Nyabikura, Yesus arye domon yupu deice arye tamubuka nyabuk. “Wini talak ninye moubuka kel bikna ati, dirina upsil ning ara, anggun ap mitik anunuk, anggun neika unamsile. Dirina tuba wapsilye talak ara, teleb bisik adiparyuk banamlulume. Aminyan talak ara, kunuknauk unamsila ati nyapsine. Kunuknak balinye bira, el bisik banmalya ara, moubuka kel kum biktue.
Penghotbah 11:8 - Eipomek8 Yata nang do, sik nirya arye, pia kanye deibuka ukirye, ‘Telebe,’ nyanamake. Tonda, sik anang kan-kan arye, sik kam un talak, lo ton ap tabakuka arelula deice arye, keting tamun weik tonun unyak nang babye, sik kanye pia delinyake. Bukni, sik babye moubuka teninamake. Ara, anggun amutuku noutam kam tuba unamlum talak ara, yambul anun ton tupa aupmal bukni, dibikcopura, aminyan talak pia kunuknak unamlum talak ara, yupa pia weik, nukmanto kum unamle. Tonda, tuba kam unamlum talak anggun dam yanganamle ning nirya ara, talye nong kum upnamle ninguk yanganamsile. Winipmanto ara, kumanya mikip arye donmalirye baliba, tonoknye birye, ‘Akumanya talipnamneʼ tenen, mikip arye bikbik abuka bitua babye, akumanya ara, kum talipmanto ning ati, aning ara, nong pia kum upnamle. Talyeuk winilule. Gade chapit la |
Penghotbah 11:8
32 Referans Kwoze
Asum ara, dua kunukmiting abuka, inipdopnamle. Dirina ton pia kum upnamle. Tonda yuk karin mutuku yin talin nang arye, sul kwising yupa weik ulamle atonun, yin talin nang babye atonun, yupa pia weika arye, mal olan dam bikirye, amutuku-amutuku nirya singipdongopnamake. Ara, winipmanto ning ara, dua sekdoba bobalirye, mutuku deice palilamla touk upnamake. Aning ara, minop talak arye, aning atonun ton kum winibukba, ninye arye eibuka, kum bikinyak ning winipnamle. Awinipnamle ning ara, yuk dotalak babye, pia tonap tamubuka kum winipnamle. Allah tenebuk talakuk, winipnamle.
Ati ara, Allah arye anggunti, akunum teleb kibuka melisiliba, aning-aning nirya weik auplyopura, kanye deibuka, pin-pin asa arye unamlume. Bukni, ikin ning anggun dam yaliba, kanye imun upsilyopura, pia moubuka teninamlume. ‘Nun ni Allah arye abitinye ning nirya ara, kintinibuka arepmasila ati, akunuma. Talye kanye bobuka telebuk unamabe,’ tenenamlume. Allah arye ikin ning ap, caknam ning ap, yuk-yuk aresulula deiyok ara, ani. Ara, ‘Sik tukwak mutuku unyak nang arye, aminyan talak upnamle ning ara, pia walwal uk unamake. Aning ara, kel bikmanto kum unamakʼ tenen, kwepdeipsuke.
Anggun ni koproba Allah Yahweh, elce nyamuk sum, tamubuka kunukna arepnamle talak aryuk, Allah el tibuk, si erenalume. Kunukmiting aplyeba, anggun weik mutuku kon deice kwepmunyak arye, anggun yan dum min kum dukmasilye talak aryuk, anggun si erelulum Allah ara, el si erepmunce, ‘Elda pia telebe,’ nyanamlulume. Anggunce, ‘Nun dirina ara, dan tam arye yanamle do?’ tenen, kintinibuka dinamlum bukni, Allah elce tamubuka, “Asum ara, kunukna deipnamle. Malye uplye ati, asum noutam ara, pia kunukmiting,” apnamle.
Nong kum upnamle ning, pia talye-talye uk wininyaka ati, na kanye arye, ‘Wininamabe,’ tenepmana ara, nyapnusine. Ara, anang nirya ara, moubuka tenina kumce, pia kanye deibuka unamake. Tukwak mutuku im sirya, mutuku sirya nirya unyak nang nirya arye, talye kanye bobikirye, din dina ap, mek dina ap, tonda talye kanye deipdanuka un ninguk unamake. Winibikcopura, tukwak mutuku tuba kam unyakce, ikin pil donamak talak nirya ara, din dina ap, mek dina ap, unyakce, kanye deipdanuka un ning ap, pia unamake. Allah arye tukwak nang kam una ati lo tuba aresilye talak ara, winibuka unamake. Na kanye ara, teleb un ning ara aning anyak tenepne.
