Anggunda, malye winin ning noutamak, Allah arye lyebuka lopdeipsuk nang, diksukum una nang atonun unamlulume. Winibuka unamlulum bukni, ‘Nunda Allah arye akunum lyebuka lopdeipsuka anya arye, nun tenepmabye ninguk, talye luba kibuka unamabe,’ tenena meme. Malye un ning duknubuka kum unamlulume. Allah el yupu kekebuka, el piluk dobuka, diksukum unyak nang ulamak touk, anggun babye, wininamlulume.
Roma 6:22 - Eipomek22 Bukni, Isa Mutuku Dongonye arye tapu kouamsukba, el amutamuk ulamlumce, malye winin ninguk talibuka winilamluma noutamak, Allah arye akunum lyebuka loplopsukba, wini talak ara el amu tam bukuka umunyeba, elcuk anggun kanye talima talisulule. Allah el talisilya deice arye, teleb ulisulul ning ara nyapnusine. Ara diksukum teleb ubuka winin ning winipra balamibya ani, aminyan sirya talak ara, Allah ap neika kam pia unamabe. Gade chapit la |
Roma 6:22
40 Referans Kwoze
Minop talak malye una deiyoknye, Isa Mutuku Dongonye arye tapu koubuka deiamsukba, malye winin ninguk ulamluma noutamak, Allah arye lyebuka akunum loplopsuke. Winipsuka ati, wini talak ara, el amu tam bukuka, diksukum ninguk talibuka, telebuk ululume. Ati, Allah moronunye talak nirya ara, narye anggunti tenepnirye, ‘Telebe,’ nyanune.
Allah arye wenebuka kum oplopnamsile nyapmasina ara, talye ati kum nyapsine. Aning deiyok ara nyapnusine. Ara, Yesus Kristus pil dopsuka deice arye, Allah El Dib Kanye arisiliba, el melisilya deice arye, dipna ap, malye winina deiyok ning arye, tapu kouamsuka noutamak arye, loltakasulule. Ati, aminyan ara el ap bokuka yuk-yuk kum unamabe. Kum dipnamap bukni, el ap neika pia kamuk unamabe.
Ura, na weit yapu atonun ninyeo, Allah arye nyapsuka deiyok ara, ‘Tapu kouamuk ning lopdeipniba, mem pil dona kum arye, talye kanye bobuka diksukumuk unamak’ tenen, lobuka lyepsuke. ‘Wininamak’ tenen, lobuka lyepsuk bukni, anyapnusin yupu atonun kum tenenamlume. Ara, ‘E, winira Yesus arye akunum lyepsuka anya arye, nun kanye aryuk tenenyap ning ap, nun nong patasilye ning ap, aninguk tenebuka talya luparabuka malye unamap’ tenen, kum wininamlulume. Aning pia kum bukni, anggun nirya arye, yuk ninye nirya ati, bico tenepdamunce, melilanauk unamlulume.
Ayupu ara, talye kum nyapsine. Deiyok ani. Yo bok deice dekikceura, Pil urdem aryuk donyak bukni, Allah arye, yukupliba, dib tenebiceura, adeice arye, nun Deiyoknye Yesus arye tapu lopdeipsiliba, sik talima noutamak ara, talye balamak ninye atonun banyake. Aning atonun, ton nang ara, talye balamak bukni, Allah arye, yukupliba, dib tenebiceura, adeice arye, Kristus el pil melin nang unyakba, elce nyalye yupu uk kekebuka, el piluk donyake. Talye kum unyake.
Ura, anggun ton teneipdelulume. Ayupu nyapmasin deice arye, yuk nang arye, nati, “Elda telebnye,” nyabuka, ‘Kanye deipnikirye, na si erepnamniyake’ tenen, nyapmasin do? Aning kum bukni, ‘Allah elcuk kanye deipnamnil’ tenen, nyapmasin do? Kume, narye yuk nang ati, ‘Ura, sik kanye deipmanto yupu uk nyapnyeura, kekebikirye, nati kanye delinamniyak’ tenen, yupu kum nyanune. Ato yupu, talye yupu nyaptinyopura, Kristus el pil melinanye dipkoprop kum uptinye. Ati, talye nang arye kanye deipnitingce, ‘Elda pia telebnye tenepnitinge’ tenen, ayupu kum nyasunune. Na Paulus arye nyapsine.
