Rasul 17:4 - Eipomek

⁴ Winibuka laka nyabuka, peterebukura, sik Yahudi yala nang tonok-tonok ap, tonda Yahudi yala kum nang bukni, Allah si erelamik nang Yunani nang weik ap, tonda amutuku weik kilapu mitika kum weik ap, dib tenebikce, Paulus ap, Silas ap, sik dib tenelamrikce, doproprik ning uk, ‘Nun babye dib tenepnamabe,’ tenebikce, sik kanye yuk punubik. Sik kanye yuk punubikce, Paulus ap, Silas ap, sik tamuk kiprobik.

Rasul 17:4 Referans Kwoze

Rasul 17:12

Winilamik akarye, Yahudi yala nang yupa weik ap, Yunani yala weik kilapu ap, ton Yunani ninye ap, weika arye dib tenebik.

Rasul 14:4

Anya asik dolamikak ulamik ninye tonok bukni, noutamak bokdobikce, ton tam nang ara, Yahudi yala nang sik yupu kekelamik. Ton tam nang ara, Paulus ap, Barnabas ap, sik peterelamrik yupu diba tenebuka kekelamik. Winilamika ati, amutuku ninye kanye yuk-yuk tenebikce bokolalamik.

Rasul 13:43

Morobikura, akekepmek nang nirya bindobikopura, Yahudi nang ap, yuk mutuku ninyebuk, Yahudi nang diba tenelamik ning nirya, sik babye, kel kibuka diba tenelamik nang ap, Paulus ap, Barnabas ap, neika biyik. Neika biyikopura, Paulus ap, Barnabas ap arye, anang ati ayupu nyaprik. “Wini talak Allah el mikip arye melisulul ning, el kanye aryuk bico tenepsilirye, talye arisilya deice arye ululume. Aning pia talibuka umunce, Allah ati pia kum batakanamlume,” nyabuka, anang sik talima ati kwa deiprik.

2 Korintus 8:5

Nunce sik Makedonia tam ninye ati, ‘Winibuka wininamake,’ tenelamubu touk kum winibik. Kume. Sik Makedonia ninye arye, minop talak sik bidamang kanye talima ap, sik badamnye nong ap bobuka, ‘Allah el amutamuk unamap’ tenen, Allah ati arebik. Sikce nong Allah ati arebik, aminyan talak ara nunti arepsik. Aning nirya winibuka winibik ning ara, Allah arye, ‘Amutuku nang arye wininamake,’ tenyamuk touk akunum winibik.

Rasul 28:24

Paulus el ayupu laka nyanmoka deice arye, ton nang ara, diba tenebik bukni, ton nang ara, ‘Nun kum kekepnamabe,’ tenebika ati, diba kum tenebik.

Rasul 15:22

Yakobus arye anyabuka ati, aminyan talak, Yesus arye wipdeibuk Rasul nang ap, amutuku dib tenelamik nang ap, sik deiyok nang ap, sik nirya neika tenebikce, ‘Nun aunmap nang noutamak arye yuk nang ton wipdeipnamabe Paulus ap, Barnabas ap, ansinibuka Antiokia mutuku binamak,’ tenebik. Utenebikce Yudas el si ton, Barsabas nyalamiknye ap, Silas ap, wipdeibik. Abitinye nang ara, amutuku dib tenebik nang arye, abitinye nang ati, kanye delilamikce, ‘Sikda pia teleb nang,’ tenelamika ati, abitinye nang wipdeibik.

Rasul 13:50

Bukni, aminyan talak, sik Yahudi yala deiyok nang arye, amutuku Yunani ulamik kilapu, sikda sisin kilapu ulamikce, Allah si erelamik kilapu ap, tonda, amutuku koprop sisinanye ap, ati ayupu nyabik. “Paulus ap, Barnabas ap, sik nong deice ikin ning deipnuyabe,” nyabuka yupu deice arye obyakik. Yupu deice arye obyakikura, amutuku nang arye Paulus ap, Barnabas ap, sik nong deice ikin ning deibikce, “Anggun anang berurume,” nyabuka, sik mutuku noutamak arye yakik.

