka deice arye, lopdeipsukce lyepsuke. Minop talak ara, mem yupu amu tam ulamububa, amem yupu arye tapu koulamsuk bukni, Yesus arye pil dopsuka deice arye akunum loplopsuke. Anyapmasin yupu ara, talye ati kum nyapsine. Ara, Allah yupu sekamik yupu noutamak aubuk yupu deice arye kel kinyabe. Ayupu ara ani. ‘Wanwanun yo deice deibuka olamak ninye ara, Allah arye aninye ati wibukaplirye, wenebuka oplopnamle.’ (Ulangan 21:23) Aning ati ara, kel kinyabe. Nun malye winina ati, Allah arye talye luparabuka oplopsutu bukni, Kristus wanwanun yo deice obikba, dibuka ara, talye ati kume. Nun malye winina ning pununa ati, dibukce lyepsuke.
Akunum boyasinyopura, anggun nong nirya ara, narye pia mek diksukum arye, anggun nirya mek likuka, teleb kipdeipnamsine. Winipsinyopura, anggun malye winimunce, Isa Mutuku Dongonye si erelulum ning nirya batakmumce, telebuk unamlume. Ara, narye mek diksukum busubuka, anggun nong deice purupdonoksinya deice arye, anggun talima pum tam malye winilulum ning ap, Isa Mutuku Dongonye si eremunye ning ap nirya ara, kum daneipnamsine.
Dipkoprop ara, Yesus Kristus wanwanun yo deice obika deice arye, Yesus arye na malye ulamse ning ati punupnuk anya arye, winipmanto ara na ap, Yesus ap dukdongobuka opnikba, dipse. Ara, Yesus dibuka deice arye, na babye dipna atonun winipsa ati nyapsine. Winipmanto ara, Kristus ap dukdongobuka opnika ati, wini talak ara, na babye yuk kum unun bukni, Kristus ara na talima noutamak ulule. Na ap, Yesus ap talima dukdongobuka unyame. Ati, ninye nong atonun ubuka tuba ununye talak nirya ara, Allah el Mi Kopropa Yesus ati diba tenenuna deice aryuk kam unune. Allah el Mi Kopropa arye nati bico tenepnukce, na pununa ati, el bidamang el nonguk aribukba, yu nang arye obikba, nati dibuke.
Ara, Allah el dipkoprop yupu talibuka dobolbalamunya deice arye, malye un ning nirya akunum batakluma anya arye, yuk diba tenena ninye ati, dipkorop kanye deipdanuka, melilanauk ululume. Aning ati ara, pia dipkoprop anggun talima ap, kanye ap, arepdamunce, bico tenebuka, weik arye melinlanauk unamlulume.
Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke.
Na unye touk, anggun babye, wininamlume. Na babye Ninye Mi Koprop Atonunye birye, na bidamnye ati patapnilye ning, ‘Ninye nirya melinamniyak’ tenen, kum yase. Narye tukwak ninye nirya, sik patalye ning ati, ‘Melinamne’ tenen, yase. Na unye touk, anggun na mapu babye atonun unamlulume. Nara, ninye nirya sik kanye arye, malye tenelamikce ning ap, malye winilamikce ning ap ati, ‘Allah arye sik wenebuka oplyak’ tenen, na opnikibuk dipnamne deice arye sekdongopnamne. Winipnyopura, ara ninye kisok arena atonun winipnamne. Allah arye tukwak ninye nirya wenebuka optu bukni, sik yok pununa ati, na dipnamne.” Yesus arye nyabuk.
‘Malye un ninye ara, ansinibuka Allah ap, talima dukdongobuka unamak’ tenen, pia diksukum unanye, Yesus Kristus arye, nun malye un ninye dekna ati, like tonok talak aryuk dibuk. Yesus ara, ninye nong atonun dayukce ulamuka ani, obikopura dipmok bukni, dibukura, Allah El Dib Kanye mikip deice arye, Yesus ati tuba tamubuka kam bukeibuk.
