Penghotbah 6:3 - Eipomek

³ Aninguk kum bukni, tonok ning ton nyapnune. Winipmanto ara, ninye tonoknye birye keting tamun yupa weik deice arye, kam ulamlya ani, el mapu nirya ara, yupa pia weik, seratus mapu deiptu bukni, aning-aning nirya ati, kanye kum deiptopura, aning nirya ara talye ning atonun ulule. Ara, el kam ulamlya ani, el wisi danan keting tamun kiplye bukni, el anye bira, kam una ara, kanye deibuka, pia kum unamle. Tonda, el pil dolamlye ning ati, kanye kum delilule. Tonda, el akunum diplyopura, el kwit capu arye, el nong dobuka, teleb kibuka kum weibikcopura, aning babye, pia malye diamuka. Ati ara, narye ato ning tenenun ning ara, ani. Kilapu arye, mi winiryuk deipmakibuk, kam una kumce, minop dibilamak mapu ara, pia teleb. Deiyok ara, sik adibinyak mapu ara, mitik ikin ulule. Bukni, bona talinanye bira, ikin weik ulule,’ tenepne. Deiyok ara, ani. Bona weik talelul ning ap, mapu weik delilul ning ap ati, kanye kum delilula ati, elda ikin weik ulule, tenepne.

Penghotbah 6:3 Referans Kwoze

Ayub 3:16

“Na nin mun pum tam arye, dadiamtiniba deipkwetamnutue. Winipnutuba, keting dirina el lina kum aniryuk, tuku lukamnitinge. Mun pum tam lyulamle mapu tuku lukikiba, keting dirina kum elilamak touk, winyamtinye.

Yeremia 22:19

Aning kum bukni, talye keledai basam diamlirye, tong nyanmaliba, donoklamak touk, winipnamkiake. Ara, Yerusalem mutuku poka dobuka, unyak mutuku noutam arye, ‘Yoyakhim el nong ara, yuk nang arye, aik pum dobuka, nun likeʼ tenen, bobinuka, bai tam donokikirye, dabataknamake.

Penghotbah 4:3

Tonda, aning ton tenepse. Na kanye ara, sik min kum deiamik nang ara, teleb kanye deibuka telebuk unyake. Deiyok ara, ikin weik ning, sik dam yanmanto kum ulule. Tonda, min talak arye tukwak mutuku sirya, im sirya nirya ara, daunyak ninye arye, pia malye weik winilamik ning nirya ara, sik min kum diamik nang ara, amalye winilamik ning, sik el lina kum arye, aning kum bikinyake. Ati ara, ‘Sikda teleb kanye deibuka telebuk unyake,’ tenepse.

2 Raja-Raja 9:35

Yehu birye, “Winipnamlume,” nyapdeibuk bukni, anyaik noutam melibuka, pil dona ati pegawai nang nirya arye, akil el dipmoka nong boyanuka, weina ati, bolbiyik talak ara, sikce Izebel el dipmoka nirya, asukum kum upmokak ati, kum eibik. Izebel el kisok ap, el yan yok ap, taruk yok ap, upmoka ak eibik.

Kejadian 47:9

Asipdeyukura, Yakub birye, “Nara tukwak mutuku noutam balamse talak ara, keting tamun yupa weik 130 tahun akunum ulamsirye, wisi deipse. Na ulamse talak ara ikin uk ulamnuk bukni, na apu yapu ara keting tamun yupa pia weik ulamik. Nara mitik tonun uka,” nyabuk.

Matius 26:24

Allah yupu laka nyalamik nang, sik nabi-nabi nang arye, nati sekamnik touk, nara Ninye Mi Koprop Atonunye bira, malye nang arye opnikceba dipnamne. Sik Allah yupu laka nyalamik nang, nabi nang arye laka lyalamik touk, amutuku nang arye winipnamniyak bukni, nara Ninye Mi Koprop Atonunye yupu delilbinamnilanye bira, elin, el li birye kum deiamtiringtoura, telebe. Bukni, el lin, el li birye anye deiamrika ati ara, yupu deiyaliba opnikcopura, Allah arye delilbinamnilanye biti weik arye wenebuka opnamle. Ati anye bira pia bicoe,” Yesus arye nyabuk.