Winibuka unyak bukni, narye kel bikse ning ara ani. Sik malye ning talibuka unyak nang kan-kan arye, tonoknye birye malye un ning nirya ulul ning ara, yupa pia weik seratus arye malye wililucuk, tuba kam ulule. Tonda el una ati lo ara, pia weik tonun upnamle. Bukni, na kele, aminyan sirya talak ara, ikin weik ning el nong deice yanuka upnamlarya! Bukni, yata nang do nirya, Allah arye, Aning ara wininamlume, aning ara pia kum wininamlume,’ nyapdeiamsuk yupu, moubuka talibikirye, dipkoprob telebuk ubikcopura, aminyan sirya talak ara, sikda tuba telebuk unamake. Sik anang arye Allah ati, Elda pia mambul weikʼ tenen, ilil unyaka ati, aminyan sirya talak ara, Allah arye sikti, teleb kipdeipliba, sikda tuba telebuk unamake.
Tonda na kele. Yata nang do nirya, sikce, ‘Yupu pia weik tonun ton tabakuka nyanamne tenebikirye, nyaptinga babye, aning deice arye, yuk nang nyanyak yupu kum sektinge. Yupu weik tonun tabakuka nyabikirye, nong una kum yupu, talye-talye yupu nyaltakanyake. Ati ara, ‘Yupu weik tonun ton tabakuka nyapniba, yuk nang arye kekenamake,’ tenena pia meme. Winipmanto ara, ‘Kumanya ati talipnunʼ tenen, piribuka dobolbalamaka atonun ulula ati, winina nirya ara, talye wininyake tenepne. Aning babye, nong pia kum upnamla ati, yupu weik tonun nyana ara, pia kum nyanamlume.
Ninye tonok ton, el kam una ati keting tamun ara, seribu uptua babye, elce kanye deibuka kum utopura, elda talye ning atonun ulule. Aning atonun, el kam una ati keting tamun ara, seribu tonap uptua babye, elce kanye deibuka kum uptopura, ‘Elda talye ning atonun ulule,’ tenepne. Na kanye ara, ‘Dibinyak mapu ara, mitik ikin unyak bukni, bona weik talilinye bira, ‘Na talenun ning kum danilyakʼ tenene, ikin pia weik ulule,’ tenepne. Bukni, winiryuk deipmakce talak aryuk dibinyak mapu babye, bona talinyak nang babye, kam tuba unyap nang babye, nun nirya akunum dibibyopura, tonok mutuku binuka upnamabe. Akunum diamik nang unyakak uk binuka upnamabe. Ati ara, nun nirya neiktoto uka.
Awelnye bira, ninye deiyoknye kibukabukce, amutuku taleamuk talak ara, elce talibuka ulamuk mutuku noutam ara, amutuku ulamik nang nirya ara, el nyalamuk yupu moubuka kekelamikce, elti, dobolbalamik. El yupu kekelamik nang ara, yupa pia weik ati, kum nukmanto ulamikba, eipsirye bikse. Winilamik bukni, sik nirya teleb ubuka daulamika ani, aminyan talak ara, yuk nang ton yangalnamakce, awelnye nyalul yupu ara, ‘Nun likʼ tenen, pia kum kekenamakce, anye biti si erebuka kina kumce, bataknamake. Na kanye ara, aning babye, pia talye uka. Aning ara, pia diba aning ara, nong pia kum upnamla atia. Aning ara, talye-talye ning, nong kum ninguk ulule. Winipmanto ara, kumanya mikip arye don maliba, ‘Aning talipnuyapʼ tenen, bikbik abuka dobolbatinga babye, kumanya ara, talipmanto kum ning ati, awininyaka ara nong kum upnamle! Aning atonun ara, talye ning uka.
