Winibuka teleb kipdeipsiniba, na yupu kekebuka diba tenepmunce, na amu tamuk unamlume. Ara, na Dib Kanye anggun talima pum tam dongopnamsine. Dongopsinyopura, na Dib Kanye melipsilya deice arye, anggunce, ‘Se, nun ni koproba, Allah arye nyasilye yupu nirya, moubuka kekepnamabe.’ Allah arye, ‘Wininamlulume. Aning ara, kum wininamlulume,’ nyapdeipsilye yupu, ‘Pia moubuka dobolbanamabe’ tenen, kanye lamapdongobuka, telebuk unamlume.
Titus 2:12 - Eipomek12 Nun ni Allah, el bico tenepsilirye, talye melisilya deice arye, peteresiliba kel bikinyabe. Ara, Allah yanibuka kanye talima malye winina ap, talye nang arye tukwak malye ning tenebuka kanye engena ap, ati, “Kume, aning pia kum wininamlume,” nyabuka peteresululba kel bikinyabe. Tonda, nyanamlyame. Allah bico tenesilirye, lyesulul anya arye, “Anggun patasilye ning. ‘Talye kanye bobuka winipnuyap,’ tenena kume. Anggun bidamnye ati moubuka dilanamlulume. Allah pia funguk ulirye, pia teleb ulye touk, anggun babye diksukumuk ubuka teleb nang unamlulume,” nyabuka peterepsine. Wini talak babye, aning atonun wininyabe. Gade chapit la |
Titus 2:12
59 Referans Kwoze
Nyabukce, el yupu kekebuka dobolbalamik nang ap, abulubuka wekmek nang nirya ap ati, “Na dam yalulume,” nyabukce ayupu ton nyanmok. Yata kil do, yatanye do, nati diba tenepnikirye, na dobolyanganamniyak nang ara, sik ning atibuk, ‘Aning mambule,’ kum tenenamake. Sik wenebikiba dipnamak nanguk, wanwanun yo bobuka talya mangkau asa balamikirye, ‘Akunuma, anang arye oplopnamniaka ara telebuka, na kam unmana ara mambul kume,’ tenenyak touk, na mapu ababye, ‘Yu nang arye opnamniak do?’ tenena kumce, sik kam un ning ap, sik patalye ning ap atibuk, kum tenenamake. Yesus dib tenenyaka ning ati ara, yuk nang arye opnukcopura, ‘Ara mambul,’ kum tenenamake. Na yupu uk kekebuka dobolyanganamniake.
Ura, winipmanto yupu ap, lakak kekepmanto yupu ap deice arye nyapmasina ara, anggun kanye talima nirya min kum wisibukba, talye nang arye tenelamak touk, tuba tenelulume. ‘Deiyok dan do?’ tenen, teneipdemunce, ‘Deiyok ning moubuka kum kel kipmunyak’ tenen, lakak aryuk nyapsine. Minop talak ara, anggun nong ap, kanye talima nirya ap ara, malye una deiyoknye biti arilamlumba, tapu kouamsuka anya arye, el amutamuk bukuka ulamlumce, malye winin ning aning-aning nirya weika arye talibuka winiprabalamlume. Minop talak ara, malye winin ninguk talibuka winiprabalamlume. Bukni, wini talak ara teleb kibuka winin ninguk talibuka wininamlulume. Ara, anggun nong ap, kanye talima nirya ap ara, Allah atibuk arepmunce, el amutamuk bukuka dobolbamunyeba, elce talinamsila deice arye, diksukum ubuka un ninguk talibuka unamlume. Winipmunyopura, anggun malye winin ning nirya kum kipdeipsilyeba, teleb nanguk ubrabanamlume. Tonda, ‘Elce diksukum ninye kipsilirye, teleb kibuka deipnamsil ca’ tenen, teleb winin ninguk talibuka ubrabanamlume.
