Rasul 14:17 - Eipomek

¹⁷ Winilamuk bukni, ‘Elda yatato Allah ulul do?’ tenen, laka lena ati ara, kum bataksuke. Elce nun bico ati teleb kwepdeipsuk ning ara, ani. Dua noutamak arye mok aresulule. Tonda, nun dinyap ning ara, atalak-atalak dina ati, yuk-yuk wibuka aresulule. Tonda, nun dinyap ning weika arye arisulule. Tonda, nun talima kanye delinyap ning nirya arisilibuk, ‘Kanye langdipsilyeura, pin-pin arye unyabe,’ nyalamabe. Aning-aning nirya arisilya deice, ‘Allah arye dipkoprop bico tenesulule’ tenen, kel kinyabe,” Paulus ap, Barnabas ap arye, awekmek nang ati nyaprik.

Rasul 14:17 Referans Kwoze

Yoel 2:23

Aning atonun, anggun Sion mutuku ululum ninye nirya, weik kanye deipmunce, pin-pin asa arye unamlume. Ara, anggun malye winin ning nirya kum kipdeipniba, teleb kibuka winimunya deice arye, na Allah disinirye, anggun nong deice kanye deibuka, teleb kilisunune. Tonda, narye li ning arisinye touk, dou arepmasinya ani, ton talak ara, mok aresunune. Aning atonun, ton talak ara, mok arepmasinye touk, dou li ton aresunune. Ara, min yuma talak, narye melibuka arelamse touk, wininamsine.

Ayub 5:10

Allah aryuk, ‘Mok ceptu,’ teneplyopura, mok ceplirye, ninye wa pinyapak ap, tukwak ap saklirye, Allah aryuk mek dikilule. Allah arye tenelul touk, bai tam mutuku-mutuku nirya arye, mek panabuka balule.

Ulangan 11:14

Narye anyapmasin touk, dipkoprob winipmunyopura, Allah arye anggun wa wibuka, yal ning koupnamlum talak ap, kouamunya lipnamlum talak ap, yuma talak deiyok koun ning ap, aminyan sirya dakan talak ap ati, mok arepliba, tuku teleb unamle. Winiplyopura, anggunce koupnamlum ning gandum do, anggur duk do, minyak zaitun duk do, aning-aning nirya kouamunye ani, akunum wisiplyopura, dakuka linmamunce, weik tonun delinamlume. Telebuk unamlume.

Yesaya 5:6

‘Na anggur tapu duk weik moupnamnil’ tenen, anggur tapu taruk seklopniba, kwapu youbuka, duk weik mouptu bukni, aning ara, kum seklopnamne. ‘Duk weik moupnamnil’ tenen, pinga kum deipnamne. Anggur wa ara, ‘Dauplye’ tenen, bataknamne. Anggur wa wilamse mutuku nirya ara, talye yo mutmuta ap, tace ning ap, beteklirye pabuka kwiniklyopura, anggur tapu bok ton kum eipnamake. Talye ninguk papnamle. Tonda, narye dua ap, mok ap ati, “Memepdoplulume,” nyapniba, mok ara, asukum ton kum sakuka, kum pulyanamle.

1 Timotius 6:17

Wini talak tukwak mutuku unyakce, aning-aning nirya, weik talikirye, bona weik talin nang atonun unyak ninye ati, nyanamlyame. “Anggunda maknya kanyeuk, kintinina ap, dina ap, meme. Bona ap, yo bok ap, tukwak bona weik nang nirya ap ara, anang deice anggun kanye delina kume. Aning arye kum lyepsutue. Aning nirya ara, pia unamle ning kume. Yata wiribuka talakuk aupmalya ani, aminyan talak tukwak ning nirya kum danamle. Tukwak ning ara, ‘Yata talak kum danamsil do?’ Nun walwal anya arye, aning ati kanye delina meme. Aning kum bukni, ‘Allah elcuk melipsilirye, lyepnamsil’ tenen, el deiceuk anggun kanye delinamlulume. Nun kanye deibuka, teleb una ati, arisilya deiyoknye bira, Allah elcuk aning-aning nirya weik arye arisulule.” Ayupu nyapnamlyame.

Yehezkiel 34:26

Ati ara, narye sik amutuku unamak nang ap, sik unamakak ap ara, pia teleb kipdeipnamne. Winipnirye adiparyuk narye, ‘Asukumuk unamne,’ tenyamse mutuku konak ara, pia teleb kipdeipnamne. Amutuku unamak talak arye, mek pataplyopura, narye mok li arepnyeura, mok weik tonun cenamle. Winipnamne deice arye, anggun ap, anggun mutuku ap ara, telebuk unamle.

