Aning winipmanto ara ani. Ara, kumanya mikip, like tonok talak arye, pu abuka yalirye, adiparyuk kum danalamle touk, nun tukwak mutuku unyap nang nirya ara, minopce dibinyabe. Tonda, keting winiryuk beren tam talak deiplirye kanya, like tonok talak aryuk, tukwak uaplya ani, adiparyuk kum danalamle touk, nun tukwak mutuku unyap nang nirya ara, minopce dibinyabe. Kam pia kum unyabe.
Penghotbah 1:2 - Eipomek2 Peterena Deiyoknye birye, el kanye aryuk, ayupu nyabuk. “Yata yupu do, yata un ning do nirya ara, tia ninguk ulula ati, el nong deiyok noutam ning ton, pia kum upmasila ati, aning nirya ara, talye ning uka,’ teneptibya. Elce, ‘Yata ning do nirya, tukwak nang arye wininyak ning ap, teninyak ning ap ara, deiyok noutam ton, pia kum upnamsila ati, tia ninguk ulula ati, aning nirya ara, talye ning uka,’ teneptibye,’ tenebukce nyabuk. Tonda, ‘Nun kam unyaba ara, talye atibuk unyabe. Anirya ara, deiyok noutam ton, kum upnamle ati, tia wininyap ning nirya ara, talye ning uka,” nyabuk. Gade chapit la |
Penghotbah 1:2
23 Referans Kwoze
Pia minop talak, deiyok kouamuk talak ara, aning-aning nirya ap, dipna ap, lyuna ap, malye winina ap, kum uamuk. Bukni, wini talak ara, tukwak mutuku ulul ning aning-aning nirya ara, dipna ap, lyuna ap, malye winina ap noutam akuk ulule. Tukwak mutuku ulul ning nirya ara, talyauk ulule. Nong kum upnamle ninguk ulule. Ulula deiyok ara, Allah arye tukwak ulul ning nirya wenena ati, malye yupu nyabuka wibukba, talyauk ulule.
Yata nang do nirya, ‘Yo bok ton pia weik tonun doproptinyeʼ tenen, sik asing labukabikirye, epra banyak nang ara, sik yo bok weik tonun doprobikca babye, sikce, ‘E, akunuma,’ tenen, sik kanye kum delinyake. Tonda, aning atonun, bona talina atibuk motona talin nang atonun ubuka elulnye bira, Aning ara pia weik tonun taliptinyeʼ tenen, elula deice arye talilye ning ara, weik auptua babye, kanye pia kum lonamle. Aning nirya ara, talye nong kum unamle. Winipmanto ara, kumanya mikip arye peiyang-peiyang apliba, tonoknye birye, ‘Aning talipnunʼ tenen, bikbik abuka dobolbitua babye, kumanya ara kum talipmanto ati, atenen ning ap, mikip arye pil dolye ning ara, nong pia kum upnamle! Aning nirya ara, talye ning diamuka.
Na peterena deiyoknye birye nyapne. Na kanye tenenun ning ara, nyapnukine. Ara, nun tukwak ninye nirya arye wininyap ning ap, talye tukwak mutuku ulul ning ap nirya ara, talye-talye ninguk ulule. Deiyok ton pia kume. Tonda, nun tukwak nang arye, pil donyap ning nirya ara, talye-talye atibuk pil donyabe. Nong ton kum upnamsile. Nun tukwak ninye nirya ara, minopce dipna uk unyaba ati ara, ayupu nyapkine.
Tonda, Allah ati diba tenebuka ululnye bira, Allah arye, Winipnamake,’ tenelul touk winiplinye tonok, Allah el kanye deiplirye melilule. Ara, Allah arye, atonye tonok, weik kel bikna deiyok ning babye, moubuka teneplirye, teleb kibuka pil don kel bikina babye, tonda teleb un ning babye, kanye delina deiyok ning babye, aning nirya ara arelule. Bukni, Allah elti, diba kum teneplirye, malye un ning tuba ululnye bira, Allah arye ikin uning arelule. Ara, atonye birye, ikin pil dolamlirye, bona tonok imun kanye bobuka, ikin unmalibuk pil doplirye, aning nirya bulubuka delilule. Bukni, anye bira, adeililul ning ara, aminyan talak Allah arye dobuka, elti, diba tenelulnye uk tabakuka arelule. Allah ati, diba tenena kumce, ikin pil dolamlinye bira, aning nirya kum arenamle. Ati, na kanye ara, ninye tukwak nang tonok ikin kanye bobuka pil donyap ning nirya ara, talye-talye atibuk pil donyabe. Aminyan doupnamle talak ara, dipkoprob nong teleb kibuka kum upnamlarya. Winipmanto ara, kumanya dolamlyak, ninye arye, ‘bikbik abuka bibirye, kum mikip taliptibyeʼ tenen, ulamak touk unyabe tenepne. Peterena Deiyoknye birye nyabuk.
