Ura, yuk yupu ton nyapnusine. Wini talak ara, malye nang arye nunti, ‘Nun like’ tenen, nun nong deice, ikin ning weik delisinyakba, imun kanye bobuka unyabe. Bukni, na kanye ara, Allah arye aminyan talak nunti erepdeipsilirye, pia teleb unamaba ati, wini talak ikin usilye ning ara, mitik tonun mambul uka.
Pilipi 3:8 - Eipomek8 Anyapmasin yupu uk kume. Tonda, teleb-teleb kibuka winilamse ning weik aupnuk bukni, Yesus dib tenepnirye, ‘Na deiyoknye Yesus Kristus ap, dukdongobuka unaname,’ akunum tenepne ning ati ara, ‘Mince arye tenelamse ning nirya ara, malye ning atouk, dauplye,’ tenenune. Ara, ‘Na Deiyoknye Yesus Kristus ap, talima dukdongobuka una ara, pia mambule,’ ati nyapsine. Minop talak ara, na diksukum ulamse deice arye, ‘Aning deice arye, teleb updeipnamnile,’ tenelamse bukni, wini talak na kanye ara, ‘Aning nirya ara, mal-malya, sukulonga donoklamak atonun ning ulule,’ tenenune. Tonda, ‘Lyun ning atonun ning ulule,’ tenenune. Winibukap tenenuna deiyok ara, ‘Weik mambul ning ara, Kristus eluk talibuka, el ap, talima dukdongobuka unaname’ tenen, nyapne. Gade chapit la |
Pilipi 3:8
53 Referans Kwoze
Nun deiyoknye Yesus arye, pil arepnuk ara, Allah el kanye aryuk nun bico ati, Yesus deice lyepsilirye, talye melisulul yupu, el laka teleb yupu peterena pil arepnuke. ‘Apil nirya doptinirye, sirya daktinyopura, anyuk ara, pia teleb,’ tenenune. Yesus arepnuk pil ara, ‘Pia dopra balamnya ani, sirya daknamne’ tenen, na ona babye, dipna babye, telebe uka. Na kam una ara, ‘Na’ tenen, tenena kum arye, ‘Urtalya, daopnitinge,’ tenenune.” Paulus arye nyabuk.
Anirya, winibuka ulamse bukni, yata diksukum winin ning do nirya, yuk nang arye, ‘Elda pia telebnye, tenepnamniyak’ tenen, mem pil atonunuk pil dolamse ning nirya ara, wini talak na kanye ara, ‘Anirya ara, talye ning uka,’ tenenune. Wininuna ara, ‘Yesus eluk dib tenepnirye, pia talibuka unamne. Kristus aryuk lyepnamnile. El uk ara, weik mambule, yuk ning nirya ara, pia kume’ tenen, unune.
Ura, bol koplobuka pia kam una ara, talye winina kum bukni, ara na areamnulum ninye ap, an ap, ance dopdeipnulumnye Yesus Kristus ap, nun nirya talima dukdongobuka neika una ati nyapne. Aninye nirya arye, nunti diba tenepsikirye, nun bitinye ap, aninye ap, talima dukdongobuka neika ubibya deice arye, pia kam unamake.
‘Se, aning winiptinye’ tenen, pia patapnil ning ara, nyapnusine. Ara, dipkoprop Kristus ap, talima dukdongobuka unirye, Allah arye, Kristus kam bukeibukura, winira Kristus mikip weik ulye touk, ‘Na babye, winiptinye’ tenen, patanulule. Tonda, Yesus el kanye imun ning weik ulamuka ani, nun malye winina ati dibuk touk, na babye ikine upnutopura, akunum diamik ninye atouk uptinye. Akunum diamik ninye atonun uptinye nyanmana ara, diamik ninye, malye winin ning nirya kum patalirye, malye kum winilamak touk, ‘Na babye, malye ning kum patapnutu ura, malye kum winipnamne’ tenen, patanulule. Ara, Kristus arye, el mikip weik arinulula deice arye, ‘Malye ning arye, na talima kum lilonamnile’ tenen, nyapne.
