Allah arye ayupu nyabukopura, ayupu ton dukdongobuka nyabuk. Nara Allah Yahweh arye, nyapsine. Sik kel weik bikamik nang arye, ‘E, nunda kel weik bikupu ati, nunda mambul weik nang,’ tenena kume. Winibuka tenebikirye, sik talima babye erebuka, kwalina kume. Tonda aning atonun, anggun mikip weik nang ara, “E, nunda mikip weik nang unyaba, ati, nunda mambul weike,” nyabuka, maknya kintina kume. Aning atonun, sik bona weik talin nang babye, ‘E, nunda aning-aning yala-yala nirya talinyabe. Tonda, bona weik talin nang unyabe. Tonda, nunda mambul weik nang unyabe,’ tenebuka, maknya kintina ap, kwalina ap, pia meme.
Penghotbah 9:11 - Eipomek11 Tonda, ‘Aning nirya kel biknamneʼ tenen, epra balamse talak ara, tukwak mutuku noutam ulamik nang ati, dipdesirye bikse. Ara bikbik an ning ati, mikip arye bikbik abuka banyak talak ara, mikip weik arye bikbik abuka banman nang arye, atalak nirya kum bisinyake. Aning atonun, yuk-yuk mutuku nang arye mal olan talak babye, sik mikip pia weik nang arye, yuk daunyak mutuku nang ati, adiparyuk kum oltakanyake. Tonda, sik kel weik bikamik nang ara, atalak nirya sikda din ning dobuka kum dinyake. Tonda, ‘Deiyok aniʼ tenen, mambul ning ati, weik tonun akunum kum bikamik nang arye, pil weik donyak bukni, atalak nirya ara sikce sik dengna ati, dengna weik ning ap, bona ap ton kum dolonyake. Aning atonun, pil pia teleb ubuka donyaka deiyok nang ara, sik pil dona deiyok nang arye, sikti, kanye deibuka, teleb ning kum arenyake. Deiyok ara ani. Nunce kum tenipmanto ning, nun dam ikin weik ning yanamsil talak ara, pia kum biktibirye, kum teneptibye. Nun tukwak nang nirya arye, ‘Winipnamabʼ tenen, piriptibye bukni, ikin ning nun dam yalyopura, aning deice arye winipmanto kum usulule. Gade chapit la |
Penghotbah 9:11
35 Referans Kwoze
Unyap ati ara, na talima pum tam tenenuna ara, ‘Allah aniryuk wibuka, malye nang arye malye unyak ning ara ani, teleb nang arye, diksukum unyak ning ara ani, tenebuka lipsisikuka bokeipanamsile,’ tenepse. Aning tenepsa deiyok ara, talye ati kume. Deiyok ning ara, nun tukwak ninye wininyap ning ap, nun pil donyap ning ap nirya ara, Allah arye, ‘Atalak ani,’ tenyamuk touk, el dem arye nunti yupu lipsisikuka bokeipsilirye, teleb ning ati dekna arepnamsilirye, malye ning ati, wenepnamsile.
Ara, Allah elce, ‘Wininamne, wininamne,’ tenelul touk, aning-aning nirya talilirye, pil doliba, aning nirya elce tenyamuk touk, aninguk winilule. Tonok ning babye, kum batakalule. Aning atonun, minop talak, nun min kum deiamsik talak arye, Allah arye nunti, wepdeiamsukce utenyamsuke. Yesus Kristus ati dib tenebupa deice arye, Yesus ap, kanye talima dukdongobuka ulamibya ani, sirya talak ara, Allah arye, ‘Aning-aning arepnibuk, pia talinamake,’ tenen, kintinipsuk ning nirya ara, arepnamsile.
Yahasiel birye nyabuk, “Na deiyoknye Raja Yosafat ap, na kayapu nang, anggun Yehuda tam ululum nang ap, Yerusalem weik asik noutam ululum nang ap, anggun nirya ati nyapsine. Wini talak ara, nun ni koproba Allah Yahweh arye nyapsile. Ara anggun ona ati yin talin nang yupa pia weik arye yanganmacak, eipmunyakarye ilil una ap, kanye bokoltona ap, una kume. Deiyok ara, ayanganmak nang ona ati ara, anggun mikip deice aryuk, kum opnamalume. Allah aryuk, anang opnamale.
