Obaja 1:12 - Eipomek

¹² Anggun kayapu nang, sik Yehuda tam ulamik nang, ikin ning sik deice yayukba, dorobik talak ara, anggun Edom tam ululum nang arye, ‘Nun kanye ara, pia deibabe. Ikin doprobik ning ara, pia kum tenenamabe,’ tenyamlumce, anggunce nalibuka akutulamlume. Tonda, anggun kayapu nang, Yehuda nang, ikin ning dorobik talak ara, anggunce, ‘Merekuka ikin ning dopropmakeʼ tenen, kanye ara, pia kum deipnamtum bukni, anggunce kanye deiamlume. Tonda, anggun kayapu nang, sik Yehuda yala nang, ikin ning dobukabikce, kanye imun ubukaura, sik Edom mutuku nang arye, ‘Nun dam ara, ikin ning ton kum usilyeba, dolonyabe. Sikuk ikin ning nirya ara, yalyeba dolonyakʼ tenen, kanye erebuka, maknya kum kwalilamtum bukni, aning wilinlamlume.

Obaja 1:12 Referans Kwoze

Mika 4:11

Dipkoprop wini talak ara, yuk pera im sirya, mutuku sirya nirya, daunyak ninye arye, bulubuka, Yerusalem mutuku yakirye, ‘Aninye nirya opnamabe’ tenen, yanuka warikinamsiyake. Anggunda, amalye wininyak ninye arye, ‘Se, Sion mutuku ara, weik mambul mutuku nyanyak bukni, nunce amutuku nirya ap, amutuku noutam ulul ning nirya ara, malye kipdeipnamabe. Israel ninye arye, ‘Aning weik mambule’ tenen, Sion mutuku noutam duknubuka deiamik ning ap, Allah el si eren aik ap ara, nun asing koproba arye, mining dam elinamabe,’ tenenyake.

Yehezkiel 35:15

Ara, anggun kwang dakna ati, winipnamsine. Anggun Edom mutuku nang arye, Israel yala nang talilamik ning nirya ati, ‘Kume nuncuk aning alubuka dopropbibirye, nuncuk aning talibibyakarye, kanye deibuka unamabe,’ tenelamlume. Aning nirya ara, na Allah arye, anggun Israel nang ap, Yehuda yala nang ati, bokuka arepsirye, ‘Aning ara, sikcuk pia talinamake. Amutuku ara, sik ning diamuk unamleʼ tenen, arepse. Bukni, anggun Edom mutuku nang arye, na mapu Israel nang, sik mutuku alubuka doproplumba, akunum tunim anauk ubukopura, anggunce kanye deiamlume. Ati, Israel nang ap, sik mutuku ap, pia tunim anauk uamuk touk, narye anggun Edom mutuku nang ati, wenebuka opsinyopura, anggun babye, anggun mutuku noutam babye, pia kum kipdeipsinyopura, asik oldemuk upnamle. Tunim abuka, oldemuk upnamlarya! Narye, kum kipdeipsiniba, tunim anauk upsilyopura, Seir mutuku noutam ap, Edom mutuku noutam ap, unyak nang nirya arye, ‘Se, dipkoprob Allah Yahweh ara, eluk Pia Mikip Weik Deiyoknye ululaʼ tenen, na siuk Yahweh biknamake.

Amsal 17:5

Yata ninye do nirya, talye bona utotoa talina kum ninye ati, nalibuka akutunyak ninye ara, bona utoto talina kum ninye ati nalinyake. Bukni, winilamice deice arye, bona utoto talina kum ninye kwepdeiamuka deiyoknye Allah ati, malye nyalinyake. Aning atonun, yata ninye do nirya, bona utotoa talina kum ninye ap, yuk mutuku daunyak ninye nirya ap ati, kanye imun ning, sik damak yalyopura, ‘Aninye ara, ikin kanye bonyaka ara, merekuka ulule,’ tenebikirye, kanye delinyak nang ara, Allah arye awininyak ninye ati, ‘Dauplye,’ pia kum tenelule. Allah arye aninye sik wenena ati, dipkoprob wenebuka opnamle.