Allah el weik mikip deice arye, nun nirya ati, ‘Aninye ara, bola koplobuka kam pia unamake. Tonda, na Allah unye touk, diksukumuk unamak’ tenen, patapsilye ning nirya ara, akunum areamsuke. Ara, ‘Diksukumuk unamak’ tenen, deiyok ning areamsuka nirya ara, el ap kanye dukdongobuka neika ubirye, el ulul ning nirya kel bikanyaba deice arye, akunum areamsuke. Tonda, tuba arisulule. Allah arye nun nirya ati, nyapsuka ara, ‘Aninye ara na mapu unamake,’ tenenyamsukce, el weik mambule ulula ap, el pia teleb-teleb ubuka dirina weik ulula ap deice arye, akupsukce yukamsukce, wibuka deiamsuke.
Ara, na tenyamsi ning ara, ani. ‘Kume, Korintus mutuku peterenye talak nirya ara, yuk ning kel bikamse ning tenena kumce, tonok weik mambul ninguk dobuka, peterenamne,’ tenepse. Ara, ‘Yesus Kristus arye nun lyena ati, wanwanun yo deice dibuk yupu, aninguk, peterenamne,’ tenepse. Utenepsirye, ayupu uk peterelamsise.
Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.
Aning ara, talya ati kum bukni, naio, ance areamnulum yupu nirya ara, narye dobuka na mapu ati peterelamsibuk, sikce ayupu kekebuka diba tenyamikce, akunum dolonyake. Na mapu ara, sik kanye teniltona kumce, akunuma, ‘Yesus ara, Allah arye dopdeibukce, tukwak dokwetepsuk anya arye, Allah el un dam arye yasuk’ tenen, akunum kel bikuka unyake.
Ara, na ap na Ni Koprop Allah ap, talima dukdongobuka neika unyame. Tonda, anggun ap na ap, talima dukdongobuka unyabe. Anggunda na noutamak ululume. Nara, anggun talima noutamak unune. Aning nirya ara, na ni tenyamuk talak, sirya talak akunum uplyopura, anggunce aning nirya moubuka kel biknamlume.” Yesus arye nyabuk.
Amambul yupu ton nyapnusine. Nunce Allah ati, winiryuk diba tenebupu talak ara, kanye bokoltona kum arye, mikip arye diba tenebupu touk, tuba-tuba diba tenepra balamibya ani, dorsirya talak babye, batakna kum arye, Allah eluk moubuka talibibirye, tuba diba tenenamabe. Winibuka winibibyopura, wini talak babye, aminyan talak babye, Kristus ap, talima dukdongobuka neika unamabe. Bukni, kanye boktopsilyeba, Allah ati batakipyopura, Yesus Kristus ap, neika kum unamabe.
Allah arye, “Kuna noutamak arye, dirina unamle,” nyabuk. Ayupu nyabuknye Allah, elcuk nunti pia mambul ning arepsuke. Ara, nun kanye talima noutamak, el dirina ning arepsuka deice arye, Allah el pia teleb ulul ning ap, pia teleb winilul ning ap ara, bikinyabe. Allah el pia teleb ulula ara, Yesus Kristus el winilamuk ning kel kibibya deice arye, laka usilibuk, bikinyabe.
Allah el si Yahweh arye, wipdeibukba, pil donamlanye bira, imun kanye bobuka, ikin deice aryuk ulamikca ani, akunum obikiba dipnamle. Aning akunum winiplyopura, kam bukuka kanye deiplirye, imun kanye bomuk ning, nong upnamle ning eilyopura, elce, ‘Na akunum upne,’ tenen, kanye deipnamle. El imun kanye bobuka unamla deice arye, ninye tukwak ninye weik, elce sikti, ‘Akunuma, narye aninye ati, akunum teleb kipdeipmane,’ nyapdeipnamle. Adeice sik kanye talima teleb ulinamle. Na Allah ati pil donamnilnye birye, ninye mutuku-mutuku nirya malye wininyak ning wenena ati, el nong deice uk dobuka deipdanamle. Winipnamla deice arye, na Allah arye ninye mutuku-mutuku nirya noutam arye ninye weik namin kipnirye lyepropnamne.