Aning kum bukni, moubuka teneipnamlulume. Allah elcuk minopce deiyok koubuka, weik kel kina deiyok ning arisiliba, adeice aryuk bona utotoa talin ning talibuka unyabe. Nun bidamang mikip aryuk kume. Ati, anggun ni Allah, el si Yahweh ati, pia teninauk unamlulume. Allah arye, minop talak arye dipdongobuka, wini talak babye, pia kintinibuka melisilya touk, pia arenamsile. Ara, anggun apu yapu ati, ‘Sik ap, na ap, teleb ubuka neika unamap’ tenen, ‘Wininamsine,’ nyalilamsuk yupu atonun, anggun wini talak ululum ninye ati, tuba melibuka arenamsile. Musa birye, Israel ninye ati nyabuk.
Tonda, yuk ning ton tenipsi ning ara, ani. Ara, na kanye ara, yata nang do nirya, sik mikip arye pil donyak ning ara, winibuka tenepse. Ara, sikcuk, ‘Sik yuk nang arye talinyak ning ara, na babye ton taliptinyeʼ tenen, sik kwit capu arye do, yuk talya daunyak nang arye do, anang arye talibuka ulamne ning tonok tenekirye, ‘Na ton, aning nirya ara taliptinyeʼ tenen, mikip arye pil donyake. Aninguk tenebuka ulamikce ning nirya ara, talye nong una kum ninguk teninyake. Winipmanto ara, kumanya mikip arye lulukunmaliba, ‘Aning talipnunʼ tenen, bikbik abuka dobolbatinga babye, kumanya ara kum talipmanto ati, atenen ning ap, mikip arye pil donyak ning ara, nong kum upnamle! Aning nirya ara, talye uka.
Mal olana kel weik nang babye, kum bikbik abuka binmanto upnamake. Tonda, yin nang sik deiyok nang babye, sik mal olan dam nang akunum olyakiba, ‘Nun lyepdanuyapʼ tenen, sik dam arye, bai sakuka binmanto kum upnamake. Sik mikip ara, mitang upliba, sik nirya yan dum dukliba, dabu tam, arah utara tam ara, weik mek el si Efrat mekinuk, sakuka poulbinamake.
Ura, yuk mambul yupu ton nyapnusine. Anggunda pia moubuka teninamlume. Ara, Allah elce pil domuk ning ap, tuba pil dolye ning ati ara, pia moubuka dimunce moubuka tenenamlume. Deiyok ara, yata nang arye do? Allah elce kwalipdeiamtu ning ara, yatanye birye tamubukapturye, moubuka lipsisikuka deiptu do? Kume aning ara, kum winiptue.
Yuk talak ton, narye pia bita dinmasiba, tukwak mutuku im sirya, mutuku sirya nirya ara, ton tam nang arye, yuk tam nang ati, pia ikin ning dobuka, sik nong deice delinyakba, aning ara imun kanye bobuka unyake. Aning nirya ara, teleb winina kum ning ati, moubuka tenipdese. Atenepse ning ara, pia kanye imun weik ning noutam unyak nang nirya, aning winipca deice arye, weik tonun engenyake. Malye kanye bobuka engenyak bukni, ikin weik unyak ning ara, yuk nang arye ton pia kum melinyake. Yuk nang nirya arye, ‘Aning ara, dauplyeʼ tenen, luba kina uk unyaka ati, anang ara tuba ikin kanye bobuka unyake. Ninye tonoknye babye ton, anang ati, kum melilirye, sik talima kum kwadilule. Tonda, sik mikip pia weik nang arye, yu weik ukirye, sik mitang nang dam yanuka, weik ikin ning, sik nong deice deibikceura, imun kanye bobuka unyak bukni, yuk nang arye, kum melinyaka ati, ‘Seʼ tenen, engana uk unyake.
Aning akunum eibuka biksirye, aning nirya bataksirye, yuk ninguk tenepse. Winipse ning ara, narye deiyok kibuka, weik kel bikna deiyok ning ap, walwal uning ap, malye ning talibuka uning ap nirya ara, tuba tonap moubuka tenipdese. Deiyok ara, ani. Ara, na tenepse ara, ‘Kume, aminyan talak na punuplirye, amutuku nirya talibuka, Raja kipnamlanye bira, elce yatato yuk ning ton doptu do?’ Kume, yuk winin ning ton kum winilula ati, min talak ninye arye akunum winilamik ning, aninguk winipnamle. Tonda na babye winipse ning, el babye wininamle,’ tenepse.
Allah arye, ‘Nara tunim abuka diltaknauk unirye, malye wininyak nang, min kum wenepnamane,’ tenebuka utopu ura, yata nang arye sik adeiyok nang ati wenepting do? Tonda, Allah arye, ‘Ninye ara, na wininye ning kum eipnikcakʼ tenen, el urasin duknuptu ura, yata tonye birye, el urasin eiptu do? Tonda, tonok weik mutuku noutam unyak nang arye, Allah eipting do? Akumopura, tonoknye biryuk, Allah el urasin eiptu do? Kume, ara kum winipmanto.
