Roma 8:29 - Eipomek

²⁹ Ayupu ara talye ati kum nyapsine. Deiyok ara ani. Ara, minop talak Allah arye akunum tenebuka kel bikamsukce, ‘Sikda, na mapu unamake anya arye, aninye teleb kipdeipniba, na Mi Kopropa el teleb kibuka ulul touk, sik babye atonun unamak’ tenen, akunum wibuka deiamsuke. ‘Unamake’ tenen, wipdeiyamsuka deiyok ara ani. Ara, Allah arye, ‘Na mi kopropa Yesus Kristus ara, minyuma du mi atonunye ulyopura, el weit yapu ara, noutam mapu atonun kibuka tabaknin bakirye, weik upra banamake,’ tenyamsukce, wipdeiyamsuka ati nyapsine.

Roma 8:29 Referans Kwoze

Yeremia 1:5

‘Yeremia, an nin mun pum tam, min kum kintinip deiamkise talak ap, tonda, an nin birye kum deiamkuk talak arye, na Allah arye anti, ‘Doryanamle talak ara, narye wininamne ning, anye Yeremia biti, laka nyaipneba, daunamak ninye ayala-yala nirya ati, na yupu laka nyananye, nabi unamle’ tenen, akunum kintinipkisirye anti wipdeiamkise,’ nyabukce, Allah arye na Yeremia biti nyapnuke,” nyabuk.

Efesus 1:11

Ara, Allah elce, ‘Wininamne, wininamne,’ tenelul touk, aning-aning nirya talilirye, pil doliba, aning nirya elce tenyamuk touk, aninguk winilule. Tonok ning babye, kum batakalule. Aning atonun, minop talak, nun min kum deiamsik talak arye, Allah arye nunti, wepdeiamsukce utenyamsuke. Yesus Kristus ati dib tenebupa deice arye, Yesus ap, kanye talima dukdongobuka ulamibya ani, sirya talak ara, Allah arye, ‘Aning-aning arepnibuk, pia talinamake,’ tenen, kintinipsuk ning nirya ara, arepnamsile.

2 Timotius 1:9

Allah el mikip deice arye nunti, ‘Malye ning nirya batakuka, diksukum un ninyeuk unamak’ tenen, nyabuka melipsukce, akunum lyepsuke. Winipsuka ara, nun teleb ubuka pil dolamupa deice arye, kum lyepsuk bukni, elce minop talak akunum tenyamsuk touk, elce nunti bico tenepsukce, el kanye aryuk nunti talye melibuka lyepsuke. Allah el kanye aryuk bico tenyamsukce, ‘Yesus Kristus el pil donamla deice arye, aninye melibuka lyepnamne’ tenen, kintiniyamsuk ning ara, Yesus Kristus deice arye kintiniyamsuke. Aning ara, aning-aning min kum kwepdeiamuk talak arye, nun Lyena Deiyoknye Yesus Kristus akunum kintinipdeiamsuke.

1 Peterus 1:20

Allah arye, aning-aning nirya min kum kwepdeiamuk talak ara, ‘Yesus arye ninye lyepnamle’ tenen, akunum wibuka deibuk bukni, winira sirya talak ara, anggun lyena ati akunum lakak arepsukbuk, kel kibape.

Wahyu 13:8

Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.

2 Timotius 2:19

Aninye ara wininyak bukni, Allah arye nyapsuk yupu ara, min kum upsutue. Winipmanto ara, pia teleb ayukumna yo, gat yo iknabuk, pia gat ulamle atonun, Allah arye nyapsuk yupu ara, min kum kum datue. Allah el yupu noutamak sekamik yupu deice arye, lak kipdeipsuke. Ayupu ara, ani. ‘Allah arye, ‘Aninye na mapu unamake’ tenen, akunum wipdeiamsuk ninye ara, el akunum kel bikamsuke.’ (Bilangan 16:5) Tonda, ‘Yata nang do nirya, “Allah ati akunum diba tenepsa ati, el mi unune,” nyanyak nang nirya ara, adiparyuk malye winin ning nirya ara, batakikirye, balye tamubuka diksukum bisikuk banamake.’