Anggunda, Allah Yahweh arye, anggun wipdeiamsukce, el ‘Naʼ tenen, nang kipdeiamsukba, ululuma anya arye, Allah el mapu koproba ululume. Tukwak nang mutuku-mutuku nirya, aunyak kan-kan arye, ‘Anggunda, na mapu koproba unamakʼ tenen, akunum wibuka kintinip deipsuk nang ululume. Ati elce anggunti, ‘Anggunda mambul weik nang. Yuk nang nirya ara, mitik teleb unyak bukni, Israel nang ara, pia telebuk akunum wipdeipsine,’ tenesulule.” Musa birye, sik Israel nang ati nyabuk.
Nun Deiyoknye Yesus Kristus arye, ‘Atalak malye-malye wininyak ninye ara, sik malye wininyak ning ap, malye tenenyak ning ap deice arye, na mapu malye kipdeibicak’ tenen, ‘Sik malye wininyak ning noutamak arye lobuka lyepnamle,’ tenyamukce, nun malye wininyap ning kilina ati, el babye el bidamang nong arepsuke. Yesus arye nun dekna ati, el nong arepsukba, malye nang arye obikba, nun pununa ati dibuk. Ara, nun malye wininyap ning wenena ati, Allah arye talye luba kibuka oplopsutu bukni, ‘Aninye wenebuka kum oplopnamne,’ tenyamukce, Yesus arepsukba, nun pununa ati dipsuke. Aning nirya ara, nun Ni kopropa Allah arye Yesus ati, ‘Wininamle’ tenen, wipdeiyamuk touk, Yesus winibuka deice arye deksuke.
Nyaplumba, Allah akunum kekepmasilce, anggun Israel ninye ati, arup arye nyapmasile. “Ura ‘Naʼ tenen, ninye ara, Israel ninye uka. Na mapu atonun unamak,” nyapmasile. Aning ara, min arye, Allah el si Yahweh, akunum anggunak nyapdeiamsuk touk, tuba tonap nyapmasile. Tonda, elce, “Aning ara, wininamlulume. Aning ara, ton pia kum wininamlulume,” nyapdeiamsuk yupu nirya, ‘Kekebuka wininamlum’ tenen, nyapmasile.
“Narye, ‘Talye ning si erenyak ning nirya, adiparyuk dakuka, uku dapnamlulume,’ nyapmasina deiyok ara, ani. Ara, anggun ni koproba Allah, el si Yahweh arye, akunum wipdeiamsuka atia. Anggunda, el ‘Naʼ tenen, ninye ati ara, yuk talye ning do, Isa Mutuku Dongonye do, aning-aning nirya ati, si kum erenamlume. Allah el siuk erenamlulume. Allah arye, ninye im sirya, mutuku sirya nirya ati, bico tenelul bukni, anggun Israel nang ati ara, weik arye bico tenesilirye, anggun diamuk ati, ‘Na tenena ninye dipkoprop’ tenesulule. Yuk ninye ton kume.” Musa birye, Israel ninye ati nyabuk.
Sik nirya arye, ‘Se yata wiripnamsil do?’ tenen, ilil weik upliba, imun kanye bobuka unamake. Allah an mikip weik deice arye, ilil upliba, keil talye darabuka bulamle touk, unamake. Ara, Allah arye meliamuk ninye sik bisibuka banmaca ani, amutuku noutam banamak talak, yan dobikce talak nirya ara, yuk malye nang nirya, olena kum bukni, keil ikin ulamle touk, talye tunim abuka unamake.
Yata winin ning do nirya, winipmanto ati ara, ance pil dominyebuk, akam nang eipkikirye, ‘Teleb winin ning kel biknamak’ tenen, aning-aning nirya pia moubuka, telebuk pil donamlyame. Ance Allah yupu peterenamlam talak nirya ara, ‘Yo bok doproptinye’ tenena ap, tenepce arye tilila yupu nyana ap, ‘Anang arye, nati, yata tenepnuninyak do?’ tenen, ilil una ap, kil-kil arye talye-talye nyana ap, anirya ara, kum wininamlyame. ‘Teleb yupu petereptinye bukni, naryuk tenepmanye touk, malye winina telebe,’ tenena kume.