Wininamluma deiyok ara nyapnusine. Wini talak ara, Allah arye, “Aning ara wininamlulume, aning ara kum wininamlulume,” nyapdeibukba, Musa birye sekeiyamsuk mem yupu amu tam tuba kum ululume. Wini talak ara, Allah bico tenesilirye, el kanye aryuk el mikip arisilirye, melisilyeba, el amutamuk ululume. Ati ara, malye una deiyok ning arye, anggunti malye kum upnamsil bukni, telebuk unamlume.
Bukni, dan ninye do nirya, ‘Israel ninye optibye,’ tenen, ninye on ning kintinibikirye, olyasiting bukni, kum winipmanto upnamake. Aning atonun, dan nang do nirya, anggun Israel ninye ati, ‘Malye kum winipmakibuk malye yupu sik deice nyapnuyabe,’ tenepnamsiyak nang ara, urdemuk unamake. Sikce nyanamsiak yupu ara, talye urdemuk nyanmatinga babye, nong kum upnamle. Tonda ayupu nyanamsiyaka deice arye malye kum kipdeipsitinge. Narye melipsiniba, anggun Israel nang arye amalye yupu talamak nang ati, yupu sekmunyeba, yupu kum asa unamake. Nara Allah Yahweh arye anggun Israel ninye ati nyapsine. Arup nyapmasin yupu nirya ara, na amu tam unamlum nang melipsiniba, dolonamlulume. Yuk ninye arye anggunti, malye yupu nyanamsiak bukni, na Allah arye anggunti pia melipsiniba, teleb upmunyopura, yuk mutuku ninye nirya arye, kel biknamake. Ara, ‘Se, Israel ninye ara, dipkoprob Allah el ‘Naʼ tenen, ninye unyake,’ tenen, kel biknamake. Narye dekna arin ning ara, pia teleb una deiyok ning arepsiniba, telebuk unamlume. Allah arye Israel ninye ati nyabuk.
Ura, amalye-malye winina kum bukni, teleb yo arye, teleb yo duk moulamle touk, Allah El Dib Kanye, el mikip arye melisilyeba, wininamap ning ara nyapnusine. Ateleb winin ning ara, ani. Ara yuk nang ati bico tenebuka melilana ap, kanye deibuka pin-pin asa una ap, kanye teniltona kumce, kanye deibuka una ap, yuk nang arye nunti malye updeipsica babye, talima namin asa arye una ap, yuk nang pataplye ning ati melina ap, diksukum una ap, ikin upsilya babye pil batakna kumce, pi dobuka pia pil dona ap,
Aning ati ara, na kayapo, arup nyapmasin touk, Kristus el nong dibuka deice, Allah arye anggun ap, Yesus ap, kanye talima dukdongopsuk ati, adeice arye anggun babye diplume. Kristus dibuk talak arye Musa sekamuk mem yupu amu tam tuba kum ulul touk, Kristus ap dukdongopsuk deice arye, anggun babye amem yupu amu tam tuba kum ululume. Allah arye winipsuka deiyok ara nyapnusine. Allah arye utenelamsuke. Ara ‘Narye nyapsiba, Musa birye sekamuk yupu talibuka ulamik bukni, wini talak ara, el dibukba narye kam bukeipsinye, Yesus Kristus, elcuk sik talilulba, el amutamuk unamake. Unyakce diksukumuk kibuka winibikirye, na Allah ati, kibuka na si erenamniake,’ Allah arye tenelamsuke.
Atalak winilamlum ning nirya ara, ila tuba tonap teneipdelulume. Amalye winin ning aning-aning nirya winilamluma deice arye, anggun kanye talima ap, anggun winin ning nirya ap, teleb kililamsuk do, kum do? Wini talak ara, anggun minop winilamlum ning tenepmunyopura, alye dakalalulume. Aning nirya talibuka winipra balamibya ani, sirya talak dibibyopura, Allah ap neika kum uptibye. Malye ninguk pia talibuka winipmunyopura, dipkoprop dipnamlume. Malye ninguk talibuka wininyak ninye ara, sirya talak, Allah ap neika kum unamake. Sik yuk-yuk unamake.
