Allah arye amalye winin ning talibuka unyak ninye nirya ati nyalamuk. “Aninye atonun ninye nirya ara, weik arye wenebuka opnamne. Winipnyopura, na ap neika pia kum unamabe. Batakniba, sik yuk dadepnamake. Aninye ara, weik arye wenepnamne,” nyapdeiyamsuk yupu ara, akunum kel kiyamik bukni, ‘Aning ara pia mambule,’ tenena kum diparyuk, tuba-tuba talye luparabuka pia malyeuk wininyake. Winikirye, sikce pia malye winilamik touk, aninguk talibuka unyakce, malye ninye ati, sikce “Aning ara telebe uka,” nyabuka si dolakirye erelilanyake.
Roma 6:21 - Eipomek21 Atalak winilamlum ning nirya ara, ila tuba tonap teneipdelulume. Amalye winin ning aning-aning nirya winilamluma deice arye, anggun kanye talima ap, anggun winin ning nirya ap, teleb kililamsuk do, kum do? Wini talak ara, anggun minop winilamlum ning tenepmunyopura, alye dakalalulume. Aning nirya talibuka winipra balamibya ani, sirya talak dibibyopura, Allah ap neika kum uptibye. Malye ninguk pia talibuka winipmunyopura, dipkoprop dipnamlume. Malye ninguk talibuka wininyak ninye ara, sirya talak, Allah ap neika kum unamake. Sik yuk-yuk unamake. Gade chapit la |
Roma 6:21
46 Referans Kwoze
Nun min diba kum tenelamubu talak noutamak arye, nun kanye talima nirya ara, pia malyeuk ulamsuka anya arye, Musa sekamuk yupu deice, “Winina meme,” nyapdeipsuk yupu kekelamupa deice arye, malye winin ninguk patalamsuke. Ara, ‘E amalye winin ning ati ara, Allah arye, ‘Winina meme,’ nyapdeipsuk bukni, aning ara pia wininamap’ tenen, patalamsuke. ‘Awinipye ning ara, malye ulule’ tenen, moubuka tenelamubu bukni, aninguk patalamsukba, malyeuk winilamubu. Winilamupa deice arye, nong upsuk ning ara, dipna deiyok uka. Winibuka malyeuk wininyaba deice arye, nun nirya dipnauk unyabe.
Aning ara talye kum nyapsine. Deiyok ara nyapnusine. Ara, nunce dengna ning dolona ati, pil dobibiba, sik pil deiyok nang arye menenga ning, yo bok arisinyak touk, malye winin ninguk tenebuka, pia malyeuk winipra balamibyopura, sirya talak ara dipnamabe. Dibibyopura, Allah ap neika pia kum unamabe. Bukni, Allah bico tenesilirye, el kanye aryuk talye arisilye ning ara, nyapnusine. Ara, nun Deiyoknye Yesus Kristus ap, talima dukdongopsuk deice arye, sirya talak ara kam bukeipsilyeba, Allah ap pia kam unamabe.
Ara, sik ninye nirya arye utenenyake. ‘Kume, nun wininyap ning ap, banyap bisik ap ara, diksukum bisikuk banyabe,’ tenebuka banyake. Bukni, tukwak ninye arye, malye ninguk talibuka unyak ninye ara, dipna damak bisikuk banyake. Kwalin bisikuk ulula anya arye, sik abisikuk banyaka deice arye, sirya talak ara, sik dibikcopura, uku dilamle bisikuk banyake.
Aning ara talye ati kum nyapsine. Deiyok ara ani. Ara, nun kanye talima malye ulina deiyok ning arye talisiliba, malye winin ninguk talibuka upra babyopura, dipkoprop aminyan talak dipnamabe. Bukni, Allah El Dib Kanye melisilya deice arye, malye winin ning aning-aning nirya ati, ‘Nun like,’ tenebuka batakipyopura, kam pia unamabe. Ara malye winin ning oltakana atonun unamaba ati nyapsine.
Yata ninye do nirya, Allah El Dib Kanye arye sik kanye talima talipliba, el patalul touk tenebuka unyak ninye ara, kanye deibuka telebuk ulamica ani, aminyan talak dibica babye, Allah ap neika kam pia unamake. Bukni, sik malye ninguk talibuka wininyak ninye ara, amalye winin ninguk tenebuka winilamica ani, aminyan dibicopura, Allah ap neika pia kum unamake.