Tonda, bona weik talin nang ati ayupu ton nyanamlyame. “Sik bona weik talin nang ara, sik bona weik aulye touk, teleb un ning weik arye pia upmunyopura, aning ara, bona weik talin nang atonun unamake. Tonda, ‘Se aning ara, ‘Na’ tenen ning anya arye, kum arenamne’ tenen, teniltona kum aryuk, talye kanye bobuka yuk ninye ati, anggun ning weik arye bokuka arenamlume,” nyabuka peterenamlyame. Na Paulus arye nyapmakine.
Ara, minop talak ulamik Yahudi ninye arye, ‘Allah nun malye winin ning namin kipsilirye, nun moronyap yupu kekenamsil’ tenen, Allah el si erena ati, kam ning obuka arena ap, nintong teleb ning dobuka, uku dongona ap, ulamika atonun, Kristus arye nunti, bico tenebuka kanye talima arepsukce, elcuk el bidamnye nong, Allah ati aribukce, nun yok pununa ati dibukura, Allah arye, kanye deibuk. Yesus arye, kanye talima arepsukce, bico tenesilye touk, anggunce yuk ninye nirya ati, bico tenebuka melilanauk unamlulume.
Tonda, minop talak ara, Isa Mutuku Dongonye si erelamikce, malye un ning weik arye, winilamik bukni, atalak arye diprongobuka dounamle talak noutamak nirya ara, aning nirya tuba tonap kum wininamake. Isa Mutuku Dongonye si erebikirye, malye un ning ton kum ubikirye, malye kum updeipdanamake. Na Allah arye, ‘Like,’ tenenun ning nirya kum wininamake. Atonun talye ning yupu nyana ap, kanye bona kum ning, ninye arye kintinibuka deibikirye, si erelamak ning ara, sikce kum erenamake. Tonda, na Allah ati, batakaninyakce, pia malye-malye weik ulamik ning ara, tonap kum wininamake. Bukni, aning nirya ara, narye kum kipdeipnirye, aninye nirya teleb kipdeipniba, sikti, lyepropnamne. Winipnyopura, sikda na mapu koprop unamake. Nara, sik ni koproba Allah unamne.
Na ikin ulamnuk ning nirya noutam arye lolamnuk Allah arye, ‘An mapu bitinye ati melibuka pia teleb updeipnamle’ tenen, nyapne. Tonda amapu bitinye ara, yuk ninye arye sikti, ‘E, amapu ara Israel birye deiamuk mapu ururake. Sik apu yapu ara Abraham ap, Isak ap ulamrik. Sikda ayala nang arye deibik,’ nyabuka ‘Pia nyanamake’ tenen, Allah moropne.” Israel birye nyabuk.
Allah el tam kipdopmunyopura, Allah elce anggun dam unamle. Sik malye ning paliplibuk, taruk mek liklamak touk, anggun malye winimunye nang ara, anggun malye ning batakanamlulume. Anggun kanye bitinye kisululbuk, kanye bokoltosulul nang ara, anggun kanye talima noutam malye upsilye ning nirya batakanamlulume. Allah arye nyasilye yupu kekebuka wininamlulume. ‘Tonok kanye bobuka unamlum’ tenen, nyapsine.
Aning kum bukni, Allah arye, ‘Na si erebuka, nati kanye deibikirye, na melin kilapu ara, wininamake,’ tenesilye touk, ninye melina ati, teleb pil dona ap, ninye bico tenebuka melina ap, diksukumuk unamake. Yuk ninye, aunyak ning eibice, deice arye, ‘Akilapu ara, telebuk,’ tenepnamake. Kwerya weik ning donyak deice arye kume. Allah si erebikirye, diksukumuk unyak kilapu ara, amalye winin ning kum wininyake.
