Winipnamsen talak ara, narye tenepse touk, dipkoprob winipnamne. Adeice narye sik malye wininyak ninye nirya obuka sirya daknamne. Sik amalye winina ninye nirya obuka batakniba, sik anang deice ara, tuku butbuta deice yanibuka balamlum touk ubuka, sik nong deice arye, yanibuka banamlume. Nara Allah Yahweh, im deice yin talin malaikat nirya, sik weik deiyoknye birye nyapsina ati ara, aning nirya dipkoprob winipnamle.
Ratapan 1:15 - Eipomek15 Allah Yahweh elce, ‘Yin talina deiyok nang, sik kanye talima erenyak nang ara, amu tam unyak nang uka,’ tenelule. Anang, sik yin talina deiyok nang ara, amu tam nang arepniba, sik anang nirya obuka, sirya daknamake. Winibikirye, amutuku noutam nirya yaniptapnirye, uku sice atonun kiplopnamne. Winipmanto ara, anggur tapu wa wiamlinye birye, wisipliba liplirye, teiklamica ning pum bisik dongobuka, teikuka purulamak touk upnamle. Gade chapit la |
Ratapan 1:15
27 Referans Kwoze
Nyabuka asipdeyukbuk, ayanganmoknye birye tamubuka nyabuk. “Nara anggur tapu duk dakuka mek purunmangu sukum unmace nang, sik baju deice ining bi, bol pilamle touk, nara malye-malye winin nang weik onmanu talak ara, na baju deice ara ining bol pipmanile. Amalye nang onmanu talak ara, yuk pera mutuku nang ton kum melipmanunge. Na aryuk amalye nang obukapnurye sirya dakmane. Ati aining bol pipmanil ning ara, anggur mek ining bi kume. Ara, ninye ining bol pipmanile. Ara, ninye mutuku-mutuku nirya malye winiceba, na yu unulul ninye nirya ati, obuka yaniptapmanba, sik ining ara aupmanil atia. Sik ining weik unmoa anya arye, na baju nirya ining bol pipmanile,” nyabuk.
Sikda, ‘Mesir mutuku noutam unyak nang ap, nun ap, yupu nyapdabirye, tonok ansinipnamaba ati, yuk pera mutuku yu nang arye, pia kum obuka sirya daknamsiyake. Winibiyopura, ninye olana ati pia ikin weik ning yanamle talak ara, sik adiparyuk yanuka opsikiba, kum dipnamabe. Dibin nang weklamakak, Sheol tam ara, nun ton kum wekelbinamabe. Kam tuba unamabe,’ tenelamlum bukni, aning ara nong kum upnamle. Ara sik ninye olana deiyok nang, anggun mutuku noutam yanuka olyanamsiyak talak ara, sikce, anggun Israel yala nang weik tonun oplobikirye, sirya dakanamsiyake. Bikbik abuka duknubuka kum bitume.
Allah Yupu Deiyoknye, el si bam bol pum tam arye, yu weik parang ya belebukba, eipse. Aparang ya arye, sik malye winin ning talibuka unyak ninye ayala-yala nirya ap, im sirya, mutuku sirya nirya noutamak unyakce, malye wininyak kili sal ap ati, aparang ya arye opnamle. Tukwak ninye mutuku-mutuku nirya weik mikip deice arye talinamle. Ninye nirya arye, elti, malye kum kipmanto unamake. Winipmanto ati, ‘Anggur mek binamle’ tenen, weik keil deice pum lukikirye anggur dukdongobuka, yanibikiba, amekwen balamle touk, anye birye Allah ati mambul pil donamle. Ayupu nong ara, ani. Ara aning-aning nirya deice tam ulirye, weik mikip ap, weik eitamnye ap ululnye Allah ara, el yu weik upliba, tukwak malye un ninye nirya, weik arye wenebuka yupu lipsisikuka, oplopnamdak ati tenenyabe. Malye winin ninye ati wenena deiyoknye bira, akurun kuda deice bukuka balamlanye bira el uka.
