Penghotbah 2:10 - Eipomek

¹⁰ Atalak nirya ara, narye, ‘Aning ara, winipnamne, aning ara, dekuka talipnamne. Aning ara, eipmance kanye deipman ati, aning babye dopropnamne,’ tenelamse ning yala-yala nirya ara, atenelamse touk dobuka talilamse. Atalak nirya ara, ‘Na kanye deiptinyeʼ tenen, patapnuk ning ara, ‘Aning ton bataknune,’ pia kum tenelamse. ‘Atenepman ning nirya ara, winina uka tenepman, kanye deibuka ulamse. Tonda, narye pil dolamse ning nirya ara, na kanye teleb ulamnuk. Kanye teleb upnukba, apil ara dolamse deice arye, menenga atonun dadololamse,ara, kanye deibuka ulamse.

Penghotbah 2:10 Referans Kwoze

Penghotbah 9:9

Ati ara, ance an kil pia bico teneplum kil ap, neika kam unamlum talak nirya ara, kanye delilanamlume. Deiyok ara, anggun kam unamlum talak nirya ara, talye nong pia kum upnamle ning anggun dam yanganamle. Tonda, anggun ni Allah arye, ‘Aning ara wininamake,’ akunum tenepsuka ati, amutuku noutam unamap talak ara, el akunum tenyamukce, areamsuk touk unamabe. Ati ara, tukwak mutuku noutam unamap talak ara, nong kum upnamle ning, talye ning ara, nun dam yanganamsile. Ati ara, anggun tukwak mutuku noutam unamlum talak ara, pia pi dobuka, pil mikip arye donamlume. Allah arye, ‘Aning wininamake,’ akunum tenyamsuk touk wininmabe.

Penghotbah 5:18

Ati ara, na akunum bita tenipsirye, bikse ning ara, pia teleb weik ning nyapnusine. Ara, ani. Nun ni Allah arye, ‘Sik tukwak nang nirya ara, kam ouku weik kum unamak talak ara, ‘Aning dinamakʼ tenen, arisulul ning ara, akunuma. Allah arye, ‘Wininamake, aning ton dolonamake,’ tenyamukce arisulul ning ara, akunuma. Ati ara, pia teleb ning ara, ani. Ara, nun tukwak nang ati akunum arisulul ning ara dobuka, nun din dina ap, mek dina ap uka. Aning atonun, teleb weik ning ara, nunce wa wibuka koubibiba, nong uplyeba libuka dinyap ning ara, akunuma. Tonda, Allah arye aepbsukba, pil talibuka donyap ning ara, akunuma. Aning talibuka ubirye, kam tuba unamap talak nirya ara, kanye deibuka telebuk unamabe. Allah arye, ‘Sik, aninguk talibuka unamak tenen, akunum arepsuk ning ara, aning uka. Pia teleb ning ara akunuma tenepsirye, bikse.

Penghotbah 3:22

Aning nirya tenepdesirye, kum kel bikmanto kipsa ati, na kanye aryuk nyapne. Nun tukwak nang ati, weik teleb ning ara, ani. Ara, nun pil dobibiba, nong ulul ning ara, doprobibirye, talye kanye deibuka unamabe. Aning kum winibipyopura, yata ning ton uptibye do, kum ati, Allah elce tenelamsuk ning ara, akunuma tenepne. Yuk ning ara, ton kum uptibye. Tonda, akunum dibipyopura, yata winina deice arye, aminyan winipnamsil ning ara, yata wiribuka kel kiptibye do? Ara, nun kum kel biktibya ati, nun pil dopye ning ara, talye kanye bobuka wininamabe. Penghotbah yupu nyabuka sekeibuknye birye nyabuk.

Mazmur 119:37

Tonda, ance nati, pia moubuka kalikinamnilyame. Ance na batakniminba, ‘Mangkau arye, talye-talye yuk malye winin ninguk eipnirye, melibuka dobolbinyak’ tenen, moropkine. Ara, na ni koprop Allah, an pia kam uminye birye, ‘Wininamake,’ nyasiminye yupu uk, areniminba, ayupu uk talibuka wininamna deice arye, kam pia unamne.