Yesus elce, ‘Ninye mutuku-mutuku nirya sik malye unyak ning kum daneipnirye, dekuka lyepnamne’ tenen, elce el nonguk arepsukbuk obik. Ara, nun malye winin ning ati, talye oplopsutu bukni, Yesus arye nun pununa ati dipsuke. Allah arye, ‘Teleb talak ara, atalakuk,’ tenyamuk touk winibuk. Allah arye, ‘Ninye nirya lyeptinye’ tenen, patalamuka ara, awinibuka deice arye akunum lak kipdeipsuke.
Nun ka Simon Peterus birye akunum laka nyapmasile. Allah arye Yahudi yala kum ninye mutuku noutamak, ‘Na’ tenen, ninye ton unamak’ tenen, minopce wipdeiyamukba, sikce Yesus ati dib tenebike. Dib tenebik deice arye, elce ninye mutuku-mutuku nirya ati, bicoe tenesilya ning ara, akunum laka nyabuka peterepsuke. Anirya ara, Simon arye akunum laka nyapmasil atia.
Im deice arye yayuk roti kwaning, kam una deiyoknye bira, ara na uka. Akwaning nyapmasina ara, dobuka diplinye bira, nong dipmalya babye, pia kam unamle. Domon yupu deice arye, kwaning nyapmasina ara, na nong atia. ‘Ninye mutuku-mutuku nirya lyepnebuk, kam unamak’ tenen, na nong arepsine.” Yesus arye nyabuk.
Batce dipnulinye bira, batce bama labuka, uku dongoplirye, batce nonguk dilamle touk, Yesus arye ninye nirya bokuka, teleb ning doproplirye, malye ning bataknamle. Ninye arye din ning teleb ning yo lalina deice delilamak touk, Allah arye elti, diba tenebikirye, diksukumuk wininyak nang ara, aninye dobuka im deice deipliba, el ap neika pia unamake. Tonda, ninye arye, din ning bama labuka, uku dongolamak touk, Yesus arye malye winin ninye nirya dobuka, uku pia dilulak dongopnamle. Auku ara pia kum tangaptue, pia dinamle.” Yohanes arye awekmek nang nirya ati, adomon yupu nyabuk.
Maria arye sal mi deipnamle. Deiplyopura, el si Yesus nyapnamlyame. Yesus nyapnamlama deiyok ara, ‘Elda Ninye Lyenanye ulule,’ tenena ati nyapnamlyame. Allah el mapu nirya sik malye wininyak ning ap, malye tenenyak ning ap ati, ‘Allah arye wenebuka oplyak’ tenen, Yesus arye aning nirya kum daneiplirye, ninye weike lyepnamla ati, ami el si Yesus nyanamle.” Malaikat arye Yusuf ati nyabuk.
Na yanamne sum ara, malye ulamice ninye ap, teleb ulamikce ninye ap ati, yupu lipsisikuka bokolina ati yanamne. Nara, yupu lipsisikuka bokolina deiyoknye unune. Winipmanto ara, dekna weik ning el si perak, uku dabikirye, moubuka dinmakibuk, uku arye malye wamlye nirya uku diplirye, teleb ninguk laka upliba, aning dobuka, moubuka memelamak touk, narye malye ning aning-aning nirya, kum kipdeipnirye, teleb kipdeipnamne. Malye ning bataknamne. Teleb ning ara, ‘Naʼ tenen, deipnamne. Aning atonun, dekna pia weik ning emas do, perak do, malye wamlibuk, teleb kililamak touk, narye sik Lewi yala nang, imam-imam nang nirya ati, yanuka yupu lipsisikuka bokeipnirye, teleb kipdeipnamne. Winipnyopura, sik Lewi yala deiyok nang arye, ila tuba tamubuka, na Allah Yahweh ati, kam ning obuka arelyakirye, na si erena ati, uku dongopnamake. Winibikiba, na Allah arye kanye deipnamne. Narye sikti, teleb kipdeipniba, na tenenye touk wininamake.
