Penghotbah 7:1 - Eipomek

¹ Nun tukwak nang unyap talak nirya ara, yuk nang arye, ‘E, anye bira, pia dipkoprob, diksukum unanye ulule,’ nyabuka, si erepsikirye aning nyapsikcopura, “Aning ara pia telebe,” teneptibye. Winipmanto ara minyak mek, dengna pia weik ning, aupmatopura, Aning ara mitik teleb teneptibye bukni, yuk nang arye, nunti, Elda pia diksukum unanye ulule,’ nyapsitingopura, Aning ara pia teleb teneptibye. Tonda, na kanye ara, nun nin yapu arye deipsik sum ara, mitik teleb sum bukni, aminyan talak nun dipnamap sum ara, weik teleb sum ulule, teneptibye,’ tenepne. Tonda aning atonun, nun delisinyak talak ara, mitik teleb bukni, nun dibinyap talak ara pia telebe, tenepne.

Penghotbah 7:1 Referans Kwoze

Wahyu 14:13

Amalaikat winilye dinmasiba, adiparyuk im deice tam arye, ninye yupu atonun yupu arye, ayupu ton nyabukba, kekepse. Ayupu ara, ani. “Ayupu seklyame. Wini talak arye dipdongobuka, aminyan yanamle talak noutamak nirya, Yesus ap talima dukdongobuka unyak bukni, aminyan talak dipnamak ninye nirya ati, Allah arye teleb updeipliba, kanye deibuka, pia telebuk unamake,” nyabuk. Nyabukura, Allah El Dib Kanye arye nyabuk. “Dipkoprop nyaplume. Sik pil teleb ubuka dolamikba, nong uamuk ning ara, Allah arye kel kilula ati ara, aninye dibikirye, el dam welebicopura, ikin ning, sik nong deice ulamukba, pil ikin arye dolamik ning nirya batakuka, dikdik sebikirye, teleb kanye deibuka unamake. Sik ikin tonap pia kum unamake.” Allah El Dib Kanye arye nyabukba, kekepse.

Amsal 22:1

An bon-bona ning pia weika arye deiaminba, bona weik talinanye ulaminyopura, aning ara mitik teleb bukni, teleb ubuka diksukumuk ulaminye bukni, yuk nang eibikirye anti, “Anye bira pia diksukum ubuka ulula ati, telebnye ulule,” nyabuka anti kipkicopura, ara pia weik telebe. Aning atouk, yuk ninye nirya arye, anti, ‘Elda teleb ululnye’ tenen, anti erepkikcopura, ara pia telebe. Urasin teleb ap, dekna weik ap ulul ning el si ara emas ap, perak ap aupmatua babye, ara mitik teleb uka. Weik teleb ning ara, yuk nang arye, anti kisal donyake.

Penghotbah 4:2

Aning nirya tenipse ati, winibuka tenepse. ‘Se, diba, na kanye ara, min talak arye akunum diamik nang ara, pia telebuk unyake,’ tenepse. Bukni, wini talak tuba kam unyak bukni, ikin ning weik uplyeba, imun kanye bobuka unyak nang ara, pia ikin kanye uk bobuka unyaka ati, aning ara pia mambul weike. Sikda ikin weik unyake,’ tenepse.

2 Korintus 5:8

Arup nyapmasin touk, nun kanye teniltona kum aniryuk, dib tenebuka lamapdongobuka unyabe. Nun kanye patapsilye ning ara, tukwak ninye nong unyaba ara, dawaptubuk aning batakuka, nun Deiyoknye Yesus ulyak neika uptibyetoura, ‘Aning ara, pia telebe,’ tenenyabe.

2 Korintus 5:1

Ara, yuk yupu ton nyapnusine. Nun nirya kele. Tukwak mutuku unyap talak ara, nun nong ara, baju aik, el si ara tenda, atonun tia ninguk ulule. Nun nong ara, tia talakuk ulula anya arye, malye upliba dibibyopura, anong kum upsilyopura, yuk ning dopropnamabe. Wininamap ning ati, winipmanto yupu ara, aik nyapnune. Allah arye akunum dipkoprop pia aupnamle aik kintinipsuk ning ara, aupmale. Anyaik ara, ninye taruk deice kum dobik. Anyaik ara im deice ulirye, pia atalak nirya aupnamle.

Kidung Agung 1:3

Na dopnamnilamnye bira, an si bikinirye tenipkinyopura, winipmanto ara, nintong pia teleb minyak mek dobuka, an nong bol deice likminba, nintong pia teleb nyapliba kekenune. Aning atonun ton, amutuku nang nirya ara, anti akunum kel bikamkika ati, an si kekebikirye, ‘Anye bira, pia telebnye ulule,’ tenekinyake. Ati ara, amutuku noutam unyak wel kilapu nirya babye, anti kanye delikinyake.