Se anggun mikip pia weik ululum nango, dan talak tonap na ni Allah ati, yep-yep abuka nalinamlum do? Winipmunyeura, yuk nang arye ton, kekebikirye, malye yupu nyakiba, alye weik unululule. Anggun ninye deiyok nang ululum nang ara, ouku weik arye ton, nong kum upnamle yupu nyakiba, ance kanye deibuka kekenamlum do? Tonda, ouku weikto arye, tilila yupu kekepmunce, dobonmanulum do?
Ura, arup anyapmasin ning nirya ara, Allah aning nirya ubuka deice arye, bitinye ning lakak upsiliba, diba tenebuka kele kiptume. Tonok ning ara, diksukum un nang, kanye imun ning ap, talima winin winildena ning ap upsile talak noutam, ikin kanye bobikcopura, Allah arye aninye, sik lyen ning ati ara, el kele. Bitinye ning ara, elti, diba kum tenebikirye, pia malye wininyak ninye ara, Allah arye sikti, atalak noutam babye wenelul bukni, sirya daknamle talak, ninye bokuka oplopnamle talak, aning ati ara, ‘Sirya talak arye, pia malye kibuka oplopnamne,’ tenelule. Bukni, wini talak ara, tia talak ati, anang sik weik wenena ning tenepce delina ara, el kele.
Yata ninye do, nirya, “Diba tenepsirye, Allah ap, na ap neika unyame,” nyanyak nang ara, adiparyuk Yesus ulamuk touk wininamnyake. Yuk ton kume. Winilamibya deice aryuk, ‘E, Allah ap, nun ap neika unyabe,’ tenebuka kel kinyabe. Ati, Yesus winilamuk touk, kum wininyak nang ara, ‘Allah ap, nun ap, neika unyabe,’ talye nyaplopting bukni, ara tilila yupu uk nyanyake.
Malye nang arye, ‘Allah yupu nun lik’ tenen, ikin ning weik na nong deice deiamnik ning ara, na tonok kume. Dipkoprop ning ara, yata nang do nirya, ‘Yesus Kristus ap, kanye dukdongobuka Allah yupu nyasilye touk, nun diksukumuk unamyabe,’ tenenyak nang nirya ati, malye nang arye sik nong deice ikin ning delinamake.
Ati ara, moubuka kekenululume. Na Yohanes arye nyapsine. Ikin ning weik yanamla ati ara, Allah arye wiamukba, elti, diba tenekirye, el yupu talibuka dobolbanyak ninye nirya ara, ikin ning upsilya babye, batakna pia kum diparyuk, pia pi dobuka, eltibuk, diba tenemunce, Yesus ati pia talibuka unamlume. Ikin weik unamsil ning ara, min kum kum danamle ati nyapsine.
Aning peterelamlyam deiyok ara ani. Ara, minop talak nun babye kanye bona kum arye, walwal ulamubu. Ara, malye kibuka, ninye deiyok nang yupu ap, Allah yupu ap, kum kekelamubu. Yata malye winin ning do, malye patan do, malye kanye tenena do nirya, amalye ninguk patalamsuka deice arye, yukulamsukce, nun malye ning winina deice arye, tapu kouamsukba, pia malye ulamubu. Atilila ning diba tenelamuburye, yuk nang ati, yu weik ubuka, waldana ap, oldana ap, ulamubu. Tonda, yuk nang ning ati, ‘Se sik ning ara, naryuk doproptinye’ tenen, kanye talima engena ap, ulamuburye, nun nirya arye, yuk nang nirya ati, lik upsinabuk, ‘Pia lik,’ tenelalamubu.
Minop talak ara, sik Yesus ati dib tenena kum ninye arye, malye-malye winilamak touk, anggun babye, atonun malye winilalume. Asing arye, kum eilinyap bukni, im noutamak balamak Isa mere, sikti, talipsinaba, sik weik deiyoknye Isa Mutuku Dongonye, el yupu kekebuka ulalume. Ara, Allah el yupu yaniltalamak ninye ara, Isa Mutuku Dongonye elcuk sik kanye talima taliliba, malye weik wininyake.
