Roma 15:26 - Eipomek

²⁶ Yerusalem mutuku binamana ara talye ati kume. Deiyok ara, sik Makedonia tam diba tenenyak ninye ap, tonda Akaya tam unyakce, diba tenenyak ninye ap nirya arye, ‘Yerusalem mutuku diba tenebuka unyak ninye kan-kan noutam arye, pia bona utotoa kum ninye sik melinamabe’ tenen, sik yo bok bulubuka delilamik.

Roma 15:26 Referans Kwoze

2 Korintus 9:12

Ninye melina ati, yo bok bulubuka arenamlum ning ara, Allah ati dib tenenyak ninye, bona utotowa talina kum ninye sik patan ning ati melipnamlulum bukni, aninguk kume. Tonda, aning arepmunyopura, mek langdiplirye, dikilsaklamle touk, aninye weik arye Allah ati, “Telebe,” nyanamake.

Pilemon 1:5

Wininuna deiyok ara, yuk nang arye an ati, laka nyapnikceura, akunum kekebuka kel bikikinune. Allah arye wiamuk ninye, el mapu nirya ati, ance talima arena ap, nun Deiyoknye Yesus ati, weik arye diba teneluluma ap ati, “Telebe,” nyabuka, Allah moronune.

1 Korintus 16:15

Ara, na kayapo, anggunda Yesus ati dib tenemunyeba, du weit atonun unyabe. Anggun kele, sik Akaya tam unyak ninye kan-kan, Stefanus ap, el aik unyak ninye ap, Allah yupu peterebupeba, sik minopce dib tenebike. Sik yuk nang nirya ara, aminyan tamuk dib tenebike. Yuk nang bukni, Allah ati akunum dib tenebikbuk, Allah arye, ‘Na’ tenen, wepdeibuk ninye nirya ati, Stefanus ap, el aik neika unyak ninye arye, ‘Aninye melinamabe’ tenen, apiluk dobuka unyake.

Rasul 18:12

Ura, winibuka peterelamuk bukni, Galio arye Akaya mutuku talibuka Gubernur ulamuk talak arye, Yahudi yala deiyok nang neika nirya arye, ‘Paulus opnuyap’ tenen, el yupu yaniplobikce, sik yupu bokolin deiyok nang yupu talipmekak, Paulus dobuka bobiyik.

Rasul 16:9

Teroas mutuku biyikura, binuka mapmeka lukunyan noutamak arye, lengdar atonun ning Paulus eibuk deice arye, Makedonia tamnye, tonoknye tikukce, pia morobukce nyabuk. “Makedonia tam yamince nun melipsilyame,” nyabuka morobuk.

Lukas 14:13

Anggun yuna kwalibuka delinamlum talak ara, talye bona utotoa talina kumnye ap, yok kwalin ninye ap, aik bun ninye ap, asing guna ninye ap, ‘Sik nirya dilyanuyak’ tenen, yukupnamlulume.

Lukas 6:20

Yesus arye, el yupu kekebuka dobolbalamik nang ati dipdeyukce, ayupu nyabuk. Wini talak teninamsil ning, talye bona utotoa talina kumnye ara, Allah ninye nirya lyeplirye, kanye talima talinamsil ning dopropmunce, el ap neika unamlume. Allah arye teleb ulinamsil ati, anggun kanye deibuka unamlume.

Matius 26:11

Talya bona utotoa talina kum ninye ara anggun ap neika pia unamluma anya arye, anggunce teneplum talakuk aninye meliptume. Bukni, nara anggun ap tuba neika pia kum unamabe.

Matius 25:40

Asipdenicopura, nara, weik ninye deiyoknye Rajanye birye, aninye ati nyapnamne. “Na dipkoprop nyapsine, nati diba tenepnik nang, na mapu ara, bona utotoa talina kum ninye ap, sekeltakne ninye ap, yuk nang arye, ‘Aninye ara mambul kume,’ tenenyak ninye ara, anggunce tonoknye babye melilamlum ning ara, nati melilamnulume.”

Zakaria 11:11

Akama bulaklopseba, asum deice, akama bulakmase ning, nyalin yupu nyapdeipse ning ara, akunum kum kipdeipse. Winipseba, sik domba basam dekna deiyok nang arye, nati kalikuka dilamnika ati, moubuka bikike. Ara, ‘Se, nabi Zakaria birye nyapmasil yupu ap, elce winimok ning ap ara, dipkoprob ninge ara, Allah Yahweh, elcuk aning nyapsutua babye, atonun ulule. Ati nabi arye nyapmasil ning ara, Allah Yahweh el yupu uk nyasulule,’ tenelamik.

