Yuk talak ton, narye pia bita dinmasiba, tukwak mutuku im sirya, mutuku sirya nirya ara, ton tam nang arye, yuk tam nang ati, pia ikin ning dobuka, sik nong deice delinyakba, aning ara imun kanye bobuka unyake. Aning nirya ara, teleb winina kum ning ati, moubuka tenipdese. Atenepse ning ara, pia kanye imun weik ning noutam unyak nang nirya, aning winipca deice arye, weik tonun engenyake. Malye kanye bobuka engenyak bukni, ikin weik unyak ning ara, yuk nang arye ton pia kum melinyake. Yuk nang nirya arye, ‘Aning ara, dauplyeʼ tenen, luba kina uk unyaka ati, anang ara tuba ikin kanye bobuka unyake. Ninye tonoknye babye ton, anang ati, kum melilirye, sik talima kum kwadilule. Tonda, sik mikip pia weik nang arye, yu weik ukirye, sik mitang nang dam yanuka, weik ikin ning, sik nong deice deibikceura, imun kanye bobuka unyak bukni, yuk nang arye, kum melinyaka ati, ‘Seʼ tenen, engana uk unyake.
Penghotbah 5:8 - Eipomek8 Tonok mutuku noutam balamlumce, dipdebuka, mikip weik deiyoknye birye, sik talye bona utotoa kum nang nirya ati, sik nong deice ikin weik ning deiplirye, sik anang ati dopropnyopura, aning ara anggunce, ‘Seʼ tenen, Yata upmal do?’ tenen, kanye teniltona kume. Deiyok ara ani. Amalye ulamlye ninye deiyoknye, el deice tam ton, ninye deiyoknye yuknye ton aulule. Atonun, anye el deice tam babye, yuk deiyok nang ton daunyake. Sik nirya arye, amalye ulamlanye ulul ning nirya ara, elikirye akunum bikinyak bukni, sik nirya ara, ‘Yo dauplye,’ tenebikirye, luba kinyake. Ati, sik nirya ara malyeuk unyake. Gade chapit la |
Penghotbah 5:8
60 Referans Kwoze
Tonda, malye kanye bobikirye, anggunce, “Nun weik kel yupu arye nyapmunyeura, yuk nang nirya ati, malye kipnamabe. Sikda nun amu tamuk unamake,” nyabuka nyanyake. Tonda, sik kanye erepdakirye, “Nun kanye aryuk tenenyap yupu nirya ara, talye lukdanuka nyanamabe. Yata deiyoknye birye, ‘Ance aning ara, winiplyame, aning ara, pia kum winipnalame,’ nyabuka, yupu nyapdeipsutu do? Kume, nun kanye aryuk tenebupu touk unyabe,” nyabuka, maknya kintilanmakirye, nyanyake.
Na kam ulamse talak noutamak ara, dilamsirye na bikamse ning ton ani. Na kele, tukwak mutuku noutamak, keting amu tam mutuku-mutuku nirya ara, ninye yupu lipsisikuka bokolinak ara, Allah arye ‘Diksukumuk unyakce, teleb unamak,’ tenepsuk bukni, ninye tukwak mutuku nang arye, aning batakuka, tilila yupu nyana ap, malye un ning winina ap, aninguk pia unyabe. Aning atonun, Allah arye, ‘Pia diksukumuk unamak,’ tenelamsuk ning nirya ara, ninye tukwak nang arye, malye winin ninguk unyabe.
Aninguk tenebuka wininamluluma deiyok ara, ani. Ara, yata nang do nirya, yuk nang arye sikti, malye ubiceura, bico tenebuka luba kina kum arye, malye ubuka wenebmace nang ara, Allah arye anang sik malye winin ning ati, talye luba kinamle do? Kume, Allah arye awenebice nang ati, sikce yuk nang ati wenena yupu nyalamak touk, bico tenebuka luba kina kum arye, tamubuka weik arye wenebuka opnamle. Bukni, yuk nang arye, sik malye upsikiba, bico tenebuka lubkinyak nang ati ara, Allah el babye anang ati, bico tenebuka, lupakilongonamle anya arye, weik arye kum wenepnamle.