Penghotbah 10:1

Nintong pia teleb ulamle minyak aupmatua babye, deibum arye aning deice amulamliba, amek makau pum tam lyubuka tong nyalamlirye, malye ulamle touk, ninye arye kel weik bikamikirye, pia teleb pil doptingba, yuk nang nirya arye, aning ati, ‘E, aning ara pia telebe,’ nyabuka, si ereptinga babye, walwal nang arye, sik mitik tonun malye unyaka deice arye, aning nirya ara, malye kipdeibikirye, lubakinyake. Awininyak ning ara, mitikto malye wininyak bukni, awininyaka deice arye, kel weik bikin ning nirya ara, lubakinyake.

Amsal 27:9

Winipmanto ara, yata ning do, nun nong deice nintong teleb nyana ati, teleb minyak mek arye likmakiba nintong teleb nyasiliba, nun kayapu nang arye kekebuka kanye delisinyake. Aning atonun, nun malye winibibyeba, nun kayapu koprop arye nunti, ‘Na kwit el talima ap, el winilul ning ap, telebuk unamle’ tenen, wenepsutua babye, nunce, ‘Aning ara teleb uka,’ tenenyabe.

Yesaya 56:5

Sikce aning nirya akunum winibikcopura, nara, Yerusalem mutuku noutam bukni, na si eren aik pum tam arye, ‘Sik si ap, sikce winilamik ning ap ara, ninye nirya tuba teninamakʼ tenen, lak bikilin ning ton deipnamne. Yuk nang nirya ara, aning eibikirye, bikikcopura, ‘Se, sik asi sekeiamuk nang ara, dipkoprob mambul teleb weik nang ulamik. Allah el mapu koproba babye, mitik mambul unyak bukni, dipkoprob anang ara, pia teleb mambul weik nang ulamik,’ tenenamake. Tonda ‘Teleb ning ara, nunce mapu ap, kilmapu ap, deiptibyeba, nun si pia tuba aupnamsil bukni, dipkoprob weik mambul ning ara, Allah arye anang, sik lak kilin ning deibuka ati, sik si pia tuba tenenamabe,’ tenebuka nyanamake. Na Allah arye, sik anang si dobuka, na aik pum tam deipniba, anggun si aupmasilyopura, tuba bikinamsine. Winibuka anggun si akunum deipnyopura, narye anggunti, kum bataknamsine, Pia ati, aupnamsile, nyapsine.

Amsal 15:30

Ninye ton sik urasin etek-etek abikirye, kanye deibuka unyak nang ara, ninye yuk nang nirya eibikirye, sik babye kanye delinyake. Aning atonun, yuk nang arye nun melina ati, teleb yupu dobuka, yuk pera mutuku arye, nun dam laka nyalyasicopura, ayupu kekebibirye, nun kanye deibuka unamabe.

Ayub 3:17

Malye ulamice ninye dibikiba, weibicopura, tonap tamubuka kum malye unyake. Atonun, weik ikin pil bolamlinye dipliba, binuka weibice talak ara, apil tonap tamubuka kum donyake. Dikdik selbana uk unyake. Dibiceba weibicopura, ikin ning nirya, sik dam kum yatue. Na babye winyamtinye.”

Yohanes 13:2

Atalak ara, Isa Mutuku Dongonye arye, ‘Anye malye winipnamle’ tenen, Simon el mi Yudas Iskariot ati, el talima akunum tamubukura, Yudas arye, ‘Yesus opnamak’ tenen, tonda, ‘Ninye yupu delilbinun’ tenen, akunum kintinibuk. Alukunyan sik dipnuyik ning bokuka arilanmek.

Mazmur 133:2

Winipmanto ara, Allah el si eren pil dona deiyoknye, el si Harun biti, wipdeiamik talak, ‘Imam deiyoknye unamleʼ tenen, bikilina ati, atalak ara, dengna weik minyak mek, el si ara, minyak Zaitun dobuka, el kisok deice dikdeibikba, aminyak mek biyukce, Harun el bam potong deice poul biyukba, abulupmek nang nirya, aning eibikce, kanye deibuka ulamik. Anang arye kanye deibuka ulamik touk, ninye nirya arye, kanye deipdanuka, neika ulamting toura, pia telebe, nyapne. Diba aminyak Zaitun dikdeibikba, Harun el bam potong deice biyukce, el cang baju, el si juba, abaju juba el ngang dam binuka, likdeibik. Sik atalak bulupmek nang nirya arye, aning ebikce kanye deibik.