Tonda, sik diba kum tenenyak ninye arye winilamaka atonun, tuba kum wininamlum bukni, Allah arye anggun malye kanye tenen ning nirya dangupsilirye, kanye talima winiryuk ning punubuka arisilya deice arye, anggun winin ning nirya ara, telebuk wininamlulume. Anggun kanye talima winiryuk ning akunum upmasilyopura, Allah arye, ‘Wininamake,’ tenesilye ninguk, moubuka kel kinamlulume. Ara, ‘E, dipkoprop teleb winin ning ara ani. Winibibiba, Allah arye kanye deilisilye ning ani. Malye ning tonok babye kum winiplirye, diksukum winin ning ani, kel kinamlum’ tenen, nyapsine.
Aning ati ara, wininamlulume. ‘Malye una deiyok ning malye kipsilirye, nun kanye talima talisilirye, lilosululba, malye winin ninguk patasilya deice arye, malye winibibyak’ tenen, kanye moubuka, malye winin ning nirya batakmunce, telebuk unamlume. Malye winin ning nirya, ila tuba tonap pia kum wininamlulume.
Tonda, narye, ‘Wininamlulume,’ nyabuka peterelamsise yupu nirya, ‘Aninye babye, aning atonun winibuka unamak’ tenen, na yupu bobuka peterelbinamlume. Wininamlum talak nirya ara, na dipkoprop nyapsine, na ap, sik ap, neikak unamabe. Winibuka daulamibya ani, sirya talak babye, na ap, sik ap, pia neikauk unamabe.” Yesus arye nyabuk. Telebe, na Matius arye ayupu sekdeipsine.
Bukni, anggunda Allah El Dib Kanye Yesus arye arepsuka ara, anggun talima ak, wekamukce, tuba ulula ati, talye ninye arye nyapsitinge yupu ara, kum patasulule. Anang nyasikce yupu ara, kum kekenamlulume. Bukni, Allah El Dib Kanye arye, aning-aning nirya peteresulule. Aning nirya peteresilye ning ara, moubuka kekenamlulume. El babye, el peterelye ning babye, talye kum, dipkopropuk ulule. Ati ning ara, elce peteresilye yupu uk, kekebuka dobolbalamunyopura, Yesus ap neika uk unamlume, nyapsine.
Aning-aning nirya ara, na nyapmasin touk, Allah arye malye kibuka oplobuka, kum ubuka daneipnamle. Aning ati ara, anggunda yata ninye atouk ubuka unamlulum do? Kume. Yesus tukwak tamubuka yanamla ati, ‘Allah arye wibuka tenyamuk sum ara, dan sum yanamle do?’ tenen, kintinibuka pia dinauk unamlulume.
Minop talak ara, na yupu kel kiyamik nang arye, ayupu kum kel kiyamik nang ati, peterelamik bukni, wini talak ara, tonoknye birye, el aik dam ululnye biti, “Allah ap talima dukdongobuka neika una ati, winipnulyam, winipnulyam,” nyabuka, tuba-tuba kum peterenamle. Aning atonun, tonoknye birye, el weit kopropa ati, “Allah ap, talima dukdongobuka neika una ati, winipnulyam, winipnulyam,” nyabuka, kum peterenamle. Kume, narye na yupu dobuka, anggun kanye talima noutamak dongopnamsina ati, weik mambul nang babye, pia mambul kum nang babye, anggun nirya ap, na ap talima dukdongobuka neika unamabe. Atalak ara, na mapu nirya kel kipra banamaka ati, sik kum peterelanamake.