Mazmur 128:2

Tonda, anggunda taruk arye, pil dobuka winilamunya ani, aminyan talak ara, anggun pil domunye deice arye, teleb ning dopropmunce, teleb unamlame. Tonda, anggun nirya ara, kanye deibuka, telebuk wininamlume. Tonda, anggun pil donamlum ning nirya ara, teleb wininamle.

1 Yohanes 2:16

Aning ara urtalya ati kum nyapsine. Deiyok ara, tukwak tam ulul ning nirya ara, malye wininyak ninye, sik patalamle ning ap, sikce, ‘Se, aning doproptibye’ tenen, asing arye eibuka patalamle ning ap, sik bona do, sik talibuka kimilan ning nirya ara, aning ara nun ni Allah el ning kume. Amalye tenena ap, malye patana ap, anirya ara Isa Mutuku Dongonye el ninguk ulule.

Penghotbah 2:22

Aning ton tuba ton ap tenepsirye. Ara, ninye nirya, kam tuba ulamlye talak ara, ikin unmalibuk, kanye ikin deice aryuk pil dolule. Elce, ‘Akanye imun unmalibuk, nong kipnamlarya tenebuka pil dolul ning nirya ara, dipkoprob nong upnamle do, kum do? Kum tenepmana ati, aning nirya ara talye-talye uka!

Penghotbah 11:9

Ati ara, anggun wel nanguk tuba ululum nang ara, anggun tuba weluk unamlum talak ara, kanye deibuka umunce, pin-pin kanye bobuka unamlume. Anggun talima noutam arye, ‘E, aning ara wininamne, aning ara, ton piripnamaneʼ tenen, teninamlum ning nirya ara, dobolbanamlume. Tonda, anggun asing arye eipmunce, ‘Se, aning ton taliptibye,’ tenelulum ning nirya babye, ‘Talipnunʼ tenen, dobolbanamlume. Wininamlum bukni, kanye moubukapmunce, teninamlume. Anggun wel tuba unamlum talak wininamlum ning nirya ara, Allah arye, anggun malye wininamlum ning nirya ati, dipdelirye, yupu bokeipsilyopura, wenepnamsile. ‘Dauplyeʼ tenen, talye luba kina kum unamle. Ati, pia moubuka teninamlume.

Penghotbah 6:9

Narye tenepse ning ara, ani. Pia teleb ning ara, nun dam aupsilye ninguk, talibuka unyap ning ara, kanye deiptibirye, telebuk unamabe. Bukni, nunce yuk nang ning ati, ‘Se, na ton weik tonun taliptinyeʼ tenen pantana ara, pia meme. Aning ara pia kum teninamabe. Awininyak ning nirya ara, talye nong kum ninguk wininyake. Winipmanto ara, kumanya mikip balyeba, tonoknye birye, ‘Kumanya talipnunʼ tenen, bikbik abuka dobolbitua babye, kumanya ara kum talipmanto ati, sikce, ‘Se aning ton taliptinyeʼ tenen, patalyeba teninyak ning ap, mikip arye pil donyak ning ap, nong pia kum upnamala ati, ‘Aning nirya ara, talye pil donyaka,’ tenepne.

Amsal 23:5

Yo bok ap, bona ning ap nirya ara, asing elimunce umunye ning nirya ara, tuba elinmamunye talak noutamak aryuk, kum upnamlarya. Winipmanto ara, bip maka eipmunba, adiparyuk minopce im noutamak lakuka balamle atonun, bona weik talin ning babye, minopce kum danin banamle. Winipmanto ara, bip maka pol laklirye, talye karin arye lakuka balule. Winilamle atonun aning nirya ara, pia kum upnamlarya.

Ayub 31:1

Nara, dipkoprob nyalin yupu akunum na bidamnye nyapdase. Ara, kam kilapu asing eipnirye, ‘Akil ara, na ap neika maptinimnye, tenena ara, pia tuba kum tenenamne,’ nyapdase.

