Ayupu nirya ara, urdem ati kum nyapsine. Nun tukwak ninye nirya arye, pil donyap ning ap, tenebuka duknunyap ning aning-aning nirya ap ati, Allah eipsilirye, kel kisulula anya arye, aning nirya ati wenebuka yupu lipsisikuka bokeipnamsile. Ara, ‘Malye winilamik ning ara ani. Teleb winilamik ning ara ani,’ tenen, wipsilirye, nun pil erebirye winilamepya touk, Allah arye dekna arepnamsile. Ayupu ara, abuku Penghotba sekamuka deiyoknye birye nyabuk.
Penghotbah 11:9 - Eipomek9 Ati ara, anggun wel nanguk tuba ululum nang ara, anggun tuba weluk unamlum talak ara, kanye deibuka umunce, pin-pin kanye bobuka unamlume. Anggun talima noutam arye, ‘E, aning ara wininamne, aning ara, ton piripnamaneʼ tenen, teninamlum ning nirya ara, dobolbanamlume. Tonda, anggun asing arye eipmunce, ‘Se, aning ton taliptibye,’ tenelulum ning nirya babye, ‘Talipnunʼ tenen, dobolbanamlume. Wininamlum bukni, kanye moubukapmunce, teninamlume. Anggun wel tuba unamlum talak wininamlum ning nirya ara, Allah arye, anggun malye wininamlum ning nirya ati, dipdelirye, yupu bokeipsilyopura, wenepnamsile. ‘Dauplyeʼ tenen, talye luba kina kum unamle. Ati, pia moubuka teninamlume. Gade chapit la |
Penghotbah 11:9
41 Referans Kwoze
Unyap ati ara, na talima pum tam tenenuna ara, ‘Allah aniryuk wibuka, malye nang arye malye unyak ning ara ani, teleb nang arye, diksukum unyak ning ara ani, tenebuka lipsisikuka bokeipanamsile,’ tenepse. Aning tenepsa deiyok ara, talye ati kume. Deiyok ning ara, nun tukwak ninye wininyap ning ap, nun pil donyap ning ap nirya ara, Allah arye, ‘Atalak ani,’ tenyamuk touk, el dem arye nunti yupu lipsisikuka bokeipsilirye, teleb ning ati dekna arepnamsilirye, malye ning ati, wenepnamsile.
Ayupu nyapmasin ara, urdem ati kum nyapsine. Kume, ninye mutuku-mutuku nirya aminyan sirya talak ara, Kristus arye ninye nirya yupu bokona ati, weik ninye deiyok nang arye bulamak ning takta kursi bulamak ning deice buklibuk, el dam binamabe. Kristus arye, ninye nirya dipdesilirye, ninye yuk-yuk bukni, nirya, sik pil dolamak ning ap, yupu nyalamak ning ap, nirya awinilamak touk, yupu lipsisikuka bokeipnamsile. Ara, ninye nong ubuka pil dolamubu ning ati, teleb ning babye, malye ning babye dipdesilirye, yupu lipsisikuka bokeipnamsile. Ati, ‘Yata pil doptibyeba, Allah arye kanye deipsutu do?’ tenenauk unamnyape, nyapsine.
Tonda, narye diksukum bisik akunum bataknirye, kirikuka yuk malye bisik dobolbalamtinyopura, Allah arye wenepniliba, yuk nang arye, “Dipkoprop malye winilul arye,” nyapnitinge. Aning atonun, na asing eipnya deice arye, na kanye talima lipropniliba, malye bisik banyopura, Allah arye wenepniliba, yuk nang arye eipnicake. Tonda, na taruk arye malye winipnyopura, Allah arye wenepniliba, aning ara yuk nang arye eipnicake.
