Penghotbah 6:6 - Eipomek

⁶ Ninye tonok ton, el kam una ati keting tamun ara, seribu uptua babye, elce kanye deibuka kum utopura, elda talye ning atonun ulule. Aning atonun, el kam una ati keting tamun ara, seribu tonap uptua babye, elce kanye deibuka kum uptopura, ‘Elda talye ning atonun ulule,’ tenepne. Na kanye ara, ‘Dibinyak mapu ara, mitik ikin unyak bukni, bona weik talilinye bira, ‘Na talenun ning kum danilyakʼ tenene, ikin pia weik ulule,’ tenepne. Bukni, winiryuk deipmakce talak aryuk dibinyak mapu babye, bona talinyak nang babye, kam tuba unyap nang babye, nun nirya akunum dibibyopura, tonok mutuku binuka upnamabe. Akunum diamik nang unyakak uk binuka upnamabe. Ati ara, nun nirya neiktoto uka.

Penghotbah 6:6 Referans Kwoze

Penghotbah 3:20

Aning tenenuna deiyok ara ani. Na kanye aniryuk nyapne ning ara, talye ati kume. Tukwak ninye babye, talye kam tuba ulamle ning babye, sik dibicopura, sik nirya tamubuka tonokak uk banyake. Ara, Allah arye tuku dobuka ninye babye, kam ulul ning babye, kwepdeiamuk ati, daulamica ani, aminyan talak dibikcopura, tamubuka tuku uk kilolule.

Ibrani 9:27

Ura, Allah arye ninye tukwak ninye nirya tenyamsuk touk unamabe. Ara, kam ulamibya ani, tonok talak arye akunum dibibyopura, aminyan ara, Allah arye, nun tukwak ninye nirya ati, “Aning telebe, aning malye,” nyabuka yupu lipsisikuka bokeipsilirye, wenepnamsile.

Ayub 30:23

Na kele. Ance na bobinuka dibin nang unyakak bobinamnilama atia. Kam unyak nang nirya dibikceba, ance bobinuka deililbalyamak uk, na babye bobinamnilame.

Yeremia 17:6

Aning atonun wininyak nang nirya ara, pia ikin weik unamake. Teleb ning ton, sik dam pia kum yanganamla ati, teleb ning ton kum elinamake. Winipmanto ara, pia buta mutuku, mek kum wamlye mutuku noutam ara, amutuku tuku pum tam, garam uwa weik abuka ati, ninye arye kouamikce ning yala-yala nirya ara, amutuku noutam teleb kibuka kum paptue. Ati, mutuku buta tuku deice arye, talye pabukaplirye, nelamle bukni, teleb kibuka kum palamle atonunuk, anang babye atonun, teleb kibuka kum unamake. Sikda teleb mutuku kum bukni, mek kum sukum, pia buppu weik buta mutuku noutamuk unamake.

Yesaya 65:22

Minop talak ara, anggunce domlum aik ara, yuk pera mutuku nang arye yanuka dalubuka dopromsik touk, pia kum wininamsiyake. Aning atonun, anggun wa wiamluma nirya, yuk pera mutuku nang arye yanuka dalubuka kipromsik touk, pia kum wininamsiyake. Amutuku ara, na wipdeiamse nang, sik unamaka ara, lo weik tonap, tabakuka arepneba unamake. Winipmanto ara, yo pia tiknamle atonun, ‘Naʼ tenen, ninye sikda keting tamun yupa pia weika arye kam uk unamake. Sik taruk deice arye, aning-aning nirya pil donamak nirya ara, sik dem aryuk talibikirye, kanye deibuka unamake.