Ara, ton nang arye, sik kam unyak talak nirya ara, sik tonok unyake. Sik anang arye, mapu ton delina kumce, talye urdemuk unyake. Tonda, sik kilapu ara, mi delina kumce, urdemuk pia daunyake. Ati ara, sikce mapu delina pia kumce, talye you kilapu unyake. Ati, sik mapu ton kum delinyake. Tonda, sik kwit capu nang ap, sik weit capu ap, sik du yapu ap, sik mapu silip ap, pia kum unamak ati ara, anang bicoe. Sik yuk unyak bukni, sikda pia mikip aryuk, ikin pil tuba-tuba dokirye, dikdik kum senyake. Tonda, sik pil weik donyaka deice arye, bona ap, dengna weik ning ap, weik tonun taliptinga babye, sik talima noutam telebuk kum unamake. Deiyok ara, ani. Winipmanto ara, kumanya mikip arye donmaliba, ‘Aning talipnuyapʼ tenen, bikbik abuka dobolbitinga babye, kumanya ara, talipmanto kum ati, aning ap, mikip arye pil donyak ning ap ara, nong kum upnamle! Aning ara, talye unauk ati, sik talibuka unyak ning yala-yala nirya ara, pia kum boulule. Anang ara, winibuka upnin bakirye, ‘Se, nara, dikdik sena kumce, ikin piluk dopnin banmanya ani, ‘Bona weik tonun doproptinya babye, na bidamnye kuma ati, yatanye biti melibuka areptiniba, kanye deipnamnil do? Kume ati, yata deiyok ati, ikin pil tuba donun do? Apil donuna ara, nong kum ninguk ulula ati, talyeuk ulule,’ tenenyake. Ati ara, narye nyapsine. “Aning-aning nirya ara, kumanya mikip arye donmaliba, ‘Aning talipnuyapʼ tenen, bikbik abuka dobolbitinga babye, kumanya ara, kum talipmanto ning ati, aning ap, mikip arye pil donyak ning ap, nong kum upnamle! Aning nirya ara, talye un ninguk ulula ati, apil donamna deice arye, kanye deibuka teleb kum unamne,” tenebikirye, moubuka kum bikinyake.
Tonda, Allah ati diba tenebuka ululnye bira, Allah arye, Winipnamake,’ tenelul touk winiplinye tonok, Allah el kanye deiplirye melilule. Ara, Allah arye, atonye tonok, weik kel bikna deiyok ning babye, moubuka teneplirye, teleb kibuka pil don kel bikina babye, tonda teleb un ning babye, kanye delina deiyok ning babye, aning nirya ara arelule. Bukni, Allah elti, diba kum teneplirye, malye un ning tuba ululnye bira, Allah arye ikin uning arelule. Ara, atonye birye, ikin pil dolamlirye, bona tonok imun kanye bobuka, ikin unmalibuk pil doplirye, aning nirya bulubuka delilule. Bukni, anye bira, adeililul ning ara, aminyan talak Allah arye dobuka, elti, diba tenelulnye uk tabakuka arelule. Allah ati, diba tenena kumce, ikin pil dolamlinye bira, aning nirya kum arenamle. Ati, na kanye ara, ninye tukwak nang tonok ikin kanye bobuka pil donyap ning nirya ara, talye-talye atibuk pil donyabe. Aminyan doupnamle talak ara, dipkoprob nong teleb kibuka kum upnamlarya. Winipmanto ara, kumanya dolamlyak, ninye arye, ‘bikbik abuka bibirye, kum mikip taliptibyeʼ tenen, ulamak touk unyabe tenepne. Peterena Deiyoknye birye nyabuk.
Yuk nang aryuk na taleamse ning dopropnamaka bukni, yatanye birye biktu do? Na punupnamnilanye bira, weik kel bikamlinye unamle do? Pia walwalnye unamle do? Bukni, na kam ulamse talak mikip arye talibuka akunum pil dolamse ning ap, weik kel bikna deice arye ulamse ning ap nirya ara, el anye biryuk talibuka unamle. Winipnamla babye, doyanamle talak ara nong uplyeba, teleb upnamle do? kume, nun walwal ati, ‘Aning nirya babye, talye-talye uk ulule,’ tenepne.
Aning nirya tenipdesa ati ara, utenepse. ‘Se, na kam ununa ara deiyok ton kum ati, tukwak mutuku ulye ning nirya ara na like. Talye tonok unune, yuk ton kume. Aunun ning nirya ara, doyanamle talak ara, kanye kum deipnamnil ati, tonda deiyok kum upnamla ati, pia talye atibuk unune. Winipmanto ara, kumanya dopnin balamle ning atie, ninye arye, ‘Aning doptaliptinyeʼ tenen, pirilamak atonun unune. Aning ara na like,’ tenepse.