Yeremia 5:24

Anggun awinilulum nang arye, anggun kanye talima namin upsutuba, anggunce, “Se, nun ni koproba Allah ati, dipkoprob ilil asa unamabe. El yupu uk kekebikirye, aninguk talibuka wininamabe,” nyaptum bukni, aning kum tenebuka nyalulume. Tonda, anggunce, “Se, nun ni koproba Allah aryuk, mok li talak ara, mok aresilyeba, mok celule. Tonda, aketing tamun, aketing tamun nirya, mok li ap, dou man ning deiyok koun talak ap, mok li sirya daklyeura, wa wibuka koumice ning, lin talak ap ara, Allah arye teneplirye, elcuk asum-asum nirya, teleb kibuka arisulule,” nyapmatume. Allah arye, ‘Winipnamakeʼ tenen, ‘Akunum kintinip deiamuk touk, tuba aresululʼ tenen, na Allah ati, si erebuka dopnutum bukni, aning babye, pia kum tenelulume.

Mazmur 145:9

Allah Yahweh, ance ninye nirya ati, kanye talima arekulule. Tonda, Allah arye kwepdeiamuk ning nirya ati, ‘Na tenen ninguk ulule’ tenen, an talima namin ubuka bico tenesimince, pia moubuka kalikisilyame.

Ulangan 28:12

Allah Yahweh elce, mok kintinibuka, im noutam deibuk ati, anggun mutuku mok cen li kiplyeura, Allah arye areplirye, mok dopkwetepsilye ura, cenamsile. Adeice arye, anggun pil donamlum ning yala-yala nirya ara, telebuk unamsile. Winipsilyopura, anggunce winimlum ning ap, talinamlum ning ara, pia weik tonun unamla ati, tia talak ati, yuk mutuku nang ati arenamlume. Anggunce yuk mutuku nang ati, arena ara, telebe uka. Bukni, anggunce yuk nang ati, “Nun ti, anggun weilulum ning ton, tia talak ati, arepsululume,” nyana ara, pia kum nyanamlume. Awinin ning ara, pia malye atia.

Imamat 26:4

Tonok ning ara, narye, ‘Mok cen wala ani,’ tenelamse talak ati, mok aren talak akunum uplyopura, mok arepsinyeba cenamle. Winipniba, mok ceplya deice arye, tuku deice arye, talibuka kounamlum ning, yuk yala nirya ara, tuku namin kibuka, pia weik tonun teleb kibuka panamle. Winiplyopura, yo duk ayala-yala weik tonun mounamsile. Aning nirya ara, pia telebuk unamle.

Lukas 6:35

Wininyak bukni, narye nyapsin yupu ara, yuke. Sikce, ‘Anang optibye,’ tenelamsikce nang ati, bico tenebuka, teleb updeipmunce, ‘Aning tamubuka arenamsiake,’ tenena kum aryuk, talye urdemuk arenamlulume. Aning ati ara, anggun ni Allah im deice ululnye birye, pia malye ninye ap, teleb ubuka melilule, sikce tamubuka, ‘Naio telebe,’ pia kum nyanyak ninye ap nirya ati, bico tenebuka kanye arelul touk, anggun babye, yuk ninye nirya ati, bico tenebuka kanye delinamlulume. Anggunce winipmunyopura, Allah el mapu koprop kipdeipnamsile. Tonda aminyan ara, Allah arye im deice teleb ning weika arye arenamsile.

Yeremia 14:22

Nun ni Allah, nun kele. Mutuku-mutuku nirya arye, kwemdina ning Isa Mutuku Dongonye si erenyak ning ati, ‘Mok arepsilyame,’ nyabuka moroptibye babye, mok kintinibuka kum arepsutue. Tonda, im noutamak ulul ning aryuk, mok tukwak mutuku kum dopkweteptue. Aning nirya kum bukni, Allah ancuk, nun patapsilye ning nirya arisilyame. Ati ara, nunce an deiceuk, nun kanye delinyabe. An dem aryuk, aning-aning nirya arisilyame.” Israel ninye arye, Allah ati ayupu nyabik.

Mazmur 52:1

Raja Daud birye, ‘Israel nang nirya ati, peterepnamne’ tenen, Allah yupu mot sekuk. Winibukopura, Allah yupu mot nyana deiyoknye, arepnamika ati, aMazmur yupu sekuk.

Ayub 37:6

Allah elce, ‘Atalak ara, winipnamne,’ teneplye touk, el yupu deice aryuk, “Mok purye ap, es mok, el si ara salju ap ara, tukwak mutuku noutam saklyame!” nyaplyeba, aning adiparyuk sakalule. Aning atonun, Allah elcuk, “Weik mok cepnulame,” nyaplyopura, adiparyuk, weik mok celule.