Yesaya 65:20

Sik amutuku ukirye delinamak mapu nirya ara, mitik talak arye, like bitinye do, winilyeto kam unmaca ani, adiparyuk kum dibinamake. Pia kam unamake. Aning atonun, anggun wisi ninye ara, daulamunya ani, wisi deipmunce, minopce dipna kumce, pia daulamunya ani, wisi deipmunba, kul potong uk upnamsile. Wel tuba umunye talak ara, kum dibinamlume. Anyapmasina ara, urdem ati kum nyapsine. Amutuku noutam ara, keting tamun yupa weik, 100 tahun deice arye wisi akunum deiamikce nang ati, yuk nang arye, ‘Anang ara kam nanguk unyake,’ tenenamake. Ati, keting tamun yupa weik 100 tahun kum kipmalibuk, dipmantonye ton awamtu toura, yuk nang arye, ‘E, elda malye ulamlya dengna ati, Allah arye wenen ning el deice deipmala arye dipmale,’ tenenamake. Ara, Yerusalem winiryuk mutuku unamak ninye ara, keting tamun yupa pia weik kam uk unamaka ati nyapne.”

Penghotbah 12:7

Aning atonun, nun ninye nong ara, tamubuka tukwak min kum danmapye talak ap, nun kanya tamubuka el arepsuknye Allah dam min kum binmapye talak ara, nunce Allah atibuk tenenamabe. Ayupu nirya nyapmakina ara, talye ati kume. Ara, ‘Na wisi daniryuka’ tenena meme, kam tuba unmaminye talak aniryuk, Allah diba tenebuka el si erepmince, ‘Allah atibuk tenebuka kentinilinamlyame’ tenen, nyapkine.

Penghotbah 6:3

Aninguk kum bukni, tonok ning ton nyapnune. Winipmanto ara, ninye tonoknye birye keting tamun yupa weik deice arye, kam ulamlya ani, el mapu nirya ara, yupa pia weik, seratus mapu deiptu bukni, aning-aning nirya ati, kanye kum deiptopura, aning nirya ara talye ning atonun ulule. Ara, el kam ulamlya ani, el wisi danan keting tamun kiplye bukni, el anye bira, kam una ara, kanye deibuka, pia kum unamle. Tonda, el pil dolamlye ning ati, kanye kum delilule. Tonda, el akunum diplyopura, el kwit capu arye, el nong dobuka, teleb kibuka kum weibikcopura, aning babye, pia malye diamuka. Ati ara, narye ato ning tenenun ning ara, ani. Kilapu arye, mi winiryuk deipmakibuk, kam una kumce, minop dibilamak mapu ara, pia teleb. Deiyok ara, sik adibinyak mapu ara, mitik ikin ulule. Bukni, bona talinanye bira, ikin weik ulule,’ tenepne. Deiyok ara, ani. Bona weik talelul ning ap, mapu weik delilul ning ap ati, kanye kum delilula ati, elda ikin weik ulule, tenepne.

Mazmur 34:12

Se na mapu, na dam yamunce, narye nyapsinye yupu, moubuka kekepnululume. Nunce, ‘Se, nun ni Allah Yahweh, elda weik mambulnye ulule ati, elda pia teleb’ tenen, ‘El amu tamuk unamap,’ tenenyap ning nirya ara, narye peterenamsine. Peterepsinyopura, anggunce Allah Yahweh, el siuk erebuka, si erenamlulume.

Ayub 7:7

Aning ton tuba teninauk unune. Na kam unamne lo ara, mitik tonun uka. Winipmanto ara, tonok talak aryuk, isin kum danilyopura, akunuma. Amitikto lo talak noutam ara, teleb uptinirye, kanye bobuka un ning ara, ton kum upnutua ati, kamnye akunum wangapse. Winibuka unmanya ani, dipnyopura, akunum kum danamne.

Ayub 1:21

Kanupdongobuka bukukce, ayupu nyabuk. “Na nin birye deipkwetepnuk talak ara, baju ton kum ongopsirye, tonda bona ton talibuka kum yanamse. Atonun dipnirye, im deice binamne talak babye, baju ongopnirye, bona ton kum bobinamne. Aning ati ara, Allah Yahweh aryuk, aning-aning nirya arelamnuk touk, el Yahweh aryuk tamubuka dopropmanile. Ati, na ni Allah Yahweh ati, telebe nyapkine. Tonda, ‘Ninye mutuku-mutuku nirya Yahweh an si erenamkiyake’ tenen, telebe nyapkine.” Ayub birye Allah ati nyabuk.

