Penghotbah 2:16 - Eipomek

¹⁶ Aning ara, talye ati kum tenepse. Deiyok ara ani. Ara, weik kel bikamlinye babye, tonda walwal uk ulamlinye babye, akunum diplyeura, aminyan talak yuk nang arye, sik anang si ton, pia kum tenenyake. Daupnin balamikca ani, sik si babye kum si nyanyake. Yata ning do nirya ara, dorupnamle talak ara, ninye arye aning-aning nirya, adiparyuk luba kilongona uk unyake. Se, nun nirya ara, kam ton kum unamabe. Ara, weik kel bikamlinye babye, walwal uk ulamlinye babye, nun nirya ara dibina uk unamabe. Se, aning ara yata ati do?

Penghotbah 2:16 Referans Kwoze

Penghotbah 1:11

Tonda, pia min talak arye kam ulamik nang ara, wini talak unyak ninye arye, ton tamubuka, anang ati, tuba kum teninyake. Atonun, dotalak unamak nang ara, sik unamak talak bukni, dorapce, aminyan talak ton unamak nang arye, anang ton tuba kum teninamake. Ninye ap, awamlye ning, ninye arye wininyak ning nirya ara, doyanamle talak unamak nang nirya ara, ‘Aning uamuk ning ara, ton ani,’ pia kum tenepnamake. ‘Ninye arye, aning-aning nirya ara, luba kinauk unyabe.’ Kel weik bikamuk Peterena Deiyoknye birye, nyabuk.

Penghotbah 9:5

Sik kam tuba unyak nang ara, ‘Se, aminyan talak ara, dipkoprob dipnamnarya tenen, akunum bikinyake. Wininyak bukni, sik akunum diamik nang ara, aning-aning nirya ara dipkoprob pia kum teninyaka ati, kum bikinyake. Sik akunum diamik nang ara, pil ton kum dopmanto unyaka ati, sik dengna ning tonap tabakuka pia kum dolonyake. Aninguk kum bukni, yuk nang arye, sik akunum diamik nang ara, sik si tonap kum teninyake. Anang nirya ara, adiparyuk luba kinyake.

Mazmur 88:12

Tonda, ance an tenen nang ati, bico tenesimince, “Tuba teleb kilinamsilame,” nyabuka, nyalin yupu deice arye nyapdeiamsulum ning ara, sik akunum diamikba, akunum tuku lukamik nang, tuku pum tam arye ton, ayupu nirya ati, tuba laka nyanyak do? Kume, aning babye kum winipmanto. Aning atonun, akunum diamik nang unyakak, aning-aning nirya kum kipnamle mutuku, el si ara Abadon mutuku, noutam arye, sik diamik nang arye, “Allah arye nyamuk touk, dipkoprob ulule. Elce pia kum batakasulule,” nyabuka, an si erekinyak do? Kume, kum wininyake.

Keluaran 1:8

Ulamik talak ara, Mesir mutuku noutamak ninye deiyoknye tonok, Raja winiryuknye tikukce, Mesir mutuku nirya talibuk. Atikuknye bira, Yusup el si ap, nong ap, kel kum kiyamuk.

Ibrani 9:27

Ura, Allah arye ninye tukwak ninye nirya tenyamsuk touk unamabe. Ara, kam ulamibya ani, tonok talak arye akunum dibibyopura, aminyan ara, Allah arye, nun tukwak ninye nirya ati, “Aning telebe, aning malye,” nyabuka yupu lipsisikuka bokeipsilirye, wenepnamsile.

Maleaki 3:16

Allah arye Israel ninye ati, weik arye wenebuka, Israel ninye kan-kan, sikce Allah ati, tuba ilil ulamukba, diba tenebuka ulamik ninye arye, bulubuka yupu talipmikce, yupu nyalanmikba, Allah el si Yahweh arye, sik talipmek yupu kekebuk. Sik tuba dib tenen, kili sal ap, sik kayapu dib tenen ninye ap arye, amambul yupu buku dobuka sekik. Ara, ‘Nun ni koproba, Allah Yahweh ati, tuba dib tenebuka elti, ilil tenebuka unyap ninye ara, nun si abuku noutam sekenamabe. Tonda, Allah ati kanye deibuka ubirye, tuba-tuba tenebuka, el siuk erenyap ninye ara, nun si abuku noutamak sekenamabe. Aning sekibirye, luba kina kumce, pia tuba tenenauk unamabe. Tonda Allah arye, aning eiplirye tuba tenenamsile,’ tenebikce, dib tenen ninye si abuku noutamak sekik.

Penghotbah 6:8

Tonda, aning ton tenepse. Ara, kel weik bikamik nang arye, ‘E, nara aning-aning nirya akunum kel bikamsa ati, narye aning-aning ton tabaknamne. Sik walwal unyak nang ara, tonok ning babye kum tabakuka taliptinge tenenyak do? Tonda, amutuku noutam talye kankan unyak nang ara, ‘Nun ap, yuk nang ap, teleb kibuka neika un ning ara, ani, ani,’ tenebuka akunum kel bikamting bukni, Sikda pia teleb kibuka unamak do? Aning ara kum unamake, tenepne. Ara, kel weiknye babye, bona talina kumnye babye, aminyan talak dipnamraka ara, neiktoto ururaka ati, sikce kam pia un ning ton, kum tapakuka dopropnamrake.