1 Korintus 2:7

Kume, nunce weik kel bikne yupu nyanyaba ara, Allah minop talak arye duknyamuk ning ati nyapsine. Allah arye aning-aning nirya min kum kwepdeiamuk talak arye, nunti utenyamsuk. ‘Aweik kel bikne ning deice arye, na ap, na mapu ap, talima dukdongobuka ulamibya ani, na pia teleb unye touk, sik babye, atonun teleb kipdeipnirye, na ap neika unamake. Winipnyopura, aninye ereipnamne,’ Allah arye, aning tenelamsuke.

1 Peterus 1:2

Nun ni Allah arye minop talak akunum wiamsukce tenyamsuk touk, Allah El Dib Kanye arye, anggun talima noutamak malye ning kum deipsukce, teleb kipdeilisulul deice, Allah arye wibuka deipsuke. ‘Wininamak’ tenen, Allah arye wibuka deiamsuka deiyok ara, nyapnusine. Ara, ‘Yesus Kristus el ining biyuka deice arye, anggun malye ning kum danyaipsilirce, lyepsiliryopura, el yupu uk talibuka dobolbanamak’ tenen, wibuka deipsuke. Allah arye bico tenepsilirye, nun patapsilye ning talye arisulul ning ap, Allah ap kanye dukdongobuka umunce, yuk ninye ap kanye deibuka, teleb ubuka neika unamlulum ap, ‘Aning nirya weik upnin banamsil’ tenen, Allah morosunune.

1 Korintus 15:49

Aning atonun, Adam arye, deibukura, dadeipdanin, yangalamika ani, nun ni yapu arye, deipsikba unyap nang babye, Adam ulamuk nong ap, el urasin ap, ulamuk touk, nun babye aning atonun unyabe. Aning ati ara, im deice arye, yayuknye bira, im deice nong ap, urasin ap, ubuka ulye touk, aminyan talak ara, nun babye, el ulul im deice nong ap, el im deice ulul urasin ap, mitik anun atonun ubuka deipsilibuk, kam pia unamabe.

Roma 9:23

Kume. Nun tukwak unyap ninye nirya ati, adiparyuk oplopsutu bukni, minop talak ara, ‘Aninye ati, sik malye ning namin kipnirye, namin arye unamne. Winipnyopura, na pia telebnye unye ning, eibuka kel biknamniyake. Sirya talak ara, aninye ereipnirye, pia teleb kipdeipniba, sik ap na ap neika unmabe,’ tenyamsuk. Utenyamsuka ati, adiparyuk wenebuka kum oplomsuke.

1 Yohanes 3:2

Na kayapu na kanye deipsine. Wini talak ara, Allah el mapu unyabe. Aminyan nun nonge unamaba ara, min kum laka nyapsike. Bukni, nun kele. Yesus el yanamle talak ara, el nong babye, el ulul ning babye, dipkoprop ulye touk eipnamaba ati, nun babye el ulye touk unamabe.

2 Korintus 3:18

Tonda, nun nirya ara, nun urasin lelina kum, kimilana deice arye ninye urasin elilamak touk, nun ubya deice arye, yuk ninye arye, Yesus el winilul ning elinyake. Ara, nun Deiyoknye Yesus Kristus, el pia teleb ulye touk eibikirye, kel bikinyake. Nun Deiyoknye Yesus ara, Allah El Dib Kanye eluk ulule. El pia teleb ulya deice arye, nun talima pum tam pil dosilirye, el teleb ulye touk, nun babye atonun teleb ulisulule. El ulye touk teleb winilisilye talak nirya ara, teleb winipnin balamibya ani, aminyan ara pia teleb wininamabe. Anirya ara, Yesus Kristus aniryuk, teleb ulisulule.

