Penghotbah 8:13 - Eipomek

¹³ Bukni, sik malyeuk unyak nang ara, Allah dam bikca babye, sikce moubuka tenina kumce, Elda pia mambul kumnyeʼ tenen, elti, ilil kum ulule. Aning utenenyak nang, sik kam una ara, minopce kanya kum danalamle touk, sik babye kum danin banamake. Aning utenenyak nang ara, sik kam una ara, weik tonun ton kum unamake. Adiparyuk minop dipnamake. Anang ara, Allah Yahweh ati, kanye kum delinyak nang ati nyapne.

Penghotbah 8:13 Referans Kwoze

Penghotbah 6:12

Tonda aning tenepse. Yatanye birye, “Ninye nirya arye, tukwak mutuku noutam unamak talak ara, keting tamun mitik tonunuk unamaka ati, sik teleb ning nirya ara ani,” nyabuka, teleb kibuka laka nyapsutu do? Kume, tonoknye babye kum laka nyapsutue. Tonda, keting kumuplye talak, sintam ara, kanya tukwak kilul bukni, min aning babye kum danalamle touk, ninye tukwak nang babye, keting tamun yupa weik deice arye kam kum unyabe. Minopce dibinyabe. Tonda, yatanye birye, nun tukwak nang ati, “Anango, anggun akunum dipminyopura, aminyan talak yanamle ning ara, ani,” nyabuka, dipkoprob laka nyapsutu do? “Kume, aning babye kum nyaptinge. Aning nirya ara, nong kum upnamle ning ulule,” nyapsine.

Yesaya 3:11

Bukni, sikce malye ninguk, talibuka winilamice nang ara, nyapnamlulume! “Anggunda bico, anggun wenena ati, ikin ning ton dopropnamlume. Anggunce yuk nang ati, ikin ning delilalum touk, anggun babye, ikin ning anggun dam yalyopura, dopropnamlume. Tonda, anggunce malye-malye pil dolamlum touk, anggun dam ara, ikin pia ning yanuka, anggun nong deice deipsilyeura, doropnamlume,” nyabuka wenepnamlyame.

Ayub 14:2

Tonda, yo keta mopmalye like tonokuk, akalsakalule atonun, ninye dib kanye ara, keting donokliba, kanya kinim-kinim anmalya ani, keting akuplye talak ara, tunim alamle atonun, nun tukwak ninye ara, aning atonun unyabe. Winipmanto ning ara, keting deipliba, kanya lakak uaplya ani, minopce tunim alamle atonun unyabe.

Maleaki 3:18

Aning nirya akunum winipnyeba, na mapu anggun nirya arye eipmunce, kel biknamlume. Ara, sik telebuk unyak nang ara, sik urasin laka upliba, eibuka kel biknamlume. Aning atonun, malye ninguk talibuka unyak nang babye, sik urasin laka upliba, eibuka kel biknamlume. Ara, na si erepnikirye, na amu tam unyakce, na piluk donyak nang ap, tonda na si kum ereninyak nang ap ati, narye yupu lipsisikuka bokeipnamsin talakuk, eibuka kel biknamlume. Na Allah Yahweh arye nyapsine.” Allah arye nyabuk.

Yesaya 57:21

Ati, sik malye un ninguk talibuka unyak nang ara, teleb kanye bobuka, tunim abuka kum unamake. Sikda imun kanye bobikirye, ikin asa pia unamake.” Allah arye, sik Israel yala nang ati, nyabuk.

2 Peterus 2:3

Atilila yupu peteren nang arye, ‘Aning-aning nirya weik doproptibye’ tenen, patalye ninye unyaka anya arye, sik badamnye kanye arye tenenyak ning, talye yupu uk, peteresinyak deice arye, ‘Sik ning weik dolonamap’ tenen, yum yupu nyabuka, anggun ning ubula dolonamsiyake. Minop talak ara, Allah arye, ‘Atilila peteren nang ara, wenebuka oplopnamne,’ tenyamukce, akunum kentenlamuk anya arye, aning ara lubakiplirye, kum bataknamle. Dipkoprop aminyan talak ara, aninye oplopnamlarya.