Wini talak tukwak mutuku unyakce, aning-aning nirya, weik talikirye, bona weik talin nang atonun unyak ninye ati, nyanamlyame. “Anggunda maknya kanyeuk, kintinina ap, dina ap, meme. Bona ap, yo bok ap, tukwak bona weik nang nirya ap ara, anang deice anggun kanye delina kume. Aning arye kum lyepsutue. Aning nirya ara, pia unamle ning kume. Yata wiribuka talakuk aupmalya ani, aminyan talak tukwak ning nirya kum danamle. Tukwak ning ara, ‘Yata talak kum danamsil do?’ Nun walwal anya arye, aning ati kanye delina meme. Aning kum bukni, ‘Allah elcuk melipsilirye, lyepnamsil’ tenen, el deiceuk anggun kanye delinamlulume. Nun kanye deibuka, teleb una ati, arisilya deiyoknye bira, Allah elcuk aning-aning nirya weik arye arisulule.” Ayupu nyapnamlyame.
Tonda, yuk nang arye, anti, “Anda kamnye atonun ulyama ati ara, an yupu kum kekepnukiyap ati, dauplye,” nyapkicopura, sik anang ati yupu sekenamlyame. ‘Dauplye,’ tenena kume. Aning kum bukni, an winilaminye ning, yuk nang eipkikirye, ‘Kel biknamak’ tenen, winipmantonye bira anuk unamlame. Ara, an yupu nyana ap, an winin ning nirya ap, yuk nang ati bico tenebuka melina ap, Allah ap, el yupu ap, diba tenelulum ning ap, mingne ubuka, diksukum una ap, winipminye deice arye yuk nang kel biknamkiake.
Winibuka pia yuk ulalum bukni, wini talak ara, nun ni Allah arye, anggun malye ulalum ning kilibuka lyepdeipsukce, el ap, neika una ati, kanye dukdongopsuke. Teleb kipdeipsukce, el ap, dukdongobuka ansinibdeipsuk ara, el Mi Koprop Kristus ara, ninye nong dayukce, tukwak mutuku yanuka daulamuka ani, nunti dibuk deice arye teleb kipdeipsuke. Winipsuka ara, talye ati kume. Deiyok ara, ‘Na Allah arye sik dobuka, na dam deipnamsin talak ara, sik malye wini ning tonok babye, kum uptu ura, pia diksukumuk unamak’ tenen, teleb kipsukce, el ap, kanye dukdongopsuke. Akunum teleb kipdeipsuk ning ati ara, yata nang arye do nirya, ‘Aning ara, malye ning,’ nyabuka malye yupu kum nyapsitinge.
Yesus Kristus ati diba tenebibirye, el ap talima dukdongobuka ubibyeura, elce nun talima talisulul ninye ara, wininyabe. Talye tukwak ninye ubirye, nun kanye talima noutam malye ning ulye akarye, talima lilosululba, malye ning patasilye ning ara, aupmal bukni, amalye winin ning kum wininyabe. Deiyok ara, Yesus Kristus wanwanun yo deice dibuk talak ara, nun ap dukdongopsuk anya arye, el dibuka deice arye, nun ton dibupu. Ara, nun ap, Yesus ap talima dukdongopsuk deice arye, nun malye ning patasilye ara obuka, yaniltana atonun unyabe.
Nun Deiyoknye Yesus Kristus arye, ‘Atalak malye-malye wininyak ninye ara, sik malye wininyak ning ap, malye tenenyak ning ap deice arye, na mapu malye kipdeibicak’ tenen, ‘Sik malye wininyak ning noutamak arye lobuka lyepnamle,’ tenyamukce, nun malye wininyap ning kilina ati, el babye el bidamang nong arepsuke. Yesus arye nun dekna ati, el nong arepsukba, malye nang arye obikba, nun pununa ati dibuk. Ara, nun malye wininyap ning wenena ati, Allah arye talye luba kibuka oplopsutu bukni, ‘Aninye wenebuka kum oplopnamne,’ tenyamukce, Yesus arepsukba, nun pununa ati dipsuke. Aning nirya ara, nun Ni kopropa Allah arye Yesus ati, ‘Wininamle’ tenen, wipdeiyamuk touk, Yesus winibuka deice arye deksuke.