Tonda, atalak noutam aryuk, ninye weik tonun akunum diamikce nang babye, tamubuka kam buknamake. Ara diamikba, tuku palyamik nang ara, tuku pum tam arye kam buknamake. Kam bukikirye, ton tam nang ara, pia bola koplobuka, kam una deiyok ning dopropbikirye, tuba tamubuka bukikirye, kam kipman pia telebuk unamake. Bukni, ton tam nang ara, kanye imun weik ning doprobikirye, alye dakdanamake. Sikda, kanye imun weik ning doprobikirye, uku bisik bikirye, malye nyabuka ngalukikirye, pia engenauk unamake.
Bukni, na Allah Yahweh aryuk, ninye sik talima pum ulul ning ap, ninye arye teninyak ning ap ara, tukwak arye eibuka bikne ning ara, narye sikti, ‘Teleb wininamak do, malyeuk wininamak do?’ tenen, sik nirya ati winilenune. Narye tukwak nang nirya ati, tonok-tonok nang arye, sik wininyak ning, dawinilamiceba, nong akunum uplyopura, narye eipnyopura, sik winilamikiba, duk mouplyopura, narye sikti, kwang dakanune. Ara, narye sik winilamice touk, deken ning arenune.
Aweik ninye deiyoknye birye, apil nirya akunum dopra balamuka ani, apil nirya akunum dobukopura, dipna deiyok ning ap, diamik ninye wekelbalamikak, el si ara Kerajaan Maut ap ara, amutuku bitinye doprobukce uku din mutuku noutamak dopkwetebuk. Uku din mutuku noutam akuku tuba dilamle mekwen ara, Dipna Bitinye ning ati nyanyabe.
“Aning ara, talye ati kum nyapne. Deiyok ara, amalye winin ninye arye an mapu weik oltakalamik. Ara, ance, ‘Aninye ara na mapu unamak’ tenen, wiamlumba, anti diba tenelamik ninye ap, an yupu lake nyana deiyok nang nabi-nabi nang ap, weika arye oltakalamik. Winibuka malye ulamika ati ara, ance nyapdeipmalamba, sik mek nirya ining mekwen danmalabuk, ining mekuk dinamake. Sikda malye ninye ati, ‘Bita merekuka wenepmalume,’ nyapne.” Mek deiyok talibuka ulamuk malaikat arye nyabukba, kekepse.
Allah arye ninye mutuku sirya im sirya nirya ati, yupu yuk-yuk bokeiplirye, wenepnamla ara, el mapu kan-kan arye deiyok koupnamla anya arye, ikin ning anggun nong deice deipsikce talak ara, kanye deibuka, Allah el siuk erenamlulume. Tonda, el mapu kan-kan arye deiyok koupsilyeura, mitik ikin usilye bukni, aminyan daknamle talak ara, diba tenena kum arye, Allah el laka teleb yupu ati, yaniltanyak ninye ati ara, yupu bokeiplirye, wenepnamle ning ara, weik mambule. Sik pia ikin weik unamake.
Yata nang do nirya, yuk nang malye bisik bace bukni, teleb bisikuk yanuka tamupdeibice nang ara, pia mambul pil donyake. Ara, amalye bisik banyak nang ara, abisik pia dobolbitingopura, diptingopura, uku din mutuku dongoptubuk, apia unamtinge. Bukni, anang arye tamubuka, teleb bisik delilyanamak deice arye melibikikba, Allah arye malye bisik binamice ninye ati lyelule. Tonda, apil melibuka dolamaka deice arye, Allah arye sik malye winin nang, sik malye ning nirya namin kibuka, teleb ubuka delinamle. Telebe, asukumuk sekuka deipsine. Telebe na Yakobus arye nyapsine, akunuma.
Musa sekamuk yupu yanilamik nang oltakalamik ning ara, mitik ikin uamuk bukni, Allah el Mi Kopropa ati, yaniltanyak ninye ati, Allah arye wenebuka onamle ning ara, ikin weik kum unamle do? Kume, na kayapo, anggun ton teneipdelulume. Allah arye, “Wininamsine,” nyabuka, nyalilamsuk yupu deice, diksukum ulisilye ning, ‘Nong unamle’ tenen, Yesus el ining arepsukba, biyuke. Aning ara, weik mambul bukni, sik malye nang arye, ‘Kume, aining ara, talye ninguk ulule. Malye ning uka,’ tenenyak ninye ara, Allah arye aninye ati, weik arye weneplirye, kum onamle do? Tonda, Allah El Dib Kanye arye, bico tenesilirye, el kanye aryuk melisilye Dib Kanye ati, el nong deice malye yupu nyabuka, lyek-lyek alamak ninye ara, weik arye wenebuka kum onamle do? Kume, weika arye opliba, aninye ara ikin weik unamake.