“Tonda, ‘Pinehas ap, elce deiplyeba, dadeipdanin banamak nang ati ara, sik anang aryuk, imam pil don nang ara, moubuka talibikirye, pia ati pil dopnamake,’ nyapne. Aning deiyok ara, ani. El Pineas birye, na Allah ati, ‘Elda weik mambulnye ati, el siuk pia erenamabʼ tenen, anang bitinye obuka deice arye, teleb pil dobuka, teleb ulamukce, mikip arye pil dolamuka ati nyapne. Tonda, Israel nang ara, malye weik upmangubuk elce, ‘Allah arye, sik malye unyak ning ara, kum kipdeipnusilʼ tenen, pia teleb pil dobuk deice arye, anggunti teleb kipdeipmanue. Ati, el ap, na ap pia teleb kibuka neika unamname,” Allah arye nyabuk.
Aning nirya ara, talye ning ulul bukni, anggun Israel ninye tonok ara, Allah arye akunum wipdeipsukce, ‘Na tenena ninye’ nyabuka, akunum nyapsuke. Tonda, ninye arye besi do, emas do, ‘Malye ning kum dalirye, teleb ning pia upnamle’ tenen, uku dalamikiba, uku diplirye, malye ning kum danalule. Aning atonun, Mesir mutuku noutamak, Allah arye anggun Israel ninye malye winin ning ati, kilipsukce, ‘Winira, anggunda diksukum ninye unyake,’ nyapdeipsukce, teleb ninye uk kipdeipsuke. Teleb kipdeipsukce, Mesir mutuku noutamak arye, ikin weik ulamupu buk, dalubuka dobukapsukce, lyepsuke. Wini talak, anggunda, el ‘Naʼ tenen, ninye akunum ululume. Allah arye anggunti, ‘Na mapu’ tenen, melibuka pia talipnamsile.” Musa birye nyabuk.
‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.
Ara, Allah elce, ‘Wininamne, wininamne,’ tenelul touk, aning-aning nirya talilirye, pil doliba, aning nirya elce tenyamuk touk, aninguk winilule. Tonok ning babye, kum batakalule. Aning atonun, minop talak, nun min kum deiamsik talak arye, Allah arye nunti, wepdeiamsukce utenyamsuke. Yesus Kristus ati dib tenebupa deice arye, Yesus ap, kanye talima dukdongobuka ulamibya ani, sirya talak ara, Allah arye, ‘Aning-aning arepnibuk, pia talinamake,’ tenen, kintinipsuk ning nirya ara, arepnamsile.
Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.
Aning atonun kum bukni, Allah malye winina pia kumce, dirinak ulamle touk, nun babye, malye winina kumce, telebuk ubirye, dirinak atouk ulamibyeura, nun nirya ap, tonok kanye tenebuka, ansinibuka unyabe. Allah el yupu uk kekebuka, dobolbabyeura, Allah el Mi Yesus, el ining arye, nun malye tenenyap ning ap, malye wininyap ning nirya ap, kum ubuka deipsilirye, lyepnamsile.
Bukni, nun malye tenenyap ning ap, nun malye unyap ning ap ati, “Kume, aning ara na dipkoprop malye winipse,” lak akarye laka nyabuka, amalye winina ning dipkoprop batakipyopura, Allah arye kum batakasulule. Nun winilamibye touk wibuka, yupu yuk-yuk bokuka delisulule. Allah arye nunti, ‘Sik malye winilamice bukni, aning tonok, adiparyuk kum opnusine’ tenen, bataksilirye, talye kanye dolule. Winilirye, Allah arye nun malye winilamibye ning nirya ati, kum daneipsilirye, amalye ning ati, ila tamubuka tonap kum tenesulule. Nun malye ning namin kipsilirye, telebuk ulisulule.
Ara, Yobel keting tamun akunum uplyopura, apia talye kankan ulamlinye ap, el mapu nirya ap, tonda sik mapu silip nirya ara, sik tam nang ulamice sukum ulamikirye, pil dolamica ani, batakdongobikceura, anye ap, el mapu kilapu ap, tamubuka el mutuku koproba bilirye, el apu yapu nang arye taleamik mutuku ak, tamubuka binuka daunamlule.
Piblisite