Yakobus 4:14

Anggun ayupu nyalulum ning ara yata ati do? Ambusum winipnamasil ning, aning babye tenebuka kum kel keptuma ati, nyana meme. Anggun kam unamlulum talak nirya atonun ning nyapnusine. Dua puto welebli ani, keting deiplirye, keting bupu arye minopce kum danalamle touk ululume.

Yohanes 5:29

Nyabukopura, ayupu ton dukdongobuka nyabuk. “Atalak ara na yupu kekebiceura, tuku lukamicebuk kam bukikirye, kubuka yanamake. Sik diksukum ulamice ninye ara, kam pia unamake. Bukni, sik malye-malye winilamice ninye ara, kubuka tiknamak bukni, narye Ninye Mi Koprop Atonunye, sikti, yupu lipsisikuka bokipnirye, wenebuka opnamne.

Yesaya 30:13

Anggun malye winimunye ning ati, winipmanto ning nyapnusine. Ninye arye cang keil poka domikibuk, daklirye dalubuka talye karin arye, sakuka tukwak poulbalamle touk, anggun malye winimunye ninye ara, anggun wenen ning talye karin arye, anggun dam yanamsile.

Mazmur 144:4

Aning winipmanto ara ani. Ara, kumanya mikip, like tonok talak arye, pu abuka yalirye, adiparyuk kum danalamle touk, nun tukwak mutuku unyap nang nirya ara, minopce dibinyabe. Tonda, keting winiryuk beren tam talak deiplirye kanya, like tonok talak aryuk, tukwak uaplya ani, adiparyuk kum danalamle touk, nun tukwak mutuku unyap nang nirya ara, minopce dibinyabe. Kam pia kum unyabe.

Mazmur 55:23

Na kayapu nang, anggun nirya ara, kekepnululume! Anggun ikin usulul ning nirya dobuka, nun ni Allah Yahweh, el deice deipnamlume! Winipmunyeura, bico tenepsilirye, el mikip deice arye, melibuka lyelonamsile. Pia dipkoprob nyapsine. Allah arye, ‘Aning ara, wininamlume, aning ara, pia kum wininamlume,’ nyabuka, yupu talibikirye, pia diksukum kibuka wininyak nang ara, pia kum bataknamsile. Elce melisilya deice arye, nunce elti, ‘Diba,’ tenenyap ning ara, min kum upsutue. Tuba diba tenenauk unamabe.

Mazmur 39:5

Ara, ‘Se, na ni Allah Yahweh, yata talak ton kam unamne do? Na kam unamna talakk ara, ouku weik tonun ton, lo unamne do, mitik tonunuk do? Bukni, nun tukwak nang ara, keting tamun mitik tonun dem kam unyaba ati, ance aning lake nyapniminba, moubuka biknirye, telebuk wininamne.

Mazmur 11:5

Allah Yahweh arye, malye winin ninguk, talibuka wininyak nang babye, teleb ning talibuka, diksukumuk wininyak nang babye, ‘Teleb wininamak do, kum do?’ tenen, asilelule. Bukni, Allah el talima noutam ara, ‘Sik malye winin ninguk, talibuka wininyak nang nirya, sik anang ara, pia na like,’ tenelule.

Ayub 21:30

Ati, anggun ap, na ap akunum kel bikamupu ning ara, anggunti laka nyapnusine. Ara, dan mutuku do nirya, sik malye ninguk talibuka unyak nang ara, sik mutuku noutam kanye imun weik ning yalye babye, sik anang deice yaliba kum dolonyake. Tonda, Allah arye amutuku nang ati, yu weik uplyeba, amutuku nang deice deibuka wenelul talak ara, sik malye wininyak nang nirya ara, sik deice weik wenen ning mek sik dam obuka yangalule. Sikda talye kanye bobuka, telebuk unyake.