Ara, anggun Korintus ninye ton tenipdelulume. Wenen surat dopdeipsukba, Allah arye anggun talima noutamak pil dobukba, anggunda mambul kanye bobuka engepluma deice arye winipsuk ning ara, telebuka. Ara ani. Anggunce nati, ‘Anang ara, teleb nang tenepnamsil’ tenen, pia pi dobuka yupu nyalamnulum ning ap, tonda, ‘Malye winipsuk ning kum daneiptibye’ tenen, pi dobuka pil dolamlum ning ap, tonda, ‘Se, yata ati malye winin ning nun noutamak tuba upmasil do?’ tenen, ilil kanye bobuka ululum ning ap, tonda, ‘Malye winin ning batakuka, teleb ninguk wininamabe’ tenen, patana ap, ‘Malye usilye ning batakuka, teleb kibuka mupdeipnamap’ tenena ap, tonda, malye usilye ning ati, “Dauplye,” kum nyanamap bukni, malye ning nirya ati ‘Yupu bokeibibirye, lipsisiknamap’ tenena ap, anirya ati ara, na kanye ara, telebuka. Adeiyok nirya ati ara, anggunce apil nirya dolamluma deice arye, ‘Anang ara, teleb winin ninyeuk unyak’ tenen, laka upsilaba akunum kel kisinyabe.
Sik Israel yala nang arye aning nirya kekebikirye, alye weik dakdanamak talak ara, an Yeheskiel birye, na si eren aik pum tam ulye ning urasin ati, lak nyapnalame. Tonda, anyaik wekelban bisik bublan ap, anyaik batakuka ban bisik ap, aik taplak deibikce domik ning ap, laka nyapnalame. Tonda, na Allah ara, na si eren aik noutam pil dona ati, ‘Wininamlume, apil ara, winibuka donamlume. Aning ara, telebe, aning ara meme,’ nyabuka, laka nyapse ning ap, tonda, aning kum winibikiba, yu upnilyopura, wenepnamsin ning ap, ance lak nyalbinalame. Tonda ayupu-ayupu nirya ara, ance sik Israel nang dinamakak arye, ayupu sekenalame. Winipnalama deiyok ara, sikce eibikirye, anyaik pum pil dona nirya ati, ‘Winibuka apil donamlume,’ nyapse ning, moubuka bikikirye, na nyapse touk unamake. Tonda, narye sikti, “Anyaik pum tam ap, bai tam ap, aning wininamlume, aning ara, pia kum wininamlume,” nyapdeipse touk, moubuka tenebikirye, wininamake.
Tonda nyanyake. “Se, nunce Allah anti, akunum balye tam kiyamkupu. Bukni, nun amalye winilamupu ning ara, ‘Yata deiyok ati, nun ni koprop Allah batakamuburye, amalye ning winilamupu do?’ tenenyabe. Ara, nun malye winilamupu ning kel biksulumce, wenepsulum ati, Allah ance wenepsulum deice arye, kel bikupu. Winibupurye, ‘Diba, nunda weik malye ulamupu nang’ tenen, an amu tam unyabe. Adeice arye, nun kam ulamupu talak, malye winilamupu ning ati, ilil upsiliba, alye dakaldanyabe.” Israel ninye arye, nyakiba kekenune. Allah arye nyabuk.
Winipmanto ara, na mapu Israel nang arye gandum yala akunum dokik bukni, el duk kum daknamake. Talya taca ninguk kipdeipnamake. Imun kanye deice arye, sik wa akunum piribuka wibik ning ara, nong ton pia kum ubuk. Winibuka ati, sikce, ‘Se yata ati upsil do?’ tenen, taram talipdanuka, talima dakalsakalule. Sikce, ‘Aning libibirye, dekeipyopura, bona talin nang unamapʼ tenen, pirilamik bukni, nong pia kum ubuke. Ati, na Allah arye sikti, yu upniliba, sik deice ikin ning deipnyopura, sik wa winyak ning ara, nong ton libuka kum dipnamaka ati, alye weik dakdanamake. Allah arye, na Yeremia dam yanuka nyapnuk.
