Roma 1:29 - Eipomek

²⁹ Aninye arye pia malyeuk ulamik touk, wini talak babye aninye atonun unyak ninye arye, tuba malyeuk wininyake. Yata malye winin ning do nirya, malye winin ning aning-aning nirya talibuka wininyake. Sik kanye talima pum tam nirya ara, malye ninguk langdibukba, ninye kum winipmanto, pia malye winin ning weika arye wininyake. Tonda yuk malye wininyak ning ara ani. Yata bona ning do nirya, sikce aning-aning nirya ati, ‘Se, nuncuk aning yala-yala nirya weika arye doproptibye’ tenen, kanye talima lilolulba unyake. Tonda, yuk nang arye talinyak ning ati, ‘Se nuncuk taliptibye’ tenen, kanye talima engena ap; yu upliba ninye oltakana ap, walana ap; tenepce arye tilila yupu nyaltakana ap; yu upliba yuk ninye ati malye ulina ap; yuk nang arye wininyak ning ati, malye yupu nyabuka murmur ana ap; awininyak ning nirya ara malyeuk wininyake.

Roma 1:29 Referans Kwoze

2 Korintus 12:20

Na ilil upmanil ning ara nyapnusine. Narye anggun dam yanyopura, min arye ‘Winibuka, winibuka winiptinge,’ tenyamse touk kum upmunyopura, malye kanye donamne do? Aning atonun, anggunce nati, ‘Paulus ara, winibuka, winibuka winiptue,’ tenenululum touk kum winipnyopura, anggunce ton malye kanye bopnamnulum do? Tonda, na yanyopura, yupu deice waldana ap, kanye talima wililana ap, yu weik upliba, weik arye yupu nyana ap, yuk-yuk tenelamunce, yuk-yuk kilongona ap, lululina ap, kanye erelana ap, kwalina ap, yuk nang arye, ‘Anang ara, malye nang tenepnamak’ tenen, ‘Malye yupu nyalina ap, winipnamlum do? Na yanamne talak ara, sik Korintus mutuku ninye tuba malye winibicak’ tenen, ilil unulule.

Amsal 16:28

Ninye ton, ‘Asum-asum nirya yu kanye bobuka, nyaldana ap, oldana ap unamabe,’ tenekirye, sik ap neika unyak ninye ati malye ulinmaki bukni, sik ap sik neika unyak nang ati, derelana ap, oldana ap ulamikca ani, sik amalye una deiyok nang arye, kanye deibuka unyake. Winibuka unyak nang ara, winipmanto yupu ton nyapnusine. Ara, ninye arye malye yala ning koubikiba, sik yo duk moulamla atonun unyake. Tonda, din ning dibikirye, kwal talye deiplopmakiba, daupmalya ani, aminyan talak tong weik lelamle tonun unyake. Yuk yupu ton nyapnusine. Ninye bitinya nang, sik ap neika dukdongobuka ulamtiring bukni, atalak arye tonoknye birye, ‘Yuk nang kekepnamak’ tenen, el ka biti, malye yupu nyapra balibuk, yuk nang ayupu kekebikirye, el ka biti malye kanye bobikcopura, aminyan talak sik abitinye nang babye, kanye talima wilibuka bokoldadurake. Talima wilibuka bokolidaruka deice arye, like teneldalamdake. Bukni, winipnamle ning ara, talye ati kume. Deiyok ara, ninye tonoknye birye sik neika tonok dukdongobuka ulamlinye biti, minina yupu nyabuka, nyalina deice arye, bokolilule. Minopa ara, kanye deipdanamdik bukni, aminyan talak nirya ara, malye kanye bolanamdake.