Ayub 20:5

Na kanye ara, ance min kum bikamluma ati, aning laka nyapnukine. Ara ani. Talye daunyak nang arye, sik pia malye unyak nang ati eibikirye, ‘Se Sikda telebeʼ tenen, sikti, pinpin kanye bobuka unyak ning ara, dipkoprob tia talak atibuk ulule. Tonda, ninye arye Allah ati, ‘Allah ara nun like, elce nyasulul yupu ara, yaninauk unamabe,’ tenenyakce, malye-malyeuk wininyak ninye ara, sik kanye deibuka unyak talak ara, lo mitik tonun, like tonok talak ulule. Winipmanto ara, ninye arye asing kuplam-kuplam alamak atonun ulule. Anang ara, kum winipnamaka ati nyapkine.

Ayub 18:5

Ance min, aning-aning weik tonun nyamamum bukni, dipkoprob ara, ani. Ara, malye unyak nang ara, minopce dipnamake! Winipmanto ara, ninye arye, weisa upna buk ara, dipkoprob minop tangap dongoptingura, malye ninguk wininyak nang babye, minop dipnamake. Tonda, weisa akunum tangabikceba, malye kibukyopura, uku buk ton diniptinga babye, uku tonap buk kum lanamle. Aning atonun, sik malye unyak nang akunum dibikcopura, kanye arye tonap, kam pia kum unamake.

Penghotbah 3:14

Na kele, Allah arye pil dolye ning nirya ara, pia ati aunamle. Ati ara, nun ninye arye el pil dolye ning ara, min kum winiptibye. Tonda, nunce ton kum tabaktibye. Allah arye winilya deiyok ara, nun ninye nirya, elti, ilil weik upsiliba, el amu tamuk unamabe.

Penghotbah 5:7

Anggun moubuka teninamlume. Anggun kele, lengdar man deice malulum ning nirya ara, yala-yala weik aulul bukni, pia el deiyok ara ton, pia kum ulule. Aning atonun, anggunda talye yupu weik tonun nyalatakalulum ning babye, deiyok pia kum uplirye, nong kum upnamla ati, anggun yupu talye luparabuka nyaltakana pia meme. Bukni, Allah arye, “Aning ara wininamlume, aning ara pia kum wininamlume,” nyabuka, nyasulul yupu moubuka taliplumce, anggun ni koproba Allah ati, ilil tenenamlume. Teleb ning ara, akunuma. Talye yupu nyana ara, pia meme.

Penghotbah 7:15

Nara, Peterena Deiyoknye birye nyapsine. Na kam ulamse talak nirya ara, nong kum upnamle ning ati dobolbalamse bukni, wini talak ara, pia mambul weik ning, nirya akunum elilamse. Ara ton tam ning ara, Allah arye, Aning ara wininamlume, aning ara pia kum wininamlume,’ nyapdeipsuk yupu, pia moubuka talilamikce, daulamikani aminyan talak, dipkoprob pia telebuk tuba unmek ani dibike. Tonda, yuk nang, sik cang arye kam ulamik bukni, pia malye un ning talibuka ulamik nang ara, malyeuk ulamika ani, sik tuba malyeuk ulamik talak ara, sik adiparyuk dibike.

Penghotbah 7:18

Na kanye arye tenenun ning ara, nyapnusine. Ara, pia teleb ning ara ani. Ara, kel weik bikin ning ara, moubuka talipnamlume. Walwal un ning ara, bataknamlume. Teleb un ning ara, moubuka talipnamlume. Malye un ning ara, adiparyuk batakmunce leibuka kisikdopnamlume. Winibuka unamlum talak nirya ara, nun ni Allah arye, “Aning wininamlume, aning ara, pia kum wininamlume,” nyapdeipsuk yupu, moubuka talipmunce, Allah ati ilil upsilyopura, winipmunya deice arye, dipkoprob nong unamle ninguk, winipnin banamlume. Winipmunyopura, Allah arye, teleb updeipsiliba, telebuk unamlume.