Aning ati ara, sikce yuk diba tenenyak ninye nirya ati, yata deiyok ati, “Sikda malye wininyake,” nyabuka wenepmunce, yupu lipsisikuka bokolinamlum do? Tonda, yata deiyok ati, sik diba tenebikce unyak ninye, anggun weit yapu atonun nang ati, ‘Kume, anang ara, nun wininyap ning atonun kum wininyaka anya arye, nunda weik mambul nang unyap bukni, sikda mambul kum nang unyake,’ tenelulum do? Kume, na kayapo, Allah arye ninye im sirya, mutuku sirya nirya ati, yupu lepsisikuka bokeipnamsil talak ara, el Yupu Lepsisikuka Bokolina Deiyoknye, el teleb buna ning deice bukliba, nun nirya asukumuk yanuka tikibirye, nun winilamepye ning ati laka nyabibyeba, elce, “Aning telebe, aning ara malye,” nyabuka, yupu lepsisikuka bokeipnamsila ati nyapsine.
Bukni, na nyapsin yupu ara, anggun asing arye kilapu eipmunce, ‘Akil ara, teleb tenepmana ati, dobuka yoptinye,’ tenepmunyopura, ara dipkoprop kil dobuka talya yolamak touk, anggun talima ap, kanye ap, tenena noutamak arye akunum winilulume. Winipmunyopura, Allah el kanye ara, ‘Akunum yopdanmarake,’ tenesulule.
Atalak nirya ara, narye, ‘Aning ara, winipnamne, aning ara, dekuka talipnamne. Aning ara, eipmance kanye deipman ati, aning babye dopropnamne,’ tenelamse ning yala-yala nirya ara, atenelamse touk dobuka talilamse. Atalak nirya ara, ‘Na kanye deiptinyeʼ tenen, patapnuk ning ara, ‘Aning ton bataknune,’ pia kum tenelamse. ‘Atenepman ning nirya ara, winina uka tenepman, kanye deibuka ulamse. Tonda, narye pil dolamse ning nirya ara, na kanye teleb ulamnuk. Kanye teleb upnukba, apil ara dolamse deice arye, menenga atonun dadololamse,ara, kanye deibuka ulamse.
Nyabukba akil arye, ayo duk ati dinmokce, utenebuk. ‘Se, ayo duk ara, urasin pia telebe. Tonda, ayo duk diptinyopura, pia telebe. Tonda ayo duk dipnyopura, kel bikna weik deiyok ning deipnutue,’ tenebuk. Utenebuka ati, ayo duk dakuka, mitik anun dobuka dibukce, el ap neika ulamdiknye Adam ati, bokuka arebukba, el babye dibuk.
Bukni, Israel ninye tonoknye do, yuk mutuku arye yanuka, tikilyanamikce ninye asik nang do nirya ara, mangkau arye kum bukni, malye kipnikirye, tenepce arye, nati aren ning kum arepnikirye, pia malye upmakcopura, na Allah Yahweh ati, ‘Nun like,’ tenebuka malye, upmanyaka anya arye, atonun nang ara, anggun Israel ninye unamlumak arye, buru tam yakdonokmunyeba, el yuk talye dabinuka unamle bukni, narye anye bira, wenebuka opniba dipnamlume.
Allah arye ayupu nyapdeibukura, aning ubuk touk, Allah el yupu nyabuka deice arye, wini talak ulul im ap, tukwak ap, tonda im ap, tukwak ap noutamak ulul ning nirya ara, tenebuka tenepce deibuka kalikilule. Aning-aning nirya ara, tenebuka tenepce deibuka kalikilamlya ani, apia daulamlye bukni, Allah teneplye talak arye, elti, yaniptabuka, pia malye winin nang ati, yupu bokeiplirye, wenebuka oploplyopura, kum ubuka daneipnamle. Atalak aryuk, wini talak tukwak mutuku ap, im noutam ulul ning nirya ap ara, Allah teneplye talak arye, el yupu nyaplibuk uku arye dipnamle. Allah arye, ‘Na tenepse talakuk, aning nirya kum ubuka deipnamne,’ tenelula anya arye, aning ara wini talak ati, talye tenebuka tenepce deibuka kalikilule.
