Pilipi 4:6 - Eipomek

⁶ Yesus nun dolyanamsil talak ara, akunum dam upsil anya arye, yata ning do nirya ati, ilil upsiliba, ‘Se, yata upnamap do’ tenen, teniltonauk kum unamlulume. Ilil upsiliba, teniltona kum unamlum bukni, aminyan winipnamsil ning noutamak nirya ara, Allah ati moronamlulume. Ara, Allah ati telebe nyabuka, anggun patapsilye ning nirya ara, lakak nyapmunce, Allah pia moronamlulume.

Pilipi 4:6 Referans Kwoze

1 Peterus 5:7

Allah arye anggun nirya ati, bico tenepsilirye, pia melisulula anya arye, anggunce, ‘Se, yata wiripnuyap do?’ tenen, imun kanye bobuka, teniltonauk usilye ning nirya ara, Allah el deiceuk delinamlulume.

Mazmur 55:22

Anye birye, kekena pia teleb yupu nyanulul bukni, el kanye talima pum tam ara, ‘Narye anye biti, olbinyeura, anye opnamne,’ tenenulule. Diba, anye birye, pia namin yupu deice arye, teleb yupu nyanulul bukni, elce nyanulul yupu ara, dipkoprob ninye ona ati, parang ya atonun ulule. Nemalye aryuk, talye yupu uk nyanulule.

Matius 6:8

Anang yupu cang arye nyabuka, Allah morolamak touk, kum moronamlulume. Anggun patasilye ning, min kum moropmamunye talak arye, anggun ni Allah akunum kel bikilula anya arye, yupu cang arye morona kum unamlulume.

Yeremia 33:3

Anggunce amutuku ulamlum ninye arye, nati, ‘Nun ni Allah, aminyan talak upnamle ning ara, lak nyapsilyame,’ nyabuka, moropnimunyopura, narye anggun moropnimunye ning kekebuka, laka nyanamsine. Ara, narye anggun bikina kum yupu, pia mambul weik ning, minop talak min kum laka nyapdeipsise ning, lak arye laka nyapdeipsiniba, kekepmunce, biknululume.

Amsal 16:3

Aning ati, anggunce, ‘Wininamabe,’ tenelulum ning nirya ara, ‘Allah Yahweh elcuk melisilya deice arye, teleb upnin banamap’ tenen, anggun tenelulum ning ap, winipnin banamlum ning nirya ap, Allah el tibuk arenamlume. Arepmunyopura, Allah arye melisilyeba, anggun tenepmunce winipnin banamlum ning nirya ara, nong teleb ubuka nong unamle. Anggun wininamlum ning nirya ara, ‘Kume, nun mikip deice aryuk wininamabe,’ tenena pia kume.

Mazmur 62:8

Ninye tukwak nang arye kum bukni, ikin upmanilibuk na ni Allah arye, lyepnilyopura, teleb kibuka erepdeipniliba, yuk nang arye, nati, si erebuka kininyake. Allah ara, elcuk melibuka kalikinulule. Yata ikin ning do nirya, el dam kum yanuka opnutua ati, el dam ara, na telebuk unune. Elda pia mikip weik keil aik atonun, tonda weik mutuku kon keil atonunye ulule.

Kolose 4:2

Anggun Kolose ninye nirya ara, batakna kumce, pia pi dobuka, Allah moronauk unamlulume. Wininamlum talak nirya ara, ‘Mankau arye malye winibibyak’ tenen, pia kanye moubuka kalikildanamlulume. Tonda, Allah ati, pia “Telebe,” nyanamlulume.

