Roma 1:20 - Eipomek

²⁰ Allah arye malye wininyak ninye ati wenelye ning ara, akunum lakak kibuka delisulule, nyapmasin ning ara laka nyapnusine. Deiyok ara ani. Allah el pia mambul ulul ning ara, akunum lakak kibuka deiamsuke. Allah el pia mambul ulul ning ara, nyapnusine. Ara minop talak babye, dor upra banamle talak babye, atalak nirya ara, el weik mikip ulul ning ap, el im deicenye ulirye, pia teleb ulul ning ap, Allah el babye ulul ning nirya ara, talye ninye asing arye kum eiptibye bukni, Allah el pia teleb ulul deiyok ning ara, lakak kibuka deiamsuke. Ara, im sirya, mutuku sirya nirya, kwepdeiyamuk talak arye dipdongobuka, wini talak noutamak nirya ara, Allah arye kwepdeipsuk ning nirya ara, pia teleb ulula anya arye, elce kwepdeipsuk ning elinyaba deice arye, Allah el ulul deiyok ning ara lakak upliba, eibuka kel kinyabe. Ati ninye mutuku-mutuku nirya arye, “Kume, Allah el ulul ning ara, nun walwal arye winilamupe anya arye, Allah ati diba kum tenebupe,” nyabikirye, ‘Allah kum wenepsutue’ tenen, yupu kum nyaptinge. Allah el diksukum ulul ning deiyok ning ara, akunum moubuka kel kinyak bukni, like ati tuba batakanya anya arye, Allah arye tukwak mutuku unyap ninye nirya ati wenepnamsile. Na Paulus birye nyapsine.

Roma 1:20 Referans Kwoze

Roma 1:19

Allah arye amalye wininyak ninye ati, yu upliba wenelula ara, talye ati kume. Deiyok ara, Allah el ulamuk ning ap, el winilye ning, ninye arye kel kipmanto ning nirya ara, Allah arye, ‘Ninye mutuku-mutuku nirya kel kipnamak’ tenen, lakak kibuka deiamukba, akunum kel kiyamting bukni, sikce, ‘Nun like’ tenen, batakanyake.

Yesaya 40:26

Wini talak ara, anggunce im deice erebuka dipdemunce, moubuka tenepnululume. Moubuka tenepmunce kel biknamlulume! Yatanye birye keting ap, wala ap, kurya nirya ap kwepdeibukba, im deice ulul do? Im deice ulul ning nirya kwepdeibuknye, elcuk kurya ap, keting ap, wala ap, im deice ulul ning nirya ap ara, kwepdeibukce, sik tonok-tonok, si yuk-yuk arebukce, sik si yuk-yuk sisibuka yukulule. Kurya im deice ulul ning yupa nirya ara, kum nukmanto ulule. Bukni, Allah na si Yahweh ara, na mikip weik deice arye aning nirya talibuka ununa anya arye, tonok ning babye kume, kum datue. Aning nirya tuba awamlye touk, pia unamle.

Mazmur 8:3

Ance, ‘Wininamake,’ tenelamlum touk, milo mapu babye, mitik ton akunum nepnin banyak mapu babye, anti, “Se, nun ni Allah elda pia telebuk ulule,” nyabuka, an si erekinyake. An siuk erekinyaka ara, talye ati kume. Ara, malye weik unyak ninye nirya, amitik mapu arye an si erekinyakba, kibicopura, yupu kum nyapmanto unyake. Ara, malye wininyak ninye arye, ‘Allah nun like’ tenen, yanikinyak ninye ap, an olana atonun unyak ninye ap, tonda, ‘Allah arye wenesulula ati ara, nunce kwang dakna ati, el ulul ning ara, malye kilinamabe’ tenen, unyak ninye ap nirya ara, yupu nyapmanto kum unamake.

Roma 2:15

Ara nun kele, wininyaka deice arye, Musa birye sekuka deiyamuk yupu nong kum dololamik bukni, ayupu nyalul touk deiyok ning ara, Allah arye sik kanye talima pum tam, “Aning telebe, aning malye,” nyabuka deiamuka anya arye, sik talye mangkau kanye bobuka kum wininyake. Sik unyak talak noutamak ara, teleb ning ap, malye ning ap tabakuka winibikcopura, sik talima pum tam arye, ‘E, aning ara teleb winipmap bukni, aning ara malye winipmabe’ tenen, bokuka winyake. Tukwak ninye nirya arye, sik kanye talima pum tam ara, ‘Teleb winin ning ara ani, malye winin ning ara, ani’ tenen, moubuka tenenyake. Talye mankau kanye bobuka, kum wininyake.