Kejadian 5:5

Adam el kam ulamuk keting tamun nirya ara, yupa weik 930 tahun ulamuka ani, dibuk.

Penghotbah 2:14

Ara, weik arye kel biklinye bira, elce, Teleb un ning ara, abisik binune,’ teneplye bisik ara eibuka kel biklirye balule. Bukni, walwalnye bira kuna bisikuk balamle atonun ulule. Bukni, aning babye na kele. Weik kelnye babye, walwalnye babye, nun nirya babye, sirya ara, atonun upnamsile. Ara, weik kel arye winilamak nang babye, walwal aryuk ulamak nang babye, daulamepya ani, sirya ara ato ninguk kibuka, adiparyuk dibina uk unyabe.

Penghotbah 6:5

Deipmakcebuk, adiparyuk akunum dipmalye mi ara, keting deipmalya babye, ton pia kum elilule. Tonda aning atonun, el ami arye, aning-aning kel min kum bikamlye talak, akunum dipmalula ati, ‘Se, na kam una ara, yata ati do?’ pia kum tenelule. Ati, na kanye ara, amapu nirya ara, nemalyap arye tunim abuka manyake. Bukni, bona weiknye, elce talilamuk ning nirya kum uplyopura, elce nemalyap arye tunim abuka pia kum malule. Elda, ‘Seʼ tenen, malye kanye bobuka ulule.

Penghotbah 7:2

Aning atonun, pia teleb ning ara ani. Ninye dibikcopura, deipmakce aik ara bimunce, anang ap engena ara, pia telebe. Bukni, aning atonun kum buk, talye kwalya kwalibikirye, din dibuka talye kanye bobuka unmacak bimunyopura, aning ara mitik telebe. Deiyok ara, nun nirya ara aminyan talak dipnamabe ati, ‘Aning min kum upsilye talak ara, kam tuba unyak nang arye, ‘Nun aminyan talak dipnamap ning moubuka biktibyeʼ tenen, unyabe. ‘Anggun babye ton winiptumʼ tenen ati, ayupu laka nyapsine.

Penghotbah 9:2

Anyapmasina deiyok ara ani. Ara, yata nang do nirya, ikin ning ara, sik dam yanuka unamle. Diksukum unyak nang babye, malye unyak nang babye, ikin sik dam yanuka unamla ati, ikin deice aryuk pil dobuka unamake. Tonda, aminyan sirya talak ara, ninye tukwak nang nirya ara, dipnamabe. Ati ara, malye unyak nang babye, diksukum kibuka teleb unyak nang nirya babye, ikin ning sik deice yanamle. Tonda, kam ulamikca ani, aminyan talak ara dipnamake. Tonda, aning atouk, Allah arye, “Aning ara pia kum wininamlume. Aning winipmunyopura, na si erena ati, na dam ton kum yatume,” nyabuka, akunum laka nyapsuke. Ati, amem ning tuba wininyak nang ara, sung-sunga duna atonun unyaka ati, Allah dam kum yatinge. Amem ning kum wininyak nang ara, sung-sunga duna kum nang atonun unyaka ati, Allah dam tuba yatinge. Aning atonun, Allah arena ati, kam ning opnarye boyanuka uku dabuka arenyak nang babye, aning dobuka kum boyanuka arenyak nang nirya babye, ikin sik deice yanamle ati, aminyan talak ara sik nirya babye, dibina uk unamake. Pia teleb, ubuka diksukumuk unyak nang babye, malye ninguk talibuka, malye unyak nang babye, ikin sik deice yanamle ati, aminyan talak ara sik nirya babye, dibina uk unamake. Tonda, Allah ati, “Naio, an si erebuka kina ati, winibuka-winibuka unamne,” nyabuka nyalin yupu nyanyak nang babye, Allah ati nyalin yupu pia kum nyanyak nang babye atonun, ikin sik deice yanamle ati, aminyan talak ara sik nirya babye, dibina uk unamake.