Zakaria arye ayupu nyabukopura, el mi Yohanes deipmoka ati, ayupu nyabuk. Na mi Yohanes ara, nun Lyena Deiyoknye ati, el yanamle bisik menekuka kintinilinalama ati, yuk nang arye, ‘Allah aning-aning nirya alip tam ulirye, weik mikip ulinye bira ara, el yupu laka nyalulnye nabi bira, Yohanes el ulule,’ nyanamkiake.
Asipdeyukba, malaikat arye tamubuka Maria ati nyabuk. “Allah El Dib Kanye an nong deice deipkilirye, Allah el mikip ara, kanya atonun an nong deice unamkile. Winipnamkila deice arye, mi bominya ani, aminyan talak, malye winin ning tonoknye babye, pia kum wininamle mi deipnamlama ati, ninye nirya arye, ‘Ami ara, Allah el Mi Koprop,’ tenebuka nyanamake.
Ami ara aning-aning nirya deice tam ululnye, Allah im deice ulirye, aning-aning nirya talilulnye bira, el mi kopropa unamle. Ami ara weik mambulnye anya arye, eibikirye, ‘Ara Allah el mi kopropa ulule,’ nyanamake. Ami ara el apu kopropa Daud, Israel ninye nirya talibuka weik ninye deiyoknye ulamuk touk, el babye, Allah mikip areplibuk, Israel ninye nirya talibuka, weik ninye deiyoknye unamle.
Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine. Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.
Tonda, na Allah Yahweh, aning-aning talibuka, Pia Mikip Weik Deiyoknye ununye birye, na kele. Wini talak ara, anggun Yerusalem mutuku tuba kam unamlum nang ara, na nyapmasin yupu ati, ‘Dip do, kum do? Aning nirya ara, dipkoprob winiplyeba eipnamap do? Aning ara, pia kum winipmanto ninguk, nyapmasil do?’ tenen, kanye teniltonauk upsilyeba, ilil unamsile. Bukni, moubuka kekepnululume! Nara Allah Yahweh, im deice yin talen malaikat nirya ara, sik weik deiyoknye ununa ati, na mikip ara, pia weik unulula ati, narye, ‘Wininamne,’ tenenun ning ara, kum winipmanto upnutu do? Kume, na tenyamse ning nirya ara, winipnamnarya! Dipkoprob anyapmasin yupu nirya ara, nong lak upliba, eipnamlumca!
Tonda aning atonun, ‘Na mapu koproba unyaka nang kan-kan unamak’ tenen, wipdeipse kilapu ara, anggunce yanuka yakalulume. Sik akilapu arye kanye deibuka unyak aik nirya, anggunce dalubuka dololulume. Tonda akilapu arye delinyak mapu ara, ‘Nun mapu ati, nun talenyap ning arenamabe’ tenen, kintinibuka deiamik ning nirya babye, anggun malye ululum ninye arye, ubula dalubuka dololulume.
Anggun ton tenipdelulume. Winipmanto ara, kuda basam arye mutuku deice keil tace belyamtuak bikbik abuka bitu do? Tonda, weik laut mekwen deibuk noutam ara, ninye arye sapi basam bobuka, tapu kiriktingba, sapi basam batingce, pil dopting do? Kume, anggun kele, aning nirya ara, kum winipmanto ning anya arye, pia walwal nang aryuk, ato yupu nyaptinge. Bukni, anggunce diksukumuk umunye nang ara, tamubuka yu nang atonun ubuka delilyame. Winimunye deice arye, ninye weik dibinyake. Aning atonun, diksukumuk uptum toura, ninye weik kanye deibuka telebuk upting bukni, anggun malye weik ululuma deice arye, yuk ninye ati, malye kililuluma arye, mambul kanye bobuka, malye yupu nyabuka, engenyake. Teleb ning ara, anggunce tamubuka malye winililulume.