Tonda, adeiyok nang nirya arye, “Se, nunda malye winin ning talibuka wininyap bukni, nunda dipkoprob ilil kum upsutue. Nun awininyab ning nirya ati ara, alye kum dakdanamabe,” nyabuka, mania kanye weik bonyake. Wininyaka ati ara, na Allah arye dipkoprob nyapsine. ‘'Amutuku nang wenepnamsin talak ara, anggun mutuku deiyok-deiyok nang babye, weik arye wenepnamsine. Narye lo arepnyeba, anggun mal olan nang arye, mal olyanamsiak talak ara, adeiyok nang babye obikiba, sakuka dipnamake. Anggun amutuku ululum nang ati, opsikiba saklamlum touk, sik adeiyok nang nirya babye sakiceba, amu tamuk unamake.
Ara, ninye nirya arye, sik tenebice bisikuk bakirye, ‘Kume, nun banmap bisik ara, teleb bisik anya arye, abisikuk banamabe. Nunda diksukumuk unyabe,’ tenebuka banyake. Bukni, abisik urasin teleb bisik upmatu babye, sikda moubuka kum tenipdekirye, malye bisikuk balamicopura, dipkoprob dipna damuk banyake. Dipkoprop teleb bisikuk wibuka kum banamake. Aminyan talak, sik banamak bisik nirya ara, uku din mutuku uk banamake. Ati, ‘Awininamap ning ara, teleb ning do, malye ning do?’ tenen, pia moubuka tenipdemunce, banamlulume. Talye lukparabuka bana meme.
Aning ati ara, anggunce winilamluma dekna ara ikin ning dopropnamlume. Tonda anggunce, ‘Winibuka malye wininamabe,’ tenepce arye, ‘Malye winin ninguk talibuka unamabe’ tenen, malye piluk dolamluma deice arye, dekna dopropnamlume. Aning deiyok ara, talye ati kume. Anggun bidamnye arye, anggun bidamnye ati, malye winililalulume.
Winilamsa ani, aminyan talak, Allah Yahweh, el si eren aik binuka, wekse talak ara, sik malye winin ning, wininyak nang aminyan talak winipnamak ning ara, moubuka kel bikse. Ara, aminyan talak Allah arye, amalye wininyak ninye nirya ati, wenebuka oplirye, kum daneipnamle ning ara, moubuka kel bikse.
Ati ara, ayupu nyapmanilamba kekepmana deice arye, ‘Na nyalamse yupu ara, dipkoprob malye yupu nyalamse,’ kunum tenepne. Utenepmana ati, ‘Yata deiyok ati nyalamse do?’ tenen, ikin kanye bobuka, alye dakdana anya arye, arup malye nyanmanu ning ara, bataknirye atu dobuka, na kisok deice deipna arye, butbuta deice bukmane. Ara, pia walwal arye nyanmanuba, winira kel kipmana ati ara, na malye ning batakna arye, ikin kanye bobuka abukmane. Ayub birye nyabuk.
Narye nyabuka moropse. “Se, na ni Allaho. Diba na ni Allah, nara dipkoprob mambul kanye bopnarye, alye weik upmanile. An morona ati ara, na kisok erebuka an dam dina ara, na pia ilil ati, kum winiptinye. Deiyok ara, nun malye unyap ning ara, pia weik tonun tabaknin basiliba, weik tonun nepnin basilirye weik usulule. Winipmanto ara, nun malye winin ning ati, adiparyuk wenebuka opnamsutum deiyok ning ara, nun kisok bisibuka, im deice binmanto akunum ulule,’ tenepne.
Aning nirya akunum winibukopura, ninye deiyoknye, Raja Salomo birye, imam Abyatar biti nyabuk. “Abyatar an deiamkik mutuku Anatot, tamubuka binulyame. Arup ara, an babye opkitinye sum bukni, batakina ati, nyapkine. Deiyok ara, an ap, na ni koproba ap, anggun neika tuba udurume. Neika ulamdumce, na ni ikin ning yanaba, imun kanye bobuka, ikin ulamuk talak ara, an babye kanye imun ulamkuke. Tonda, Allah elce nyapdeiamuk yupu sekuka deiamik yo marikna, Peti Perjanjian yo pum, mambul weik ning kalekina deiyoknye ulalum atia,” nyabuk.
Tonda, winipmanto yupu ton nyapnusine. Aning ara, dipkoprob nyapmanye touk wininamlume. Winipmanto ara, malye winin ning weik winipmalye nang wenebuka, obikiba dipnamle. Adipnamlanye bira, el nong ara, talye daupmalye yo deice do, sikce ikamikce cang yo deice do, yo deice tapu arye kirikil kwetenamnyake. Ara, ‘Yuk nang eibikirye, ‘Seʼ tenen, bikikirye, sik babye ton malye kum wininamnyak,’ tenena ati, aning wininamake.
