Anyapmakin yupu ara, pia dipkoprop ulula ati ara, ayupu diba tenebuka talinamlyame. Tonda, ance peterenaminye ninye ati, ayupu dem dobuka, mikip asa arye peterenamlyame. Ara, ‘Allah ati akunum dib tenelamik kili sal arye, yuk talye ning nirya batakikirye, teleb un ninguk pia patapliba, moubuka talibikirye, pia pi dobuka, diksukumuk wininamak’ tenen, nyapkine. Anyapmakin yupu nirya ara, pia teleb yupu ulul ati, yata ninye do nirya, aninguk kekebibirye, talibuka wininamyaba deice arye, ayupu arye, telebuk kilisulule. Ninye nirya ati, nyapkine.
Rasul 9:36 - Eipomek36 Ara, Yope mutuku, tonok kil, el si ara, Dorkas, Yesus ati dib tenebukce Yesus el ulamuk ning piribuka kel kiyamuk kil ulamuk. El ulamuk talak nirya ara, pia tuba-tuba teleb pil dolamukce, kankan ninye weik melilamuk. Gade chapit la |
Rasul 9:36
30 Referans Kwoze
Yata winin ning do nirya, winipmanto ati ara, ance pil dominyebuk, akam nang eipkikirye, ‘Teleb winin ning kel biknamak’ tenen, aning-aning nirya pia moubuka, telebuk pil donamlyame. Ance Allah yupu peterenamlam talak nirya ara, ‘Yo bok doproptinye’ tenena ap, tenepce arye tilila yupu nyana ap, ‘Anang arye, nati, yata tenepnuninyak do?’ tenen, ilil una ap, kil-kil arye talye-talye nyana ap, anirya ara, kum wininamlyame. ‘Teleb yupu petereptinye bukni, naryuk tenepmanye touk, malye winina telebe,’ tenena kume.
Winipsiminyopura, Libanon mutuku iknapnye tam arye, keipyal yo ap, yuk yala yo ap webuka deibipyeura, nun deiyoknye an patanmakil touk webibirye, boyanuka perahu memebuka adeice ayo koubuka deibipyeura, weik laut mekwen deice arye boyanuka Yope mutuku boyanamabe. Yope mutuku akunum delilyapyoura, na ni ance ayo nirya boyanuka, Yerusalem mutuku bobinamlyame. “Raja Huram birye Raja Salomo biti nyabuk.
Anggunti Allah morosunun ning ara, nyapnusine. Ara, ‘Yesus Kristus melisilya deice arye, anggun talima noutamak pil dosiliba, Allah arye, ‘Wininamake,’ tenyamsuk ning, el kanye delisulul ning nirya weika arye kipnamsile’ tenen, Allah morosunune. Yesus melisilyeba, aning nirya aupsilyopura, adeice arye Allah arye anggunti, ‘Wininamake,’ tenesilye touk, ‘Telebuk unamlulume’ tenen, Allah morosunune. Tonda, ‘Wini talak arye dipdongobuka, doryanamle talak nirya ara, ninye im sirya, mutuku sirya nirya arye, Yesus Kristus el siuk weik arye erenamak’ tenen, pataniliba, Allah moronune. ‘Dipkoprop pia telebuk wininamak’ tenen, “Amin,” nyabuka, Allah morosunune.
Nun ni Allah el kanye ara, ‘Diksukum diba tenena ning, talibuka una ning ara, malye ning nirya tabakuka, una kum ulul ning atia. Winibuka diba tenenyak nang arye, sik teleb unyak ning ara ani. Ara, sikce kwaknamne mapu ap, youwak kilapu ap ati, bico tenebuka melinyake’ tenelule. Tonda, anang ara diba tenena kum ninye arye, talibuka ulamice malye ning atonun ning, pia talibuka kum unyake. Diksukumuk unyake.
Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.
Allah el kanye aryuk lyepsukce, teleb kipdeipsuka ati ara, Kristus ap, talima dukdongopsuka deice arye, winiryuk ninye atonun kipdeipsukba, unyabe. Lyepsukce, winiryuk ninye atonun kipdeipsuka deiyok ara, ani. Ara, minop talak Allah arye, nun dib tenenyap ninye ati, ‘Teleb winin ning yala-yala nirya pil dobuka unamake,’ tenyamsuka ati, Kristus deice arye, winiryuk ninye kipdeipsukba, unyabe. Na Paulus arye, nyapsine.