Musa sekamuk yupu yanilamik nang oltakalamik ning ara, mitik ikin uamuk bukni, Allah el Mi Kopropa ati, yaniltanyak ninye ati, Allah arye wenebuka onamle ning ara, ikin weik kum unamle do? Kume, na kayapo, anggun ton teneipdelulume. Allah arye, “Wininamsine,” nyabuka, nyalilamsuk yupu deice, diksukum ulisilye ning, ‘Nong unamle’ tenen, Yesus el ining arepsukba, biyuke. Aning ara, weik mambul bukni, sik malye nang arye, ‘Kume, aining ara, talye ninguk ulule. Malye ning uka,’ tenenyak ninye ara, Allah arye aninye ati, weik arye weneplirye, kum onamle do? Tonda, Allah El Dib Kanye arye, bico tenesilirye, el kanye aryuk melisilye Dib Kanye ati, el nong deice malye yupu nyabuka, lyek-lyek alamak ninye ara, weik arye wenebuka kum onamle do? Kume, weika arye opliba, aninye ara ikin weik unamake.
Amutuku yanuka obisipnamak nang arye, Yahudi yala ninye weik parang ya arye olonamake. Ton nang ara tapu koubukabikirye, yuk karen mutuku bobikirye pil dinamake. Yerusalem asik dokcak nirya ara, Yahudi yala kum ninye arye, ‘Amutuku ara mambul ak,’ tenena kum aryuk, talye yan yanibuka unamake. Winibuka daulamiceura, Yahudi yala kum ninye weik ninye deiyok nang kibikirye, mutuku-mutuku nirya pia talinamake. Allah arye tenyamuk talakuk wininamake.
Minop talak ara, nun mal olan nang anggun taleamsikce, nyalamsike. “Anggun ni Allah ara, dan sukum ulul do? Allah arye melibuka kum lyepdopnamsil do?” nyabuka asilamsikce, nalilamsike. Bukni aminyan talak, Allah Yahweh arye nunti lyepsilirye, nunti teleb kipdeipnamle ning ara, sik eibikirye, alye dakdanamake. Tonda aminyan talak, Allah arye nun mal olan nang ati, yaniplirye, aninye obuka kum kipdeipnamle. Winiplyopura, winipmanto ara, ninye bisik balamicak, bental yanibuka balamak touk, Allah arye nun mal olan ninye nirya ati, yaniplirye, obuka sirya daknamlarya. Nun nirya aning eibibirye, biknamabe. Nabi Mika birye, Israel ninye nirya ati, aminyan winipnamuk ning tenebukce nyabuk.
Aminyan talak ara, Yerusalem mutuku noutam nirya unyak nang arye nyanamake. “Se, sik Babel mutuku nang arye, nunti, adiparyuk malye kibuka, sice buklopmasiake. Tonda, Babel mutuku talibuka, ninye deiyoknye Raja Babel birye, obuka, sirya dakmasile. Winipmanto ara, weik laut pum tam ikan arye, mitik ikan obuka diplirye, sirya daklamle touk, nun Yerusalem mutuku ninye nirya, akunum obuka sirya dakmasile. Nun mutuku noutam teleb uamuk ning nirya, alubuka doprobukce, kum kipdeipmasile. Winipmanto ning ton, weik yu kam arye, pia weik ning arye, mitik kam ning obuka dilamle touk, Yerusalem mutuku nirya ara, kunum dipmasile. El mun pum tam arye, amutuku noutam teleb ning nirya ara, dopropnamle bukni, elce, ‘Na like, teneple ning ara, dukuka batakmasile.”
Aning ara, narye yukupsiniba, Babel mutuku nang olyanamlum nang ara, moubuka kekepnululume! Sik Babel mutuku nang nirya ona ati, mutuku dana-dana tam nirya arye, olyanamlume. Winipmunyopura, Babel mutuku noutam unyak nang arye, sik din deiamikce aik pum tam nirya ara, bublan kuklopnamlume! Akuklopmunce, sikce deiamik gandum do, yuk yala ning do, ubula alubuka dopropmunce, tonokakuk, bulubuka deipnamlume! Sik Babel mutuku noutam domik asik nirya ap, yuk awamuk ning nirya ap, sice buklopnamlume. Tonok mitik tonun babye, ton pia kum bataknamlume. Sik asik nirya ulubuka batakmunyopura, akeil nirya bulubuka, tonokakuk deipnamlume.