Na kayapu, Allah arye nun nirya ati, ‘Wininamsine,’ nyabuka, arup nyapmasin yupu nyalilamsukba, aupmasila anya arye, yata malye winin ning ap, malye tenen ning ap do nirya, nun nong malye winisilye ning ap, nun kanye talima malye winisilye ning ap, adiparyuk batakibirye, diksukum ninyeuk unamabe. Ara, ‘Nun Ni Koprop Allah ara, pia mambule’ tenen, el si erena ati diksukumuk unamabe. Aning wininamaba ati, na Paulus arye nyapsine.
Ara, na kayapu, nun kanye deibuka ayupu nyapsitibye. Nunce tenepce nyana kum aniryuk, nun kanye talima diksukumuk upsilirye, ayupu nyanyabe. Amutuku-mutuku nirya ulamubu talak ap, weik mambul ning anggun ap neika ulamubu talak nirya ap, malye una pia kumce, diksukumuk ulamubu. Tenepce nyana pia kum aniryuk, dipkopropuk ulamuburye, pil dolamubu. Adiksukum una ap, duknuna kumce dipkoprop una ap ara, Allah arye aresulule. Winibuka unyaba nirya ara, dib tenena kum ninye arye, ‘Nunda weik kel nang,’ tenekirye winilamak atonun, aning deice kum unyabe. Nunda, Allah el kanye aniryuk bico tenepsilirye, melisilya deice arye aresilye touk, pia diksukumuk unyabe.
Aning ara talye ati kum nyapsine. Deiyok ara ani. Ara, nun kanye talima malye ulina deiyok ning arye talisiliba, malye winin ninguk talibuka upra babyopura, dipkoprop aminyan talak dipnamabe. Bukni, Allah El Dib Kanye melisilya deice arye, malye winin ning aning-aning nirya ati, ‘Nun like,’ tenebuka batakipyopura, kam pia unamabe. Ara malye winin ning oltakana atonun unamaba ati nyapsine.
Paulus arye nyanmoka ani, yupu deiyok winilye nyabuk. Tonok ning ara, ‘Allah yupu nyasilya atonun diksukumuk unyabe,’ nyabuk. Tonda, ‘Nunce malye ning patapsilye ati, malye winibibyak’ tenen, ‘Nun bidamnang aryuk kalikdanyapce, malye ning batakanyap,’ yupu ap, nyabuk. Tonda, ‘Aminyan talak Allah arye ninye weik arye lipdesilirye, yupu bokeipnamsile,’ nyabuka ayupu ap, Paulus arye laka nyanmoka ani, Feliks kekebukce ilil weik ubukura, nyabuk. “Atalak ati ara, akunuma. Yuk yupu ton kum nyapnalyame. Anda tia talak ati dabilyame. Yuk talak ara, talye lo ton upnilyopura, yukupnamkineba, yupu ton nyapnamnilame,” nyabuk.
Aning dib tenebuka talinuna ati, ‘Na pia kum tenipdanamne’ tenen, tonda, na kanye talima noutamak arye, ‘Malye winin ning ton duknupnamne,’ kum tenenune. Aning nyana kumce, ‘Na kanye talima lamabuka unyopura, pia telebuk unamne’ tenen, Allah ap, yuk nang ap dinikcak arye, na damang pia moubuka kalikdanuka unune.