Efesus 6:18

Aning nirya bobuka, unamlum talak noutamak nirya ara, Allah El Dib Kanye arye, anggun kanye talima talisilirye, el mikip deice nyasilye touk, Allah morona ap, aning-aning nirya ap, anggun patan ning ati, Allah morona ap, pia wininamlulume. Ati, ‘Allah El Dib Kanye mikip arisilya deice arye, Allah moronamabe’ tenenauk umunce, talye kanye bobuka, lik una kum aryuk unamlulume. Tonda, batakana kum, pia pi dobuka, Allah ati pia moronamlume. Allah moronamluma ara, ani. Ara, ‘Allah arye wibuka, el mapu kipdeipsuk nang nirya ati, Allah arye melinamsile’ tenen, anggunce Allah moronamlume.

Kolose 3:17

Ara, yata ning do nirya, anggun pil donamlum ning nirya ap, yupu nyanamlum ning nirya ap, nun Deiyoknye Yesus Kristus, el amu tam ubuka, el si deiceuk pil donamlulume. Ara, elce tenesilye touk, diksukumuk wininamlulume. Winibuka wininamlum talak nirya ara, Yesus arye melisilyebuk, el ap, talima dukdongobuka umunya deice arye, nun ni Allah ati fia, “Telebe,” nyanamlulume.

Lukas 18:1

Yesus arye, ‘Na mapu ara, batakna kum arye Allah moronauk unamak,’ tenebukce, ‘Winipmanto yupu nyapnyeura, kel biknamak,’ tenebuk ati, ayupu nyabuk.

Lukas 12:22

Yesus arye ayupu ton nyabuk. Anggun unamlum ning nirya ati, ‘Se yata wiripnuyap do?’ tenen, kanye imun una kume. Anggun din ning ap, ongon baju ap ara, mitik mambul bukni, anggun nong ap, kam una ap ara, weik mambul anya arye, Allah arye anggun patapsilye ning ati melinamsile. Aning ati ara, ‘Se, nun yata mek ap, yata din ning ap, dinamap do? Nun ongon baju, yataton cang baju, el si juba ongopnamap do?’ tenen, kanye imun kum unamsile.

Mazmur 51:15

Wininamne talak ara, Allah ance, “Winibuka unamlame, ateleb bisik banamlame,” nyabuka, nyaliniminye yupu nirya ara, narye ayupu dobuka, sik malye wininyak ninye ati peterepniba, kekebikirye, sik malye wininyak ning nirya, batakikcopura, tuba tamubuka an tamuk kilonamkiake.

Kolose 3:15

Ara, anggun yuk-yuk ululum bukni, Allah arye, ‘Sikda walana ap, oldana ap, kum aryuk, nong tonok atouk kibuka, talima dukdongobuka, namin arye neika unamake’ tenen, wibuka deiamsuke. Winibuka wipdeiamsuka anya arye, Kristus arye talima dukdongopsukba, nong tonok atonun, kibuka ululuma ati, teleb ubuka neika unamlume. Tonda, anggunce Allah ati tuba-tuba, “Telebe,” nyanamlulume.

1 Samuel 30:6

Aning nirya winipmekba, Daud el melina nang, sik yin talin nang ara, weik kanye ikin ubukce, ‘Se, nun kilapu ap, nun mapu kilmapu nirya ap, Amalek nang arye, akunum dobuka bobinmake. Winipmasiaka ati ara, nun deiyoknye Daud biti, keil dobuka, opnuyap do?’ teninmek. Utenebikba, Daud birye, ‘Se, yata wiriptinye do?’ tenen, tenipdeyukce, ikin kanye bobuk. Bukni, Allah el si Yahweh arye talima pum tam mikip arebuk deice arye, Daud el talima melibukba, Daud el mikip tuba ubuk.

Efesus 5:20

Winibuka wininamlum talak nirya ara, nun Deiyoknye Yesus, el si deice arye, nun Ni Kopropa Allah ati, “Aning-aning awapsilye ning nirya ara, telebe,” nyabuka, Allah el si pia erenamlume.

Mazmur 55:17

Anang ati wenebuka opnamlum bukni, na ikin weik unilye talak nirya ara, narye anti, ‘Se, na ni Allah, ance melibuka lyepnilyame,’ nyabuka moronamkine! Na kel bikne, moropnyeura, Allah Yahweh arye, nati, dipkoprob lyepropnamnile.