Yeremia 36:30

Ati ara, na Allah Yahweh arye, anda Yehuda tam talibuka ulyamnye, Raja Yoyakim biti, nyapkine. Se, Raja Yoyakim, anda ninye deiyoknye ulyam bukni, yuk nang arye anti, oplopkicopura, an kayapu nang arye, an nong dobuka, kum weipnamake. Aning kum bukni, an nong doprobikirye, bai tam talye lakak donokikiba, keting deice noutamak ara, keting diplirye, buppu weik upliba, sesal lebuka lyupnamkile. Tonda, lukunyan noutamak ara, arukna an nong deice palipkilibuk, arukna weik upnamle. Winipnamkiyaka ati ara, ance deipminba, dadeipdanin banamak nang ara, amutuku talina ati, ninye deiyok nang ton, kum kipnamake. An mapu noutamak, tonoknye babye, minop talak Raja Daud birye bulamuk ning deice, kum buknamle. An yalanye birye, amutuku pia kum talinamle.

Yeremia 8:2

Aning ara, dipkoprob malye ning ninye pia winipman kum ning bukni, atalak ara sik mal olan nang arye, min arye akunum diamikak, tuku pum tam weiamik nang, sik yok bulubuka, tukwak deipnamak nang ara, tuku pum tam arye, lukuka kata deiplopnamake. Winibikceura, ila tamubuka, tuku pum tam kum weipnamake. Ara, ninye arye sik dei yalamak atonun, tuku deiceuk deiplopnamake. Ninye arye, talye bam ning do, yuk malye ning do, tukwak talye lubakibuka donoklamak atonun, anang yok nirya ara, talye tukwak, deice anyuk aupnamle. Deiyok ara, sik mal olan nang arye, amutuku akunum diamikba weilamik nang ati, pia malye kipdeibibyeba, ‘Sik yala nang, tuba kam unyak nang ara, alye weik dakdanamakʼ tenen, anang yok lukuka, tuku deice kata sukum bataknamake. Ton deiyok ara ani. Ara min talak, sik amutuku ulamik nang arye, na Allah ati bataknarye, keting ap, kurya ap, tonda wala ap ati, ‘Nun ni ani,’ nyabuka, aning ati, si erelamika winipnamake. Ati sirya talak ara, sik akunum diamik nang yok ara, talye lakak lukuka, tuku deice batakikceba, kata sukumuk bataknamle. ‘'Amutuku nang, sikda talye-talye ning dam, si erelulum ning ap, kanye deiplumce, aning amu tam pil domlum ning ap, talye ning ati, si erebuka pil melibuka domlum ning ap, tonda, ‘Se, nun wininamap ning ara, anggunce peterepsululume,’ nyabuka, morolulum ning ap, aulula ati, akunum diamikak, tuku pum tam weiamik nang, sik yoka nirya lukuka, kata sukum tuku deice bataknamake. Ara, sik mal olan nang arye, ‘Sik Yehuda mutuku tuba kam unyak nang nirya, alye weik dakdanuka unamakʼ tenen, akunum winibikceura, ayok ara, tamubuka tuku pum tam kum weipnamake.

Amsal 17:6

Ninye ton akunum wisi deiplyopura, elce deiamliba, dadeipdanin, banamak ninye nirya, pia weik upra banamakopura, el mapu weik kipnin baca ati, kanye delilule. Winipmanto ara, ninye deiyoknye Raja arye, kweirya ning, sik kisok deice kalulamak tonun, wisi nang sik mapu weik ucopura, atonun ulule. Anang ara, kanye delinyake. Tonda sal ap, kilapu ap deibikiba, dadeipdanin banamak mapu nirya arye, sik ni yapu ap, sik nin yapu ap ati, kanye delinamake.

Mazmur 58:8

Tonda, dou malamle talak nirya ara, mok cena kumce, mek nirya cebuka, silal selamlirye, kum danalamle touk, ‘Ance amalye winina deiyok nang ati, kum kipdeipnalam’ tenen, moropkine. Tonda, winipmanto ning ara, ninye balamikirye, moubuka yanilamikiba, silal selamlirye, kum danin balamle touk, ‘Sik malye winina deiyok nang ati, kum kipdeipnalam’ tenen, moropkine.