1 Samuel 2:3

Ati ara, anggun malye ululum ning ara, talye nyalulum yupu nirya ara, adiparyuk bataknamlume! Anggun erelan yupu deice arye nyalulum yupu babye, asukumuk deipnamlume! Ara, Allah Yahweh elda, dipkoprob aning-aning nirya ati, weik kel bikina deiyoknye ulule. Ati ara, Allah Yahweh elcuk, ninye nirya arye, sik unyak ning nirya ati, ‘Malye ning ani, teleb ning ara, aniʼ tenen, dipdebuka bikilisulule.

2 Peterus 2:18

Allah arye anang dobuka, pia kunuknak dongopnamla ara, talya urdem ati kume. Ara, atilila yupu nyaninye arye, “Nunda weik mambul ning winipnamabe,” nyabuka, talye yupu uk nyaltakanyakce, sik kanye erebuka kwalinyake dilanyaka atia. Tonda, talye tukwak ninye nirya ara, talima noutamak malye ning aupsuka anya arye, yuk ninye malye winin ning pataplibuk, tenenyak ning ati ara, atilila nang arye, nyanyake. “Kume. Winina ara, telebe uka,” nyanyake. Nyabica deice arye, yuk nang sik kanye lilonyake. Sikce talima lolonyak ninye ara, winiryuk deiyok kibuka diba tenepmak bukni, kanye min kum wisibuk nang ati nyapne. Anang arye, sik malye nang winilamak ning batakuka, ‘Diksukumuk unamap’ tenen, winiryuk deiyok kipmak bukni, talima wisina kum ninye ati nyapne.

Yudas 1:16

Sik anang ara, lik kanye bobikirye, epra bakirye malye nyabuka yaniltan ninye unyake. Ton anang ara, yuk nang ati dipnilibuka tuba-tuba tilila ati talya kisilinyake. Anang ara, sik kanye talima noutam malye ning patalamlye ninguk tenebuka unyake. ‘Yuk nang arye, sikda teleb nang, tenepnamsiyak’ tenen, sikce, sik badamnye ati erelanyakce kwalin yupu nyalilanyake. Anang ara, dipkoprop yuk nang ati bico tenena kum bukni, ‘Nun patapsilye ning arepnamsiak’ tenen, “Na ka, na ka, anda pia telebnye,” nyabuka talye pil ilitakanyake.

Mazmur 37:13

Bukni, sik amalye wininyak nang ati, Allah elcuk tenelya ara, ‘Akunum dipna dam unamak nang’ tenen, Allah arye amalye wininyak ninye ati, nalibuka akutulule. Ara, talye ati kume. Elce, ‘Aninye ati, ninye yupu lipsisikuka bokeipnirye, aninye wenebuka opnamne talak ara, akunum dam upmala,’ teneplirye, aninye ati, akutulule.

Mazmur 31:18

Se, na ni Allah Yahweh! Narye anti, ‘Naio melibuka lyepnilyame!’ nyabuka, engepnirye, anti morokununa ati, ‘Na on nang arye, yanuka opnikcopura, alye dakdanyak’ tenen, moropkine na nio. Bukni, sik malye ninguk talibuka, malye-malye winin ning atibuk, weik tonun wininyak nang nirya ara, ‘Ance sikti, wenepminba, alye weik dakdanamak’ tenen, moropkine. Tonda, sik yu nang ati, weik tonun wenepminyopura, sikce, ‘Se, yata wiripmasil do?’ tenen, teninauk ubikirye, imun kanye bobuka, uku bisik binamak mutuku, el si Sheol bitinge’ tenen, moropkine.

Mazmur 22:17

Winininyaka ati, na din ning kum lilbitinye. Din ning kum dinuna ati ara, bol malye upniliba, na yok nirya ara, akunum laka upniliba nuktinye. Nara, pia bol malye bonuna anya arye, yuk nang arye, ‘Se’ tenen, dininyake. Tonda, na mal olan nang nirya, na dam yanuka elininyakce, ‘E, bita merekuka ikin ulule’ tenen, malye yupu nyabuka, dinauk uninyake.