Aning pia pil dobuka melipdabirye, daulamibya ani, aminyan talak ara, nun dib tenenyap nang nirya ara, tonok kanye bobuka, ansinibuka, Kristus ati dib tenebibirye, Allah el Mi Kopropa Kristus ap, kanye talima dukdongobuka ubibirye, elti, weika arye, kel biknamabe. Winibuka upyopura, nun kanye talima wisipsilirye, Kristus pia diksukum, teleb kibuka ulamle touk, nun babye moubuka, telebuk kipdeipnamsile.
Yuk yupu diba tenebuka kum wininamlulum bukni, nun Deiyoknye bira, nun Lyenanye Yesus Kristus kel kibuka el ap, dukdongobuka ululum ning ap, Yesus bico tenepsilirye, talye melisilye ning ap, ‘Weik upnin banamsil’ tenen, pia palibuka pil donamlume. Ara, nun Lyena Deiyoknye Yesus Kristus ati, nun nirya el si weik arye erebibirye, ‘Elda weik mambulnye tenepnamap’ tenen, Allah moronune. Ara, ‘Wini talak babye, aminyan doryanamle talak nirya babye, el siuk weik unamle’ tenen, Allah moronune. Telebe, akunuma. Na Peterus arye nyapsine. Asukum anyuk sekuka deipsine.
Nun ap, anggun asurat eiplum nang ap, ‘Nun nirya arye kanye tonok tenebuka, ansinibuka unamap’ tenen, nun elilamubu ning ap, yupu kekelamubu ning ap ara, anggunti laka nyabuka peteresinyabe. Ura nun kanye tonok tenebuka, ansinibuka unyap nang ara, nun ni Allah ap, el Mi Yesus Kristus ap, dukdongobuka neika unyabe. Nun ap, nun ni Allah ap, el Mi Yesus ap, kanye tonok tenebuka, kanye talima dukdongobuka unyabe.
Ayupu nyapmakina ara, talye ati kum nyapkine. Deiyok ara, ani. Yahudi yala ninye arye, Allah el si erena ati, kam ning obuka arilyamik talak bukni, sirya dakana ati, anggur mek ton dobuka, aning deice dikilongolamik touk, na wininune. Ara, Allah tenyamnuk touk, pil dopra balamsa ani, sirya dakna talak dam upnila anya arye, na dipnamne talak dam upnile.
Anang ara, nun batakuka nun kan-kan arye yukak bindobik bukni, nun kanye ap, sik kanye ap neiktoto kume. Nun diba tenebuka, nun kanye tenenyap atouk nang ulamtingtoura, nun batakna kumce, nun ap neika ulamtibye. Bukni, sikce nun batakuka bindobikce, yuk tam kipdobikbuk, eibupurye, sik ulamik ning kel kibupe. Ara, ‘Aning sik kan-kan danerye, tonoknye babye ton, nun diba tenebuka kanye tenenyap touk, sik babye, diba kum tenenyaka’ tenen, kel bikamubu.
