Roma 10:15 - Eipomek

¹⁵ Tonda, sik peterelbana deiyok nang ati, yuk nang arye, ‘Sik peterelbanamak’ tenen, anang sik melina ning ap, melibuka kum doprobikirye, anang dobuka kum dopkwetebicopura, yata ubuka peterelbiting do? Kume, aning nirya kum winipmanto. Allah yupu noutamak sekeipsik touk, ‘Allah arye ninye lyena ati, el laka teleb yupu peterena ati, ayupu dobuka boyasice nang ara, sik yan babye urasin pia teleb ulule, tenenyabe.’ (Yesaya 52:7)

Roma 10:15 Referans Kwoze

Yesaya 52:7

Narye wipdeipniba, yupu laka nyanamak nang ara, anggun eipmunce kanye weik deipnamlulume. Anang ati, winibuka tenenamlulume. ‘Se, pia laka teleb yupu boyasice nang ara, sik tukwak bisik yanibuka teleb yupu boyanmasiyaka anya arye, sik yan babye pia telebe tenen, kanye delinyabe,’ tenenamlulume. Aning ara, mutuku-mutuku nirya bakirye, na laka teleb yupu laka nyapre banamake. Tonda, olana kumce, kanye talima dukdongobuka teleb una ati, yupu peterepre banamake. Tonda, ninye lyena yupu boyanamake. Ayupu nyalyanganamak nang arye, anggun Sion mutuku ululum ninye ati, ‘Anggun ni koproba Allah, aning-aning talibuka, weik deiyoknye Raja, Allah aniryuk talisilirye aulule,’ nyabuka nyanamsiyake.

Nahum 1:15

Ura, anggun Yehuda tam ululum nang nirya ara, moubuka dipdelulume. Ara, ninye tonoknye ton, wibuka deipyeura, mutuku dup deice tam arye yanamle. Ayanamlanye bira, laka pia teleb yupu boyanuka nyalnyanamle. Anye birye, laka teleb yupu boyanuka nyalyanamle ara, olana kumce, pia kanye teleb ubuka, talima dukulongona ati, yupu boyanamle. Ati ara, ‘Se, anggun Yehuda nango, wini talak anggun Allah si erena ati, weik sum ara, moubuka tenepmunce, asum ara, weik kwalya kwalibuka, Allah ati, si erebuka kinamlume. Tonda, minop talak, ikin weik ulamlum talak noutam arye, anggunce, ‘Allah arye lyepdopsutopura, nunce Allah ati winipnamabe, winipnamabe. El si erebuka kina ati, aning ton, aning ton arenamabe,’ nyapbuka, nyalin yupu deice, nyapdeiamlum ning nirya ara, dipkoprob aninguk winipnamlume. Ilil una kumce, talye lukparabuka, winipnamluma deiyok ara, ani. Atalak arye dipdongobuka, dounamle talak nirya ara, anggun mutuku noutam nirya ara, yu nang ton yakirye, pia kum olyanganamsiake. Ara, Allah arye, anggun mal olan nang ati, akunum obuka, sice bukloplirye, anang nirya kum kipdeipnamla ati, tonoknye babye ton, pia kum unamake. Anggun el ‘Naʼ tenen nang ara, kanye deibuka, telebuk unamlume. Allah arye nyabuk.

Efesus 2:17

Kristus yayukce, Allah el laka teleb yupu, ninye lyen yupu peterelamsuke. Ninye yala nirya ap, Allah ap, kanye dukdongobuka neiktoto teleb una ati, el yupu peterelamsukba, anggun pia bai tam ulalumce, Allah damak ara, pia pera atonun ninye ulalumbuk, anggun babye, kekelamlume. Aning atonun, nun Yahudi yala ninye Allah dam ara, miningdam ton unyap ninye babye, ayupu ton kekelamubu.

Yesaya 61:1

Nabi Yesaya birye nyabuk. Allah aning-aning deice tam talibuka Weik Mikip Deiyok ululnye, Allah Yahweh arye, ‘Wininamne,’ tenelye touk winilule. El Sambala mikip weik ning na deice deipnuke. Allah Yahweh winipnukce, nati ‘Elce laka teleb yupu nyalbanamle’ tenen, wipdeipnuke. Ara, bona utotoa kum talinyak ninye ap, imun kanye bobuka, unyak ninye ap ati, nyanamlyame. Kanye talima uk dipliba ikin kanye bobuka unyak ninye ati, ‘Allah arye anggun kwa dibuka melinamsile,’ nyabuka laka nyanamlyame. Tonda malye kum winilamik buk, wenen aik noutam bunyak nang ati, ‘Allah arye lolinamsile,’ nyabuka laka nyanamlume. Tonda sik asing kubukba kwelakirye, kunukna noutamak unyak ninye ati, “Allah arye anggun asing laipnamsile,” nyabuka laka nyanamlyame. Anggun nirya ati, “Allah arye lyepnamsile,” nyabuka, ‘Nyalbanamle’ tenen, Allah Yahweh arye na wipdeipnuke. Nabi Yesaya birye nyabuk.

