Titus 1:16 - Eipomek16 Ato wininyak ninye ara, nyanyake. “Kume, Allah diba tenebuka, kanye dukdongobuka unyabe,” nyabuka, talye nyaltakanyak bukni, sik malye-malye ninguk winiyak deice arye, Allah batakuka yaninyake. Anang ara, Allah el yupu nirya, kekena kum arye yaniplobikibuk, Allah arye sikti, pia lik tenelirye, lik ulule. Yata teleb winin ning do, sik pia kum winiptinge. Malye winin ninguk, tenebuka wininyake. Na Paulus arye sekeibkine. Gade chapit la |
Titus 1:16
27 Referans Kwoze
Aning-aning nirya ati, Pia Mikip Weik ulye deiyoknye Allah arye, na Yesaya biti nyapnuk. Sik Israel nang ara, yupu deice aryuk, na si ereninyake. Bukni, dipkoprob ara, sik kanye talima noutam arye, nati pia moubuka kum teneninyake. Nati, walwal nang unyaka ati, sikda pia pera ninye asik nang atonun unyake. Tonda, sikce talibuka, si erenyak ning ara, talye nang sik kanye aryuk, ‘Aning-aning talibuka, si erenamlume,’ nyanyak ninguk, sik asok deice deilinyak bukni, sik talima noutam ara, nati moubuka kum tenepnikirye, na si dipkoprob kum ereninyake.
Na kayapu, talye nang arye, talye-talye yupu, nong kum upnamle yupu talye nyaplobikiba, ‘Mankau arye, tilila ning dib tenebibyak’ tenen, anggun kanye moupnamlulume. Talye ati kum nyapsine. Amalye nyapmasin ning nirya wininyak ninye arye, Allah el yupu yaniplobuka, wininyaka ati ara, Allah yu weik upliba, sik nong deice ikin ning weik deiplirye, weika arye, wenelule.
Dan mutuku do nirya winilamak touk, amutuku unyak nang babye, ‘Mambul weik yupu kekepnuyapʼ tenen, ninye weik tonun bikbik abuka bulubikirye, anang arye, an dam yanuka bunyake. Wininyaka ara, na Allah, na mapu koproba atonun winibikirye, weik tonun an dam yakirye, an yupu nyanamlam ning ara, pia moubuka kekenamake. Amol deice arye kekenyak bukni, ance, “Aning ara, winipnamlume. Aning ara, kum winipnamlume,’ nyabuka, nyapminye ning ara, sikce moubuka talibikirye, kum dobolbanamake. Deiyok ara, sik anang ara, sik si bam bol deice arye, ‘El kanye deipnamsilʼ tenen, kekena teleb yupu nyapnamak bukni, sik talima noutam arye teninamak ning ara, pia yuke. Ara, sikce, ‘Nun tenina deice arye, tilila yupu nyabibiba, yuk nang arye arepsikiba, nun diamuk teleb kipdeipdatibye. Nun dem aryuk, teleb ning dopropnamabe,’ tenenyake.
Anyapmasin ning ara, talye ati kume. Deiyok nyapnusine ara, tilila yupu nyabuka pia malye winin nang duknubuka, anggun kan-kan yanuka unyakce, pia malye winilisinyake. Allah yupu laka nyalamik nang, nabi nang arye, amalye winilamice nang atonun nang ara, “Allah arye wenebuka opnamle,” nyabuka nyalilamik. Atilila yupu peteren nang arye tenenyaka ara, ‘Allah elda talinye. Elda mambul kume,’ tenenyake. Winibuka tenebikirye, Allah yaniplobikirye, pia malye wininyake. Sikce peterenyak ning ara ani. Ara, ‘Nun malye ulamibye bukni, Allah talye urdem aryuk namin kipsilirye, lyesululnye anya arye, nun talye tenepce pia malye wininamabe. Ara, telebuka. Allah arye kum wenepnamsile,’ tenenyake. Tonda, nun du Yesus Kristus elcuk talisilirye, nun Weik Deiyoknye usulul bukni, siktilila nang wininyak ning ap, nyanyak yupu ap, deice arye, “Yesus elda talinye,” nyanyake.