Zakaria 11:7

Nara, nabi Zakaria, sik domba basam dekenyak nang arye dekna arepnikiba, domba basam opnamak ning nirya ara, naryuk weinamne. Ati ara, na kama ara bitinye akunum bopmane. Tonok kama ara, narye si dopse ning ara, ‘Bicoe tenepnirye melipnamne,’ nyabuka, si dopse. Tonda, kama bitinye talipse ning ara, el si ati, “Tonok kanye dukdongobuka un ning,’ nyabuka, si dopse. Aning nirya akunum winipsopura, adiparyuk deiyok koubuka, adomba basam kalikuka wein pil talibuka dopmase.

Amsal 17:5

Yata ninye do nirya, talye bona utotoa talina kum ninye ati, nalibuka akutunyak ninye ara, bona utoto talina kum ninye ati nalinyake. Bukni, winilamice deice arye, bona utoto talina kum ninye kwepdeiamuka deiyoknye Allah ati, malye nyalinyake. Aning atonun, yata ninye do nirya, bona utotoa talina kum ninye ap, yuk mutuku daunyak ninye nirya ap ati, kanye imun ning, sik damak yalyopura, ‘Aninye ara, ikin kanye bonyaka ara, merekuka ulule,’ tenebikirye, kanye delinyak nang ara, Allah arye awininyak ninye ati, ‘Dauplye,’ pia kum tenelule. Allah arye aninye sik wenena ati, dipkoprob wenebuka opnamle.

Amsal 14:31

Yatanye do, talye bona utotoa talina kum ninye ati, sik nong deice ikin ning weik arye delilulnye bira, bona utoto talina kum ninye kwepdeiamuka deiyoknye, Allah ati, ‘Na like,’ tenena atonun ulirye, Allah ati yanilule. Bukni, yatanye do nirya, mitang ati imun kanye bobuka ukirye, talye bona utotoa talina kum unyak ninye ati, bico tenelirye, teleb ubuka melilulnye bira, bona utoto talina kum ninye kwepdeiamuka deiyoknye Allah atibuk, kibuka si erelule. Allah arye anye biti, kanye delinamle.

Amsal 14:21

Yata ninye do nirya, sik mining damak unyak ninye ati, ‘Nun like,’ tenebuka batakanyak ninye ara, dipkoprob pia malye unyake. Utenenyak deice arye, malye kililanyake. Bukni, yata nang do nirya, sik kanye talima nirya, talye bona utotoa talina kum ninye ati, bico tenebuka, kanye deibikirye, teleb ubuka melinyak nang ara, Allah arye aninye ati, weik arye meliplirye, teleb ulinamle. Winiplyopura, aninye sik unamak ning nirya ara, telebuk unamle.

Rasul 9:13

Yesus arye nyabukura, Ananias arye tamubuka nyabuk. “Anti dib tenelamkik nang Yerusalem mutuku unyak nang ati, anye birye ikin ning weik deililamuk. Tonda, el winilamuk ning nirya sikce nyabikura, kekepse.

Rasul 16:12

Napolis mutuku arye tuku bisik arye Pilipi mutuku banmapurye, liki dumbarye sum asukumuk unmapu. Pilipi mutuku ara, Provinsi Makedonia tam noutamak awamuk. Atam noutamak, sik Roma mutuku ninye arye asik dolamikce ulamik mutuku awamuk.

Rasul 19:21

Anirya akunum winibukopura, Paulus tenebukce nyabuk. “Na Yerusalem mutuku binaman talak ara, Makedonia tam noutamak ap, Asia tam noutamak ap, banmanya ani, Yerusalem mutuku binamne,” nyabuk. Utenebukce nyabuk. “Asi nyapman mutuku nirya akunum binyopura, ‘Roma mutuku binamne,’ tenepsa ati, dipkoprop Roma mutuku babye, binamne.” Paulus tenebukce nyabuk.

1 Korintus 16:5

Na kayapo, yuk yupu ton nyapnune. ‘Makedonia tam mutuku peterepra binamne,’ tenepsa ati, amutuku noutamak nirya peterepra banmanya ani, akunum binyopura, aminyan talak ara, anggun dam Korintus mutuku ton tamubuka yanamne.

2 Korintus 1:16

Ara, ‘Makedonia tam binamnarye, bisik noutamak benamne talak ara, sik dam binuka unamne,’ tenyamse. ‘Winipyopura, aminyan talak ara, Makedonia tam akunum binirye, ila tamubuka abisikuk yanamne talak ara, tuba tamubuka tonap, anggun Korintus mutuku nang dam yanamne,’ tenyamse. ‘Sik dam akunum yanyopura, na Yudea tam benamne talak, sik Korintus mutuku nang arye, Yudea tam bana ati, melibuka dopdeipniting,’ tenepsise.