Efesus 6:15

Yin talin nang arye, sik yan deice kat sepatu ongolamak atonun, Allah el laka teleb yupu, ninye lyena ati, el teleb yupu kel bikimunya deice arye, kintinip deipnamlulume. El laka teleb yupu kekebibya deice arye, el ap, ansinipdeipsiliba, kanye deibuka unyabe. Winipmanto ara, Allah el laka teleb yupu ara, ninye yan deice ongolamak ning, kat sepatu atonun, upnamsile.

Yesaya 40:9

Ura, anggun Yerusalem mutuku umunye ninye ara, weik arye erebuka bukuk mutuku kon deice welebuka binululume. Anggun Sion mutuku umunye ninye ara, pia teleb yupu nyanamlulume. Winipmunyopura, teleb yupu dopropmunce, sik Yerusalem mutuku unyak ninye nirya ati, weik yupu deice mikip arye nyanamlulume. Yerusalem mutuku umunye nang ara, pia teleb yupu nyabuka, weik arye nyanamlulume. Ayupu nirya ara, Yehuda yala ninye kekenak uk laka nyanamlulume. Ayupu nyanamlum talak ara, ‘Ayupu ara nyapnuyap do, kum do?’ tenen, ilil una kume. Sik Yehuda yala ninye unyak mutuku nirya ati, ‘Anggun ni koproba Allah akunum yanmale,’ nyabuka nyanamlulume.

Efesus 3:8

Na kanye ara, Allah el mapu nirya ara, ilil weik asa unyak bukni, na Paulus ara, ilil pia kumnye unune. Nara, ilil pia kumnye ununa babye, Allah el kanye deipnukce, ‘Paulus ara, Ninye Lyena Yupu, Kristus el pia teleb yupu bobuka, Yahudi yala kum ninye peterelbinamle,’ tenepnukce, wipdeipnuke. Allah arye, Kristus deice kintinipdeipsukce, el ap kanye dukdongobuka upyopura, arenamsil ning nirya ara, nukmanto kum ati, nunce kum biktibye.

Yeremia 23:32

Nara, Allah Yahweh arye nyasunune. Tilila yupu laka nyana nabi-nabi arye, ‘Lengdar mabupu talak ara, Allah arye yanuka nyapmasuk yupu ara, ani,’ nyabuka, yuk ninye dam yanuka, nyaltakanyak nang nirya ara, na like. Atilila yupu nyanyak nang arye, na mapu ati, ayupu nyabikibuk, kekebikirye, dib tenebiceura, amalye bisikuk dobolbanyake. Sikce tilila yupu nyanyak bukni, ‘Aminyan talak ara, yata wiripnamsil do?’ pia kum tenenyake. Talye lukparabuka, tilila yupu uk, nyaltakanyake. Narye ton, sik anabi-nabi nang, sik dam binuka kum nyalinune. Sik kanye aryuk nyanyake. Tonda, ‘Na yupu dobuka laka nyalbinamlyame,’ nyabuka, narye anang ati, wibuka kum deipse. Sikda dipkoprob talye yupu uk, na mapu Israel ninye dam, laka nyanyake. Winica deice arye, na mapu ati, teleb ubuka, pia kum melinyake. Malyeuk winilinyake. Ati, nara Allah Yahweh arye, anang ara wenebuka opnamne, nyapne. “Na Allah Yahweh arye nyapsin ati, dipkoprob nong upnamle,” nyabuk.

1 Peterus 1:12

Atalak ara, Allah arye el yupu laka nyalamik nang, sik nabi nang ati, sik talima noutam arye laka nyabuk. “Kume, na Dib Kanye arye anggun talima noutamak nyapdeipsilyeura, aminyan talak winipnamle ning ati, yupu laka nyalulum ning ara, anggun wini talak ululum ninye ati kume. Aning ara, aminyan talak unamak ninye ati winipnamle,” Allah arye nyabuk. Allah arye apia teleb kilinamsil ning nirya ara, Allah el im deice pil don nang, sik malaikat babye, ‘Se, Allah arye apil dolye ning ara, pia teleb ulule’ tenen, kanye deibikirye moubuka dinyake.

Yohanes 20:21

Yesus arye sikti, tuba tamubuka tonap nyabuk. “Anggun mambul kanye bona kume. Ilil asa una kumce, kanye deibuka telebuk unamlume,” nyabuk. Tonda, “Na Ni Koprop Allah arye, ‘Na yupu dobuka peterelbinamle’ tenen, dopdeipnuk touk, narye anggunti, ‘Na laka teleb yupu ninye lyen yupu dobuka peterelbinamak’ tenen, dopdeipsine,” Yesus arye el wipdeiyamuk mapu ati nyabuk.