Amsal 26:20

Ara, ninye arye yo dobuka, uku dapmakiba, winiryuk dibuka sirya dakdopliba, yo tabakuka kum dabicopura, uku tangalamle touk, ninye arye malye yupu ap, lulundana yupu ap, batakikirye, malye yupu tonap kum nyaldacopura, ninye arye yupu deice arye pakalanyake ning ara, kum upliba, talye yupu tunim abuka unamake. Bukni, tuba-tuba malye yupu nyabikcopura, tuba-tuba nyalakirye, oldana uk unamake.

Mazmur 41:7

Tonda, nakina dinilye talak ara, sikce na uruna ati, na dam yanganyak bukni, ‘El kanye deipsutu’ tenen, kekena teleb yupu nyanyak bukni, ayupu nirya ara, dipkoprob talye yupu diamuk nyanyake. Sik kanye talima noutam ara, aning atonun, tek sisa kum tenenyake. Atalak nirya ara, sik kanye pum noutam arye, ‘Anye biti, yata ikin ning dobuka, el nong deice deiptibiba, imun kanye boptue,’ tenenauk unyake. Winibuka tenebikirye, sik yukak banyak talak ara, yuk nang kekena ati, amalye yupu nirya, laka nyalbanyake.

Roma 3:10

Allah yupu noutamak seklamik touk unyabe. Ayupu ara ani. ‘Tukwak mutuku im sirya, mutuku sirya nirya unyak ninye kan-kan noutamak arye diksukumuk ululnye tonok babye ton kum ulule.

Matius 5:32

Bukni, na nyapsin yupu ara, anggun domunye kilapu, yuk nang arye ubula yobikcopura, akil batakna mitik telebe. Bukni, ubula kum yopmakce bukni, mambul ning ati, deiyok kum upmalibuk, talya batakmunyopura, ara pia malye. Anggun kilapu arye, yuk nang ap ubula yoldakcopura, batakna teleb bukni, yuk deiyok nirya deice arye teneprumunce, anggun kilapu talya batakmunyopura, ara malye. Abatakmunye kil, yuknye birye doplyopura, sik bitinye talya yolamak touk, wininamrake. Bukni, akil ati malye ulina deiyok nang ara, sik kilapu batakanyak nang uka. Tonda, yuk nang domikce kilapu, ubula kum yomikcebuk batakikceba, yuknye birye akil doplyopura, anye babye talya yolana atonun ulule. Ati, anggun babye, yuk nang babye, yuk ninye arye batakikce kilapu babye, batakikce ninye babye, dolana meme. Tonda, sik kilapu do, ninye do, talye-talye yoldana kumopura, batakna pia meme.” Yesus arye nyabuk.

1 Timotius 3:11

Aning atonun, anang sik kilapu wininyak ning ati yupu ton nyapnune. Anang sik kilapu ati, yuk nang arye, “Akilapu ara, teleb winin kilapu uka,” nyalamak nanguk, apil dona ati erelina telebe. Sik kilapu arye, yuk ninye ati, yu uplibuk lulubuka minildana kum bukni, yata pil do, yata winin ning do nirya, talye kanye bobuka una kum arye, kanye moubuka tenebikirye, diksukumuk winin kilapu, sik akanye yapu erelina telebe.

Titus 3:3

Aning peterelamlyam deiyok ara ani. Ara, minop talak nun babye kanye bona kum arye, walwal ulamubu. Ara, malye kibuka, ninye deiyok nang yupu ap, Allah yupu ap, kum kekelamubu. Yata malye winin ning do, malye patan do, malye kanye tenena do nirya, amalye ninguk patalamsuka deice arye, yukulamsukce, nun malye ning winina deice arye, tapu kouamsukba, pia malye ulamubu. Atilila ning diba tenelamuburye, yuk nang ati, yu weik ubuka, waldana ap, oldana ap, ulamubu. Tonda, yuk nang ning ati, ‘Se sik ning ara, naryuk doproptinye’ tenen, kanye talima engena ap, ulamuburye, nun nirya arye, yuk nang nirya ati, lik upsinabuk, ‘Pia lik,’ tenelalamubu.