Na Allah arye nyapse yupu ati ara, atilila nabi nang arye, ‘Ayupu ara nun like, kum kekenamabe,’ tenenyak nang ara, sikce nyanyake. “Kume, anggun malye wininmaluma babye, Allah arye talye lyepnamsile. Dipkopropnye bira, Israel ninye malye wininyak bukni, anabi nang arye, ‘Kume, amutuku winipnamsil ning ara, telebuk unamsile,’ nyanyake. Tonda, na yupu nyapse ning kum kekenyakce, sik bidamang kanye noutamak tenenyak ning talibuka, mandipna kanye bobuka, weik ulul ninye ati, nyanyake. “Kume, malye winilalum babye, Allah kum wenepnamsile anya arye, anggun dam ara, ikin ning kum yanamsile. Telebuk unamlume,” nyanyake. Ayupu nyanyak ara, na Allah arye kum nyapdeipse, tilila yupu uk nyanyake. Allah arye nyabuk.
Bukni, anggun apu yapu arye, na nyalamse yupu kekebuka, kum dobolbalamik. Narye nyapdeiamse touk, kum winilamik. Narye nyalamse yupu talibuka, yangalamting toura, pia telebuk winipnin yangalamting bukni, sikce sik bidamang kanye tenepman touk, winipnin yangalamik. Sikda pia mandipna kanye dobuka, kekena kumce, kat kanya bon nang winilamikce, malye-malyeuk winipnin yangalamik. ‘Sik anang ara, telebuk wininamak,’ tenelamse bukni, tuba tamubuka, malye winin ninguk tenelamikce, malye winin ninguk talibuka, malye winipnin yangalamik. Aminyan teleb upnamle ninguk tenipting bukni, aning batakuka minop talak malye ninguk winipnin yangalamik. Winibuka winilamika ati, aminyan talakuk, “Aning wininamlulume. Aning ara, pia kum wininamlume,” nyabuka, mem yupu ton tabakuka, sik deice deiamse.
Ati, narye, “Anggun Israel yala nang ara, anggun si bambol weik tonun anggunce si akuka moropmunyopura, narye anggun patan ning weik tonun arepsiniba, dinamlume!” Na Allah arye, ayupu nyalamsise bukni, anggunce na yupu kum kekelamnulume. Diba, anggun Israel yala nang ara, narye nyalamsise yupu ati, ‘Se, diba na nio, aninguk kekebibirye, wininamabe’ tenen, na amu tam kibuka kum ulamlume. Ayupu nirya ara, batakalamlume.
Anggun ayan bukuka kekenmalumak, Allah elce, “Malye ning si erebikce nang ara, ikin ning dopnamake,” nyabuka, nyalin yupu deice arye, ‘Aninguk wininamakʼ tenen, mikip arye nyapsuk ning nirya ara, anggunce kekeplume. Anyalin yupu akunum kekeplum nang ara, ‘Nunda, ayupu akunum kekebabe ati, aminyan talak ara, nun babye patapsilye touk, talye malye wininamabe. Aning ara, teleb uka,’ pia kum tenenamlume. Anggun mining kanye tenepmunye ninguk, dekmunyeura, anggun dam babye, ikin ning yalyeura, dopropnalume. Ara, Allah arye, sik malye wininyak nang ati, weneplirye, deken ning arepsilyeura, teleb un ning babye, malye winin ning babye, ikin ning yalyeura, sik nirya ikin ning dolonamake. Atouk, malye winin ninguk talibuka winilamlinye bira, ikin ning yalyeura, dolonamle.
Benang tapu arye, urasin teleb ubuka yangapdeipnamlum ning ara, ‘Nun ni koproba Allah arye winyamsukʼ tenen, anggun kel bikna ati, lak kelinamlume. Winipmunya deice arye, narye anggunti, “Aning wininamlume. Aning ara, pia kum wininamlume,” nyapdeipsise yupu ara, anggunce bikilina ati, tupa-tupa tenipmunce, wininamlume. Adeice arye, anggunda na nyapdeipsise yupu, lubakipmunyopura, benang tapu wipnamlum ning eipmunce, tamubuka teninamnuluma ati, lak kipdeipnamlume. ‘Anggun bidamnye, kanye tenina deice arye, malye winipmunyak’ tenen ati, narye “Aning wininamlume. Aning ara, pia kum wininamlume,” nyapsise ning kum winipnin bamunce, luba kipmunyak tenen ati nyapsine.