Lukas 10:41

Nyabukopura, Yesus arye Marta ati tamubuka nyabuk. “Marta, Martao, pil weik donmalamce, aning-aning nirya ati, ‘Se, yata wiripnun do?’ tenen, kanye bokoltonmakil akarye, kanye imun deice arye nyapnilame.

Lukas 18:7

Allah arye wibuka deiamuk ninye ati, yuk nang arye, sik nong deice ikin ning weik delilamikceura, sik yu nang ati, Allah el mapu arye, ‘Nun ni Allah arye, yupu lipsisikuka bokeipsilirye, telebuk keipnamsile’ tenen, keting noutam babye, lukunyan babye, tuba-tuba moronauk unyake. Allah el mapu arye wininyaka ati ara, Allah arye sik pirinamle do?

Matius 10:19

Yata talak do nirya, anggun tapu koubukapsikirye, yupu talina deiyok nang sik dam bobisikcopura, yupu kum nyapnumunyop talak ara, ‘Se, yata winibuka nyapnuyap do?’ tenen, mambul kanye kum bonamlulume. Allah El Dib Kanye arye anggun talima noutamak wini talak nyapsilye ninguk, kekepmunce nyapnamlulume.

Amsal 15:8

Allah Yahweh elda, malye winin ninye arye elti, morona ap, ‘Nun malye un ning kilipsilirye, namin kipnamsil’ tenen, teleb ning weik arye arena ap, wininyak ning nirya ara, el kanye deibuka kum dolonamle. Allah arye anang ati yu tenelule. Bukni, ninye ton Allah arye, “Wininamlulume, aning ara pia kum wininamlulume,” nyabuka, nyasilye touk kekebikirye, moubuka wininyak ninye nirya ara, el kanye delilule. Sikce Allah ati, arena ning pia teleb ning kum upmalya babye, sik aninye arye morobice ning ara, Allah kekebuka dopdoplirye, sikti, kanye delilule.

Lukas 12:29

Allah arye dipkoprop melinamsila anya arye, anggun unamlum ning ati, ‘Se’ tenemunce, ‘Nunda, yata ning ap, mek ap, dinamap do?’ tenen, kanye imun kum unamsile. Anggun talima ap, kanye ap, aning talye-talye ning deice kum delinamlulume.

1 Samuel 1:15

Nyabuka wenebukopura, Hana birye tamubuka nyabuk. “Kume na nio, nara ninye kanye wangan mek aning-aning nirya, kum dinune. Nara, ikin kanye bopmana ati, ikin unilye ning ati engenmance, na ni Allah el si Yahweh ati, na talima pum tam unulul ning arye, elti, nyanmance, moronmane.

2 Korintus 1:11

Winibuka unanam talak noutamak nirya ara, anggun Korintus mutuku ninye arye nunti, Allah morosululuma deice arye melisululume. Winibuka anggunce nunti Allah morosumunyopura, yuk ninye weik arye nunti tenepsikirye, “Allah, anti ‘Telebe,’ nyapkiyabe,” nyabuka, el si erebuka nyanamake. Ara, ninye weik arye nunti, Allah morolamibyeba, Allah el kanye aniryuk bico tenepsilirye, melisilye ning ati ara, ninye weik arye Allah ati, “Naio, nun morobupe touk, Paulus ap, el melin nang ap, melyamluma ati, ‘Telebe,’ nyapkiyabe,” nyanamake. Na Paulus arye nyapsine.

1 Korintus 7:32

Ara, sal arye, kil doldana yupu ati tonap nyapnusine. Sirya talak akunum dam yanamsila anya arye, anggunce aning-aning nirya ati, ‘Se yata wiripnun do?’ tenen, ‘Mambul kanye bobuka kum unamak’ tenen, pataniliba, nyapmasine. Kil min kum dopmakce nang ara, Yesus el piluk tenebuka, el ning atibuk pia moubuka tenenauk unyake. Ara, sikda, ‘Se, yata teleb pil doptinyeba, Allah arye, kanye deipnamnil do?’ tenenauk unyake.