Winipmanto ara, anggun Yudea tam ululum ninye arye, Babel mutuku yin nang nirya ati optumce, kam tuba upting nang ara, dilauk doploptumba, sik tenda aik buktinga babye ara, sik Babel mutuku nang aniryuk, anggun nirya obuka, sirya daksitinge. Sirya opsitingce, anggun Yudea tam dolulum aik nirya, uku dongobuka, sirya daksitinge. Aning ara, dipkoprob winipnamsina ati nyapsine. Allah arye, Yeremia biti nyabukba, Yeremia birye, el dam yanmarek nang bitinye ati, laka nyabuk.
Ati, wini talak ara, Allah ance sikti, batakmimba, din patana ap, mal oldana ap deice arye, sik mapu nirya dipna teleb uka. Tonda, oldana deice arye, sik aninye nirya oltakana teleb uka. Tonda, yuk mutuku nang yakirye, sik akanye yapu nirya obikiba, kum dalyopura, sik amutuku noutamak nirya ara, kilapu youwak dem unamake. Tonda, mapu kum delinamake. Tonda wisi-wisi nang ara, weik kanye imun uk, dina deice arye, dibinamake. Sik kam nang ara, mal olan noutamak, ya arye seklobikiba, dibinamake, nyapne.
Allah arye, na Yeremia biti wipdeipnukce, nyapnuke. “Yeremia ance, sik Israel ninye ati, laka nyalbinulam yupu ara, ani. Narye sikti, bico tenena arye, nara sikti, tunim abuka kum unamne. Keting noutam babye, lukunyan babye nirya, ‘Naʼ tenen, ninye ati, pia engenauk unamne. Winipmanto ara, tonoknye el kilmu, kanamuk ulamlya ani, diplyopura, ikin kanye bobuka ulamle touk, unamne. Ara, ‘Naʼ tenen, Israel ninye deice, kanye imun weik ning yaliba, mambul weik unamaka ati, nyapne. Winipmanto ara, ninye arye tonye biti, mikip arye obikiba, weik suse dilamliba, ikin kanye bobuka, donmalya ani, aminyan diplamle atonun, ‘Naʼ tenen, ninye dam, kanye imun weik ning yanamla ati, engenauk unamne.
Anggun teneipdelulume. Yatanye birye yukubukba, keting panalyangan tam arye weik yin talina deiyoknye kekebukce yanganmal do? Yatanye birye anye binyak, ‘Na amu tam ulirye, na tenelamse pil donamle’ tenen, mikip kililulba yanamle do? Yatanye birye ayin talina deiyoknye biti, mikip kipliba yuk mutuku nirya unyak ninye ati bisibuka opra yanganmal do? Atonun yatanye birye, anye biti mikip arebukba, el parang ya ap, el yin ap boplirye, yuk mutuku ninye deiyok nang nirya, yaniptabuka obuka sirya daknamle do? Aninye nirya obuka sirya daklirye, nirya daknamle. Winipmanto ning ara, kumanya doplyopura, kel-kel alamle tuku erebuka balule. Tonda, kumanya arye doplye talak ara, maning kolupmaliba, kumanya yalirye bobuka balamle touk, yuk mutuku weik nang nirya babye, atonun winipnamake. Aning atonun, anye birye, yuk yala ninye ap, sik ninye deiyok nang ap ati, obuka sirya daklyopura, aninye nirya kum danamake. Winibuka olyalyopura, amutuku nirya ara obuka uku sice buklopnamle.
Anggur duk malye ninguk moulamnuka ati, winipnamak ning ara, nyapnusine. Ara, anggur wa wiamsak dana-dana tam nirya, keil poka dobuka denepse ning ara, dakuka uluplonamne. Winipnyopura, anggur wa malye upnamle. Keil poka dobuka denepse ning ara, dakuka daluplopnyopura, yuk malye nang wekikirye, amutuku nirya yanuka yanipnamake. Winibuka yanibikirye, uku sice kiplopnamake.