Yohanes 1:18

Minop talak arye dipdongobuka, wini talak noutamak nirya arye, nun tukwak ninye arye, Allah el urasin pia kum elilamubu. Bukni, nun ni Allah, el ulyak ululnye, el Mi Koprop, Allah ap neika ururaknye bira, Yesus arye Allah el ulul ning laka elilule. Yesus el ulamuk ning ap, yupu nyalamuk ning ap deice arye, Allah el ulul ning lak kibuka laka nyalamsuke.

Yohanes 15:22

Na kum yatinirye, aninye ati na yupu kum nyapmatinyetoura, sik malye winilamak ning anggun nong deice tuba kum uptopura, aninye ati kum wenepnamtinye. Bukni, wini talak na yupu akunum nyamsiba, sik akunum kekeplopnika ati, “Naio, nun mangkau kanye arye malye winilamubu,” kum nyapnitinge.

1 Timotius 1:17

Aning ati ara, nun ni Allah, elda Weik Ninye Deiyoknye, Sisinanye minop dorapce dipdongobuka noutam talak ap, wini talak ap, aminyan do unamle talak ap nirya, pia unamle. Elda, pia kam ulul anya arye, kum diptue. Ninye asing arye pia kum eiptinge. Dipkoprop Allah ara, el tonoka, yuk ton kum ulule. Ati ara, ninye nirya arye, adiparyuk atalak babye, aminyan talak nirya babye, ‘El ti si erebuka, el si weik arye erepnamak’ tenen, Allah moronune. ‘Aning ara, dipkoprop unamle’ tenen, pia patanulul anya arye, Amin nyapne. Akunuma.

Kolose 2:9

Allah el kanye talima ap, el ulul ning nirya ap ara, Yesus el deice deibukura, Yesus Kristus el talima noutamak dipkoprop ulule.

Mazmur 139:13

Tonda, Allah ancuk na nong noutamak wamnuk ning nirya ara, kwepdeipnulume. Tonda, ancuk na nin mun pum kum bomnuk talak arye, ance minopce kwepdeiamnulume.

Mazmur 119:90

An pia teleb ubuka uminya deice arye, ance nyasiminye touk, dipkoprob usulule. Ninye arye mapu deibikiba, dadeipdanin banamak ninye babye, ance aninye ati, bico tenepsimince, teleb ubuka melisilyame. Pia kum bataknamsilyame. Tonda, ance tukwak mutuku nirya kwepdeiplumce, moubuka talilyama deice arye, wini talak babye, tuba kat ulule.

Mazmur 104:5

Tukwak mutuku-mutuku nirya dobuka, weik mutuku yangan keil deice deiplume. Ninye arye aik dopnuce talak, ayukumna yo ikildaralamak atonun, ance, ‘Tukwak mutuku nirya, long-long aplirye, kum kum danamle’ tenen, tukwak mutuku amu tam mutuku yangan keil deiplumba, pia darapdongobuka, dopluma ati ara, anye pia aunamle.

Ibrani 9:14

Sik minop talak pil dolamik ning ara, mitik mambul pil, nong bol deice ning uk, mitik teleb winilamik bukni, Kristus el bidamang ining deice arye, nun kanye talima dipkoprop teleb kilisilya ara, mambul weik ulule. Kristus ara, pia diksukumuk ulamukba, Allah El Dib Kanye, pia aunamlanye bira, el mikip melyamuka deice arye, Yesus arye Allah ati, el bidamang el nong kopropa arepdayuk. Nun kanye talima noutamak, malye ning usilya deice arye, malye winibirye dibinyabe. Ati, Kristus el ining deice arye, nun kanye talima noutamak malye ning dipsuka deiyok ara ani. Ara, ‘Tukwak ninye arye, Pia Kam Una Deiyoknye Allah, el amu tam ubikirye, el pil donamak’ tenen, pil dopsuke.

Roma 2:1

Ura yata nang do nirya, sikce yuk nang ati, “Anggun malye winilulum ning ara, ani-ani,” nyabuka, lyep-lyep abuka wenelulum ninye nirya ara, Allah arye anggun babye teleb ninye anya arye, ‘Dawaplye’ tenen, kum namin kipnamsile. Sikce yuk nang ati, “Anggunda malye ululum ninye,” nyabuka yupu bongoliluluma deice arye, anggun bidamang arye anggun bidamang ati, yupu lepsisikuka bokeipdanmalume. Deiyok ara, anggunce yuk nang ati, “Malye winipmalum ning ara atia,” nyamunye bukni, amalye winin ning ara, anggun babye atonun kibuka winiluluma anya arye, anggun bidamang ati wenebuka yupu lepsisikuka bongolilalulume.