Narye wenepsiniba, aning nirya kum wininamlum ning ara, urdem ati kume. Deiyok ara ani. Anggunce malye ninguk tenebuka, weik malye winilulum ning ara, na akunum kele bikisunune. Anggunda, pia malye winin ning weik arye winilulum ning ara, na kele. Ara, anggun yupu bokolin talak ara, teleb ninguk wininmak nang ati ara, “Sik malye wininyake,” nyaplobuka, ikin ning, sik nong deice delilulume. Bukni, malye wininmalinye bira, “Elda malye kum winipmale,” nyabuka, talye nyaltakalulume. Ara, urdem ati, kum winilulume. Deiyok ara, el malye winimalinye bira, anggun yupu bokolina nang ati ara, “Lak kum nyapnamanulume,” nyabuka, kunusa don yo bok arepsikiba, dololuluma deice arye nyaltakalulume. Tonda, sik talye bona utotoa talina kum ninye ati ara, yupu bokolin talak ara, aninye talye yaniltalulume. ‘Aninye ara, awaplye’ tenen, batakalulume. Sikti diksukum teleb yupu ton, kum nyalulume.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Allah arye ayupu nirya akunum lak nyabukopura, Allah Yahweh arye wibuka doprobikba malaikat arye, asum lukunyan aryuk Asyur mutuku yin talin nang, sik tia ati doltakne tenda aik dobuka ulamikak yanuka nyabukba, ninye yupa pia weik tonun, seratus delapan puluh lima ribu (185.000) yin talin nang obuk. Oplobukba, lukunyan kipmoka ani, berekukba beren tam ara, obuka deipmek nang, sik nong nirya ara, lak ubukba eibik.
Raja Asyur bira utenebuka nyalul bukni, Allah ara, aning-aning eitam erebuka, mikip weik ululnye birye, tamubuka nyapsile. Na tenepse ning, Sion mutuku deice ap, tonda Yerusalem mutuku weik asik noutam unyak nang ap, sik wenena ati akunum wenepnirye opnyeura, naryuk tamubuka, Asyur mutuku talibuka ulul deiyoknye, Raja Asyur biti, weik arye wenepnamne. Ara, anye birye, el kanye eren deice arye, dipdanuka kwaliplyak arye, yupu weika arye nyalula ati, narye ikin weik ning dobuka, el nong deice deipnamnarya!
Adomon yupu nyapmasina deiyok ara ani. Anggur wa deiyoknye bira, Allah aning-aning nirya talibuka ulye deiyoknye, Allah Yahweh ulule. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. El anggur wa ara, Israel yala ninye unyake. Tonda, teleb wa tuku ati kanye delilul ning ara, sik Yehuda yala ninye unyake. Israel ninye ap, Yehuda yala ninye ap, ‘Teleb kibuka unyak do?’ tenen, dililamuk bukni, aninye nirya ara, olanauk ulamik. ‘Diksukumuk unyak do?’ tenen, dililamuk bukni, ton nang arye, ton tam nang ati, ikin ning weik, sik nong deice delilamikce, malye nyabuka, ngaluklamikba, kekelamuk. Ati, Allah arye aninye nirya ati, malye kanye bolamuk.
Anggunda, yata deiyok ati, anggunce na mapu koproba ati ara, sik nong deice, kanye ikin ning deiplumce, ikin kililulum do? Tonda, anggunce na mapu koproba bukni, talye kankan nang, sik ning alubuka dololulumce, anggun urasin ara, tuku deice buta noutamuk singnilongolulum do? Nara Allah Yahweh, aning-aning nirya, eitam erebuka, mikip weiknye unune. Tonda, narye sik im deice unamak yin talin malaikat nirya ara, sik deiyoknye unune. Narye anggunti, ayupu akunum nyapsin ati, anggun nirya ara, dipkoprob wenepnamsine!”