Atalak, Nebukadnesar weik uku buk dinmok aik, bisik bublan dam tikuk. Tikukce, elce ayupu nyabuk. “Sadrak ap, Mesak ap, Abednego ap, anggunda Allah erenanye, el pil don nang ululuma anya arye, weik uku buk dinmala kan-kan noutamak arye, kubuka yamunce, yalulume,” nyabuk. Nyabukopura, Sadrak ap, Mesak ap, Abednego ap, weik uku buk dinmok aik pum tam arye, kubuka yayik.
Tonda, ance nunti, “Weik tonun bico tenesinirye, pia teleb kilinamsine,” nyabuka, nyalin yupu deice nyapdeiamsulum touk, adeice arye, nun mal olan nang ara, obuka sirya dakanamlame. Ara, nati, ‘Anye bira nun lik,’ teneninyak nang nirya ara, ‘Ance anang obuka, malye kipnalam’ tenen, moropkine na nio! Ara, talye ati kum bukni, deiyok ara ani. Nara, an amu tam unirye, an piluk donuna ati, ance lyepdopnamnilame na nio!
Telebe, na mi Tituso, an ap, neika Yesus Kristus dib tenebupubuk, kanye talima dukdongopsuk ati, na mi koprop atonun ulyamnye anti, na Paulus arye asurat sekeibkine. Na Paulus ara, Allah el amu tam unirye, el yupu uk kekebuka, el piluk donune. Yesus Kristus arye, ‘Na yupu dobuka peterelbanamle. Elda na Rasulnye unamle’ tenen, wipdeipnukura, Allah arye, ‘Lyepnamne’ tenen, wipdeiamuk ninye ara, ‘Sik arye, elti, weik arye dib tenepnamak’ tenen, pil donune. Tonda aninye arye, ‘Allah el dipkoprop yupu weik arye kel biknamak’ tenen, pil donune. Allah el yupu ara, moubuka kekebibye deice arye, Allah el funguk ulye touk, diksukumuk uptibye.
Nunce anggun anang ati, ‘Aning nirya dolonamak’ tenen, Allah morosinyam ara, urdem ati kume. Deiyok ara, Allah arye, ‘Na mapu winibuka, winibuka diksukumuk unamake,’ tenesilye touk, dipkoprop aninguk talibuka, ‘Anggun unamlum ning nirya teleb ubuka unamlum’ tenen, Allah morosinyame. Tonda, ‘Wininamluma deice arye, Allah arye kanye delinamsil’ tenen, nunce anggunti Allah morosinyame. Winibuka winimunyopura, Allah arye kanye delinamsil ning ara, lilibuka nyapnusine. Ara, yata teleb winin ning nirya do, diksukum ninguk yala-yala nirya umunyebuk, teleb duk weik moupnin banamsile. Tonda, Allah ap, kanye dukdongobuka umunye ning ap, Allah winilul ning nirya ara, ‘Weik arye kel kipra banamak’ tenen, nunce anggunti Allah morosinyame.
Atalak noutam nirya ara, anggun ap, Yesus Kristus ap, talima dukdongobuka neika ululumbuk, Kristus el mikip deice melisiliba, pia diksukumuk winilamlum ani, ‘Teleb winina ati, duk weik moupnamsile’ tenen, Allah morosunune. Diksukumuk winilamunyebuk, duk weik moupsilyopura, ninye nirya eipsikirye, “Allah elda pia telebe,” nyabuka, el si erebikibuk, Allah el si weik upnamle. Winiplyopura, ‘Ninye weik el si kel kibikirye, el siuk erepnamak’ tenen, Allah morosunune.
Deiyok ara, ani. Duk moulamle yo arye, el yo yala ulye touk, duk moulule. Duk moulamle atonun, diksukum una ap, teleb ninguk winina ap ati, dirina usilibuk, duk moulamsil ning ara, nyapnusine. Ara, teleb winin ning, yala nirya ap, Allah ara, malye ning tonok ning babye, kum ulirye, pung ulye touk, diksukum winin ning nirya ap, tilila nyana kum aniryuk, dipkoprop yupu uk nyana ap ara, aning-aning nirya ara, dirina ning ulule. Teleb yo arye, teleb duk moulamle atonun, anggunda dirina atonun ninye ululuma anya arye, ateleb winin ninguk, pia ati wininamlulume.