Aning nyabukba, Absalom ap, Israel ninye, sik yin talin nang ap, ayupu kekebikopura, Husai biti nyabik. “Ahitofel birye nyapsuk yupu ara, mitik teleb upmok bukni, anda Arki yalanye, Husai birye nyapmasilam yupu ara, pia teleb winilula ati, aninguk wininamabe,” nyabik. Ura, anang arye, Husai yupu kekebik ning deiyok ara, ani. Ahitofel birye nyapmok yupu, dipkoprob teleb ubuk bukni, Allah el si Yahweh arye, ‘Kume, Absalom biti, kanye imun ning weik arepneba, ikin weik unamle’ tenen, Absalom ap, el tam yin talin nang ap ati, sik kanye tamupdeibuk. Husai nyapmok yupu ara, malye yupu nyapmok bukni, Allah arye, sik kanye tamupdeibukba, anang arye, ‘Husai nyapmok ning ara, telebe,’ tenebikce, el yupu uk kekebik.
Aning nirya akunum winipnyeba, na mapu anggun nirya arye eipmunce, kel biknamlume. Ara, sik telebuk unyak nang ara, sik urasin laka upliba, eibuka kel biknamlume. Aning atonun, malye ninguk talibuka unyak nang babye, sik urasin laka upliba, eibuka kel biknamlume. Ara, na si erepnikirye, na amu tam unyakce, na piluk donyak nang ap, tonda na si kum ereninyak nang ap ati, narye yupu lipsisikuka bokeipnamsin talakuk, eibuka kel biknamlume. Na Allah Yahweh arye nyapsine.” Allah arye nyabuk.
“Ninye tukwak mutuku unyap ninye nirya ara, weik konop nang ton, kum unyabe. Kume, an mikip atonun nang ton, kume. Allah ancuk, an pil don nang, malaikat taliplum ning babye, tonda ninye tukwak mutuku nirya taliplum ning babye, an tenelyam touk ulyame. Ati ara, yatanye birye ton, an mikip yanipkutu do? Tonda yatanye birye, wenena atonun an winipminya ati, ‘An yata deiyok ati winipmalam do?’ nyabuka, asipdekutu do? Pia kume.” Nebukadnesar birye nyabuk.
Winibikba, sikti, ‘Winipnamrurume,’ nyananye, Ahitofel bikukopura, ‘Sik ti yupu nyapdeipmase ning ara, kum kekepmanike,’ tenebukce, el keledai basam deice bukukce, el mapu silip, sik ulamik aikuk biyuk. Biyukopura, el winilamuk ning nirya ap, el mapu ap, kilapu ap ati, “Na taleamse ning ara, anya akunum kintinibuka deipne,” nyabuk. Adiparyuk, tapu yupdanuka opdayukba, akunum dibukba, sikce el nong dobukabikce, el li koproba weiamikak binuka, el nong weibik.
Winipmunyeura, sapi basam bitinye arye, bobarikce talak ara, anggunda dinamalulume. Allah arye nyapdeiamuk yupu, Nyalin Yupu Marikna (Peti Perjanjian) pum libuka deibik ning bobanmarikca ani, ton tamubuka yangana kumce, tuba nong bisikuk banmarica ani, Israel yala ninye, sik tam bukni, mutuku si Bet-Semes mutuku asik dobuka, unyakak berikcopura, adeice arye anggun biknamlume. Ara, ‘Israel ninye, sik ni koproba, Allah arye, nun dam kanye imun ning deiamsukba, uk dilamsuka ara, akunum diplamupuʼ tenen, biknamlume. Bukni, Allah yupu nyapdeiamukba, libuka deibik Nyalin Yupu Marikna yo ap, (Peti Perjanjian) emas arye suse ap, kub mana urasin ato ning puturubuka, deipmamunye ning, asapi basam arye, libuka bobanmalye ning ara, sapi basam Bet-Semes bisik kum bilirye, tamubuka nun mutuku uk tuba yalyopura, ‘Se, nun deice ikin ning, yayukba dopromubu ning ara, Israel ninye sik ni koproba Allah, elce kum deipsuke. ‘Nun malye ububa deice arye, aning yayukba, ikin upsukʼ tenen, biknamlume.