Sikce nati patapliba, ‘Se, pia weik kel bikna deiyok ning ton doproptibye’ tenen, tuba teneninyak ninye ara, narye sikti, bico tenenirye, melinune. Tonda, yata mutuku ninye do nirya, sikce, ‘Se pia weik kel bikna deiyok ning doproptibye’ tenen, nati patapliba, pia pi dobuka, eninyak ninye ara, dipkoprob sikce pia weik kel bikna deiyok ning, akunum talibuka unamake.
Allah Yahweh el si erenamapa ara, talye ati kume. Deiyok ara, nun ni koprop Allah, el si Yahweh, elda aning-aning nirya deice tam erebuka, talibuka Mikip Weik Deiyoknye ulula anya arye, talye ning bukni, ninye arye, ‘Nun ni,’ nyabuka, si erenyak Isa Mutuku Dongonye ap, isa mer nirya ap, yuk mikip ulul ning, aning-aning nirya ap, el amu tamuk unyake. Allah elda, mikip weik ubuka, aning nirya Deice Tam Erenanye ulule.
Na ni Allah, narye moropkin ning ara, ani. Ance sik anang ati, wenebuka opminyeura, sik nirya ara, alye weik daknamake. Tonda, ance arepminyeura, ‘Sik kanye boktopyeba, kanye teniltonauk unamake’ tenen, moropkine na nio. Allah ance anang opminyeba, akunum dibikceura, aminyan talak yuk-yuk mutuku nang nirya arye, anang nirya ati, ‘Sikda daupye, sikda malye nang ulamik,’ tenenamake. Utenena ati moropkine na nio.
Se, na kwit capu. Allah elce kel kiyamuk ning ap, elce, ‘Deiyok ani’ tenen, moubuka tenelye ning ap ara, mambul weik ning ulule. Allah arye kel bikamuk ning nirya ara, kum nukmanto ulule. Elce, ‘Winipnamne. Teleb una ara ani,’ tenebuka yupu lepsisikuka bokolisilya ara, nun talye tukwak unyap ninye arye moubuka kum teneptibye. Allah el pil dolye ning ap, el winilul ning nirya ap, nun bidamang aryuk kum kel biktibye.
Yata nang do nirya, ‘Bon-bona weik talibuka unyak ninye ati, teleb ning arebibya deice arye, kanye deipsikirye, aminyan talak melibuka teleb kinamsiak’ tenen, arinyak kili sal ara, aminyan talak bona utotoa weik talin nang kum unamak bukni, talye bona talina kum ninye uk upre banamake. Aning atouk, dan kili sal do nirya, talye bona talina kum ninye ati, ‘Aninye ara nun like’ tenen, malye kinyak kili sal ara, Allah arye wenepliba, aminyan talak sik talinyak ning nirya kum upliba, sik babye talye bona talina kum ninye uk ubikirye, ikin asa uk unamake. Bona talina weik ninye ati, arinyak ninye ap, tonda, bona talina kum kili sal ati, ikin ning sik nong deice delinyak kili sal ap ara, sik bidamnye atibuk ititilalinyake.
‘Aninye daopnyake’ tenen, namin kipmunyeura, anggunce nyalulume. “Aning ara, nun deiyok kume, aninye opnuyak ning ara, moubuka kum kel kepmapa anya arye, yata wiriptibye do, kume. Dauplye,” nyalulume. Winibuka anyuk nyamunye bukni, anggun ni koprop Allah arye, ninye kanye talima nirya dilirye, yupu lipsisikuka bokolisulule anya arye, dipkoprob anggun kanye talima noutamak tenelulum ning babye, elce kum kel biktu do? El bidamnye aryuk anggun talima noutamak usilye ning nirya kel kipsilirye, melibuka kalikisulule anya arye, dipkoprob el kele. Anggun tenelulum ning ap, anggunce winilulum ning ap nirya ara, kum dungnuptume. Allah arye aning nirya dilulnye anya arye, elcuk ninye nirya yuk-yuk winilamice ning ati, tamubuka wenenamsile. Aning ara, luba kina meme.