Hakim-Hakim 14:2

Eibukopura, tuba tamubuka yayukce, el li ap el lin ap, sik dam biyukce nyabuk. “Na Timna mutuku binmanurye, Pilistin yala kil ton eipmance, na kanye talima se tenepmana ati, anggun birumunce akil anyuk morobuka boyanurumnyeba, akil anyuk dopnamne,” nyabuk.

Kejadian 6:2

‘Allah ara, weik mambule’ tenen, el tam diksukum ulamik nang arye, yuk talye nang arye, delilamik kilmapu dililamikce, ‘Se, akilapu ara, pia teleb kilapu,’ tenelamikce, sik patalamuk kilapu uk, talye alubuka dolalamik.

Kejadian 3:6

Nyabukba akil arye, ayo duk ati dinmokce, utenebuk. ‘Se, ayo duk ara, urasin pia telebe. Tonda, ayo duk diptinyopura, pia telebe. Tonda ayo duk dipnyopura, kel bikna weik deiyok ning deipnutue,’ tenebuk. Utenebuka ati, ayo duk dakuka, mitik anun dobuka dibukce, el ap neika ulamdiknye Adam ati, bokuka arebukba, el babye dibuk.

Penghotbah 5:10

Yata nang do nirya, ‘Yo bok ton pia weik tonun doproptinyeʼ tenen, sik asing labukabikirye, epra banyak nang ara, sik yo bok weik tonun doprobikca babye, sikce, ‘E, akunuma,’ tenen, sik kanye kum delinyake. Tonda, aning atonun, bona talina atibuk motona talin nang atonun ubuka elulnye bira, Aning ara pia weik tonun taliptinyeʼ tenen, elula deice arye talilye ning ara, weik auptua babye, kanye pia kum lonamle. Aning nirya ara, talye nong kum unamle. Winipmanto ara, kumanya mikip arye peiyang-peiyang apliba, tonoknye birye, ‘Aning talipnunʼ tenen, bikbik abuka dobolbitua babye, kumanya ara kum talipmanto ati, atenen ning ap, mikip arye pil dolye ning ara, nong pia kum upnamle! Aning nirya ara, talye ning diamuka.

Penghotbah 6:2

Aning ulamukba, elilamse ning ara, laka nyapnusine. Ara, ani. Allah arye tukwak mutuku nang ati, sik bona talibuka un ning ara, weik tonun areamukba, aning-aning nirya talibuka unyake. Ara, bona yala-yala nirya ap, yo bok weik ap, talinyakba, yuk nang nirya arye, bona talin nang ati, ‘Se, Sikda mambul weik nang unyakeʼ tenen, si erenyake. Aning-aning nirya ap, sik patan ning yala-yala nirya ap aupmalya ati, tonok ning babye ton kum patalule. Sikda pia talye kanye bobuka unyake. Allah arye tenyamuk ning ara, anang ati arelul bukni, malye weik ning ara ani. Allah elce sikti, ‘Aning nirya talibuka, kanye deibuka telebuk kum unamake,’ tenelula ati, ninye yuk nang, sik kum bikamik nang arye yanuka, sik bona talin nang arye talilamik ning yala-yala nirya dolonyake. Ati, aning nirya ara, talye nong pia kum upnamle. Yuk nang arye aning nirya talibikirye, kanye deibuka unamake. Aning nirya ara, talye nong kum upnamle ati, pia malye ulule. Aning nirya ara, winipmanto ara, kumanya mikip arye peiyang aplyeba, tonoknye birye, ‘Aning talipnunʼ tenen, bikbik abuka dobolbitua babye, kumanya ara kum talipmanto ati, sikce teninyak ning ap, mikip arye pil dolamik ning ap, nong pia kum ubuka ati, aning nirya ara, talye diamuka tenepne.