Yata ninye do nirya, pia weik kel bikna deiyok ning akunum kel bikamik ninye babye, ayupu kekebicopura, pia weik kel bikna deiyok ning ton tabakuka, kel bikra banamake. Aning atouk, nong bol deice uk kum bukni, nong noutam ning akunum kel bikamik nang babye, ayupu kekebikirye, ‘E, bana teleb bisik ara ani,’ tenebikirye, diksukumuk upre banamake.
Anyapmasina deiyok ara ani. Ara, yata nang do nirya, ikin ning ara, sik dam yanuka unamle. Diksukum unyak nang babye, malye unyak nang babye, ikin sik dam yanuka unamla ati, ikin deice aryuk pil dobuka unamake. Tonda, aminyan sirya talak ara, ninye tukwak nang nirya ara, dipnamabe. Ati ara, malye unyak nang babye, diksukum kibuka teleb unyak nang nirya babye, ikin ning sik deice yanamle. Tonda, kam ulamikca ani, aminyan talak ara dipnamake. Tonda, aning atouk, Allah arye, “Aning ara pia kum wininamlume. Aning winipmunyopura, na si erena ati, na dam ton kum yatume,” nyabuka, akunum laka nyapsuke. Ati, amem ning tuba wininyak nang ara, sung-sunga duna atonun unyaka ati, Allah dam kum yatinge. Amem ning kum wininyak nang ara, sung-sunga duna kum nang atonun unyaka ati, Allah dam tuba yatinge. Aning atonun, Allah arena ati, kam ning opnarye boyanuka uku dabuka arenyak nang babye, aning dobuka kum boyanuka arenyak nang nirya babye, ikin sik deice yanamle ati, aminyan talak ara sik nirya babye, dibina uk unamake. Pia teleb, ubuka diksukumuk unyak nang babye, malye ninguk talibuka, malye unyak nang babye, ikin sik deice yanamle ati, aminyan talak ara sik nirya babye, dibina uk unamake. Tonda, Allah ati, “Naio, an si erebuka kina ati, winibuka-winibuka unamne,” nyabuka nyalin yupu nyanyak nang babye, Allah ati nyalin yupu pia kum nyanyak nang babye atonun, ikin sik deice yanamle ati, aminyan talak ara sik nirya babye, dibina uk unamake.
Amalaikat arye, na Zakaria biti, nyapnuke. “Anda, ninye si Zerubabel dam binuka, elti, Allah Yahweh arye, nyapdeibuk yupu ara laka nyapnulyame,” nyapnuke. Ara, ance elti, nyapnalam yupu ara, ani. “Zerubabel an teleb winipnamlam ning ara, an mutuku yin talen nang, sik mikip weik deice arye, mambul pil kum dopnamlame. Aning atonun, ancuk mikip deice arye, kum winipnamlame. Aning kum bukni, na Allah Yahweh arye, na mikip weik ulul Pia Teleb, Lek Dip Kanye, el mikip weik, an deice deipkiniba, aning aryuk, narye, ‘Anye apil dopnamnile,’ tenepkise mambul ning ara, winipnamlame. Nara, Allah Yahweh, im deice unyak yin talen malaikat nirya, sik deiyoknye ununa ati, anyapmakin yupu ara, dipkoprob nong upnamlarya!
‘Yata nang do nirya, teleb unyak nang babye, malye unyak nang babye, ikin yanuka sik deice yangalamlya ani, aminyan talak ara, dibina uk unamake. Na kanye ara, tukwak mutuku im sirya, mutuku sirya nirya ara, aning pia malye ulule. Tonda, tukwak nang nirya ara, ninye tuba kam unyak talak noutam arye, ninye tukwak nang nirya, siktalima nirya ara, malye un ning tuba ulule. Tonda, sik talima nirya ara, moubuka tenina kumce, motana talin nang ap, walwal un nang ap, ulamak atonun nang ton aulule. Tukwak mutuku nang nirya ara, tuba kam unyak talak nirya, aning atonun kibuka unamake. Bukni, daulamikca ani, aminyan talak ara, dibina uk unamake. Aning nirya ara, winibikak eipsirye bikse.
Minop talak ara, anggun Moab mutuku ululum nang arye, yuk mutuku nang ati, ilil tenena kumce, “Kume, nunda ninye olana ara, weik tonun kel bikamuburye, nunda pia mikip weik yin talin nang unyabe. Yuk nang nirya arye, nunti, ‘Se, sikda, dipkoprob mambul nang unyake,’ tenesinyake,” nyalamlum bukni, wini talak ara, anggunce yata deiyok ati, aning tuba nyaptum do? Aning ara, kum nyaptume.
Piblisite