Yuk nang aryuk na taleamse ning dopropnamaka bukni, yatanye birye biktu do? Na punupnamnilanye bira, weik kel bikamlinye unamle do? Pia walwalnye unamle do? Bukni, na kam ulamse talak mikip arye talibuka akunum pil dolamse ning ap, weik kel bikna deice arye ulamse ning ap nirya ara, el anye biryuk talibuka unamle. Winipnamla babye, doyanamle talak ara nong uplyeba, teleb upnamle do? kume, nun walwal ati, ‘Aning nirya babye, talye-talye uk ulule,’ tenepne.
Aning nirya akunum winilamse ning ara, aminyan yuk talak ara, tonap tenipdese. Ara, ‘Na pil yala nirya akunum domse ning ap, tonda apil yala nirya ara, na mikip arye dolamse talak ara, dikdik ulamnuka ati, tamubuka bita dipdesirye tenipdese. Winipsirye, aning nirya eibuka, bita biksirye, tenepse ara, ‘Kume, aning nirya ara, talye tonok pil dolamse. Nong pia kum upnamle deiyok ara, pia ton kume. Winipmanto ara, kumanya dopliba balamle ning, ninye arye, ‘Aning doptaliptebeʼ tenen, pirilamak atonun ulamse,’ tenepse. Keting im noutam daulamlyeba, ninye tukwak mutuku deice unyabak, mutuku sirya, im sirya nirya ara, dotalak arye teleb kipdeipsutu ning ara, nong kum upnamle atia.
Tukwak nang nirya ara, yata yala pil don ning nirya ara, sikda, ‘Nong teleb kipnamsilarya tenebikirye sik kam tuba ulamikce talak arye, mikip arye pil donyaka deice arye, sik anang nong deice, uk dina ap, ikin un ning ap, kanye ikin kilina uk unyake. Tonda, sik anang lukunyan talak mapmacak babye, pia kum maluk unyake. ‘Na pil dopmana ara, teleb upnamle do? Talye pil doplopnamne do?’ tenen, tuba teninauk unyake. Na tenepmana ara, ‘Aning nirya ara, talye tonok ulule. Do upnamle talak ara, dipkoprob nong teleb kibuka kum upnamle,’ tenepne.
Aning nirya tenipdesa ati ara, utenepse. ‘Se, na kam ununa ara deiyok ton kum ati, tukwak mutuku ulye ning nirya ara na like. Talye tonok unune, yuk ton kume. Aunun ning nirya ara, doyanamle talak ara, kanye kum deipnamnil ati, tonda deiyok kum upnamla ati, pia talye atibuk unune. Winipmanto ara, kumanya dopnin balamle ning atie, ninye arye, ‘Aning doptaliptinyeʼ tenen, pirilamak atonun unune. Aning ara na like,’ tenepse.
Yata nang do, sik nirya arye, pia kanye deibuka ukirye, ‘Telebe,’ nyanamake. Tonda, sik anang kan-kan arye, sik kam un talak, lo ton ap tabakuka arelula deice arye, keting tamun weik tonun unyak nang babye, sik kanye pia delinyake. Bukni, sik babye moubuka teninamake. Ara, anggun amutuku noutam kam tuba unamlum talak ara, yambul anun ton tupa aupmal bukni, dibikcopura, aminyan talak pia kunuknak unamlum talak ara, yupa pia weik, nukmanto kum unamle. Tonda, tuba kam unamlum talak anggun dam yanganamle ning nirya ara, talye nong kum upnamle ninguk yanganamsile. Winipmanto ara, kumanya mikip arye donmalirye baliba, tonoknye birye, ‘Akumanya talipnamneʼ tenen, mikip arye bikbik abuka bitua babye, akumanya ara, kum talipmanto ning ati, aning ara, nong pia kum upnamle. Talyeuk winilule.
Tonda na kele. Yata nang do nirya, sikce, ‘Yupu pia weik tonun ton tabakuka nyanamne tenebikirye, nyaptinga babye, aning deice arye, yuk nang nyanyak yupu kum sektinge. Yupu weik tonun tabakuka nyabikirye, nong una kum yupu, talye-talye yupu nyaltakanyake. Ati ara, ‘Yupu weik tonun ton tabakuka nyapniba, yuk nang arye kekenamake,’ tenena pia meme. Winipmanto ara, ‘Kumanya ati talipnunʼ tenen, piribuka dobolbalamaka atonun ulula ati, winina nirya ara, talye wininyake tenepne. Aning babye, nong pia kum upnamla ati, yupu weik tonun nyana ara, pia kum nyanamlume.