Ulangan 4:19

Nyabukce, ayupu ton dukdongobuka nyabuk. “Yuk ning urasin atonun memebuka deipmunce, aning si erena meme, nyapmasin yupu deiyok ton ani. Ara, sik im deice unyakba eiplum ning ati, ‘Si erebuka malye winipmunyak’ tenena ati nyapne. Ati ara, pia winina meme. Ara, keting ap, wala ap, kurya ap, Allah arye kwepdeibukba, im deice ulul ning nirya babye, eipmunce, ‘Se, aning ara, mambul ati ara, aning si erenamabe,’ tenen ati nyapne. Allah el si Yahweh arye, aning-aning nirya kwepdeibukba, yata mutuku do nirya, ninye mutuku-mutuku nirya arye, aning talye elinyake. Ati ara, aning-aning nirya, si erena meme, nyapne.

Kolose 1:15

Allah el ulye touk, el Mi Koprop Yesus babye, pia dipkoprop atouk ulule. Allah ara, ninye asing arye kum eipmantonye ulule. Allah arye aning-aning nirya kintinibuka, deiamuk. Bukni, winipmanto ning ara, ninye arye winiryuk mi deibikceura, ami arye anggun ning nirya talibuka ulamle touk, Allah el Mi Koprop Yesus ara, deiyok kouna deiyoknye pia weik mambulnye ulule. Ulirye, aning-aning nirya talibuka, deice tam ulule.

Yeremia 5:21

Israel nango! Anggun nirya kekepnululume! ‘'Amutuku noutam ululum nang ara, walwal arye, kum bikmanto nang ululume. Anggunda, ‘Deiyok ning ara ani,’ tenebuka, kum biklume. Anggun asing aupsuk bukni, moubuka kum elilulume. Tonda, anggun amul aupsuk bukni, moubuka kum kekelulume.

Yesaya 26:4

Pia ati Allah Yahweh, el tibuk diba tenebibirye, el tibuk talibibirye, el deiceuk nun kanye deilinamabe. Ara talye ati kuma. Deiyok ara, nun ni koproba Allah Yahweh, aning-aning deice tam erebuka, Mikip Weiknye ulula anya arye, pia melibuka kalikisiliba, el amu tamuk unamabe! Winipmanto ara, weik mutuku bukamlye keil, dama duknul bitibirye, pia teleb kibuka utibye touk, Allah aryuk nunti, melibuka kalikisulule. Allah ara, pia kum bataknamsile!

Yesaya 9:6

Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake.

Mazmur 104:31

Ati nun ni Allah an si ara Yahweh, an pia teleb winilyam ning ap, mikip weik arye pil dolyam ning ap, ninye nirya arye anti, “Elda pia telebe,” nyabuka, an si erenamkiyak ning ap nirya ara, ‘Aning nirya pia ati aunamle’ tenen, moropkine. Tonda, anda Allah Yahweh, ance kwepdeiyalum ning dimince, ‘Aning nirya ati kanye deibuka teleb unalam’ tenen, moropkine.

1 Timotius 6:16

El tonok ara, kum diptue, pia kamuk unamle. El ulya ara, ninye tukwak ninye kum binmanto ak, weik dirina noutam ulule. Yata mutuku ninye do nirya, el nong pia kum elilamik, tonda, pia kum eiptinge. Na Paulus arye nyapmakine. Na pia patanulul ning ara, ninye mutuku-mutuku nirya, el siuk pia erenamake. Tonda, el weik mikip arye aning-aning nirya ap, ninye nirya ap, talibuka unamle. ‘Aning ara, dipkoprop upnamle’ tenen, Amin nyapne. Na Paulus arye sekeibkine.

Roma 16:26

Ninye lyena yupu ara, minop talak Allah arye duknyamuk bukni, wini talak ara akunum laka kibuka deipsuk. Ara, minop talak arye dipdongobuka doryanamle talak nirya unamlanye Allah arye el yupu laka nyana deiyok nang nabi-nabi nang ati “Winipnamlulume,” nyalilamukba, sikce sekuka delilamik yupu nunce dobuka, peterenyaba deice arye, laka ulule. Allah arye laka kipdeipsuka deiyok ara ani. ‘Ninye im sirya, mutuku sirya nirya arye, Yesus Kristus el laka teleb yupu, ninye lyena yupu kekebikirye, diba tenebikcopura, el yupu uk talibuka dobolbanamak’ tenen, laka nyalilamsuke.

Rasul 17:29

Puturuna weik kel nang arye, perak ap, emas ap doprobikirye, sik kanye tenena deice aryuk, ninye urasin atonun kipdeibikirye si erenyak ning ara, Allah atonun kum ulule. Nunda Allah el mapu unyaba ati, anang arye dolamak ning atonun ati, ‘Allah ulule,’ kum tenenamnyabe.