Rasul 21:28

Talibikce yupu weik arye nyanmek. “Anango, anggun Yahudi yala nang nirya melipsululume! Anye bira nun Yahudi yala nang ap, Allah arye, ‘Wininamlulume, aning kum wininamlulume,’ nyapdeibukura, Musa arye sekeiyamsuk yupu, mem yupu ap, ton anyaik, nun Allah el si erenyapce elti, kam ning obuka arinyap aik ati, anye Paulus birye, ‘Anirya ara, malye,’ nyabuka peterelya deice arye yanilule. Tonda, Yahudi yala kum ninye, Yunani ninye dobuka, nun Allah si erenyap aik dam delilyasuk deice arye, nun Allah si erena ati wibuka deibupu aik, ateleb aik ara, malye kipdeipsuke.” Nyabikce yupu weik tonun nyanmek.

Rasul 19:10

Yupu talipdanuka, laka nyabuka, ulamika ani, keting tamun ara, bitinye. Apia ulamika ati, Yahudi yala nang ap, Yunani yala nang ap, Asia tam noutamak ulamik nang ara, nun deiyoknye Yesus, el laka teleb yupu kekelamik.

Rasul 18:4

Winilamika ani, Sabat sum nirya arye, sik Yahudi nang Allah yupu peteren aik Paulus weknarye, Yahudi yala nang ap, Yunani yala nang ap, sik kanye tenen ning batakikirye, winiryuk kanye talima yuk punubikirye, ‘Yesus dib tenepnamak’ tenen, Paulus arye lipsisikilamukce Allah yupu peterelamuk.

Rasul 17:34

Anang ulamik noutamak arye ninye tonok-tonok Paulus nyanmok yupu kekebuka diba tenebikce, el tam kipdobikura, Yesus diba tenebikce Paulus ap, neika balamik. Adiba tenebik nang ulamika noutamakarye, kil tonok el si ara, Damaris ap, tonoknye, el si ara, Dionisius ap, diba teneprik. Dionisius ara, Arepagus nyalamik nang ara, eluk ara, Arepagus ulamuk. Sik, akil ap, anye ap, ton yuk ninye mitik weiktonun, dib tenebik.

Rasul 17:17

Aning ati ara, asum-asum nirya Yahudi yala nang sik Allah yupu peteren aik wekuk akarye, Yahudi yala ninye ap, Yunani ninye bukni, Allah si erelamik Yunani ninye ap ati, ‘Yesus arye lyesulule,’ nyabuka peterelamuk. Tonda, ‘Yata ning deknuyap do?’ tenen, amutuku ninye deklamikak talye dekelyangalamik ninye ati, Yesus yupu lak lebuka peterelamuk.

Rasul 16:3

Paulus arye Timotius ati, ‘Patanilya ara, narye el dobuka binamne,’ tenebuka ati, elce Timotius dobuka yuk nang dam bobiyukura, sikce Timotius el den bola mouse ning sekik. Awinibuk ning deiyok ara ani, Paulus banamuk mutuku noutamak ulamik nang nirya, Yahudi yala ninye arye, Timotius el li Yunani yalanye ulamuka ara, akunum kel kiyamika atia. Yahudi yala nang arye Timotius ati, ‘Den bol mouse ning sekna kumnye nun like,’ tenebicak tenen, Timotius el den bol mouse ning sekik.

Rasul 15:40

Bukni, Paulus arye Silas wibukce yukak biyuk. Ara, amutuku diba tenelamik nang arye, ‘Yesus el melina deice aryuk apil donamdak’ tenen, abitinye nang ati Allah morobikce Yesus ati arebikura, birik.

Rasul 15:32

Yudas ap, Silas ap, sik babye, Allah arye nyalamuk yupu lak nyana deiyok nang ulamrik anya arye, sikce amutuku diba tenelamik nang ati, talima kwa dina yupu ap, talima mikip kilina yupu ap, yupu weik nyalamrik.

Rasul 15:27

Nun kan-kan arye dopkwetepmap nang bitinye nang ara, Yudas ap, Silas ap, nunce asekmap yupu dipkoprop atonun, sik yupu deice arye laka nyapnamsiraka ati, dopkwetepsibibuk anggun dam nyalyanamsirake.

Rasul 14:1

Paulus ap, Barnabas ap, Ikonium mutuku akunum birikopura, Antiokia mutuku ulamrik touk, sik Yahudi yala nang sik Allah yupu peteren aik wekrik. Anyaik wekrikce, sik Allah yupu pia teleb ubuka peterelamrik ati, Yahudi yala nang ap, ton Yahudi yala kum ninye ap, weike diba tenebik.

Rasul 4:23

Akunum loplobikopura, Peterus ap, Yohanes ap, sik dib tenebuka neika ulamik nang dam tamubuka birikopura, Yahudi yala nang sik yupu lipsisikuka bokolina deiyok nang ap, Allah arena weik deiyok nang ap arye, wenepmek yupu nirya laka nyaprik.