Wini talak, anggunce Yesus ati diba tenelulum ninye babye, akeil ati ara, ‘Weik mambule,’ tenelulume. Bukni, sik diba kum tenenyak ninye ati ara, Allah yupu buku Mazmur noutamak arye ayupu nyabuk. ‘Sik aik dona deiyok nang arye, ‘Akeil ara, malye keil’ tenen, batakik ning ara, wini talak weik mambul keil akunum upsile.’ (Mazmur 118:22)
Ara, tukwak mutuku nirya talilye Deiyoknye Isa Mutuku Dongonye arye, sik dib tenena kum ninye ati, asing kuna atonun kum ning arilule. Winiplyopura, anang ara, Allah el dipkoprop yupu kekepman kum unyake. Winilya deiyok ara, sik kanye talima noutamak, Kristus el laka teleb yupu deice arye, Kristus el pia teleb ulya ning kel bikikirye, sik talima ak dirina atonun upliba, ‘Moubuka kel bikicak’ tenen, Isa Mutuku Dongonye arye ninye ati, asing kun ning arilule. Ariliba, Kristus el pia teleb ubuka weik mambul ulya ara, el laka teleb yupu ara pia bikman kum unyake. Allah el pia teleb ulye touk, Kristus el babye atonun ulule.
Gume, dipkoprop Allah arye, ninye ap ati tenebukce, ayupu nyapdeipsuke. ‘Dipkoprop ninye bico’ tenen, melilana ati ayupu nyapdeipsuke. Wa tuku palinanye ap kouamikiba, nong uplirye, wisipliba, lilbananye ap, ‘Wa wiamikca ani, aminyan nong uplibuk, lipnamak nang ara, bokuka arepsikibuk, nun ap neika dinamabe’ tenen, wa wipdatingtoura, telebuka. Talya demuk pil dobicopura, aminyan talak ara, bokuka kum arepdanamake ara, pia malye. Ati ara, Allah arye, nun nirya ati tenenyamsukce, ayupu nyapdeibukura, Musa arye, sekamuk.
Kume, na isa mer nirya yakuka dolkwetenya ara, Mutuku Dongonye mikip deice arye kum dolkwetenune. Allah el mikip deice arye yakuka dolkwetenune. Aning ati ara, Allah ninye weik lyeplirye, sik kanye talima talinamle talak akunum deiyok uple. Anggun dam akunum yanmale. Na isa mer bisibuka dolkwetenuna deice arye, laka akunum eiplume.
Bukni, Yefune el mi Kalep ap, tonda Nun el mi Yosua ap, sik uk ara, Kanaan mutuku birikirye eipnamdake. Na taruk erepsirye, sik apu yapu ati, ‘Teleb mutuku arepneba, anggun talibuka unamlume,’ nyabuka nyalamse mutuku ara, abitinye nang sik ap, binuka weknamak bukni, sik yuk Israel kili sal nirya ara, Kanaan mutuku kum weknamake. Sik nirya ara, dipnamake.
Anggunce na nyapdeiamse yupu kum kekenululuma ati ara, diksukum narye anggunce delinamlum mapu, anggun deice ara, wenepnamne. Tonda anggun kam ning obuka, uku dalyangalulum ning, domba ap, kambing ap, sapi ap ara, aning sik dei ap, dei suruk ap dobukapna arye, imam-imam nang anggun asok deice likilinamsine. Ara, ‘Sik alye weik daknamak’ tenen, winipnamsine. Winipsinyopura, anggun nong dobuka, malye ning donokolbamunba, weik aulyakuk bobinuka, donoknamsine.
Wininyak bukni, dipkoprob anang ara, Allah arye pia kum kipdeipnamle. Ara, sikcuk, ‘Aning ara, pia malye ning ati, bai tam donokiceba lyuplirye, minopce kum danalamle touk, akwalinyak nang babye, minopce kum danamake. Tukwak mutuku noutam unyakce, pia malye wininyaka ati, mutuku-mutuku nirya noutamak ara, anang pia kum danalamyake. Winibikceba, sikda akunum bikamikce nang arye, nyabuka asipdenamake. “Se, sik mambul weik nang ara, dan mutuku biyik do?” nyabuka asipdenamake.