Paulus arye nyanmoka ani, yupu deiyok winilye nyabuk. Tonok ning ara, ‘Allah yupu nyasilya atonun diksukumuk unyabe,’ nyabuk. Tonda, ‘Nunce malye ning patapsilye ati, malye winibibyak’ tenen, ‘Nun bidamnang aryuk kalikdanyapce, malye ning batakanyap,’ yupu ap, nyabuk. Tonda, ‘Aminyan talak Allah arye ninye weik arye lipdesilirye, yupu bokeipnamsile,’ nyabuka ayupu ap, Paulus arye laka nyanmoka ani, Feliks kekebukce ilil weik ubukura, nyabuk. “Atalak ati ara, akunuma. Yuk yupu ton kum nyapnalyame. Anda tia talak ati dabilyame. Yuk talak ara, talye lo ton upnilyopura, yukupnamkineba, yupu ton nyapnamnilame,” nyabuk.
Nabi Mikha akunum nyabukura, sik bitinye tamubuka Ahab bukmoka dam birikopura, Israel nang sik deiyoknye birye, asibuk. “Mikhao, yatato do? Na ap, Yosafat ap, nun bitinye arye Ramot Geleat mutuku olbinamanam ning ara, teleb nyapsiminba, olbinamanam do, kume nyapminba, bataknamanam do?” nyabuk. Nyabuk bukni, Mikha birye tamubuka nyabuk. “Olbana uka, na deiyoknye anti Allah arye, ‘Telebe dawiniplule,’ tenepmakila ati ara, ance Ramot Geleat mutuku nang opmince, sik unyak mutuku babye dopropnalame. Allah el si Yahweh arye, melipkilya deice arye sik anang obuka sirya daknalame,” nyabuk.
Nyanmek bukni, sintam akunum kibukopura, Elia birye sik anang ati, “Anggun ni koprop dam anye tonok anye tonok yupu dobuka yukunamalume. Anggunce, ‘Nun ni koproba ara dipkoprob Allah atonun ulule,’ tenepmaluma ati ara, kekepnamasilarya. Anggun ni koproba ara, weik mambul ning tenepmalce kum kekepmasil do? Tonda, yuk pil donmalarye, anggun yupu kum kekepmasil do? Akumopura, yuk pera mutuku binmalce, anggun yupu kum kekepmasil do? Tonda, mapmalarye do? Anggunce elti, bukeiplulume. Bukeipmunyopura, anggun yupu kekepnamasilarya. Yata deiyok ati, anggun yupu kum kekepmasil do, nun walwal ati ara, moronauk unmalume,” nyabuka, Elia birye nyalinmok.
Nyabukce ayupu ton dukdongobuka nyabuk. “Naie, winipmanto ‘Ninye deiyoknye dam nyapnun’ tenen, bisik tuba banmanye talak arye, Allah el si Yahweh, el Dib Kanye arye bobuka yuk mutuku delilbikiliba, ‘Tuba atikmala’ tenen, ninye deiyoknye Ahab dam binuka nyapniba, yalirye, yanuka dipdelamkiliba, kum eipkilyopura, ‘Ahab birye, ‘Tilila nyapmanilama,’ nyabuka na opnilyak’ tenen, nyapkine. Bukni na nio, na mitik talak arye Allah el si Yahweh ati, el siuk erepnin yangalamse, ani wini talak babye tuba si erenune. Ati biknilyame na nio. Nara an amu tam atonunye unye bukni, anyapmanilam ning ara, na ilile.
Winibukopura, Yahweh arye dopreipmok malaikat arye, Bileam biti asipdeyuk. “Anda yata ati, akeledai basam ara, like winilye yo kama arye, debuka opmalam do? Na kanye ara, ance, ‘Balak dam binirye, winipnamane,’ tenepmalam ara, ‘Dipkoprop malye winipminyak’ tenen, ati ara, na yanmance an binmanto bisik nirya, sekdongopmakine. Abisik noutamak tikmana deiyok ara, ‘El bisik sekniba kum binule’ tenen, winipmakine. Malye winipmanto upmalama deice arye, nati winilenmanilame.