2 Korintus 2:13

Kel kipse bukni, na weit atonunye Titus ara, Teroas mutuku kum ulamukba, kum eipse ati, ‘Se tenen, na kanye talima noutamak teleb ulul do, kum do?’ tenen, na kanye talima noutamak ara, teleb ubuka kanye kum darapnuke. Titus kum eipse anya arye, sik Teroas mutuku ninye ati, “Telebe daulalume,” nyabuka, sik mutuku bataksirye, kirikuka Makedonia tam bise.

2 Korintus 7:5

Aning ara, talye ati kum nyapsine. Kume, nun Makedonia tam yapu talak ara, atalak-atalak nirya dana-dana tam arye ikin ning wamsukba, imun kanye bobuka ulamubu. Atalak nirya noutamak ara, malye nang ara nun yupu ati, yu kibukba yupu sekeldongona ap, waldana ap winilamsikba, nun babye kanye talima noutamak ara, ‘Se, yata upnamsil do?’ tenen, ilil ulamsuk. Atalak nirya ara, talye kanye bobuka dikdik sena talak, mitik anunuk kum wamsuk. Ikineuk tuba ulamubu.

2 Korintus 9:4

Ara, deiyok ton ani. Ara, Makedonia tam ninye ap, na ap anggun dam yatibyeura, anggun dipkoprop kum kintinipdeipmunce, talye demuk ulamunyopura, nara mitik alye dakanamne bukni, anggun Korintus mutuku nang ara, weik arye alye dakdanamlume. Ara, narye, “Kume, anggun Korintus ninye ara, dipkoprop kintinipnamake,” nyapsise ning ara, ‘Nong kum uplyak,’ tenena ati nyapsine.

2 Korintus 11:9

Tonda, anggun ap ulamubu talak noutamak, na patalamnuk ning kum upnukbuk, ‘Na patan ning kum danil ati, anang moropneba, sik Korintus ninye, sik nong deice ikin ning deipnun’ tenen, anggunti kum morolamsise. Tonda sik dib tenebuka Provinsi Makedonia tam arye, Korintus mutuku yayikce, na patalamnuk ning arel yangalamnike. Minop talak babye, wini talak babye, aminyan talak babye, na patan ning kum morosununa anya arye, na winin ning deice arye ikin kum kilisunune.

Pilipi 4:15

Aninguk kume. Anggun Pilipi mutuku umunye ninye ara, anggun kele. Allah el laka teleb yupu winiryuk kekebuka diba teneplum talak ara, ‘Yuk mutuku ton peterelbinun’ tenen, Makedonia mutuku batakuka, binuse talak ara, anggun Pilipi ninye ap, na ap, nun bidamnang aryuk melilalamubu. Yuk mutuku diba tenyamik ninye nirya, tonok babye, kum melilamnike. Anggun Pilipi mutuku Ninye aryuk melyamnulume.

1 Tesalonika 1:7

Winilamluma ati ara, yuk mutuku nang sik kel bikna ati, winipmanto nang ululume. Ara, sik Provinsi Makedonia tam diba tenebuka unyak nang ap, Provinsi Akaya tam diba tenebuka unyak nang ap arye, anggun Tesalonika mutuku ninye ulalum ning elilamikce, kel bikamike.

1 Tesalonika 1:8

Tonda, Provinsi Makedonia tam ap, Provinsi Akaya tam anyuk kume. Anggunce Allah ati diba tenebuka, diksukumuk umunya deice arye, yuk nang eibikirye, laka nyalbakibuk, mutuku-mutuku nirya unyak ninye arye, anggun diba tenelamlum ning ap, Allah el yupu ap ati, kel bikinyake. Nunce, ‘Aninye kekebikirye kel biknamak’ tenen, peterelbitibye bukni, anggun winimunya deice arye, akunum kel bikinyaka anya arye, ayupu nirya peterelbana ati, ‘Dauplye’ tenen, kum laka nyalbanyabe.

1 Tesalonika 4:10

Tonda, elce peterelamsuk touk, anggunce yuk diba tenenyak ninye nirya ati, Provinsi Makedonia tam unyakce diba tenenyak ninye nirya ati, bico tenebuka melilanauk ululume. Bukni, nun weit yapu atonun nango, ‘Aning akunum winimunya atonun, pia weika arye tonap, tabakra banamlulume’ tenen, nyapsiabe.

1 Timotius 1:3

Ara, na Makedonia mutuku binamse talak nyapdeiamkise touk, anda Efesus mutuku tuba unalyame. Ara, dipkoprop Allah el yupu ulye touk kum bukni, yuk tilila yupu peterenyak nang ati, ‘Ance sik yupu sekenalyam’ tenen, nyapkise.