Penghotbah 2:14

Ara, weik arye kel biklinye bira, elce, Teleb un ning ara, abisik binune,’ teneplye bisik ara eibuka kel biklirye balule. Bukni, walwalnye bira kuna bisikuk balamle atonun ulule. Bukni, aning babye na kele. Weik kelnye babye, walwalnye babye, nun nirya babye, sirya ara, atonun upnamsile. Ara, weik kel arye winilamak nang babye, walwal aryuk ulamak nang babye, daulamepya ani, sirya ara ato ninguk kibuka, adiparyuk dibina uk unyabe.

Mazmur 103:16

Mutmuta kita oplirye, aupmale bukni, bupu kumanya mikip arye, bai tam yo kita deice pu aplyeba, adip aryuk sesal sebuka kum daliba, amutuku ninye arye, akita ning ara, tonap kum elilamak touk, ninye tukwak nang babye, akunum dipbikce ura, akunuma. Yuk nang arye aninye tonap pia kum elinyake. Dibipyopura, yuk ninye minopce lubakisinyake. Dortalak yanamle keting tamun noutamak ara, yuk nang arye, “Anye bira, asukum ulamuk,” nyabuka, laka kum nyaptinge.

Mazmur 49:10

Sikce, ‘Nunda kam pia unamabe’ tenen, bona pia weik tonun areptinga babye, sik kam una deiyok ning ara, kum dektinge. Aminyan talak ara, dipkoprob dipnamakca! Sikce, ‘Kume, nunda kum dipnamaba ati, aminyan talak, yuk nang arye dibipyeura, yuk nang arye, tuku kum dongopnamsiake,’ tenebikirye, talye yupu nyanyak bukni, ara kum winipmanto ning tenenyake.

2 Samuel 3:33

Aning nirya akunum winibikopura, Daud birye, Abnar biti engebukce, nyabuk. “Abnar dipmal ning ara, talye walwalnye dipneto upmal do? Aning ara, kume.

Keluaran 1:6

Sik nirya daulamika ani, Yusup el kiklip nang ap, Yusup nong koproba ap, sik atalak wisi akunum danamika anya arye, anang nirya dibik.

Penghotbah 2:15

Ati ara, narye tenipdese, ‘Se, bita tenena kumce, pia walwal arye ululnye, el dam yangalul ikin ning ara, na babye dopropnamnarya. Aning ati ara, nara weik kel bikna deiyok ning kel bikamse ning ara dan do? Aning nirya kel bikamsa deiyok ning ara, yata ati do?’ tenepse. Winilula ati ara, aning nirya tenipsirye utenepse. ‘Kume, weik kel bikna deiyok ning babye, aminyan dotalak ara, teleb kum kipdeipnamsil ati, deiyok ara pia kum upnamle,’ tenepse.

Penghotbah 7:2

Aning atonun, pia teleb ning ara ani. Ninye dibikcopura, deipmakce aik ara bimunce, anang ap engena ara, pia telebe. Bukni, aning atonun kum buk, talye kwalya kwalibikirye, din dibuka talye kanye bobuka unmacak bimunyopura, aning ara mitik telebe. Deiyok ara, nun nirya ara aminyan talak dipnamabe ati, ‘Aning min kum upsilye talak ara, kam tuba unyak nang arye, ‘Nun aminyan talak dipnamap ning moubuka biktibyeʼ tenen, unyabe. ‘Anggun babye ton winiptumʼ tenen ati, ayupu laka nyapsine.

Penghotbah 8:10

Tonda, aning nirya kel bikina ati dilamsirye, elamse talak ara, aning ton eipse. Ara, na asing arye dilamsiba, malye ning talibuka ulamikce, weik yupu nyalamik nang ton dibikba, akunum tuku lukike. Bukni, sik anang ara, min talak ara sikce ton, Allah el si eren aik dam yangalamikce, Allah ati aren ning arelamikba, sik ulamik mutuku tuba kam unyak nang arye anang ati, ‘Se, sikda mambul nang ulamik,’ nyabuka, si erenmekba, eipse. Ati, na kanye ara, awininmek ning nirya ara, pia nong una kum, talye ninguk winimeke. Winipmanto ara, kumanya mikip arye don maliba, ‘Aning talipnunʼ tenen, bikbik abuka dobolbitua babye, kumanya ara kum talipmanto ati, aning nirya ara nong pia kum upnamla ati, ‘Aning ara, talye ning uka tenepne.

Penghotbah 9:15

Kintinibuk bukni, amutuku noutam ara, ninye talye bona utotoa kumnye bira, aning-aning nirya pia kumnye tonok ulamuk. Anye bira, moubuka bikinanye ulamuk. Winilamuka ati, el weik tonun kel bikamuk ning arye, el mutuku nang ati melibuka, lyepdobuk. Bukni, amutuku noutam ‘Telebe,’ nyana kumce, elti, tonok ning babye, kum arebik. Sikce elti, pia kum tenelamikce, akunum lubakina uk ulamik.

Amsal 14:8

Ninye ton dipkoprob weik kel bikamik nang ara, sik winipnamak ning nirya ati, kabul talak arye moubuka tenipdekirye, namin asa arye unyak ning ara, dipkoprob telebuk unyake. Bukni, walwal kanye bobuka malyeuk unyak nang ara, sik upnamak ning nirya kabul talak arye, moubuka kum tenildenyake. ‘Aning ara teleb do, aning ara malye do?’ tenena kumce, talye lukparabuka winipnin bakirye, teleb kum wininyaka anya arye, sik malye unyak ning nirya deice arye, sikce sik bidamang atibuk, tilila nyalildakirye, malyeuk ulilanyake. Walwal kanye bobuka, malye ninguk ululnye bira, tilila ninguk talibuka unamle.