Penghotbah 8:8

Tonda, yata nang do nirya, yatanye birye, kumanya ati, “Asukumuk peiyang-peiyang anamlume, asukum ara, tunim apnalume,” nyabuka, kumanya ati, yupu sektu do? Kume aning ara, kum winipmanto. Aning atonun, tonda ninye dibin ning yatopura, yatanye birye, “Dauplye, aning ara, kum talipnamnila ati, nara kum dipnune,” nyaptua deice aryuk, tuba kam uptu do? Kume, aning ara kum winiptibye. Aning atonun, ninye olan talak, tonoknye birye, ‘Kume, na ilil ati, adiparyuk batakuka, na mutuku tamubuka binamneʼ tenen, mal olanak batakuka, kisikuka yukak bindoptu do? Kume, aning kum winiptinge. Tonda, yata nang do nirya, malye un ning talibuka malye unyaka deice arye, ikin weik unamakak arye batakuka, sik bidamnye aryuk sik bidamnye ati, lobuka, lyepdating do? Kume, malye unyaka deice arye, dipkoprob kum lyepdatinge.

Yesaya 65:20

Sik amutuku ukirye delinamak mapu nirya ara, mitik talak arye, like bitinye do, winilyeto kam unmaca ani, adiparyuk kum dibinamake. Pia kam unamake. Aning atonun, anggun wisi ninye ara, daulamunya ani, wisi deipmunce, minopce dipna kumce, pia daulamunya ani, wisi deipmunba, kul potong uk upnamsile. Wel tuba umunye talak ara, kum dibinamlume. Anyapmasina ara, urdem ati kum nyapsine. Amutuku noutam ara, keting tamun yupa weik, 100 tahun deice arye wisi akunum deiamikce nang ati, yuk nang arye, ‘Anang ara kam nanguk unyake,’ tenenamake. Ati, keting tamun yupa weik 100 tahun kum kipmalibuk, dipmantonye ton awamtu toura, yuk nang arye, ‘E, elda malye ulamlya dengna ati, Allah arye wenen ning el deice deipmala arye dipmale,’ tenenamake. Ara, Yerusalem winiryuk mutuku unamak ninye ara, keting tamun yupa pia weik kam uk unamaka ati nyapne.”

Mazmur 37:1

Raja Daud arye nyabuk. Sik malye winin ninguk, talibuka wininyak ninye arye, malye winibikiba eipmunyopura, anggunce, ‘Se, yata wiripnamap do?’ tenen, malye kanye bobuka, kum unamlulume. Aning atonun, sik malye ninguk talibuka, malye weik wininyak ninye, eipmunce, ‘Se, sik malye wininyaka deice arye, talinyak ning ara, nun babye ton taleptibye’ tenen, ‘Seʼ tenen, mambul kirikna meme. Sik malye wininyak ninye arye, wininyak ning nirya ap, talinyak ning nirya ap ati, ‘Se, na babye ton doproptinye,’ tenena pia meme.

Yeremia 44:10

Bukni, anggun apu yapu, minop talak ulamik nang babye, wini talak kam ululum nang babye, ‘Se, nunda dipkoprob pia malye unamabe. Aning ara, adiparyuk bataknamabe,’ nyabuka, anggun talima lamapdongobuka, namin asa arye, kum unamlume. Narye anggun apu yapu nang ap, anggun wini talak ululum nang ap ati, “Teleb una ara ani. Aning-aninguk talibuka, diksukumuk wininamlume,” nyapdeiamsise yupu ara, kum moubuka taliplumce, na si dipkoprob kum erenululume.