Ayub 31:29

Tonda, na mal olan nang, sik ikin ning doprobice talak ara, narye sikti, ‘Merekuka winipmake,’ tenelamtinyopura, Allah arye wenebuka opnutue. Tonda, sik dam ikin ning yatubuk, ara, ‘Merekuka winipmale’ tenen, kanye talima ereldalamtinyopura, Allah arye wenebuka opnutue.

Wahyu 13:5

Mem Kwatima Urasin Atonye birye, laut mekwen pum tam arye yayuk ning ati, mikip weik aribukba, aning arye weik kwalina yupu ap, el bidamang kanye aryuk tenebuka erelana yupu ap, Allah ati yanina yupu ap, weika arye nyalamukce, tukwak mutuku ning nirya talyamuk. Aning nirya talyamuk talak ara, wala yupa weik 42 wala deice arye aning nirya talyamuk.

Yakobus 3:5

Ayupu nyapmasin touk, nun ninye sitang ara, nun nong noutam mitik ninguk upsuk bukni, asitang arye kwalin yupu weik nyabica deice arye, malye ning weik usulule. Ton tenipdelulume. Weik yo kan-kan pamtu ak babye, dou mapturye, kel-kel abuka sesal leptu ura, tonok tong uku arye diniptingbuk, nirya uku diptue.

Lukas 19:41

Yesus arye ayupu nyabukce, bisik banmoka ani, Yerusalem mutuku asik dolamik dam biyukopura, amutuku dipdeyukce, bico ubuk ati, engenmok deice arye ayupu nyabuk.

Ratapan 4:21

Anggun Edom mutuku tam ululum nang ap, Uz mutuku ululum nang ap ara, sikce nunti, ‘E moubuka, sik Israel nang ara, akunum ikin weik deice arye unyake,ʼ tenebuka, akutusululum nang ara, aminyan talak kum kipnamlarya. Ara, Allah arye, teleb karin lo areplyeba, anggun dam babye, ikin ning ton areplyeba, dopropnamlum ca. Sik babye, yu mek dibikceba, mikip arye pil doplyeba, nong banang malamak touk upnamlum ca.

Yesaya 37:24

Ance ninye dopdeiamlumba, mok yupu nyalyanmika deice arye, na Allah Yahweh, aning nirya talenirye, mikip weiknye ulunua bukni, nati nalibuka akutunmanik. Ance nyapdeiamlume. Ance, “Nara ninye bukuka olban ning ati, el si kereta perang ara, yupa weik tonun deipsirye, weik mutuku dup welepsirye, iknapye tam Libanon mutuku noutam babye, weik mutuku deice tam welepse. Libanon mutuku noutam nirya ara, na patan ning talye alubuka dopropse!” nyaplume. Ara, ayupu deice an kanye erepdalumce, maknya kintinimince,” Urasin pia teleb kat wa mutmuta yo, pia teleb cang arye tiklamuk ning nirya ara, webuka sirya dakamse. Tonda, pia teleb wa mutmuta cang yo palpal tikamuk weik mutuku dup, ninye kum binmanto mutuku babye, narye amutuku welepsirye ayo webuka sirya dakamse,” nyaplume.

Mazmur 92:11

Diba na nio, malye wininyak nang weik daunyak bukni, ance nati, pia melinilyama deice arye, mikip kinulule. Winipmanto ara, sapi basam yim weik ning, el kisok deice tace belelamle ning, mikip ulye touk, ance nati, mikip kilinilyame. Tonda, ance, ‘Anye bira, ninye deiyok kibuka, na mapu Israel yala nang taliplirye, sik ninye deiyoknye unamle’ tenen, akunum wipnimince, aning lakilina ati, na kisok deice, minyak zaitun mek akunum likdeipnulume.

Mazmur 59:10

Se na nio, anda na mikip kelinilyamnye ulyama ati, ‘Yata talak arye melibuka lyepnamnil do?’ tenen, anti pia dinauk unamne. Deiyok ara, Allah an dam ara, yu nang arye kum opnitinga ati, weik keil aik atonun unulule.