Kume, na kayapo, na kele. Na kanye talima pum tam tenenye ning nirya ara, Allah elce nyabuk yupu, diksukum ninguk pataniliba, el yupu uk talibuka, el amutamuk unune. Unun bukni, nara talye tukwaknye ununa anya arye, na kanye talima pum tam ara, malye winina deiyok ning aryuk talinululba, amalye winin ning el amutamuk tuba unirye, malye wininune. Bukni, Nun Deiyoknye Yesus Kristus ap, nun ap kanye talima dukdongopsuka deice arye, nun ni Allah elce akunum lobuka lyesulule. Ati, narye nun Ni Kopropa Allah ati, “Anda pia telebe,” nyanune. Na Paulus birye nyapsine.
Anggunce nati kum wipdeiamnulume. Aning kum bukni, narye anggunti, ‘Aninye ara melisiniba, pia teleb ubica deice arye, duk moupnamle ning ara, pia unamle’ tenen, wipdeiamsise. Ati anggunce anyapmasin touk akunum winipmunyopura, anggunce na si deice arye moropmunyopura, na ni koprop kekepsilirye, aning-aning moropmunye touk arenamsile.
Nati, diba tenebuka, na ap talima dukdongobuka unyak ninye ara, anggur tapu taruk atonun unyake. Na ni koprop arye, anggur tapu taruk duk kum moulamle ning ara, sekuka batakalule. Bukni, atapu taruk arye duk teleb ubuka moulamle ning ara, ‘Tapu duk pia teleb ubuka, weik arye moupnamle’ tenen, yuk malye tapu koupdongobuk ning ap, talye taruk ap, sekloplirye, moulilule.
Dipkoprop kwaning yongobuka lin talak atonun talak ara akunuma. Wini talak ara kwaning lina deiyoknye birye, el dekna ning dekuka dololule. Winira, li talak akunum ulula anya arye, ‘Kwaning yala kouamuka deiyoknye ap, kwaning nong lina deiyoknye ap, neika kanye deipnamdak’ tenen, kwaning lina deiyoknye birye akunum lipnin banmale. El kwaning linmal ning nyapmasina ara, domon yupu nyapmasin bukni, ayupu nong ara, kam pia unamak ninye ati, nyapsine.
Tonda, yatanye do, yata kil do? Ninye yala-yala nirya arye, na nong ap, na yupu peterena ap ati, sik talilamice ning batakikirye, na aminyan tam dobolyanganamniak ninye nirya ara, sikce batakikce ning atonun ning, yupa pia weik dolonamake. Ara, atalak noutam aryuk dolonamake. Ara, sik ulamice mutuku ap, sik aik ap, sik weit yapu ap, sik du yapu ap, sik weit kilapu ap, sik du kilapu ap, sik nin, sik ni yapu ap, sik bidamnye mapu ap, sik wa bun ap, anirya bataklamica ning ati ara, atalak noutam aryuk aning atonun ning, yupa weik dolonamake. Tonda, aminyan yanamle talak ara, kam pia una ati deiyok ning doprobikirye, nong bola koplobuka pia kam unamake.
Aning akunum winibikcopura, Allah arye talyamukba, diksukumuk wininyak ninye ara, Allah ap, im deice unamake. Keting deiplirye, dirina weik ulamle touk, diksukumuk wininyak ninye ara, im deice unamak talak ara, Allah arye aninye taliplirye, im deice unamle mutuku noutamak ara, sikda weik mambul ninye anya arye, pia teleb ubuka unamake. Ati, anggun amul aupsilyopura, ayupu kekepmanto ululum nang ara, na nyapmasin yupu moubuka kekepnululume. Yesus arye nyabuk.
Sik wa win nang arye, talye palamuk ning malye ning kwinibukabikce, koubuka uku dongobik touk, na Yesus arye ninye mutuku-mutuku nirya ati yupu lipsisikuka bokolin talak, ninye nirya bokukabnirye, yuk-yuk deipnamne talak ati nyapmanue. Diba tenena kumce, malyeuk wininyak ninye ara, bokukabnirye, wenebuka uku din mutuku dongopnamne ati nyapne.
Winipmanto ning ara, teleb yo yala bobuka, an si eren aik dam koubikiba, weik palamle. Winiplyeba, dola kwelamak touk ance melisiminyeba, sik diksukum wininyak nang ara, telebuk wininamake. Diba, an si eren aik dam, mitik yo koubiceba, weik palamle atonun, sik diksukum wininyak nang ara, ance areamsulum mutuku, Israel nang unyap mutuku noutam nirya ara, telebuk wininyabe.
