Nehemia 2:4 - Eipomek

⁴ Nyapsiba, Raja arye, nati tamubuka nyapnuk. “Anda yata wiriptinye tenepmalam do?” nyabuka asipdenuk. Ninye deiyoknye birye asipnukopura, na kanye talima pum tam arye, Allah mutuku-mutuku nirya talibuka, im deice tam ululnye biti moropse.

Nehemia 2:4 Referans Kwoze

Amsal 3:6

Yata pil do nirya, dopmunyopura, Allah ati moropmunce donamlume. Tonda, yata wirin ning do nirya, ‘Allah melisilya deice aryuk apil donamabe,’ tenenamlume. Tonda, ‘Allah el si erena ati, apil donamabe,’ tenebuka unamlulume. Allah ati, si eremunyopura, elce, “Pia diksukum un bisik ara, ani,” nyabuka peterenamsile. Winipsilirye, anggun wininamlum ning nirya ara, telebuk ulinamsile.

Nehemia 1:4

Na kwit capu arye ayupu nyapnikba, kekepse ning ara, aning atibuk tenipsirye, tukwak bukuka engepse. Malye kanye bobuka engepsa ara, like tonok talak arye kume. Ara, asum-asum nirya din dina kumce, ikin kanye bobuka engelamsirye, im deice ulirye aning-aning nirya talilul Allah ati, mikip arye moropsirye nyapse.

Pilipi 4:6

Yesus nun dolyanamsil talak ara, akunum dam upsil anya arye, yata ning do nirya ati, ilil upsiliba, ‘Se, yata upnamap do’ tenen, teniltonauk kum unamlulume. Ilil upsiliba, teniltona kum unamlum bukni, aminyan winipnamsil ning noutamak nirya ara, Allah ati moronamlulume. Ara, Allah ati telebe nyabuka, anggun patapsilye ning nirya ara, lakak nyapmunce, Allah pia moronamlulume.

Nehemia 1:11

Ati ara na ni, nara an amu tam pil donunye birye, anti moropkin yupu ara, kekepnilyame. Tonda an mapu arye an si ati, pia kanye deibuka ukirye, ‘Elda pia mambule,’ nyabuka, an si erenyak ninye arye, sikce ton morokinyake. Sik moronyak ning babye, kekeplyame na nio. Na nio, aning nirya ara, na moropkin yupu kekepmince, ‘Arup sum ara, bico tenebuka melipnutume’ tenen, moropkine na nio. Ara, melipsiminya deice arye, ninye deiyoknye Raja, el dam binuka yupu nyapnyopura, ‘Elce kanye deipnuturye, kekepnutopura, telebe nyapnutue’ tenen, moropkine na nio,” Nehemia birye, Allah ati nyabuka morobuk. Aning nirya moropse talak ara, narye weik deiyoknye Raja Artahsasta, el mek makau boyangana deiyoknye ulamse. Nehemia birye nyabuk.

Markus 10:51

Yayukura, Yesus arye anye biti nyabuk. “Anda, ‘Yata wiripdeipnutu’ tenen, patapkilba, moropmanilam do?” nyabuk. Nyabukura, asing kuamuknye Bartimeus arye tamubuka nyabuk. “Naio, na asing arye aning-aning elina ati patanulule,” nyabuk.

1 Raja-Raja 3:5

Winilamuka ati, tonok lukunyan noutam ara, Salomo lengdar mabukba Allah el si Yahweh arye, Gibeon mutuku deice lak kibukba, Salomo eibuk. Atalak ara, Allah arye, “An tenepmalam ning nyapminba, dipkoprob arepnamkine,” nyabuk.

Ester 7:2

Sik neika din ning ap, anggur duk mek ap, Ester birye memepmok ning yanuka dinmarik talak ara, Raja Ahasyweros birye, ninye deiyok kil Ester biti asipdeyuk. “Anda yata ning patanmakilba, nati moropnamnilam do? Yata ning, ‘Moropnamane,’ tenepmalamak arye, moropnunilam do? Se, Ratu Ester, yata ning do nirya, an tenepmalamce, moropnunilama ara, kum bataknukine. Dipkoprop arepnamkine. Ara, ance moropnememnyopda, na taleamse mutuku, ‘Noutam ton bokuka arepnilyame,’ nyabuka, moropniminya babye, na talenun mutuku noutamak ton boknirye, amutuku noutamak bokuka, dipkoprob anti arepnamakine,” Raja Ahasyweros birye Ester biti nyabuk.