Mazmur 54:7

Na on nang arye, pia malye winin ning weik tonun unyaka ati, Allah arye dipkoprob, sikti, oplirye, kwang daknamlarya! Diba na ni Allah, ance, ‘Winipnamne,’ nyabuka nyasilyam yupu nirya, dipkoprob winilyama ati, amalye winin nang nirya ati, opminyakarye, kum kipdeipnamlyame.

Ayub 18:20

Allah arye sik malye winin ning talibuka wininyak nang ati, akunum kum kipdeiplyeura, yuk-yuk mutuku nang, keting kumul balamle tam unyak nang arye, winiplyame nyabikceba kekebikirye, sik nirya ara, ilil weik upnamle. Tonda, aning atonun, keting panalyangan tam unyak nang sik nirya ara, aning eibikirye bikikceura, ‘Se’ tenen, ilil pia uplyeba, yok sirim taliplirye, lukdanuka berber apnamake.

Mazmur 35:15

Sik ikin weik ulamik talak ara, narye sikti, engelamse bukni, nara ikin weik ulamse talak ara, ayu nang nirya bulubikce, kanye deibuka ulamik. Kanye deibikopura, sikce, “Neika bulubibirye, anye biti, olbinamabe,” nyabuka, yupu talilamikce, kintinibik. Ton ninye ona ati, yu nang ara, na pia kum bikamse bukni, sikce ikin ning weik dobuka, batakna kumce, na nong deice pia deililamnik. ‘Winilamnikce, pia tuba-tuba opnuyapʼ tenen, pirinauk winilamnik.

Ratapan 2:16

Anggun Israel nang, anggun olan ninye, yuk mutuku nang nirya arye, anggun asok deice dipdesikirye, ‘Aning ara, pia malyeuk unyake,’ tenepsikirye, yu tenesinyake. Sik anang arye anggunti, si dirik-dirik apsikirye, nalibuka akutubuka nyasinyake. “Amutuku asik dobuka ulamikak ara, akunum obuka, kum kipdeibupu! ‘Asum ara, min yatuba, winiptibyeʼ tenen, pia dinauk ulamupu. Wini talak ara, anyaik malye uplyeba, adinauk ulamupu sum ara, asum akunum upleba, eibabe. Ati kanye deibabe,” nyanyake.

Yehezkiel 35:12

Tonda, aning nirya, narye winipsiniba, anggunce biknamnulume. Ara, na Allah Yahweh arye, anggun minop talak malye nyalamlum yupu ara, narye akunum kekebuka bikamsise. Ati, anggunce Israel yala nang ap, Yehuda yala nang ap ati, malye yupu weik tonun, nyabuka nalilamlum ning nirya ara, na akunum kekepse. Ara, anggunce, ‘Kume, Israel mutuku ulamik nang nirya ara, yuk mutuku nang arye, akunum obuka sirya dakmaka ati, tunim anauk upmala ati, sik talilamik ning ap, sik mutuku tuku ap nirya ara, nuncuk, talye luparabuka, alubuka doproptibye,’ nyalamlume.

Yehezkiel 36:5

Ati, na Allah Yahweh, aning-aning nirya talibuka deice tam, Pia Mikip Weik Deiyoknye birye, nyapnusin yupu kekeplulume. Ara, na weik arye, yu upniliba, sik Israel mutuku dana-dana unyak ninye nirya ap, tonda Edom mutuku unyak ninye nirya ap, anggun nirya ati, yu kanye bobuka nyapsine. Ara, anggun nirya wenebuka opnamsine. Derebuka opnamana deiyok ara, ani. Amutuku ninye nirya ap, Edom mutuku ninye ap arye, ‘Israel yala ninye talinyak mutuku nirya ara, maning teleb ubuka, palamle mutuku anya arye, nun kambing ap, nun domba ap arye, aning dinamaka ati, sik Israel ninye malye kibuka obibyopura, nuncuk amutuku nirya, dobuka talipnamabe’ tenen, kanye deiamikce, yupu sirikamika ani, Israel ninye taleamik mutuku, dalubuka dopromik.