Mazmur 90:2

Tonda, mutuku-mutuku nirya, min kum kwepdeialum talak arye aulalume. Tukwak mutuku ap, mutuku-mutuku nirya ap, min kum kwepdeialum talak ara, anda akunum aulalume. Allah an Kam Una Deiyoknye anya arye, pia ati, aunauk unalame. Atalak arye diprongobuka, dounamle talak babye, kam pia ati unalame.

Ulangan 33:27

Allah ara, pia unamle. Atalak-atalak nirya, anggunti melipsilirye, kalikilamsiliba, malye ning ara, anggun dam ton kum yanamle. Allah el taruk mikip arye, anggun amu tam talipsilirye, el taruk deice arye, pia kalikinamsile. Anggun mal olan nang ati, Allah arye yupu sekliba, anggun dam kum yanganamake. Allah arye anggunti, mikip arepsilirye, melipsilyopura, anggun mal olan nang ati, ‘Anang opnuyabe,’ nyabuka yakmunyeba, bai sakuka bindopnamake. Winibikiba, anang obuka, sirya daknamlume.

Ibrani 11:27

Tonda Musa arye, Allah ati diba tenelamuka deice arye, ‘Mesir mutuku weik ninye deiyoknye Firaun arye derepnilyak’ tenen, ilil asa arye, Mesir mutuku batakuka, yukak biyuk. Talye ninye asing arye kum eipmantonye Allah ati, Musa arye eibuka anya arye, ikin ning weik el nong deice deiyamikba, ikin ulamuka babye, pia kum bataklamuk.

Matius 5:45

Wininamlum ning ara, anggun ni Allah, im deicanye, ‘El mapu unamak’ tenen, wininamlyame. Allah ara, pia telebnye ulula anya arye, teleb ninye babye, malye ninye babye, bico tenebuka, kanye talima aresulule. Anggunda, el mapu ululuma ati, anggun babye atonun unamlulume. Allah el keting ara, elce nyaplyeba, malye nang dam babye, teleb nang dam babye, delilule. Mok ababye, Allah elce nyaplyeba, malye nang dam babye, teleb nang dam babye, mok celule.

Kejadian 21:33

Abraham bira, asukum Bersyeba mutuku dam, yo si tamaris yo koubukce, ‘Na ni koproba Allah, el si Yahweh, Pia Kam Ulul Allah tonok’ tenen, Yahweh el si erebuka morolamuk.

Rasul 22:1

“Ura, na ni yapu ap, na kayapu nang ap, telebe nyapsine. Sik talye kisibuka nyapnika ati, winira na dipkoprop nyapse yupu ara, lipsisikuka nyapnusine ati, kekepnululume!” Paulus arye nyabuk.

Kejadian 1:1

Aning-aning nirya kum uamuk talak ara, Allah arye im ap, tuku ap kwepdeibuk.

Ayub 12:7

Walwal arye wininyak bukni, anggunda, na dam yanmalum nang babye, talye kam ulye ning ati asipmunba, abai tam ulamle ning arye, anggunti peterepsitingura, biktume. Ara, bai tam kam ulye ning ap, maka yala-yala nirya, im tam lakuka balamak ning ap, tuku tam kam unyak ning ap nirya ati, anggunce moubuka dipdemunce, asipnamlume. Winipmunya deice arye, anggunda, “Kume, Allah el taruk arye, aning-aning pil dosulule,” nyabuka peterepsitinge. Aning ara, anggun moubuka biknamlume.

Yeremia 51:15

Allah Yahweh, el mikip weik deice arye, atukwak mutuku nirya kwepdeibuk. Allah el kel weik deice arye, atukwak mutuku ara, urasin teleb kibuka kwepdeibukba, asukumuk aulule. Tonda, el kel weik ap, aning-aning nirya nong noutam kel bikilula deice aryuk, im tam ton kwepdebukce, amsuna kitcamikca yokuka tokolilamak touk, pala kipdeibuk.

Markus 10:6

Allah arye aning-aning nirya kwepdeiamuk talak ara, ninye ap, kilapu ap, kweipdeibuk.

1 Korintus 1:20

Ati ara, wini talak tenipdelulume. Sik weik kel bikamik ninye ap, Musa arye mem yupu sekeibukura, ayupu weik arye kel kibuka peterelamik ninye ap, yata yupu do nirya, “Deiyok ani-ani,” nyabuka laka nyalamik ninye ap, wini talak ara, anggun dan do? Allah arye aninye ati, ‘Se, sikda, weik mambul’ tenelul do, kum do? Allah el pil dopsuka deice arye, lakak kum kipdeipsuk do, kum do? Kume, akunum kel bikinyaba ara, talye tukwak ninye arye, weik kel bikamik ning nirya ara, nong kum upnamle ning, talye ninguk ulule.