Ester 5:6

Birikopura, Ester birye anggur duk mek kintinibuka deipmok ning, dobuka dinmarik. Amek sikce dinmarik talak ara, ninye deiyoknye Raja Ahasyweros birye, Ester biti asipdeyuk. “Wini talak anda yata tenepmalamce, na dam moropmanilam do? An moropnunilam ning ara nyapnutumba, dipkoprob na arepnamkine. Moropniminyopura, na taleamse mutuku, ‘Noutam arye bobuka, aning ton arepnilyame,’ nyabuka moropniminya babye, na talenun mutuku noutamak arye boknirye, amutuku noutamak dobuka, dipkoprob anti ton arepnamakine,” Raja Ahasyweros birye, Ester ati nyabuk.

Ester 5:3

Ninye deiyoknye Raja Ahasyweros birye, Ratu Ester biti asipdeyuk. “Anda yata ning patanmakilba, na dam morolyanmanilam do? Yata tenepmalamak arye do? Se, Ratu Ester, yata ning do nirya, an moropnunilam ning ara, kum bataknukine. Dipkoprop arepnamkine. Moropniminyopura, na taleamse mutuku, ‘Noutam karin arye bokuka amutuku nirya arepnilyame,’ nyabuka moropniminya babye, na talenun mutuku noutamak arye boknirye, amutuku noutamak dobuka, dipkoprob anti arepnamakine,” Raja Ahasyweros birye Ester biti nyabuk.

2 Samuel 15:31

Ara, yuk nang arye Daud biti, “An melinanye Ahitofel ara, Absalom tam akunum kiprobuke. El ap, an mi Absalom ap, neiktoto ururake. El babye, ‘Raja Daud malye kipnamne,’ tenelule,” nyabik. Nyabikba, Daud kekebukce, Allah ati morobuk. “Na ni Yahweh, Ahitofel tenepmalce, Absalom ati, ‘Winipnalame,’ nyapnamle ning ara, ance aning nirya kum kipdeipminba, nong kum upnamle. ‘Talye yupu uk walwal arye nyaptuba, kanye walwal kiptue’ tenen, moropkine,” nyabuk.

Nehemia 2:5

Moropsirye, Raja biti nyapse. “Naio, ance nati bico tenepnimince, ‘Anye bira telebnye,’ tenepnutumce, ance nyapniminyeba, na Yudea mutuku binirye, na deiyok koun deilin nang weilamik mutuku dipdetinirye, amutuku domik asik tuba tonap moubuka dopnamne. Ati, ‘Telebe,’ tenepnimince, ‘Dabilyame,’ nyapniminyopura, tamubuka bindopnamne,” nyapse.

Nehemia 2:20

Nyapsikopura, na Nehemia birye sikti, nyapse. “Kume, Allah im deice tam ulirye, aning-aning nirya talilulnye birye tenepsuk touk, winipnamabe. El melisilya deice arye, apil teleb kibuka dolamepya ani, sirya daknamabe. Nunda, Allah el amu tam ubirye, nun el mapu ara, adiparyuk aning-aning nirya lipsisikuka dobibirye, apil dobuka sirya daknamabe. Bukni, anggun anyapmasulum nang tonok ara, Yerusalem mutuku noutam nun neika kum unamabe. Minop talak babye amutuku kum talibuka ulalum ati, ‘Amutuku ara, nun ning anya,’ kum nyapsutume. ‘Anggun yuke,’ nyapsise.” Nehemia birye, sik winilye nang, malye yupu nyabik nang ati, wenebukce nyabuk.

Nehemia 1:5

Se, na ni Allah, im deice ulyamnye bira, anda kwelina mikip weiknye ulyame. Anti ara, ninye tukwak nang nirya arye, ‘Se, elda, weik mambule,’ tenekinyake. Ance, “Aning ara wininamlume, aning ara kum wininamlume,” nyapdeiamsulum yupu kekebuka ayupu atonun unyak nang ara, an deice uk sik kanye talima akunum deiamkike. Ati, ance nunti bico tenebuka, weik arye melisilyame. Ati ara, ance, “Na nyanye yupu moubuka kekepminyeura, narye winibuka melipnamsine,” nyabuka, nyalilamsulum yupu dipkoprob winisilyame. Tonok ning babye kum batakasilyame.

Mazmur 136:26

Ati ara, nun ni koproba Allah ara, im deice tam ulula deiyoknye biti, Nun ni Allah telebe,’ nyabuka, el si erenamlume. Nun ni Allah Yahweh arye, ‘Wininamsine, winibuka teleb kipdeipnamsine,” nyalin yupu deice arye nyapdeipsuk yupu nirya ara, pia kum bataknamlume. Elce, ‘Winibuka melinamsine,’ nyapdeiamsuk yupu nirya ara, batakna pia kumce, dipkoprob pia, tuba-tuba arenamsile. Elce nyalin yupu deice arye nyasulul yupu ara, minopce kume, kum danmanto ulule. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

Rasul 23:19

Nyabukura, ayin talin nang, sik weik deiyoknye birye, akamnye taruk talipdanuka yukak delilbiyukce “An tenepmalam yupu dan do? Ayupu nyapnulyame,” nyabuka asipdeyuk.