Ara, ton nang arye, sik kam unyak talak nirya ara, sik tonok unyake. Sik anang arye, mapu ton delina kumce, talye urdemuk unyake. Tonda, sik kilapu ara, mi delina kumce, urdemuk pia daunyake. Ati ara, sikce mapu delina pia kumce, talye you kilapu unyake. Ati, sik mapu ton kum delinyake. Tonda, sik kwit capu nang ap, sik weit capu ap, sik du yapu ap, sik mapu silip ap, pia kum unamak ati ara, anang bicoe. Sik yuk unyak bukni, sikda pia mikip aryuk, ikin pil tuba-tuba dokirye, dikdik kum senyake. Tonda, sik pil weik donyaka deice arye, bona ap, dengna weik ning ap, weik tonun taliptinga babye, sik talima noutam telebuk kum unamake. Deiyok ara, ani. Winipmanto ara, kumanya mikip arye donmaliba, ‘Aning talipnuyapʼ tenen, bikbik abuka dobolbitinga babye, kumanya ara, talipmanto kum ati, aning ap, mikip arye pil donyak ning ap ara, nong kum upnamle! Aning ara, talye unauk ati, sik talibuka unyak ning yala-yala nirya ara, pia kum boulule. Anang ara, winibuka upnin bakirye, ‘Se, nara, dikdik sena kumce, ikin piluk dopnin banmanya ani, ‘Bona weik tonun doproptinya babye, na bidamnye kuma ati, yatanye biti melibuka areptiniba, kanye deipnamnil do? Kume ati, yata deiyok ati, ikin pil tuba donun do? Apil donuna ara, nong kum ninguk ulula ati, talyeuk ulule,’ tenenyake. Ati ara, narye nyapsine. “Aning-aning nirya ara, kumanya mikip arye donmaliba, ‘Aning talipnuyapʼ tenen, bikbik abuka dobolbitinga babye, kumanya ara, kum talipmanto ning ati, aning ap, mikip arye pil donyak ning ap, nong kum upnamle! Aning nirya ara, talye un ninguk ulula ati, apil donamna deice arye, kanye deibuka teleb kum unamne,” tenebikirye, moubuka kum bikinyake.
Tonda, yuk ning ton tenipsi ning ara, ani. Ara, na kanye ara, yata nang do nirya, sik mikip arye pil donyak ning ara, winibuka tenepse. Ara, sikcuk, ‘Sik yuk nang arye talinyak ning ara, na babye ton taliptinyeʼ tenen, sik kwit capu arye do, yuk talya daunyak nang arye do, anang arye talibuka ulamne ning tonok tenekirye, ‘Na ton, aning nirya ara taliptinyeʼ tenen, mikip arye pil donyake. Aninguk tenebuka ulamikce ning nirya ara, talye nong una kum ninguk teninyake. Winipmanto ara, kumanya mikip arye lulukunmaliba, ‘Aning talipnunʼ tenen, bikbik abuka dobolbatinga babye, kumanya ara kum talipmanto ati, atenen ning ap, mikip arye pil donyak ning ara, nong kum upnamle! Aning nirya ara, talye uka.
Nun tukwak ninye ap, talye kam ulul ning ap, sirya talak winipnamsil ning ara, atonun winipnamsile. Ara, tonok ning diplyopura, ton ning babye dipna uk upnamake. Ati ara, nun bidamang, talye kam ulul ning babye, isin unyak ning ap, kam una deiyok ning ap atonun usulula atia. Anggun babye, nun babye, mikip mitik tonunuk usulule. Ati, tukwak ninye arye tenenyaba ara, ‘Ninye ara, nun kam una ap, mikip ap, weik mambule’ tenen, unyap bukni, ‘Sik talye kam ulul ning ara ikin kume,’ tenenyabe. Bukni, talye kam ulul ning ap, nun ninye ap ara, kam unyaba deiyok ning ap, isin usulula ap ara, ato touk usulule. Nun nirya dipnamabe. Ati, na kanye aniryuk nyapne, ‘Aning-aning nirya ara, talye urdemuk ulule. Nong noutam ara, weik mambul ton kum upmale,’ tenenune.