Ura, amalye ning winipmace nang, ikin deibuka ona ati ara, tonoknye biryuk, ‘Sik malye winipmangu ara, narye eipmanue,’ nyablya deice kum bukni, dipkoprob ninye bitinye nangto, tonda winilye nangto, anang nirya arye eibikirye, ‘Talye ning si erenyak ning,’ lak nyabikca ati ara, amalye winipmace nang, adiparyuk onamlulume. Bukni, tonap nyapne. Tonoknye biryuk eipmalirye, lak nyaplyopura, adeice aryuk, anggun anang kum onamlulume. Ara, ‘Dipkoprop amalye winin ning winipmak do, kum doʼ tenen, teniltona upsilyopura, anang batakanamlume, ona kume.
Aninye aning ara, sirya talak ara, Allah arye, weik wenebuka pia onamle. Oplirye, bataknamle. Anang ara, sikce, ‘Aning weik mambule,’ tenenyak ning ara, sik talye nong deice patalamle ning ap, sik babye, kanye deililana ning ap, anyuka. Sikce malye-malye winipmace ning deice arye, malye kanye bobuka, alye ulamtu bukni, amalye wininyak ning ati ara, maknya kintibuka kwalina ap, kimkimilana ap, unyake. Sik kanye talima nirya ara, talye tukwak deice ninguk delinyaka ati nyapsine. Tukwak ning deiceuk delinyaka ati, nyapsine.
Allah arye anye akunum ila tamubuka teleb kipdeiplyeura, anang nirya wekuka kekenmacak aryuk, el anye birye nyapnamle. “Narye teleb ning ara, malye kilamsirye, malye ning ara, ‘Aning telebe,’ nyabuka, talye yupu nyalamsirye, pia malye ulamse. Bukni, Allah elce nati kum wenebuka opnuke. Bico tenepnukce, na malye ulamse ning nirya ara, biknukce winipnuke,” nyabuka, laka nyanamle.
Ura, yuk yupu ton dukdongobuka nyapnusine. Malye una ati deiyok ning ara, tonoknye birye deiyok kibukce, ninye tukwak ninye nirya benepdeibukba, dakdongopsuke. Dakdongopsukce, wini talak ninye im sirya, mutuku sirya nirya ara, talima malye usulula ati ara, malyeuk wininyabe. Tonda, anye malye uamuka deice arye, ninye dipna deiyok ning ton yayuke. Ninye im sirya, mutuku sirya nirya malyeuk unyaba anya arye, ninye nirya dipnauk unyabe.
Yata ati, anggun walwal tuba ululum do? Narye nyapnusin yupu ara, anggun ton moubuka teneipdelulume. Ayupu ara, kum kel kipmaluma anya arye, kum tenelulum do? Winipmanto ning ara nyapnusine. Yata ninye do nirya, sikce yuk nang ati, ‘Anang sik nyanyak yupu kekebibirye, sik amutamuk unmabe,’ tenebice ninyeuk, anang aniryuk ninye deiyok talibuka, sik deice tam ubikirye, sikce aninye talinyakce, sik tenebice piluk arukunyakbuk, sik amu tam unyakce apiluk donyake. Aning atonun ton, malye winin ninguk tenebuka patapsilyopura, amalye una deiyoknye birye tapu koupsilirye, anggun kanye talima talisiliba, malyeuk winipra balamunya deice arye, aminyan talak dipkoprop dipnamlume. Akumopura, Allah arye nyasilye touk, ayupu uk kekebuka dobolbamunyopura, Allah elcuk talisilirye, diksukum ninye kilinamsile. Ati, malye winin ninguk talibibyopura, dipkoprop dipnamabe. Allah arye nyasilye touk, teleb ninguk talibibyopura, kam pia unamabe.
Aning kum bukni, pia malye ning wininyak nang arye, ‘Yuk ninye eibuka kel biksikcak’ tenen, duknulamak ning aning-aning nirya akunum batakibirye, tenepce arye yupu nyana ap, tilila yupu ap kum nyanyabe. Tonda, Allah yupu dipkoprop nyasilye touk aninguk moubuka peterenyabe. ‘Yuk nang arye kanye deipsitinge’ tenen, nun kanye aryuk kwalibuka kum peterenyabe. Aning nirya kum wininyap bukni, Allah el dinmasilibuk, Allah el dipkoprop yupu ulye touk, aninguk dobuka laka arye peterenyabe. Peterenyaba deice arye, ninye nirya kekebikirye, sik kanye tenena noutamak arye nunti, ‘Anang ara, dipkopropuk wininyak,’ tenesinyake.
Piblisite