Rasul 22:21

Nyabuk akarye, ayupu ton nyabuk. “Nyapsibuk, nun ni kopropa Yesus tamubuka nyapnuke. ‘Dabilyame. Yahudi yala kum ninye unyak mutuku, pia karin mutuku dabinamlyame’ tenen, ‘Wibuka dopkwetepnamkine,’ nyapnuk,” Paulus arye nyabukabukce, awekmek nang ati, laka nyanmok.

Rasul 13:26

Nyabukopura, ayupu ton nyabuk. Na kayapu, nun Abraham mapu Yahudi yala ninye nirya ap, anggun Yahudi yala kum nang bukni, Allah diba teneplumce si erelulum ninye ara, Allah arye nun nirya lyesulul yupu nunti laka akunum dopkwetepmasile.

Rasul 9:15

Ananias arye ayupu nirya nyabuk bukni, nun deiyoknye Yesus arye tamubuka nyabuk. “Kume. An bilyame. Anye bira narye wipdeipse. Ati, na si dobuka, yuk-yuk mutuku ninye, Yahudi yala kum ninye ap, sik deiyok nang ap, ton Israel ninye ap ati, peterelbinamla deice arye, ‘Na pil donamle’ tenen, narye anyup wipdeipse.

Lukas 10:1

Yesus arye, ‘Na aminyan peterelbanamne mutuku nirya ara, sik minop peterepra banamake,’ tenebukce, el mapu yupa weik, 70 nang wibuka dopdeibuk. Anang ara, bitinye-bitinye kibuka, weik asik dolamikak, weik kota ap, tonda ninye mitik ulamikak ap, dopdeibuk.

Lukas 8:1

Atalak noutam ara, Yesus arye, weik asik dolamikak ap, ninye mitik anun ulamikak ap, balamukce, Allah arye ninye lyeplirye, sik kanye talima talinamle yupu, laka teleb yupu peterelamuk. Peterepra balamuk talak nirya ara, elce wipdeiamuk nang obarye 12 nang ap, melibuka balamik.

Lukas 2:14

“Allah weiknye im deice ululnye bira, pia telebe. Yata ninye do nirya, Allah arye kanye deilinamle ninye nirya ara, teleb updeiplibuk, mambul kanye bona kum arye, kanam kanye bobuka telebuk unamake,” nyabik.

Lukas 2:10

Sik ilil weik ubuk ati, amalaikat arye nyabuk. “Anggun ilil una meme. Narye anggunti, laka teleb yupu boyanmasina ara, ninye mutuku-mutuku nirya kekebikirye, weik kanye deipnamake.

Matius 9:38

Aning ati ara, wa deiyoknye birye nyapdeipliba, ‘El pil don nang arye, el wa dam lilbanamak’ tenen, wa deiyoknye biti moronamlulume.” Yesus arye nyabuk.

Yesaya 57:19

Narye Israel nang nirya, asukum unyak nang babye, pia otam mutuku noutam unyak nang babye nirya ara, narye tuba tonap teleb kipdeipyeba, tenina kum aryuk, talye tunim abuka, pia teleb unamake. Nara, Allah Yahweh arye ayupu nyapmasina ati, aning nirya ara dipkoprob nong upnamle,’ nyapsine. Na mapu koprop nirya ara, narye kwetepnirye, pia teleb kipdeipnamsine.

Rasul 10:36

Allah arye Israel nang ati aning teleb yupu nyabuk. “Anggun malye ululum ning ati, Allah deresilya ara, nun malye winin ning Yesus elcuk namin kipdeipsilya deice arye, nun ap, Allah ap, neika teleb kibuka unamabe. Yesus Kristus arye nun ap, Allah ap, ati teleb kibuka ansinilisulule, Yesus Kristus ara, aning-aning nirya talilul deiyoknye bira, eluk ulule.”

Roma 1:15

Adeiyok ati ara, narye anggun Roma mutuku tam umunye ninye ati, ‘Allah el laka teleb yupu, ninye lyen yupu, peterepniba, kel kipnamak’ tenen, pia pataniliba, na kanye deilisunune.

Roma 15:20

Minop talak arye dipdongobuka, wini talak noutamak nirya babye, tonok ninguk tenebuka patalamnuke. Ara, ‘Kristus el si kum kekelamik ninye, sik unyak mutuku noutam akuk peterelbinamne’ tenen, patalamnuke. Winibuka ulamse deiyok ara, ani. Winipmanto ning tenelamse yupu deiyok ara ani. ‘Yuk nang arye, sik aik ayukumna yo min arye ikuka domicak ara, kum dopnamne,’ tenenune. Ayupu nong ara, ‘Yuk nang arye, Allah yupu min arye akunum peterelamik mutuku noutamak ara, narye kum peterelbinamne. Allah el si ap, el yupu ap, min kum kekelamik mutuku noutam akuk peterelbinamane,’ tenelamsirye, apiluk dobuka ulamse.