1 Peterus 4:7

Aning-aning nirya sirya daknamle talak akunum dam upsil ati, pia moubuka tenepmunce, teniltona kum arye, ‘Malye ubibyak’ tenen, moubuka kalikilanamlulume. Winibuka upmunyopura, Allah ati moronamlulume. Moubuka kum kalikdamunyopura, Allah ati teleb nyabuka kum moroptume.

Matius 13:22

Ton ninye ara, Allah yupu kekebuka dolonyak bukni, yo duk tirmangka weiyang-weiyang kan-kan sakmok ning atonun wininyake. Ara, tukwak mutuku noutamak arye, ‘Aning doproptinirye teleb uptinye do? Yuk ning aupnutuba teleb uptinye do?’ tenen, teniltona ap, kanye bokoltona ap deice arye, Allah yupu batakalogonyake. Tonda, “Bona weik doproptinirye, telebuk uptinye,” nyabuka, sikce sik bidamang arye, tilila yupu talya nyaldanyake. Tonda, aning-aning nirya weik patapliba, ‘Aning ton doproptinye, aning ton winiptinye,’ tenenyak deice arye, lik upliba Allah yupu batakalogonyake. Wininyaka ara, tirmangka weiyang-weiyanga arye apamuk ning koupdongobukce, angkalung kipdongobukba, wen-wen alamuk touk, talya tukwak ning aning-aning nirya pia tenenyak deice arye, Allah yupu kekelamikce ning ara, batakiceba duk kum mouplirye, talya urdemuk bolule. Ara, teleb ubuka kum kekekirye, Allah yupu pia kum dobolbanyaka ati nyapsine.

Daniel 3:16

Ura, ayupu nyabuk talak ara, Sadrak, Mesak, Abednego ap, sikce ninye deiyoknye Nebukadnesar ati, tamubuka nyabik. “Nai Rajao, nun dem aryuk, kum lyepdatibye. Anyapmasilam yupu ara, nun bidamnye arye, yupu kum sekdatibye,” nyabik.

2 Tawarikh 32:20

Nyabuka nyanmek ati ara, Raja Hizkia ap, Amos el mi nabi Yesaya ap, sikce amalye yupu akunum kekepdikopura, ‘Seʼ tenen, malye kanye bopdikce, ‘Se, nun ni Allah arye, nun melipsuturye, lyepropsutueʼ tenen, Allah moropdik.

1 Samuel 7:12

Batakikba biyikopura, Samuel birye, keil tonok doprobukce, Misba mutuku ap, Yesana mutuku ap, amutuku wiliba noutamak binuka ikdeibukce, akeil deibuk ning ati, si dobuk. “Akeil si ara, Ebenhaser nyanamabe. Deiyok ara, amutuku asukum ara, Yahweh arye melipsuk atia,” nyabuk. Asisibuk ning ara, sik Ibrani yupu deice ara, ayupu deiyok ara, ‘Allah arye melipsuk ati, keil deibabe,’ nyanyake. Aning ati, asi sibuk.

Kidung Agung 2:14

Tonda, na dopnamnilanye birye nyanulule. “Se akilo! ‘Ance nyalyam yupu ara, kekeptinyeʼ tenen, patanulule. Tonda, ‘An pia urasin teleb ara, tuba ton ap eiptinyeʼ tenen, patanulule. Ance nyalyam yupu ara, pia teleb ati, aning kekepnyopura, kanye delinune. Tonda, an urasin ara, pia teleb ukulula ati, aning ton eipnyopura, pia kanye deibuka unune. Winipmanto ara, anda yalma maka atonun kil ulyame. Ara, cang weik mutuku kon ara, yalma arye, ‘Ninye eipnikcakʼ tenen, ilil upliba, keil deiya pum tam duknubuka ulule. Bukni, amaka ara yupu pia telebuk nyalule. Tonda, yalma maka ara, urasin pia teleb maka ulula ati, amaka duknuptua babye, akunum eibiyopura, nunce kanye deibuka unyabe. Aning atonun, narye anti eipkinyopura, kanye deibuka ununa ati, anda yalma maka atonun kil ulyame nyapkine. 1