Winibuka tenepsa deiyok ara, ani. Ara, ninye arye, weik kel bikna deiyok ning kel bikna deice arye, moubuka teneplirye, el pil talibuka kel bikna ap, mikip ap deice arye, pil teleb kibuka donamne, tenebuka pil dolamik atonun kibuka, nong teleb kililule. Bukni, sirya tam ara, el amikip arye pil talibuka dolamle ning nirya ara, adiparyuk batakuka dibina uk ulule. Akunum diplyopura, atalak ara, el pil pia kum dolamlinye bira, talinye birye aning nirya ara doproplirye, elcuk aning nirya talibuka ulule. Ati, na tenepse ara, ‘Apil donyap ning nirya ara, dipkoprob dotalak nong teleb ning ton kum upnamla ati, apil donyap ning nirya ara, talye-talye atibuk unyabe. Aning babye, pia malye tenepse.
Ati, anggun wel nang ap, ninye dona kum kilapu ap ara, wisi min kum danmamunye talak nirya ara, anggun talima noutam arye, ‘Se, yata wiripnamnil do? Tonda, anggun talima noutam arye, ‘Na tenyamse ning nirya ara, aminyan talak, talye karin arye kum danamnil do?’ tenelulum ning ap, tonda, ‘Se, na nong noutamuk dinulul ning ara, yata ati do?’ tenelulum ning nirya ara, yakuka dopkwetepmunce, tuba tenina meme. Bukni, aning ton teninamlume. Anggun wel tuba unamlum talak ara, minopce kum danamsile. Aning nirya babye, nong kum upnamle ning, ‘Kumanya doliba, telebʼ tenen, bikbik abuka dobolbana meme, aning ara, pia talye ninguk ulula ati, nyapsine.
Awelnye bira, ninye deiyoknye kibukabukce, amutuku taleamuk talak ara, elce talibuka ulamuk mutuku noutam ara, amutuku ulamik nang nirya ara, el nyalamuk yupu moubuka kekelamikce, elti, dobolbalamik. El yupu kekelamik nang ara, yupa pia weik ati, kum nukmanto ulamikba, eipsirye bikse. Winilamik bukni, sik nirya teleb ubuka daulamika ani, aminyan talak ara, yuk nang ton yangalnamakce, awelnye nyalul yupu ara, ‘Nun likʼ tenen, pia kum kekenamakce, anye biti si erebuka kina kumce, bataknamake. Na kanye ara, aning babye, pia talye uka. Aning ara, pia diba aning ara, nong pia kum upnamla atia. Aning ara, talye-talye ning, nong kum ninguk ulule. Winipmanto ara, kumanya mikip arye don maliba, ‘Aning talipnuyapʼ tenen, bikbik abuka dobolbatinga babye, kumanya ara, talipmanto kum ning ati, awininyaka ara nong kum upnamle! Aning atonun ara, talye ning uka.
Ati ara, narye tenipdese, ‘Se, bita tenena kumce, pia walwal arye ululnye, el dam yangalul ikin ning ara, na babye dopropnamnarya. Aning ati ara, nara weik kel bikna deiyok ning kel bikamse ning ara dan do? Aning nirya kel bikamsa deiyok ning ara, yata ati do?’ tenepse. Winilula ati ara, aning nirya tenipsirye utenepse. ‘Kume, weik kel bikna deiyok ning babye, aminyan dotalak ara, teleb kum kipdeipnamsil ati, deiyok ara pia kum upnamle,’ tenepse.
Winipmanto ning ton nyapnukine. Ara, kel weik bikna kumce, wal-waluk ulamtunye bira, kel weik ning ara, dipkoprob pia kum biktue. Ati, winipmanto ton, bai sakamtu keledai, kil basam arye, elcuk ninye mi deiptopura, adeice arye teniptibye. Atalak aryuk, kel kum bikmanto malye ulamtunye birye, weik duknyamtinga babye, kel biktue. Bukni, keledai basam arye, ninye mi pia kum dipmanto ati, atonun pia wal-waluk ulinye birye, kel weik bikin ning, dipkoprob kum kel bikmanto ulule.
Tonda, na taleamse mutuku noutam, Provinsi deiyok nang ap, tonda, yuk karin mutuku talibuka ulamik nang, Raja-Raja nang arye, na dam bobuka arelyangalamnik teleb dengna weik ning ara, emas ap, perak ap arelamnikba, narye aning nirya bulubuka delilamse. Tonda, na kanye delilana ati, mot nyan nang sal ap, kilapu ap, dopdeipsiba, sikce mot nyalamika deice arye, nati kanye teleb kililamnik. Aninguk kum bukni, tonda na patalamnukba, naryuk tenelamse touk, kilapu babye, yupa pia weik arye dolamse deice arye na kanye delilalamse.
Piblisite