Penghotbah 9:6

Tonda, sik akunum diamik nang ara, tuba kam ulamik talak ara, bico tenelan ning ap, yuk nang ati, ‘Na likeʼ tenen ning ap, akunum kum dayuke. Tonda, sikce yuk nang talinyak ning ap, wininyak ning ati, ‘Se, naryuk aning taliptinye, aning ara, naryuk winiptinye tenelamik ning nirya ara, akunum kum dayuke. Aning ara, akunum diamika ati, tukwak mutuku noutam ara, yuk nang arye wininyak ning ap, talye dawinipnamle ning ap ara, Sikda neika pia kum uptinge. Tukwak mutuku noutam ulye ning nirya ara, sik ap pia kum uptinge. Na kanye ara, aning ara pia malye tenenune.

Penghotbah 2:1

Ura, na kanye pum tam arye utenepse. “Na babye teleb kanye bobuka, kanye deipdanirye, ‘Yata winin ning do nirya, kanye delisulul ning yala-yala nirya, talibuka unamne,’ tenepse. Utenebuka ulamsirye, aning nirya pirilamse bukni, akunum winipse ning ara, aning nirya tuba ton tenipsirye nyapse. “Kume, kanye delilana ning nirya ara, talyeuk ulule. Aninguk tenibuka ulamepya babye, dowinipnamle talak ara, kanye deibuka telebuk kum upnamabe. Aning babye, nong kum upnamle ning, pia talye-talye un ning ulule,” nyapse.

Penghotbah 2:24

Aning nirya ara, narye tenepne. ‘Ninye arye atenebuka donyap pil nirya ara, pia teleb ning ton kum unyabe. Ati nun winipnamtibye ning, pia teleb ning ara, ani. Ara, mek dina ap, din dina ap, tonda nun pil dopmatibye touk, apil donyaba deice aryuk, kanye deibuka unamtibye. Aning dotalak ara, nong teleb upnamnil do? Yata tonye birye aning nirya dopropnamle do?’ tenen ning ara, kume. Aning ara, teleb uka ati, narye tenepse ara ani. ‘Ara mitik babye, nun dam aupsilye ning ara, nun ni Allah, elcuk aning nirya ara, el taruk aryuk aresululeʼ tenen, unamabe.’ Utenebibye ning ara, aninguk talibuka moubibyak arye, tunim abuka una ara, teleb uka tenepse.

Penghotbah 5:17

Tonda, aning ton tenipse. Sikda, ‘Bona taliptinyeʼ tenen, pia motona talin nang atonun unyak nang nirya ara, sik kam tuba ulamik talak ara, lukunyan noutam nirya, teleb ubuka kum malamik. Sikda mambul kiriklamak nang atonun ulamik. Ati sik anang arye tenilamik ning nirya ara, ‘Se, na dengna weik ning kum upnuka ati, yata wiripnamne do?’ tenen, sikce ‘Seʼ tenen ning ap, ‘Na likʼ tenen ning ap, sik talima noutam arye, ‘Se, yuk nang arye, yata deiyok ati malye ulamnik do?’ tenen, uk taleamukba, se tenen pia piribuka tenilamik. Ati, sik anang arye winilamik touk, pia kum wininamlume.

Penghotbah 8:15

Nong kum upnamle ning, pia talye-talye uk wininyaka ati, na kanye arye, ‘Wininamabe,’ tenepmana ara, nyapnusine. Ara, anang nirya ara, moubuka tenina kumce, pia kanye deibuka unamake. Tukwak mutuku im sirya, mutuku sirya nirya unyak nang nirya arye, talye kanye bobikirye, din dina ap, mek dina ap, tonda talye kanye deipdanuka un ninguk unamake. Winibikcopura, tukwak mutuku tuba kam unyakce, ikin pil donamak talak nirya ara, din dina ap, mek dina ap, unyakce, kanye deipdanuka un ning ap, pia unamake. Allah arye tukwak nang kam una ati lo tuba aresilye talak ara, winibuka unamake. Na kanye ara, teleb un ning ara aning anyak tenepne.