Ester 7:10

Nyabukura, sik deiyoknye Raja arye nyabuk touk, Haman el nong dobukabikce, ‘Mordekai kirikuka deipnamne’ tenen, Haman elce yo ikuka kintinip deiamukak uk, el mining nong bobuka binuka diripkwetebikba, el ngang yok cebuka dibuk. Winibik talak ara, Raja Ahasyweros el yu tenelamuk ning nirya ara, namin kibuk.

Ester 5:11

Bukmek talak ara, Haman birye erepdanuka kwalina yupu nyabukce, ayupu nyanmok. “Bona talina weik un ning ara, pia weik talenune. Tonda, na mapu deiamse nang ning ara, pia weik unyake. Tonda, Raja Ahasyweros birye nati weik arye ereipnukba, el amu tam yuk ninye deiyok nang weik daunyak bukni, nara sik deice tamnye unune. Weik sisin nang bulamak sukum nirya ara, talye bunyake, na uk ara, pia mikip weiknye unune. Sik nirya arye, nati ereipnikirye, kininyake.

2 Tawarikh 11:21

Ura atalak ara, Rehabeam el domuk kilapu nirya ara, kilapu delapan belas (18) domuk. Tonda, kilapu enam puluh (60) ton el domuk kilapu melina ati tabakuka ton dobuk. Akilapu ara, el melina ap, mapu delina ap ati domuk bukni, sikda el kilapu koprop kum ulamik. Tonda, akilapu nirya ap neika ulamik anye, elce deiamuk mapu nirya ara, dua puluh delapan (28) deiamuk. Tonda elce deiamuk kilmapu ara, enam puluh (60) deiamuk. Tonda, elce dipkoprob domuk kilapu ap, talye el kilapu melina ati domuk kilapua ap nirya ara,kanye mitik tonun delilamuk bukni, tonok kil el si ara, Maakha bira pia kanye weik deiamuk.

1 Tawarikh 28:5

Wipdeipnukopura, elcuk narye deiamse mapu nirya ara, weik tonun arepnuke. Tonda, arepnuk mapu nirya noutam bukni, na mi Salomo tonok ati, ‘Israel mutuku noutam unyak nang talibuka, Raja unamleʼ tenen, wipdeibuk. Ara, Allah Yahweh, elce aning-aning deice tam ulirye, Israel nang nirya talilul bukni, el tukwak tam melina ati, na mi Salomo biti, deiyok weik ning arepliba, elce sik Israel nang nirya talipnamle.

2 Raja-Raja 10:1

Ninye deiyoknye, Raja Ahab birye deiamuk mapu ara, ninye weik tujuh puluh (70) nang deiamukba, sik ara, Samaria mutuku noutam ulamik. Ati ara, Yehu birye sekin ning, surat sekukabukce, Samaria mutuku nang ati dopdeibuk. Ara, amutuku noutam taleamikce, ‘Aning ara, winipnamlume. Aning ara, pia kum winipnamlume,” nyabuka, yupu peteren deiyok nang ap, tonda Samaria mutuku noutam talibuka, deiyok-deiyok nang, sikce mambul yupu nyalamik nang ap, tonda Ahab birye deibuk mi arye, deiamuk apu kaliklamik nang ap ara, asurat sekuka dopdeibuk. Asurat noutam arye sekdeibuk yupu ara, ani.

Kejadian 33:5

Winiprikba, Esau el urasin erebuka dinmokba, Yakub el kilapu ap, el mapu ap, yanganmekak eibukce, asipdeyuk. “Weito, an ap aminyan tam yanganmak ninye ara, yata asik nang do?” nyabuka asipdeyuk. Asipdeyukura, Yakub birye, “Kume, Allah el kanye aryuk, bico tenebuka meilyamnukba, deipse mapu ara, atia,” nyabuk.

Penghotbah 6:4

Deiyok ara, ani. Ara, winiryuk deipmakce talak arye dibinyak mapu ara, ‘Mambul,’ tenena kume. Winibuka akunum diplyopura, adiparyuk adibin mapu minopce tuku lukikirye aminyan talak ara minop lubakinyake. Elda kunuknak uk binuka unamle.

Ayub 3:11

“Se, yata ati, na nin deipnuk talak arye kum diamse do? Atonun, na nin mun pum tam arye, deipkwetepnuk talak ara, yata ati kum diamse do? Akunum diamtinye.