Rasul 2:44

Yesus dib tenelamik nang nirya arye, neika ulamik anye, sik talyamik ning nirya, ‘Na’ tenen, mulona kum ak arye, neika arilalamikce, aning nirya ansinibuka talilamik.

Yohanes 7:35

Yesus arye nyabukba, sik Yahudi yala deiyok nang kekebikce nyapdayik. “Anye bira, dan mutuku bitu ak, nun kum eipdatibye do? Elda, nun yala nang bukni, Yunani yala ninye ap ansinibuka unyak mutuku binamal do? Amutuku bilirye, Yunani ninye peterepra banamla ati, ayupu nyapmasil do?

Kidung Agung 6:1

Se, nun ka kilo! Amutuku noutam ara, wel kilapu yupa pia weik aunyak bukni, sikda sik urasin ap, sik unyak ning ap ara, mitik teleb unyake. Sikda mitik teleb unyak bukni, an tonok ara, an uminye ning ap, an urasin ap ara, pia telebuk ukulule! Bukni, ance pia kanye deiplumce, moun dilyamnye bira, dan mutuku pia bindobuk do? Talye ati kum asipkiyabe. Deiyok ara, nun ap, an ap, ‘Anye dan mutuku binuka ulul do?’ tenen, ‘Neika elbinamapʼ tenen, asipkiyabe.

Amsal 13:20

Kel pia weik biklirye, moubuka tenelulnye dam melibuka balamlanye bira, el babye pia weik kel bikna deiyok ning, kel kiplirye, telebuk unamle. Aning atonun, moubuka tenena kumce, walwal kanye uk bobuka, ululnye ap melibuka balulnye bira, el babye tuba walwal uk ulirye, el dam ara, ikin ning weik yanganamle.

Amsal 9:6

Ayupu ton nyalule. Na dam yamunce, pia weik kel bikna deiyok ning, akunum dopropmunyopura, aninguk moubuka talibuka upmunce, anggun walwal arye winilamlum ning nirya ara, adiparyuk bataknamlulume. Winibuka aning nirya batakmunyopura, pia weik kel bikna deiyok ninguk, talibuka umunce, teleb ubuka un ning nirya ara, kel kipra banamlulume. Aninguk talibuka umunce, pia teleb ubuka pia kam uk unamlume. Tonda pia diksukum un ninguk, kel bikmunyopura, abisikuk melibuka dobolbanamlume.

Zakaria 2:11

Atalak ara, yuk-yuk mutuku, im sirya, mutuku sirya unyak nang nirya arye, Allah Yahweh damuk, bulubuka yanganamake. Ara, ‘Nun ap neika unamabeʼ tenen, atia. Sik anang babye, nara Allah, na mapu koproba kinamake. Wininamak talak ara, na Allah ap, sik nirya ap, amutuku noutamuk neika unamabe. Allah arye nyabuk. Nyabukba, nabi Zakaria birye, nyabuk. “Anggun nirya kekeplulume! Allah arye, ‘Aning-aning winipname,’ nyapdeipmasil yupu, nong akunum uplyopura, anggun nirya arye nati, biknamnulume. Ara, ‘Yo, elda dipkoprob Allah aryuk dopdeibukba, nun dam yanuka, laka nyapsuk touk, akunum unmal atiaʼ tenen, diba tenenamnulume. Nabi Zakaria birye, sik Israel tam nang ati, nyabuk.

Rasul 17:10

Batakdongobikura, atalak akunum inibukopura, aTesalonika mutuku diba tenebuka neik du weit atonun ulamik ninye arye, ‘Paulus ap, Silas ap, Berea mutuku bindopnurak’ tenen, “Telebe dabirurume,” nyabuka dopkwetebik. Dopkwetebikura, bisik ak mapnin banmarika ani, Berea mutuku akunum birikopura, adiparyuk amutuku Yahudi yala nang Allah yupu peteren aik binuka wekrik.

Rasul 17:14

Yu ulilanmikura, adiparyuk amutuku dib tenebik nang arye, ‘Sik Yahudi yala deiyok arye, Paulus obicak’ tenen, “Paulus minopce bilyame,” nyabuka, laut mekwen lilun tam dopkwetebik. Paulus dopkwetebik bukni, Silas ap, Timotius ap ara, Berea mutuku anyakauk ulamrik.