Roma 11:2

Kume, minop talak Allah arye, ‘Israel ninye ara na tenen nang unamak,’ tenyamsukce weiamsuk ninye, Israel ninye ati, kum batakamsuk. Ura, Allah yupu noutamak ara, nabi Elia birye Israel ninye ati tenebukce, nyapdeiyamuk yupu ara, kum kel kiyamlum do? Nabi Elia birye Allah ati ayupu nyabuk.

Yohanes 17:16

Nara, tukwak mutuku ninye arye malye ning tenebuka malyeuk winilamak touk, pia kum wininune. Aning atonun, na mapu ababye, talye tukwak ninye tenebikirye, malye-malye winilamak touk kum wininyake.

Pilipi 3:21

Yata ning do nirya, Yesus el weik mikip deice arye, aning-aning nirya talibuka, el amutamak delilule. Atouk el mikip deice aniryuk, nun talye tukwak nong bataksilirye, nun dobuka urasin pia yuk ning kipsilirye, el pia teleb im deice nong ulye touk ubuka, kwepdeipnamsile. El pia teleb ulye touk, nun babye, teleb winipsiliba unamabe. Na Paulus arye, anggun Pilipi ninye ati, nyapsine.

Efesus 4:24

Aning ara, Allah arye, utenebuk, ‘Kume, malye ning tonok babye, kum uniliba, pia diksukumuk unye touk, na mapu babye, atouk unamake,’ tenepsukce, winiryuk kanye arepsuke,” nyabuka peterelamsikba, akunum kekebuka kel bikamlume.

Keluaran 33:17

Nyabukura, Allah el si Yahweh arye, Musa biti nyabuk. “An moropmanilam ning ara, aninguk narye melipnamsine. Deiyok ara, na kel kipkisirye, na kanye an deice deipkisa atia,” nyabuk.

Matius 12:50

Yata ninye do nirya, Allah arye ‘Wininamake,’ tenelul touk pil dolamikce ninye ara, sikda, na weit yapu ap, na weit kilapu ap, na nin yapu ap, atonun unyake,” Yesus arye nyabuk.

Keluaran 33:12

Tonok sum ton Musa birye Allah el si Yahweh ati nyabuk. “Ance nati nyamnuluma ara, ‘Anang dobuka narye nyalamse mutuku bobinamlam,’ nyamnulum bukni, anang bobana ati, melipnamnilanye bira, yatanye wipdeipnamlam do? Anye si min kum nyapnulume. Tonda, Allah ance nyamnuluma ara, ‘Narye an si kel bikisirye, na kanye ara, an deice deipkise,’ nyamnulume.

Mazmur 1:6

Anyapmasin yupu ara, talye ati kum nyapsine. Deiyok ara, el kanye talima lamapdongobuka arye, Allah amu tam ulirye, diksukumuk winilulnye bira, Allah Yahweh arye melibuka kalikilirye, aninye ati, teleb winililule. Bukni, malye winin ninguk tenebuka, upre bace ninye ara, wenebuka opnamle ati, kintinililule. Sik malye winin ninguk talibuka, wininyak ninye ap, sik wininyak ning ap nirya ara, Allah Yahweh arye kum daneipnamle.

Yohanes 17:26

Narye na mapu ati an winiminye ning nirya peterelamsiba, kel bikinyake. Aning akunum winilamse touk, sikti, tuba unamne. Deiyok ara ani. Ara, ance nati, weik arye kanye deiamnulum touk, ance sikti, kanye weik arye delinamlyame. Tonda na ap, sik ap, talima dukdongobuka neika unamabe. Nara, sik talima ak unamne. ‘Aning-aning nirya, moropmakin ning nirya winipnamle’ tenen, akunum moropkine, naio.” Yesus arye ayupu nyabuka, el li Allah ati morobuk.

