Roma 1:31 - Eipomek

³¹ Amalye winin ninye arye teleb winin ning ati, moubuka beta tenipmanto kum ukirye, sik kanye bokoltonauk ulule. Sikce, “Dipkoprop winipnambe,” nyabuka, yuk nang ati nyalilamak yupu ara, talyauk nyaplobikirye, dipkoprop kum wininyake. Tilila yupu uk nyanyake. Sikce yuk ninye nirya ati, sik mining yala nang ap, sik mining mapu silip ap, yuk talye ninye nirya ap, anang nirya ati, kanye talima kum arepmanto upliba, ‘Nun like,’ tenenyake. Tonda, yuk ninye ikin ning uptua babye, sik malye wininyak ninye arye, bico tenebuka melipmanto ning kum unyakce, yuk ninye ati talye batakayake. Tonda, Allah ati pia dib kum tenenyake. Tonda, yuk ninye ati, bico tenena pia kum diparyuk, talye luparabuka onyake. Yuk ninye sik nong deice ikin ning weik delinyak talak ara, ‘Se, sikda pia bicoe,’ kum tenenyake.

Roma 1:31 Referans Kwoze

2 Timotius 3:3

Yuk nang nirya ati, bico tenebuka kum melinamake. Yuk nang arye malye usikce ning ati, ‘Dauplye’ tenen, luba kina kum arye, pia tenenauk unamake. Yuk nang arye, ton nang ati, ‘Malye nang, tenepnamak’ tenen, tilila yupu bukni, “Anang arye malye wininyak ning ara, ani,” nyabuka minilanauk unamake. Tonda anang arye, ‘Malye upnun do?’ tenen, kanye moubuka tenena pia kum arye, sik tenenyak ning nirya, talye parapkabuka wininamake. Sikce yuk nang ati, yu weik uplibuk, onauk unamake. Teleb un ning aning-aning nirya ati ara, ‘Nun lik’ tenen, batakanamake.

Amsal 18:2

Ninye ton, walwal kanye bobuka malye winin ninguk tenelul ning ara, weik kel bikamikce nang arye, laka nyanyak yupu ap, “Teleb ubuka un ning ara ani,” nyabuka, nyanyak yupu ap, pia moubuka kum kekelule. Anye bira, ninye yuk nang arye nyanyak yupu kum tenelirye, elcuk, ‘Na akunum bikamse ning laka nyapnusin ning ara ani. Narye winiptinye, tenenun ning ara ani,’ tenelul touk, aninguk tenebuka nyalula anya arye, elcuk, ‘Na kele,’ tenebuka ulule. Bukni, dipkoprob anye bira, weik kelnye kum ulule. Ati ara, pia dipkoprob el kel kum kinamle.

Roma 3:11

Sik nirya Allah el ulul ning ati, pia moubuka kum kel kinyakce, walwaluk unyake. Tonoknye babye, ‘Se, na ap, Allah ap neika utinimnye’ tenen, patalyeba kum kel bikinyake.

Matius 15:16

Asipdeyukba, Yesus arye tamubuka nyabuk. “Anggunda tuba walwal upmasil ati asipdenmanulum do? Na nyapman ning ara moubuka kum bikmalum do?

Yeremia 4:22

Allah Yahweh arye ayupu ton nyabuk. “Na mapu Sikda, pia walwal nang unyake. Sikda nati, kum bikininyake. Sikda amul kunukne nang atonun unyake. Sikda mitik tonun babye, ton moubuka kum bikinyakce, malye un ning weik tonun bikinyak nang unyake. Adeice arye teleb kibuka una ara, kum bikinyakce, nong kum ulule.”

Yesaya 33:8

Wini talak ara, weik bisik balamicak nirya ara, talye lo uk upmale. Wini talak ara, anggun mutuku noutamak nirya, ‘Asyur mutuku nang arye opsicak’ tenen, abisik-abisik nirya talye lukparabuka kum balulume. Bisik nirya kum banyaka ara, urdem ati kume. Ara, Asyur mutuku deiyok nang arye, ‘Kume obuka sirya kum daknamsiabe,’ nyabuka, minina yupu deice arye nyapdeiamik bukni, ayupu akunum batakikirye, ‘Dauplye, anang ara olbinuyabe,’ tenenyake. Sikce nyalilamik talak ara, yuk nang ton kekelamik bukni, ‘Aning ara mambule,’ tenena kum diparyuk, batakanye.

Yesaya 27:11

Aolsukum noutam ara, mitik yo taruk nirya dilonyakba, aning sesal akunum seplyopura, akunum kouluplirye, ayo taruk ara dakalsakanamle. Daksaklyopura, yuk mutuku unyak kilapu yakirye, sik asik yoka ati, bobuka dongolbanyake. Se, sik Israel tam ulamik nang ara, ‘Aning-aning, mambul ning nirya ton kel biktibye,’ tenena kum nang anya arye, Allah sik kwepdeiamuknye bira, sikti, bico pia kum tenenamle. Tonda, sikti, tuba telebuk kum kipdeipliba, telebuk kum unamake. Sik ti batakanauk unamle.

Markus 7:18

Asipdeyikbuk, Yesus arye tamubuka nyabuk. “Anggunda tuba walwal upmasil ati asipdenmanulum do? Na nyapman ning, moubuka kum kel kiplum do? Yata ning do nirya, nun nong buru tam ulul ning, nun dibibye ak, mun weksilyopura, aning deice arye, nun talima malye kum ulisulule.