Penghotbah 7:11 - Eipomek

¹¹ Ura kam tuba unyak nang ara, dipkoprob moubuka tenebikirye, weik tonun kel bikinyak nang ara, telebuk unyake. Sikda, moubuka tenebikirye kel bikinyak ning, nong upnamle ninguk nyanyake. Winipmanto ara, sikce nyanyak yupu nong ara, mambul weik ning ulule. Ati, sik nong dodarapce taleamik ning dobuka, sik deiamik mapu ati arenyak mutuku ulye ning talibuka ulamle atonun, sik kel nang arye nyanyak yupu babye, pia telebuk ulule.

Penghotbah 7:11 Referans Kwoze

Penghotbah 11:7

Beren tam talak keting panaplirye, dirina weik uplye talak ara, pia telebuk ulule. Winiplyeba aketing ara, dirina lak deiplyopura, ninye nirya arye, pia teleb kanye bobukabikirye, sik kanye deibuka unyake.

Penghotbah 2:13

Aning nirya tenipdese talak ara, ‘Diba, winida na kele. Weik kel bikna deiyok ning kel biktibyopura, aninguk ara telebe. Bukni walwal uk una ara, talye-talye uk ulule. Aning ara malyeuka. Aning atonun, dirina ara pia telebe, bukni kuna ara, pia malye ulule.

Penghotbah 7:10

Ura, anggunce, aning kum nyanamlume. Ara asina ati, “Minop talak ara yata ati pia teleb ulamik bukni, wini talak ara, yata ati, malyeuk unyap do? Yata deiyok ati, nunda ikin uk unyap do?” nyabuka, pia kum asipnamlulume. Deiyok ara, anggunce ato yupu nyapmunye talak ara, anggun kanye moubuka tenina deice arye kum asilulume. Pia walwal nang arye ayupu yanuka asinyake.

Ayub 28:12

Bukni, weik kel bikina deiyok ning ara, dan mutuku arye eibuka kel biktibye do? Tonda, yata mutuku noutam eiptibirye, ‘Teleb un ning ara, deiyok aniʼ tenen, bikin ning nong ara, yuk nang arye peterepsitingba, kel biktibye do?

Mazmur 119:72

Na ni Allah, ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu, nati bokuka, arenilyam ning ara, tukwak mutuku noutamak, talibuka unyak urasin teleb ning, el si ara emas ap, perak ap, dekna weik ulamle. Bukni, na kanye ara, adekna weik ning ara, mitik mambul uka. Ance nyanilyam yupu nirya ati ara, ‘Ayupu ara, weik mambul,’ tenenune. ‘Ayupu ara, weik dekna weik ning atonun ulule,’ tenepnirye, ayupu ati, kanye delinune.

Amsal 3:14

Anyapmasin yupu ara, talye ati kum nyapsine. Deiyok ara, pia weik kel bikna deiyok ning ap, ‘Aning ara telebe, aning ara malye’ tenen, ‘Moubuka tenena deiyok ning ap, doproptinye’ tenen, piribuka epdelirye, eibuka dololul ning ara, pia mambul weik ulule. Ara, dekna weik ning el si ara, perak ap, emas ap ara, teleb kat ning ulul bukni, aning ara mitik teleb uka. Bukni, pia weik kel kina deiyok ning ap, moubuka tenena deiyok ning ap ara, pia weik mambul ning ulule.

Amsal 3:15

Urasin pia teleb keil, el si ara permata, nyanyake keil ara, yo bok weika arye deklamak bukni, aning ara mitik teleb uka. Bukni, pia weik kel bikna deiyok ning ap, moubuka tenena deiyok ning ap ara, pia weik mambul ning ulule. Ninye arye, ‘Aning-aning nirya ara pia weik mambule ati ara, doproptibye,’ tenebuka patalul ning nirya ara, mitik mambul uk ulule. Allah arye ninye ati, pia weik kel bikna deiyok ning ap, moubuka tenena deiyok ning ap, arisilye ning ara, pia weik mambul ulule.

Amsal 14:24

Weik kel bikamik nang sikce weik kel bikna deice arye, pil teleb ubuka dopra balamica ani, aminyan dolonamak ning ara pia weik unamle ati, yuk nang nirya arye sikti, kanye delilanamake. Bukni, walwal arye malyeuk unyak nang ara, ‘Se, pia piribuka teleb utibya deice arye, nun bona ning weik upsutu,’ tenenyak bukni, dipkoprob nong kum unamle. Walwal kanye bobuka unyaka anya arye, talyeuk unamake. Ati ara, ninye nirya arye, awal-wal unyak ninye unamak ning ati, moubuka kel bikamikca arye, ‘Nun babye atonun upsilyak’ tenen, leilonamake.