1 Korintus 7:21

Winipmanto ning nyapnusine. Anggunda, yo bok deice dekikirye, “Pil dopsilulume,” nyabuka pil urdem aryuk dolamak ninye ulalumbuk, Allah arye, ‘Diba tenepnamak’ tenen, yukupsukba, dib teneplum do? Pil dolulum bukni, dekna ning kum dololulum ninye ululum ninye ara, anggunce, ‘Se, nunda, yo bok deice deksik nang unyaba anya arye, yata wiripnuyap do?’ tenena kume. Ilil kanye kum bonamlulume. Deksik nang arye, bataksikceba, talye ninye utumopura teleb bukni, kum bataksikiba talye kanye bobuka kum utuma babye telebuka. Aning ara, mambul kume.

1 Raja-Raja 8:28

Bukni na nio, an amu tam ununa ati ara, ‘Na moropnukin yupu kekepnutum’ tenen, moropnukine. Nara malinye binya arye, adiparyuk wenebuka oplopnutum bukni, ‘An kanye aryuk bico tenepnimince melinamnilam’ tenen, moropkine. Na nio, an si Yahweh ati erekunune. Anda na si erenun Allah uka. Ati, asum arye, na engebuka moropmakin yupu ara, ‘Kekepnamnilam’ tenen, moropkine.”

Yeremia 32:16

Allah arye nyapdeipnuk yupu akunum laka nyapsopura, na Yeremia birye, tuku deksiba sekuka arepnik surat ara, dobuka, ninye si Neria, elce deiamuknye, Baruk biti arepsirye, Allah Yahweh ati moropse. Moropsirye, ayupu nyapse.

Daniel 6:10

Ayupu nyapdeibukba, Daniel kekebuk. Kekebukopura, adiparyuk tamubuka, el ulamuk aik biyukce, asum-asum nirya ulamuk touk, el im aik jendela kukuk. Ara, Yerusalem tam botcamik jendela ara, kukeibukce, el Allah si erelamuk touk, gutam tuku dipdongobuka, Allah morobukce, Allah el si erena ati, mot sebuk. Ara, Allah yupu mot sebuka winililamuk touk, asum babye atonun, Allah ati, teleb abuka kinmok.

Matius 6:34

Aning ati ara, ‘Ambusum ara, yata winipnamap do?’ tenen, kanye imun una kume. Ambusum ning upmal ning ara, ambusum ning anyuk tenenamlume. Asum-asum nirya, kanye imun usilye ning ara, akunum aupmalula anya arye, yuk sum ning ara, aunmalum sum noutamak tabakuka tenena kume. Yesus arye nyabuk.

1 Timotius 2:1

Ura, Timotiuso, anggun nirya adiparyuk wininamlulum ning mikip arye nyapnukine. Weik mambul ning ara, ani. Ara, anggun dib tenen nang arye, yuk yala nang nirya ati, Allah moronamlulume. Ninye patan ning ap, ikin usilye ning ap ati, ‘Allah arye yuk ninye melinamle’ tenen, moronamlume. Tonda, yuk nang nirya ati, “Telebe,” nyabuka, Allah moronamlulume.

1 Timotius 5:5

Yata youwak kilapu do nirya, el melin nang ap, el mapu ap, dipkoprop kum unyakbuk, aning-aning pataplyopura, utenelule. ‘Kume, Allah eluk melinamsil’ tenen, dib tenebikirye, keting noutam babye, lukunyan babye, “Na ni Allah melipnilyame,” nyabuka, Allah pia moronyake. Kum batakanyake.