Nyabukopura, Allah el si Yahweh arye tamubuka Isa Mutuku Dongonye ati nyabuk. “Anda na amu tam pil donanye Ayub bira elilyam do? Anyapkenanye bira, talye ati kum nyapkine. Ninye mutuku-mutuku nirya unyak nang ara, el Ayub atonun kum unyake. Na pil donanye Ayub pung telebuk ulul atonun ton kum unyake. Elda na siuk erenilirye, malye un ning tonok ning babye pia kum winilule,” Allah arye nyabuk.
Yakub birye deiamukba dadeipdanin, deipkirik danin yanganyak ninye, sikda kum nukmanto, pia weik unyake. Winipmanto ara, tuku bisik bakibuk, uku sice butbuta welelamla atonun kibuka yanganyake. Ati, yatanye birye, aninye nirya nukturye, laka nyaptu do? Kume, sik ninye yupa ara, pia kum nukmanto atia. Aning atonun, asukum atikmance, sik Israel ninye nirya, kum eiptinye. Sik cang kambing bol doltakna aik deipmekak, noutamak bokuka dumbarye deipmekbuk, amutuku deice arye, tonok ninguk eiptinye. Israel ninye, sik yupa ara, kum nukmanto unyaka ati, sik dipkoprob mambul weik. Allah arye sikti, weika arye meliamuka ati, ‘Sik diksukum unyak touk, na babye uptinye’ tenen, patapnile. Sik diksukum unyak touk, unmanya ani, aminyan talak, ‘Sik dipnamak touk, na babye atonun diptinye’ tenen, se, tenenune. Sikda, pia teleb ninye unyaka ati, na kanye ara, ‘Sik unyak touk, na babye uptinye,’ nyapmana ati, aninye ati ara, yata malye yupu nyaptinya kume.” Bileam birye nyabuk.
Yusup biti nyapnamlulume. An ni koprop arye nyapkile. An du yapu arye anti pia malye-malye weik winibikika deice arye ikin ning weik an nong deice uamkuke. Bukni, sikce pia malye winilamik ning ati ara namin kipnulyame. An ni koprop arye si erelamuk Allah ara, an du yapu babye el siuk erebuka si erenyake. Ati, sikce malye kipdeipkik ning ara namin kipnulyame. An ni koproba Yakub birye nyabuka moropkuke.” Yusup el du yapu arye ayupu nyapdeibikura, yuk nang arye ayupu bobuka laka nyalyayikba, Yusup kekebukopura, engebuk.
Na nio ance, “Aning ara, wininamlume. Aning ara, pia kum wininamlume,” nyapdeiamsulum yupu ara, pia ati talibuka wininuna ati, na kam unun talak ara, ‘Ikin ning, na dam yanilyakʼ tenen, ‘Ancuk melibuka kalikinamnilyameʼ tenena ati nyapkine na nio. Tonda, an amu tam unirye, an piluk talibuka donune. Ati, ‘Na mal olan nang arye, opnikcakʼ tenen, narye anti, na kanye talima nirya, an deice deipkinirye, diba tenekunune.
Tonda, anggun mutuku, Kolose mutukunye, Epafras arye, “Telebe,” nyapmasile. Elce Yesus Kristus amu tam ulirye, Yesus el pil dobuka ulule. Epafras arye anggunti, pia pi dobuka, Allah moronauk usulule. Elce morosulul ning ara, nyapnune. Ara, Allah arye el mapu nirya ati, ‘Wininamake, wininamake,’ tenesilye ning nirya ara, ‘Aning pia dipkoprop ning anya arye, Kolose nang arye aninguk talibuka pia kanye lamabuka unamak’ tenen, Allah morosulule. Tonda elce, ‘Teniltona kumce, diba tenebiceura, sik talima pia wisipnamle’ tenen, elce anggun Kolose nang ati Allah morosulule.
Ura, na kayapo. Anggun nirya arye, ‘Yuk ninye nirya ap, kanye deibuka neika ubibirye, malye winina ap, olana ap, yupu deice walana ap, aning nirya pia kum diparyuk, diksukumuk unamap’ tenen, pia pi dobuka, pirilenamlulume. Malye winina ning nirya, kum batakikirye, diksukumuk kum unyak ninye ara, nun Weik Deiyoknye Allah, el ap neika ansinibuka kum unamake.
Piblisite