Roma 13:14

Amalye winin ning nirya ara, pia kum wininamap bukni, nunda, ninye arye winiryuk baju ongolamak touk, nun Deiyoknye Yesus Kristus ap, neika kanye talima dukdongobuka umunyopura, Yesus el ulamle touk unamlume. Tonda, min diba kum tenyamubu talak arye, nun kanye talima pum tam malye ning patalamsuk ning ara, ila tuba tonap patapsiliba tenemunya babye, pia kum wininamlulume. Amalye winin ning ati, tuba tenebuka kum wininamlulume.

Matius 7:23

Bukni, narye aninye ati, adiparyuk laka kibuka nyapnamne. ‘Anggunda kanye talima pia malye ululum nang anya arye, na dam arye bindoplulume. Anggun winilamluma ara, na kum kel bikamsise. Anggunda na mapu koprop kume. Anggunda na walwale,’ nyapnamne,” Yesus arye nyabuk.

Yohanes 20:17

Nyabukura, Yesus arye nyabuk. “Na ni Allah dam tamubuka min kum binmana anya arye, na nong kum talipnunilame. Ance tamubuka, na weit yapu nang nirya ati, ayupu laka nyalbinulyame. Ara, ‘Na Yesus ara, na ni dam, Allah el un dam tamubuka binirye unamne. Na ni bira, anggun ni uka. Na si erenun Allah ara, anggun si erelulum Allah uka. El tonoka,’ nyalbinulyame.” Yesus arye nyabuk.

Yohanes 17:19

Wininuna deiyok ara, ‘Na mapu nirya ara, pia telebuk utingce, na ni Allah, an na tenen ninyeuk unamak’ tenen, wininune, na ni Allah. Naio, na Yesus arye na bidamnye ati, ‘An na tenenanye unamne’ tenen, na kanye talima nirya ara, an deiceuk delikunune. ‘An amu tam unirye, an piluk pia donamne’ tenen, nyapne. Yesus arye nyabuka Allah ati morobuk.

Mazmur 89:27

Atalak ara, Daud birye nati, nyanamle. “Anda na ni koproba Allah ulyame. Anda na ni Allah umince, nati melibuka lyenilyame. Ton winipmanto ara, na ni Allah, anda weik keil bulamle atonun kibuka uminyeba, nara an amu tam unamne,” nyanamle.

Matius 25:40

Asipdenicopura, nara, weik ninye deiyoknye Rajanye birye, aninye ati nyapnamne. “Na dipkoprop nyapsine, nati diba tenepnik nang, na mapu ara, bona utotoa talina kum ninye ap, sekeltakne ninye ap, yuk nang arye, ‘Aninye ara mambul kume,’ tenenyak ninye ara, anggunce tonoknye babye melilamlum ning ara, nati melilamnulume.”

Matius 28:10

Winiprikba, Yesus arye ayupu nyabuk. “Anggun ilil una meme. Na mapu dam birumunce, na weit yapu ati nyaprurume. ‘Galilea tam bimunce, Yesus ap epdanuka eipnamlume,’ nyabuka laka nyalbinururume,” Yesus arye nyabuk.

1 Korintus 8:3

Bukni, yata ninye do nirya, Allah ati sik kanye talima, el deiceuk delilamak ninye ara, Allah arye aninye, el kele.

Kolose 3:10

Bitinye ning ara, malye baju batakikirye, winiryuk ning ongolamak atonun, Allah arye anggunti, kanye talima winiryuk ning atonun kibuka, teleb kipdeipsukce, arepsukura, akunum dobuka ululume. Winibuka winiryuk kanye talima kintinibuka arepsuk deiyoknye Allah ara, el babye ulye touk, anggun kanye talima teleb ubribasulule. ‘Sik kanye talima teleb kipnin banamle’ tenen, el winilul ning weik kel kina deiyok ning ati, melibuka arisilya deice arye, el ulye touk, anggun kanye talima teleb kipra basulule. Ara, Allah ap, dukdongobuka umunya noutamak ara, Allah arye, ‘Na unye touk ubribanamak’ tenen, winiryuk kanye talima akunum arepsuke. Aning ati ara, malye winin ning nirya ara, pia bataknamlulume.