Ati ara, narye tenipdese, ‘Se, bita tenena kumce, pia walwal arye ululnye, el dam yangalul ikin ning ara, na babye dopropnamnarya. Aning ati ara, nara weik kel bikna deiyok ning kel bikamse ning ara dan do? Aning nirya kel bikamsa deiyok ning ara, yata ati do?’ tenepse. Winilula ati ara, aning nirya tenipsirye utenepse. ‘Kume, weik kel bikna deiyok ning babye, aminyan dotalak ara, teleb kum kipdeipnamsil ati, deiyok ara pia kum upnamle,’ tenepse.
Sikda min talak ara, tukwak mutuku noutam dirinak ulamik bukni, Allah arye anang dirinak arye dopdeiplyeba, unyakak binuka unamake. Ara, Allah arye, amalye unyak nang ara, kam tuba unyak nang unyak mutuku nirya dam arye, donoklyeba, pia pera binuka unamake. Ara, akunum dibikcopura, pia unyakak binuka unamake.
Tonda, sik amalye unyak nang ara, ‘Se, nun dipnamap talak ara, yata talak do?’ tenenyake. Tonda, ‘Se, yu nang arye, parang ya arye opsikceba, dibibyeura, talye bai im tam lakuka balamle maka arye, akunum kintinibuka disulula ati, opsikceura, nun dibibyeba, amaka arye dipnamsil’ tenen, ilil weik usulule. Akunum kintinibuka disinyake. Diba, amalye wininyak nang ara, ‘Se, dipkoprob pia kuna upnamsile. Ara, kanye imun nun dam yanuka upsilyeura, ikin weik unamabe!’ teninauk unyake.
Atonun, amutuku noutam ara, dirina ton pia kume. Kunukuna uk ubuk mutuku noutam arye, amutuku noutam ara, mania kanye bobuka, olana ap, walana ap, malye-malye winina ap, mutuku ulule. Dan sukum do, amutuku noutam nirya ara, dirina ululak ara kum bukni, kunukdongobuk sukumak binamne. Ayupu nirya ara, Ayub birye nyabuk.
Ati ara, na kanye ara, ‘Pia teleb un ning ara ani,’ tenenune. Ara, nun nirya ara, talye kanye deibuka, din dinauk unamabe. Tonda, kanye wangalamak mek ara, talye luparabuka dinauk unamabe. Deiyok ara, Allah elda, anggun wininamlum ning nirya ara, akunum bikamuka ati, ‘Dawininamake akunuma,’ tenelule tenepne.
Anggun talilulum ning noutamak arye bokuka, ninye tekbarye atonun ap, tonda ninye pinbarye atonun ap, bokuka arepnamlume. Wininamluma deiyok ara, ani. Ara, aminyan talak weik ikin upnamsil ning ara, ‘Atalak ara, aikin ning yanamle. Yuk talak ara, aning yanamle’ tenen, kel kum biktuma ati nyapsine. Ara, anggunce, anggun ning koproba bokuka yuk nang ati, melibuka arepmunyopura, aminyan talak anang arye, anggun ikin ning dopropmunye talak, anggun arelamlum nang arye melipnamsiaka ati nyapsine.
Sik arye pia kum unamne. Ara, ninye dibikirye, akunum diamik nang binuka unyak mutuku dam ara, pia kuna weik ululak, na babye minop binamnarya. Amutuku noutam binyopura, akunuma. Tamubuka amutuku kum yanamne. Pia ati binamne. Asukum ara, malye mutuku kunukukak ati, pia kunukulule. Ara bicoe. Ati, ‘Amutuku min kum binamnye talak ara, ance lubakibuka, teleb teneptum toura, teleb uka,’ tenepne.
Nun ninye dibinyaba ara, atonun unyabe. Ara, dibipyopura, tuba tamubuka kam kum buktibye. Im tuba upnamle talak ara, akunum dipmakce nang ati, yuk nang arye tamubuka tonap kum elinamake. Im noutamak ulul ning nirya, kum uplyopura, diamikce ninye tamubuka kam buknamak bukni, aning min kum winipmalye talak ara, pia mabuka tunimanauk unamake.
Piblisite