Israel ninye nirya arye, aik pil melibuka don nang arena ati, yo bok uang moubuka deibik. Ara, keil deibuka puturun nang ap, yo cakukabikirye, aik nong dopnamika deiyok nang ap ati arebik. Tonda din ap, mek ap, zaitun yo duk mek minyak mek ap ara, bubukabikce, sik Sidon mutuku nang ap, Tirus mutuku nang ap ati arebik. Arebik ning deiyok ara, ‘Amutuku nang arye, aning doprobikirye, Libanon mutuku bikirye, weik kepyal yo deiyok tapu kobikirye, bobuka laut mekwen deice, Libanon mutuku arye, Yafo mutuku boyanamak’ tenen, arebik. Awinibik ning nirya ara, Persia mutuku talibuka, ninye deiyoknye ulamukce, el si Raja Kores birye, “Winipnamlume,” nyapdeibuk touk, winilamik.
Tonda, yuk ninye nirya arye, ayouwak kilapu sik winilamik ning akunum eibuka kel bikamik akarye, “Akilapu ara, pia telebuk wininyake,” nyabuka nyalamak kilapu ara, sik siuk sekna telebe. Ayupu ara, ani. “Kume, ayouwak kilapu, sik teleb winin ning weik aulule. Sik damang mapu ara, teleb kibuka kwaknalamikbuk, weik arye nelamik. Ninye asik nang ati, ‘Nun aik una telebe,’ nyabuka, buplan kukulilamik akarye, melilamik.” Ayupu atonun yupu nyapting kilapu ara, sik si sekuka milina telebe. Tonda, yuk ninye melina ati, ‘Apil ara, malye pil ati ara, nun teleb kilapu arye kum pil dopnuyabe’ tenena kumce, yuk dib tenen ninye ati melilamik. Tonda, kanye imun ulamuk ninye melilamik. Ara, yata teleb winin ning do nirya, yuk ning tenena kum, apiluk dobuka teleb ulamik. Yuk ninye arye, ayouwak kilapu ati ayupu atonun nyaptingopura, ‘Ato youwak kilapu ara, melinamabe’ tenen, si sekna telebe.
Atalak noutam nirya ara, anggun ap, Yesus Kristus ap, talima dukdongobuka neika ululumbuk, Kristus el mikip deice melisiliba, pia diksukumuk winilamlum ani, ‘Teleb winina ati, duk weik moupnamsile’ tenen, Allah morosunune. Diksukumuk winilamunyebuk, duk weik moupsilyopura, ninye nirya eipsikirye, “Allah elda pia telebe,” nyabuka, el si erebikibuk, Allah el si weik upnamle. Winiplyopura, ‘Ninye weik el si kel kibikirye, el siuk erepnamak’ tenen, Allah morosunune.
Anggur tapu duk teleb ubuka moulamle atonun, na mapu anggunda, duk pia weik mounamsile. Teleb ubuka winimunya deice arye, yuk ninye nirya arye, ‘Kume anang ara, Yesus el mapu unyake’ tenen, kel kipnamake. Ninye weik akunum kel kibicopura, winimunya deice arye, na Ni Koprop Allah ati, ‘Allah ara pia telebe,’ nyabuka, el si erebikirye, elti, kinamake.
Na Yesus ara, anggur tapu deiyok atonun unune. Anggun na mapu ara, anggur tapu paplirye, taruk leklamla atonun ululume. Yata ninye do nirya, na ap talima dukdongobuka nauk talibuka unyakba, narye sik talima noutamak tuba unyopura, aninye ara duk weik moupnamle. Bukni, na ap talima dukdongobuka una kum bukni, anggun yuk uk upmunyopura, angguncuk pil teleb ning tonok babye kum doptume. Anggun dem aryuk winipdenamlum ning ara, nong kum upnamle.
Nyabuk bukni, Yunus bira, Allah el si Yahweh arye nyapmok yupu batakuka, ‘Allah dinmanil sukum ara, kum unune. Tarsis mutuku uk binune,’ tenebuka, yuk bisik banmok. Bisik banmoka ani, laut kup-kup mutuku si, Yopa mutuku biyukce, ‘Laut mekwen deice bana ati, kintinyamik mek lia yo weknirye, Tarsis mutuku binun’ tenen, el bana ati, yo bok akunum dekukopura, Yunusda laut mekwen deice bana ati, el si kapal, amek liya yo aik welebuka bukuk. Bukukopura, amek liya yo deice, el ap yuk nang ap, laut mekwen deice biyik. Yunus bira, Allah arye nyapmok yupu kum kekebukce, ‘Allah dam ara, kum unamne,’ tenebukce, ‘Tarsis mutuku binuka unamne’ tenen, biyuk.