Ibrani 11:39

Minop talak diba tenelamik ninye nirya ati ara, Allah arye, “Aninye ara, sik diba tenenyak ning ara, pia telebe. Na kanye deipsine,” nyapdeiyamuk bukni, Allah arye aninye ati, “Aning arenamsine,” nyalilamuk ning nirya ara, min kum dopropnaryuk dibilamik.

Ibrani 11:2

Nun apu yapu arye Allah ati, weik arye diba tenenlamikba, Allah arye sikti, kanye deiyamuka deice arye, teleb updeiyamukce, ‘Anang ara, na dokola ninye unamak,’ tenebuke.

Lukas 10:20

Anggunce yupu nyapmunyeura, isa mer nirya kekebuka kutuksakuka bura banyak ning ati, ‘Se aning ara weik mambule’ tenen, kanye kum delinamlulume. Dipkorop weik mambul ning ara, Allah arye anggun si dobuka im deice bukuu noutamak akunum sekeipsuka ati, aning ara kanye delinamlulume,” Yesus arye, sik 70 nang ati nyabuk.

Kidung Agung 4:10

Se narye dopnamkin kilo! Na kanye talima noutam ara, anda na weit kil do, na dopnamne kil do, atonun tenikinirye, pia bico tenekunune. Ninye arye kanye walwalan anggur mek dibikirye, kanye delinyak bukni, aning ara mitik tonun uka. Pia teleb ning ara, ance nati bico tenepnimince, nati pia kanye deibuka teninilyame. Tonda, ance nintong pia teleb minyak mek dobuka, an nong bol deice likminba, adeice arye nintong pia teleb ninguk nyapkiliba, kekenune. Aning ara, pia teleb bukni, yuk nintong teleb ning el si ara rempah-rempah yuk-yuk ning nirya ara, nintong mitik telebuk ulule.

Penghotbah 7:8

Na kanye ara, yata un ning do nirya, deiyok koun talak ara, mitikto telebuk ulule. Bukni, pia teleb ning ara, sirya dakan talak anyak pia teleb tenepne. Tonda, ninye talima noutam ara, maknya kintinina ap, kwalina ap, talima erelana ap ara, pia malye bukni, yuk nang ning ara, ‘Aminyan talak yata wiripnamsil do?’ tenen, namin asa arye, talye tunim abuka ukirye, kanye deibuka unyak nang ara, pia telebuk unyake.

Yunus 4:3

Nyabukce, ayupu ton dukdongobuka nyabuk. “Na ni Allah, Niniwe mutuku ninye kum opmalama ati, teleb ning ara, wini talak ara, na tonok ara, daopniminba dipnune. Na kanye ara, weik teleb ning ara, dipna teleb bukni, kam una ara, na like. Ati, an Yahweh arye daopnutume,” Yunus birye nyabuk.

Rut 3:14

Nyabuka ati ara, Rut bira, Boas yan damakuk mapmokbuk, berekuk. Bukni, Boas birye nyabuk, “Min kum berekaplye talak aryuk, bukdakuka binulyame. Ara, ninye yuk nang arye, ‘E, gandum duk kwekenmongak sakanmo ara, akil yanmo arye, malye winimok do?’ tenen, kel bikicak ati, min kum eipmakice talak aryuk binulyame,” nyabuk. Boas birye, nyabuka deiyok ara, Rut lukunyan yanuka mapmok ning ara, yuk nang arye, ‘Rut bira Boas yan dam mapmoe, nyapnicak’ tenen, nyabuk.

Amsal 25:10

Yuk nang arye, sik tenenyak ning dungnubuka nyapsicebuk, anggunti ayupu lakak aryuk, yuk nang kekenak talye nyaplopmunba, yuk daunyake ninye arye ayupu kekebiceura, anggunti, ‘Kume, anang ati ara, mambul yupu kum nyanamabe. Sik kanye bona kum diparyuk, yuk talye daunyak ninye nirya ati, talye lukparabuka lakak uk nyalbinamake. Sikda, malyeuk unyake,’ nyabuka, anggun nong deice ikin yupu deilinamsiake. Adeice arye alye weik dakaldanamlume. Winipsikcopura, aning kum kum danamle. Tuba-tuba anggun si deice malye yupu nyanamsiyake anya arye, yuk ninye nirya arye, aning kum luba kinamake. Tuba tenena uk unamake. Ati ara, anggun kayapu nang arye, duknuna yupu nyapsikcopura, yuk ninye kekenak ara, pia laka kum nyanamlulume.