Tonda, Izebel el dipmoka mitik tonun aupmok ning ara, Yisreel mutuku noutam ninye arye, wa wibuka kounyak ning, el teleb ubuka pana ati, anyasik batakuka, bai tam donokonamakak, dana-dana tam donokmakiba, yuk nang arye, ‘Isebel el dipmala ara, dan do?’ tenen, epnamak bukni, ninye bin tonok babye, kum eipnamake. Sikce, ‘E, ara Izebel el wein dam ara, aniʼ tenen, kum bikinamake,’ Allah Yahweh arye, akil ati nyapdeiamuk touk, akunum upmale,” Yehu birye nyabuk.
Winipmanuluma ati ara, na yu ning anggun deice deipnirye, anggun wenena ati an ap, ance deipminba, dadeipdanin binamak nang nirya ara, obuka sirya daknamne. Winipnirye, Yerobeam an mapu nirya kum danamkile. An yala nang nirya, talye kanye bobuka unyak nang babye, noutamak talye daunyak nang babye obuka sirya daknamne. Israel ninye noutam ara an yala nang ton kum unamake. Anggun nirya ara, ‘Pia malye ning ninye nong deice palipsilyak’ tenen, korokuka bataklamaka atonun, tonda uku dongolamak atonun, an yala nang nirya bataknirye, obuka sirya daknamne.
Se na ni Allah, anda im deice uminyeba, antibuk patanulula anya arye, akunuma. Yatato ning ton patapnutu do, kume. Kume, an ap neika unanam ca. An tonok ati, ‘Seʼ tenenune. Aning atouk, tukwak mutuku unamne talak ara, antibuk pataniliba, ‘Seʼ tenekunune. Tukwak mutuku noutamak aunamne talak ara, yuk ning ton, pia kum ‘Seʼ tenenune. Allah antibuk, pia mambulnye ulyama ati, ‘Seʼ tenekinirye, antibuk pia patanulule.
Mikip ulul ning, aning-aning nirya ara, im deice tam ulul ning ap, tukwak mutuku amu tam ulul ning ap ara, Allah arye kwepdeiamuk ning noutamak ulul ning nirya ap, aning-aning nirya aupmal bukni, aning nirya arye, Kristus bico tenesilye ning ara, kum danipkusitinge. Tonda, Yesus ap, nun ap, wilibuka yuk-yuk kum kipdeipsitinge.
Nun kayapu telebe. Nun bitinye Paulus ap, Timotius ap, asurat sekeipsiname. Nun bitinye ara, Yesus Kristus nun talima talisilya deice, el amu tam unyamce, el yupu uk kekebuka, el piluk donyame. Asurat ara, anggun Pilipi mutuku umunce, Yesus Kristus ati diba teneplumce, eluk talibuka, diksukumuk umunye ninye ap, Allah yupu peterena nang sik melina deiyok nang ap, Allah yupu aik pil melina don nang ap, anggun nirya ati, ayupu sekeipsiname.
Na kayapu, anyapmasin ning nirya ara, ‘Akunum sirya dakuka winipse’ tenen, kum nyapsine. Tonda, ‘Nada, pia malye winina kum, diksukumnye akunum unune’ tenen, kum nyapsine. Apatanilye ning ara, min kum winipman bukni, Kristus arye nati, ‘Anye ap, na ap, talima dukdongobuka unimirye, diksukumuk ubuka pia unamname’ tenen, lyebuka talipnukce, tuba talinulule. ‘Winipnamle’ tenen, lyebuka talipnuk touk, na bidamnye, ‘Kristus dukdongopnirye, diksukumuk unamne’ tenen, pia pi deibuka, el piluk palibuka donune.
Anggun nirya ara, Allah ap, nun Deiyoknye Yesus ap, akunum kel biknamluma anya arye, ‘Yesus ap, Allah ap, anggun ap, kanye dukdongobuka ululuma deice arye, telebuk unamlulum’ tenen, Allah morosunune. Ara, Allah arye bico tenepsilirye, talye melibuka arisulul ning ap, Allah ap, neikauk teleb ubuka umunce, teleb kanye bobuka una ati arisulul ning ap, ‘Weik upnin banamsil’ tenen, Allah morosunune.
Piblisite