Akam kilapu sik urasin teleb kibuka nelamikce talak, sik urasin ara, tuku deice balamle ning el si ara, kijang urasin teleb ulamle touk unyake. Ati anggunce anggun mining kilapu eipmunce, sik akilapu ati, kanye delinamlulume. Winipmanto ara, ninye arye kanye wangalamak mek dibikiba, kanye delilamak touk, anggunce anggun mining kilapu ati eipmunce, akilapu ati kanye delinamlulume. Atalak-atalak nirya ara, anggun kilapu koproba atibuk, neika ulamunce, kanye delilanamlulume.
Nunce anggun anang ati, ‘Aning nirya dolonamak’ tenen, Allah morosinyam ara, urdem ati kume. Deiyok ara, Allah arye, ‘Na mapu winibuka, winibuka diksukumuk unamake,’ tenesilye touk, dipkoprop aninguk talibuka, ‘Anggun unamlum ning nirya teleb ubuka unamlum’ tenen, Allah morosinyame. Tonda, ‘Wininamluma deice arye, Allah arye kanye delinamsil’ tenen, nunce anggunti Allah morosinyame. Winibuka winimunyopura, Allah arye kanye delinamsil ning ara, lilibuka nyapnusine. Ara, yata teleb winin ning nirya do, diksukum ninguk yala-yala nirya umunyebuk, teleb duk weik moupnin banamsile. Tonda, Allah ap, kanye dukdongobuka umunye ning ap, Allah winilul ning nirya ara, ‘Weik arye kel kipra banamak’ tenen, nunce anggunti Allah morosinyame.
Se, anti ara, weik tonun bico tenekinirye, kanye delikunune! Anda sik arye kum bukni, minopce na dam yanamlame! Winipmanto ara, bai tam kam ulamle ning, el si ara kijang basam, pia bikbik abuka balamle touk, an babye, minopce bikbik abuka, na dam adiparyuk yanulyame! Winipmanto ara, bai tam kam ulamle ning, el si ara rusa basam yim ara, ninye arye rempah-rempah dobuka koulamikba, aning palamuk mutuku dup deice, koulukuka bikbik abuka yangalamle touk, an babye na dam, adiparyuk minop bikbik abuka yanulyame.
Ati ara, anggun Yerusalem weik asik noutam ululum wel kilapu nirya ara, moubuka kekepnamnulume. Ara, anggunce nati, nyalin yupu deice arye nyapnamnulume. Ara, talye nyaltakna kum bukni, bai tam kam ulye ning, sik si ara rusa basam ap, kijang basam ap, sik si deice arye, nyalin yupu deice arye nyapnamlulume. Ara, anggunce nyapnamnulume, “Kume, an ap, ance moun dilyamnye ap, neika unamrum talak nirya ara, nunce anggun dam talye karin arye, pia kum yanamabe. Neika unmarumunya ani, akunum buknamrum talak ara, anggun dam yanamabe,” nyabuka nyalin yupu deice arye nyapnululume, nyapsine.
Na dopnamnilanye bira, pia mikip arye bikbik abuka yangalula ati, elda kijang basam pia bikbik abuka balamle touk ubuka, bikbik abuka balule. Diba, bai tam kam ulye ning, el si ara rusa basam mi bikbik abuka balamle touk ubuka, yangalule. Anggun ton otam elilulume. Na bico tenepnirye, pia kanye delinunye bira, nun aik dam dobupu poka dam tikmalce, na aik tamuk pia dinmale. Ara, na aik abilinga noutam bocamik kin-kin, jendela bisik arye dinulule. Tonda, na aik abilinga kin-kin bisik uamuk noutam arye tikuka, ‘Na kil anyaik pum tam unmal do?’ tenen, moubuka dilule.
Lida mutuku ara, Yope mutuku dam uamuka ati, Yope mutuku diba tenebuka ulamik nang ara, “Peterus ara, Lida mutuku unmale,” nyabikura, Yope mutuku nang kekebikce, bitinye nang wibuka, Lida mutuku dopkwetebik. Ura, abitinye nang arye Peterus binuka moroprikceura, ‘Neika tamubuka yanamak’ tenen, dopdeibik. Dopdeibikura, birikce, “Peterus an minop yalyame,” nyabuka morobidikura, Peterus ap, laka nyalbinmarik nang ap, tamubuka Yope mutuku yayik.
El aik wekupu ura, Allah yupu lak lenanye, malaikat ara, Kornelius el aik kutukuka tikilyayuk akarye nyabuk yupu, Kornelius arye nunti laka nyapsuk. “Allah pil donanye malaikat arye nyapnuke,” nyabuka Kornelius arye laka nyapsuk. “Tonoknye el si ara, Simon bukni, Peterus ton nyanyaknye bira, dobuka boyangana ati, ninye wibuka dopdeipnulyame.
Piblisite