Aning ati ara, nun nirya ati nyapsine. Allah arye, ‘Yesus tamubuka tukwak yanamla ati, atalak ani’ tenen, wepdeibuk sum min kum upmalye talak nirya noutamak arye, yata winin ning do nirya ati, “Aning telebe, aning malye,” nyabuka, yupu lipsisikuka kum bokeipnamlume. Aning nirya daupmaliba, ‘Nun Deiyoknye Yesus dan talak yanamle do?’ tenen, dinauk unamlulume. El yalyopura, elcuk yupu lipsisikuka bokeipnamsile. Yesus tamubuka yalyopura, aning-aning nirya ati, yupu lipsisikuka bokeipnamsile. Yata ning do nirya, kunuknak duknulamak ning nirya ara, dirinak deibuka, lak kipdeipnamle. Ninye sik talima noutamak arye, ‘Winipnamne, winipnamne’ tenen, deiyok ning duknulamak ning nirya ara, laka kipdeipnamsile. Tonok ning babye, kum duknupmantoe. Anirya laka danamle. Winibuka akunum laka kipdeipsilyopura, atalak aniryuk, Allah arye, ninye nirya ati, sik winilamice ning auplye touk, yupu lipsisikuka bokeipnamsile. Teleb winin ning ati ara, “Telebe,” nyapnamsile. Malye ning ati ara, “Malye,” nyabuka wenepnamsile.
Nunce nun mal olan nang akunum olanmabu talak ara, sikce batakmek bona, aning-aning nirya ara, ninye deiyok nang nong deice ongolamak cang jaket ap, tonda kain sarong cang ning atouk, urasin teleb ning tonok eipse. Aning ara, mutuku si Babilon, tonda Sinear nyanyak mutukunye birye, wiamuk ning ara, ubula dopropse. Tonda, aning ara dekna weik ning, perak ton, nukuka ikin ara, bitinye kilo gram eipsirye, dopropse. Tonda, dekna weik ning, emas ton, el ikin ara, tonok kilo gram bukni, noutamuk wilibuka deiamik ning, aning ton aupmokba, eipsirye, ubula dopropse. Aeipse ning nirya ati, na patapnukura, na ton dopropse. Aning nirya ara, dopropsirye, na cang baju arye pakubuka deipse ara, na tenda aik pum tam bukni, tuku palibukapsirye, atuku pum tam dongopse. Ara, na tenda aik pum tam tuku pum tam uk dungnubuka deipsirye, siknipdongopse. Akunuma kat weik ning emas ara, alip tam deipse bukni, perak ap, emas ap ara amu tamak moubuka deipseba, atuba ubuke. Akan birye, Yosua biti laka nyabuk.
Narye tenepse ning ara, ani. Pia teleb ning ara, nun dam aupsilye ninguk, talibuka unyap ning ara, kanye deiptibirye, telebuk unamabe. Bukni, nunce yuk nang ning ati, ‘Se, na ton weik tonun taliptinyeʼ tenen pantana ara, pia meme. Aning ara pia kum teninamabe. Awininyak ning nirya ara, talye nong kum ninguk wininyake. Winipmanto ara, kumanya mikip balyeba, tonoknye birye, ‘Kumanya talipnunʼ tenen, bikbik abuka dobolbitua babye, kumanya ara kum talipmanto ati, sikce, ‘Se aning ton taliptinyeʼ tenen, patalyeba teninyak ning ap, mikip arye pil donyak ning ap, nong pia kum upnamala ati, ‘Aning nirya ara, talye pil donyaka,’ tenepne.
Ati ara, Allah arye anggunti, akunum teleb kibuka melisiliba, aning-aning nirya weik auplyopura, kanye deibuka, pin-pin asa arye unamlume. Bukni, ikin ning anggun dam yaliba, kanye imun upsilyopura, pia moubuka teninamlume. ‘Nun ni Allah arye abitinye ning nirya ara, kintinibuka arepmasila ati, akunuma. Talye kanye bobuka telebuk unamabe,’ tenenamlume. Allah arye ikin ning ap, caknam ning ap, yuk-yuk aresulula deiyok ara, ani. Ara, ‘Sik tukwak mutuku unyak nang arye, aminyan talak upnamle ning ara, pia walwal uk unamake. Aning ara, kel bikmanto kum unamakʼ tenen, kwepdeipsuke.
Piblisite