Aninguk kum bukni, amalye winilamik ninye arye, ‘Allah ap, el ulul ning nirya ap ati, tonap kum tenenamabe. Aning nirya ara nong kum danamle. Allah el ulul ning yala-yala nirya ara, tuba kum tenenamabe. Elda nun like,’ tenyamika ati, Allah arye aninye nirya ati, lik ubukba, ‘Sik aninye daulamica ani, dipnamake’ tenen, batakukba, sik pia malye tenelamik ning deice arye tapu koupdongamukba ulamik. Winilamikba, Allah arye, “Winina meme,” nyasilye ning nirya talibuka winilamik dib arye, pia malyeuk upra balamik.
Atalak nirya ara, malye ning tonok babye, Yerusalem Winiryuk mutuku noutamak pia kum boyanamake. Tonda, malye wininyak ninye ap, tilila ning wininyak ninye ap anyasik noutamak pia kum wekelyanamake. Amutuku noutamak ara, sik malye winin ninye kum yanmanto bukni, Domba Mi Atonye birye talilye buku, Kam Pia Unamak Ninye Si Sekna Buku, abuku noutamak sik si akunum sekiamuk ninyeuk ara, sikda Yerusalem Winiryuk mutuku wekelyakirye, anyasik noutamak pia unamake. Na Yohanes arye nyapne.
Nyabuk bukni, Samuel birye, tamubuka nyabuk. “Allah el birye, ‘Aning winiptinge,’ tenesilye ning ara, namin asa arye, el amu tam una teleb do? Akam ulul ning dobuka, Allah ati uku dalbana teleb do? Pia weik teleb ning ara, dan do? Allah arye nyasilye yupu, kekebuka dobolbana ara, pia teleb ning atie. Mitik teleb ning ara, anggun malye winin ning, namin kina ati, kam ning obuka, uku dalbana uka. Aning atonun, mitik teleb ning ara, domba basam meta dobuka, uku dalbana bukni, weik teleb ning ara, Allah arye nyasilye yupu kekebuka, dobolbana uka.
“Bukni, weik uku buk dilamukce, tin ap, kumasan bol keil el si ara belerang ap, ara uku tin weika arye dipliba, keil but-buta tong ara, sikin tong atonun, weik lelamle ning nyalamukce deiyamse mekwen, uku din mutuku noutamak dopwketepniba, asukumuk pia daunamak ninye ara nyapnune. Sikda, diba tenena kum ninye ap, ‘Yu nang arye opsicak’ tenen, ilil upliba, nati batakaninyak nang ap, kir dona ninye ap, ninye bai mal ona nang ap, amalye pil donyak ninye nirya ap, talye ning ati, ‘Nun ni kopropa’ tenen, si erenyak nang ap, tilila yupu nyanyak ninye ap, aninye nirya ara, uku din mutuku, noutamak dopwketepniba, apia unamake. Uku din mutuku unamaka ara, Dipna Bitinye ning ati nyapkine.” Allah arye nyapnukba, na Yohanes arye kekepse.
Yatanye do nirya, weik ilil ning ara, el li koprop ap, el lin koprop ap, el kil ap, el mapu koprop ap, sikuk kum bukni, el yala nang ap, el aik neika ulamak nang ap, aninye nirya, sik pataplye ning ati, bico tenebuka kum meliplyeura, pia malye. Winiluluma ara, Allah yupu yaniltana ap, Yesus batakna ap, atonun ulule. Yesus dib kum tenenyak ninye ara, mitik malye wininyak bukni, atonye bira, pia weik malye ulule.
Aning ara urdem ati kum nyapsine. Israel ninye ara, asum-asum nirya na siuk erebikirye, ‘Allah arye, aning wininamlume, aning ara kum wininamlulume,’ nyapdeipsuk ninguk, ‘Nun ton kel biknamabe,’ nyanyake. Sikce, ‘Nunda telebuk kibuka ubirye, Allah tenelye ning ara kel biktibye’ tenenyak ninye mitik anun unyak bukni, yuk ninye nirya ara, dipkoprob aning atonun kum unyake. Israel ninye arye talye urdemuk unyake. Sikce na nyalamse yupu akunum batakanye. Sikce nyaninyake, “Kume, nun kanye deibibirye Allah si erenamabe. Tonda, Allah arye ‘Wininamlulume, aning ara kum wininamlulume,’ nyapdeiamsulum ning ara, tuba tenenamabe. Allah ati moropmabibuk, diksukum kibuka yupu lipsisikuka bokeipnamsile,” nyanyak bukni, aning ara dipkoprob kum wininyake. Tenepce aniryuk tilila yupu uk nyanyake. Dipkoprop sik kanye aryuk malye unyake.