Sik adeiyok nang nirya ara, malye weik unyak bukni, dipkoprob teleb ning ara ani. Tonok pala mutuku, negara talibuka, ninye deiyok kibuka ulamlanye, sik Raja bira, elcuk amutuku nirya ap, amutuku wa tuku nirya ap, teleb kibuka kalikinamle. Winipyopura, awa tuku noutam arye, wa wibuka kouamikca ani, wisiplirye, nong uplyopura, libuka delilyak ning nirya ara, amutuku nang nirya arye binuka dobikirye, aning nirya dibuka teleb aryuk unamake. Raja birye teleb kibuka kaliktopura, aning atonun unamake. Bukni, amutuku nirya ara, sik deiyok nang arye aning atonun kum wininyake. Aning ara, pia malyeuk unyake.
Dipkoprob yupu nyapsine. Kel weik bikamik nang unyak bukni, sikce tilila yupu nyabikcopura, sik babye, akunum walwal nang atonun unyake. Sikce yuk nang ati, sik nong deice ikin ning dobuka deibikcopura, awininyaka deice arye, sik bidamnye arye, sik bidamang ati, walwal kililanyake. Tonda, yata nang do nirya, malye una ati, namin kin yo bok arebikiba, doprobicopura, adeice arye, sik talima noutam nirya ara, malyeuk kililanyake. Ati dortalak ara, dipsukum ninguk teleb ubuka kum tenenamake.
Aning-aning nirya ara, ninye tukwak nang mutuku sirya im sirya nirya arye wininyak ning nirya ara, narye moubuka dinmasirye eipse ning ara, amutuku noutam ulamik nang nirya arye winilamik ning eipse. ‘Aning nirya ara, deiyok ning dan do?’ tenen, moubuka tenilamse. Tonda, narye eipse ning ara, ton nang ara, ninye deiyok kibikirye, sik amu tam unyak nang ati, “Wininamlume, wininamlume,” nyabuka, mikip weik kililamikirye, yupu nyanyake. Wininyak deice arye, sik amu tam unyak nang ati, ikin ning dobuka, sik nong deice deibikiba, imun kanye bobuka unyake.
Bukni, yatanye do ninye nirya, el li koprop arye, tilila yupu nyalamuk ning ap, yuk nang ikin ulamik talak, sik yo bok tabakuka, ubula arye dololamuk ning ap, el kayapu nang, sik ning ubula dololamuk ning ap, el yala ninye noutamak, yuk malye winin ning, ayala-yala nirya, winilamuk ning nirya ap ati ara, adeiyok ati dipnamlarya. Anye bira, elcuk malye ulamlya deice arye, wenebuka opnyopura, dipnamlarya. Ara, urdem ati kume. Deiyok ara, el malye winilamuka atia. Na Allah arye nyapsine, nyabuk.
Aning atouk, tonda Uzia elcuk, ninye kum ulamik sukum bukni, weik mutuku bai tam noutam arye, ‘Nun mal olan nang eipnamapʼ tenen, keil arye ninye kalikna aik ton dopdeiamuk. Tonda, weik mutuku dup mek binman kum mutuku bukni, ‘Ninye arye mek ton dipnamakʼ tenen, ‘Mok cebuka mek balirye, deipnamleʼ tenen, tuku lukuka, mek delinak sumur kintinip deiamuk. Mek ati tuku lukik deiyok ara, amutuku tuku noutam ara, el pil melin nang arye, domba basam ap, sapi basam ap, pia weik weilamik ati, Yudea mutuku bukni, keting komulban tam, mitik mutuku kon tam ap, lu mutuku ap nirya ara, ‘Mek deipnamleʼ tenen ati, tuku lukamik. Tonda, Raja Uzia bira, tuku telebak ara, sukun tuku ton wa win nang weik wipdeibukba, el anggur wa ap, elti, koulamik ning yala-yala nirya ara, anang arye, el melina ati, wa weilamik. Uzia bira, wa win ning ati, pia kanye delilamuk, ‘Aning ara, telebe,’ tenelamukce, ulamuknye atia.