Nehemia 9:25

Israel nang arye, amutuku weik keil poka dona ati, keil dikuka deipwelepna arye, antanap dongobuka dolamikce, weik aik alapdobik. Tonda, teleb wa tuku ap, teleb tuku ap, binuka alapdobik. Tonda, bona utotoa talin nang arye, talibuka ulamik aik ap, aik noutamak talibuka delilamik ning ap, teleb ning ap, binuka doprobik. Tonda, amutuku nang arye, palyamik mekwen ap, sik talilamik mek pu ap, anggur tapu wa tuku ap, zaitun yo koulamikba duk moulamuk mutuku ap, yuk yala yo duk moulamuk yo ap, binuka talye parapkabuka doprobik. Alubuka doprobikce, dilamikba, sik nong teleb nelamikce, sik teleb kanye bobuka ulamik. Ance nun apu yapu weik arye meliamlumba teleb arye pin-pin kanye bobuka ulamik.

1 Raja-Raja 18:1

Weik dou mabukba daulamika ani, keting tamun winilinye akunum kibukopura, Allah el si Yahweh arye, Elia biti nyabuk. “An adiparyuk ninye deiyoknye, Raja Ahab dam nyalbilyame. Nyapminyopura, na Allah arye, nyapniba amutuku noutam ara mok cepnamle,” nyabuk.

Matius 5:45

Wininamlum ning ara, anggun ni Allah, im deicanye, ‘El mapu unamak’ tenen, wininamlyame. Allah ara, pia telebnye ulula anya arye, teleb ninye babye, malye ninye babye, bico tenebuka, kanye talima aresulule. Anggunda, el mapu ululuma ati, anggun babye atonun unamlulume. Allah el keting ara, elce nyaplyeba, malye nang dam babye, teleb nang dam babye, delilule. Mok ababye, Allah elce nyaplyeba, malye nang dam babye, teleb nang dam babye, mok celule.

Yesaya 22:13

Nyapdeipsuk bukni, anggun Yerusalem mutuku ululum nang ara, teleb kanye bobuka pin-pin upsukba kanye deipmunce, weik kwalya kwalilulume. Anggunce sapi basam ap, domba basam ap, weik tonun opmunce, tup dobuka diplume. Tonda anggur mek dobuka diplumce, ayupu nyaplume. Anggunce, “Kume, anggun nirya yalulume! Nun nirya ara, anggur mek ap, teleb tup ning ap dibibirye, talye kanye bobuka unmanbe. Winibuka dibibirye, mapmapya bereklye sum ara, nun nirya dipnamabe. Ati ikin kanye bona kume,” nyabuka kanye deibuka winipmalume.

Ayub 36:31

Allah arye weik mambul pil dolya deice arye, tukwak mutuku noutam unyak nang yala-yala nirya ati, kam una deiyok ning arisiliba, kam unyabe. Tonda, elce kwepdeiamuk kam ning nirya ati, yuk-yuk bukni, sik din ning weik tonun arelula deice arye, kam tuba unyake.

Mazmur 4:7

Wini talak ara, ninye weik arye nyanyake. “Se Allah arye, tonap pia teleb kipdeipsutuba, telebuk utibye do?” nyabuka, malye kanye bobuka moronyake. Se, nun ni Yahweh, ance moubuka eipsutumce, ‘Nun ti ila tamubuka, teleb kipdeipsutumba, nunda telebuk unamabeʼ tenen, morokinyabe.

Yesaya 40:21

Anggunda yata ati bita kel kum kilulum do? Anggunda yata ati kum kekeplum do? Aning-aning nirya deiyok kouna talak arye, yuk nang arye kum laka nyapmasikba, pia kum kekeplum do? Allah arye, tukwak mutuku ap, tukwak mutuku ulul ning ap, deiyok koubuka kintinip deiamuk talak arye, aning moubuka bita kel kum kiamlum do?

Rasul 14:18

Ayupu nirya nyaprik bukni, awekmek nang sikce, ‘Asapi basam ap, domba basam ap, obibya deice arye, abitinye nang sik kibibirye, sik si erepnamabe,’ tenebik ning ara, kum batakmanto unmek. Wininmek anya arye Paulus ap, Barnabas ap, sik yupu weik nyaprik deice aniryuk, anang sik tenepmek ning batakik.

Rasul 17:26

‘Mutuku-mutuku nirya binuka unamake,’ tenebukce tonoknye kintinipdeibukura, anye deice arye yala kibukce, ninye yala-yala nirya weik kibuk. Allah arye ayala-ayala ninye nirya kum kintinipdeiyamuk talak arye, sik unamak mutuku ap, sik wininamak talak ap, ‘Winibuka unamake,’ tenebukce minop arye wibuka deiamuk.