Allah arye nyabuk. Anggunda, anggun apu koproba, Yakub birye deiamsukba, dadeipdanin yangalulumce, ululum ninyeo, anggunda moubuka kekepnamlulume. Yakub birye deiamuk nang ati, narye, ‘Sik si ara, Israel yala nang nyapsina anya arye, ninye arye nyanamsiyake. Tonda, minop talak ara, anggun pununanye Yudah birye deiamukba, dadeipdanin yangalamlum nang ululume. Anggunce, nyalin yupu nyaplum talak ara, ‘Nun ni Allah Yahweh, el si deice arye nyapsiyabe,’ nyanamlume. Tonda, ikin upsiliba, ‘Nun ni Allah arye melipnamsilʼ tenen, anggun Israel nang arye, na si erenululume. Aning nirya winibuka nyalulum bukni, dipkoprob ning ara, anggun kanye deice arye, diba tenebuka kum nyalulume. Talye yupu atonun nyabuka, si bambol deice aryuk, nyaltakalulume. Dipkoprop diksukum ubuka, teleb deice arye, kum nyaltaklulume.
Nyabukura, Saul birye tamubuka nyabuk. “Kume, ance dipkoprob yupu nyapmanilame. Nara, malye upse. Allah arye, ‘Wininamlyame,’ nyapnuk yupu yanipse. Aning atonun, ance nyapnulum yupu babye yanipse. Winipse ning deiyok ara, na amu tam unyak ninye ati, ilil upnukce, sik nyapnik yupu kekepse. Adeice arye, malye upse.
Malaikat babye, pia telebuk, lek nang kum unyaka ati, dipkoprob nun ninye koproba ara, Allah elce elisulula ara, ‘Sikda, pia diksukum teleb nang unyake,’ kum tenesulule. Tonda, kum winipnyabe. Malye winin ninguk wininyabe. Deiyok ara, nun ninye ara, malye winin nang unyabe. Tonda, nun ninye malye wininyap nang ara, winipmanto ara, talye mek kwebuka dilamak touk, malye winin ning ap, tenen ap ara, adiparyuk talye lubakibuka wininyabe. Anda atonun ulyama ati, nyapkine.
Tonda, nun kele. Allah arye nyapdeibukura, Musa arye sekeiyamsuk mem yupu ara, Allah arye diksukum un ninye ati kum nyabuk. Kume. Ayupu ara, Allah ap, ninye deiyok nang ap, sik amu tam una kum arye, sik nyanyak yupu ati, yaninyak nang, sik wenena ati sekeipsuke. Tonda, ‘Allah el mambul,’ tenena pia kum arye, kanye pia malye-malye wininyak nang ap, tonda, ‘Allah nyasilye yupu ap, el ulul ning ap, talye ning uka,’ tenebikirye, Allah el pia teleb ulul ning, el mingne ning nirya ati, akutubuka nalinyak nang ap, tonda, sik ni yapu koprop ap, sik nin yapu koprop ap, yuk talye nang ap, oltakanyak ninye ap, ati, Allah arye amem yupu nyabukura, Musa arye sekeipsuke.
Tonda Allah arye nyalinilye yupu kekenunye bira, na aunune. Allah arye weik kel bikna deiyok ning arenilirye nyaniliba, kekepnirye, laka nyanune. Allah elda, mikip weiknye birye, aning-aning nirya talibuka Weik Erenanye ulirye, lengdar mana deice arye laka nyaniliba kekebuka elinune. Allah el si erena ati, tuku deice mapna buk, na asing lapdeipniliba, teleb kibuka elinune. Ati, ayupu nyapnusine.” Bileam birye Balak biti laka nyabuk.
Ati ara, ninye arye malye perak bataklamaka touk, na Allah arye aninye sik si ara, ‘Malye Perak,’ nyanamne. Deiyok ara, narye sik malye wininyak ninye ati, akunum lik weik upnila ati, sik batakse nyapne. Perak ara, pia teleb ning bukni, talye donoklamak ning atonun wininyaka ati nyapne. Na Allah Yahweh arye sikti, akunum batakse.” Allah arye Yeremia biti, nyapdeibukba, Yeremia birye, ayupu sekuk.