Ton nang ara, ance, “Aning ara, wininamlume. Aning ara, kum wininamlume,” nyapdeiamsulum yupu ara, yaniltanauk wininyake. An yupu yaniptabikirye, sik mining kanye aryuk, ‘Kwinisa dobuka, malye winin ninguk talibuka wininamabe. Winibipye ning nirya ara, yuk nang arye eibuka, kum biknamsiakʼ, tenenyake. Utenebuka wininyak bukni, anda Allah arye, sik aninye nirya ati, ‘Aning na likeʼ tenen, batakalule. Ati sikce, ‘Aning ara, wininamabe, wininamabe,’ tenenyak ning nirya ara, nong pia kum upnamle.
Yehu birye, anang anyaik pum unmekbuk, eibukopura, nyabuk. “Izebel bira, adiparyuk dobukapmunce, eitam arye, tuku tam dopkweteplulume nyabuk!” Nyabukura, Izebel dobuka, tuku tam dopkwetebik. Winibikba, Izebel el nong tuku deice sakuk talak ara, el ining ara, weik serik-serik abukopura, anyaik bai tam abilinga dam ap, Yehu el kuda basam deice ap nirya dubuk. Tonda, Izebel el deilyu sakmok ning ara, Yehu el kuda balye deice bukmoka arye, akuda basam arye, el dipmoka yanibuk.
Ara, aketing tamun noutam arye deiyok koubikce, sik bitinye yala nang ara, Amon yala nang ap, Pilistin yala nang ap, sikce Israel nang malye weik kibik. Ara, Yordan mek duman koubuka, otam keting panalyangan tam ulamik Israel nang atia. Amori yala nang, sik mutuku ara, Gilead mutuku noutam ulamik nang arye, Israel nang, sik mutuku kan-kan noutam ulamik nang ati ara, keting tamun delapan belas (18) tahun deice arye, pia ikin ning delilamikce, Israel nang ati, malye weik winilamik.
Tonda, anggunce deibuka, pil domunce, tuku deice koulalum ning nirya ara, anggun kum bikamlum nang, yuk pera mutuku arye yangan nang yakirye, yanuka anggun wa tuku nirya doropnamsiake. Bukni, anggun ning ara, ton kum dopropnalume. Tonda, yuk nang arye yu uplyeura, anggun dam tuba-tuba ikin ning delinamsiake. Anggun ti, olbisinauk wininamsiake.
Na ni Allah, an yu tenipminye touk, na babye sik anang ati, yu uniliba derenune. ‘Na yu unulul ning ara, tuba pia kum darapdongobuka utinye,’ nyabuka, Allah dam lak nyapse. Nyapsiba, Allah arye tamubuka, na dam yanuka nyapnuk. “Ayu ukilye ning ara, ance ayu bobinuka, amutuku nang, sik mapu bisik banmakca noutam ap, tonda amutuku wel nang, bulubuka unamakak ap, na yupu bobinuka, laka nyapnulyame. Tonda, sal babye, sikce domik kilapu babye, tonda wisi nang babye nirya ara, sik deice ayu yupu bobinuka, lak nyapminyeba, dopropnamake.” Allah arye, ayupu nyapdeipnuke.
Sik dana-dana tam unyak ninye nirya ara, pia malye weik wininyak ninye unyaka ati, sik wenena talak akunum dam uplyopura, winipmanto ara, gandum wa wibuka kuamice wisiamlibuk, lipnuce talak ara, yu weik parang ya, el si sabit arye, sekuka lilamak touk winipnamne. Tonda, anggur tapu duk, wa wibuka kouamice wisipliba, dakukabikirye, mek purunak binuka deibuka yanibikiba, anggur mek weik deiplirye, langdibuka balamle touk, aninye weik arye wenepnamne.” Allah Yahweh arye nyabuk.
Tonda, bisik noutam butbuta deiceuk, wisi nang babye, wel nang babye, ninye banyak bisik noutamuk, sakuka poulbanyake. Aning atonun, wel nang ap, wel kilapu ap nirya ara, nun mal olan nang arye, ninye on ya arye obuka batakanyake. Allah ance nunti, yu upkuk sum yanmala ati, anda nunti ton, bico kum tenesilyame. Ance lo arepsulumba, nun mal olan nang arye, talye lubakibuka oltaknauk usinyake. Aning nirya ara, ance teneplum touk winiyake.
Piblisite