Anyapmasin yupu ara, talye ati kum nyapne. Deiyok ara, Allah arye, aning-aning nirya, min kum kwepdeiamuk talak ara, nunti wepdeipsukce, winibuka tenyamsuke. Ara, ‘Anang ara, Kristus ap, kanye talima dukdongopniba, el deiceuk ucopura, na Allah arye, sikti, tenenamne talak nirya ara, anang ara malye winina kumce pia diksukum nang unyak,’ tenenamsine. Ara, Kristus arye, pil dopsuk deice aryuk tenenamsila ati, ‘Anang ara, pia diksukum un ninyeuk unyake,’ tenenamsile. Tonda, yata nang arye do, nunti, “Anang ara, sik malye winin ning ani, ani,” nyabuka, Allah ati kum nyapsitinge. Aning nyapmasin touk, Allah arye nunti, ‘Wininamake,’ tenyamsukce wipdeiyamsuke.
Zakaria ap, el kil Elisabet ap, Allah yupu nyalilye atouk ubuka diksukumuk ulamrikce, Allah arye, “Wininamlulume, aning kum wininamlulume,” nyapdeiamuk yupu, moubuka talyamrikce, dolbalamrik. Ayupu nyalul touk ning nirya atonun, sirya dakuka pil dolamdik, malye una deice tenebuk ning ababye, kum winilamrik ara, Allah arye sikti, kanye deiamuk.
Allah Yahweh arye, amambul pil dolamuk ning nirya ara, urdem ati kum pil dolamuk. Deiyok ara ani. Ara, winipniba, kel bikikirye, “Aning ara, wininamlulume. Aning ara, kum wininamlulume,” nyapdeiamse yupu nirya ara, ‘Dib nyamsuke,’ tenebikirye, ‘Aninguk talibuka dukdongobuka wininamak’ tenen, apil dolamuk. Ati ara, ninye nirya arye Allah ati, ‘Se, anda pia teleb ulyame,’ nyabuka, el siuk erenamlume. Daud arye nyabuk.
Yata nang do nirya, sikce nada Ninye Mi Koprop Atonunye ati, malye yupu nyapnice ninye ara, sik malye nyapnice ning ara batakikceba, Allah arye sik malye nyanyak yupu kum daneiplirye, aninye ati namin kipnamle. Bukni, sik anang arye, Allah El Dib Kanye, el pil dolye ning ati, “Aning ara, Isa Mutuku Dongonye el mikip deice arye pil donyake,” nyabuka, malye yupu nyabikcopura, atalak noutamak ababye, aminyan doyanamle talak nirya ababye, Allah arye sik malye nyanyak yupu ara, kum daneiplirye, kum namin kipnamle. Aning pia tuba awamlyeba, aninye wenepnamle. Ayupu nyanyak ning ara, kum lyepmanto ning unyaka ati nyapsine. Yesus arye nyabuk. Yesus arye ayupu nyalamuk ara, Musa sekamuk yupu peterena deiyok nang arye, “Yesus ara, Isa Mutuku Dongonye talibuka mikip deice arye pil dolule nyanmeka ati,” nyabuk.
Bukni, ‘Se, nunda bona weik talin nang mapu uptibye’ tenen, pia pataplye ninye ara, atenen deice arye, Isa Mutuku Dongonye arye, ‘Sik malye upting’ tenen, sik kanye talima lilolibuk, malye un ning patalulbuk, malye weik wininyake. Tonda, nong kum upnamle ning bukni, talye-talye ning patana weik ap, malye usilye ning patana ap, akunum winiplibuk, malye weik wininyake. Wininyakopura, winipmanto ara, anoutamak arye, ikne pum bisik kabang balyebuk youlamle atonun, weik ikin ning pia malye ulisulule. Aning ara, kum lipsisikmanto.
Nun ni Allah el kanye ara, ‘Diksukum diba tenena ning, talibuka una ning ara, malye ning nirya tabakuka, una kum ulul ning atia. Winibuka diba tenenyak nang arye, sik teleb unyak ning ara ani. Ara, sikce kwaknamne mapu ap, youwak kilapu ap ati, bico tenebuka melinyake’ tenelule. Tonda, anang ara diba tenena kum ninye arye, talibuka ulamice malye ning atonun ning, pia talibuka kum unyake. Diksukumuk unyake.
Piblisite