Atonun, sikce deipdanin yangalamikce, sikce sik bidamang ati, ‘Nunda pia teleb nanguk unyabe,’ tenelamik bukni, dipkoprob sik aninye nirya ara, pia tuba malyeuk ulamik. Awinibuka unyaka atonun unyak ninye nirya ara, winipmanto ara, nininga pia weik ulul bukni, mek pia kum kekenyak ninye ulamak touk unyake.
Nun dam, akunum malye ulilamnyap bukni, ance, ‘Winipnamlume,’ nyapdeipsulum ning ara, batakaltakanauk unyabe. Tonda, yuk nang dam ara, nunce, ‘Kume, Allah Yahweh ara, nun walwale, el bisik kum dobolbanyabe,’ nyabuka batakanyabe. Nun ni Allah, an siuk erelamupu bukni, wini talak ara, an dam mal pipkuburye, nunda mandipna dobuka unyapce, pia yuk kwalin bisikuk akunum banyabe. Malyeuk winibibirye, yupu lipsisikuka bokolina deiyok nang dam bibirye, yuk nang ati, malye kum winipmakibuk, ‘Kume, sikda malye winipmake,’ nyabibirye, ‘Deiyok nang arye, anang wenepnamakʼ tenen, minin yupu arye nyanyabe. Allah anti, kum melibuka dobolyangakinyabe. Nunce yuk nang ati, nun kanye pum tam tenebibirye, ‘Ikin ning, sik deice akunum deilinamabeʼ tenen, yupu bokolina deiyok nang dam binuka, tenepce arye, talye tilila yupu uk nyabibiba, anang deice wenepnarye ikin ning delinyake. Adeice arye, an yupu yaninyabe.
Ura na bikse. Sik Yerusalem mutuku unyak nang arye, nyanyake. “Kume, pia dipkoprob nyababe. Nun ni Allah Yahweh, dipkoprob tuba kam ulul touk, nunce dipkoprob nyababe. Elce nyasilye yupu, moubuka talibibirye, diksukumuk wininamabe,” nyabuka, talye si bambol deice arye nyanyak bukni, sikce talye yupu aryuk nyanyake. Na kele, sikce nyace touk, pia kum wininyaka ati, tilila yupu uk nyanyake. Allah Yahweh arye, na biti, nabi Yeremia biti nyapnuk.
Allah ance, sik anang ara, teleb kililyame. Winipmanto ara, ance sikti, talye paplirye tukwak tiklamle ning atonun kililyame. Winipminyeba, sikda yating tuku pum tam bilirye, teleb kibuka paplirye, duk moulamle atonun kililyame. Sik anang ara, Allah an dam, sik si bambol deice aryuk, teleb-teleb yupu nyakinyak bukni, sik talima noutam ara, anti, dipkoprob tenebuka kum nyakinyake.
Na mi Tituso, sik dib tenenyak ninye, Kerit mutuku nang noutamak ara, ‘Akunum diba tenebikce, Allah yupu kunum kekebik bukni, luba kibcak’ tenen, tonap ayupu peterebuka nyanamlyame. “Sik amutuku deiyok nang, pemerintah nang ap, yuk ninye deiyok nang ap nirya ati, sik adiparyuk, sik amutamuk ubuka, sik nyanyak yupu kekebuka, telebuk wininamlulume. Tonda, atalak-atalak nirya, yata teleb winin ning do, yata teleb pil do, ‘Kanye deibuka, talye kanye bobuka, mikip arye pil dopnuyap’ tenen, kintinilinalulume,” nyabuka peterenalyame.
Aning peterelamlyam deiyok ara ani. Ara, minop talak nun babye kanye bona kum arye, walwal ulamubu. Ara, malye kibuka, ninye deiyok nang yupu ap, Allah yupu ap, kum kekelamubu. Yata malye winin ning do, malye patan do, malye kanye tenena do nirya, amalye ninguk patalamsuka deice arye, yukulamsukce, nun malye ning winina deice arye, tapu kouamsukba, pia malye ulamubu. Atilila ning diba tenelamuburye, yuk nang ati, yu weik ubuka, waldana ap, oldana ap, ulamubu. Tonda, yuk nang ning ati, ‘Se sik ning ara, naryuk doproptinye’ tenen, kanye talima engena ap, ulamuburye, nun nirya arye, yuk nang nirya ati, lik upsinabuk, ‘Pia lik,’ tenelalamubu.
Piblisite