Nehemia 2:19 - Eipomek

¹⁹ Winibik bukni, atalak ara yuk nang arye lak nyalbiyikopura, Horon mutukunye el si Sanbalat ap, Amon mutukunye el si Tobia ap, tonda Arab mutukunye, el si Gesem ap, sik nirya arye ayupu kekebikce, nun nirya ati nalipsikce, malye yupu nyabukabikce, akutunmasike. Nyanmasikce, “Anggunda yata ning arye winipnamalumce do? Tonda, anggunce yatato ning winipnamlumce, ‘Amutuku ninye deiyok talibuknye biti, yanipnamap’ teneplum do?” nyabuka, malye yupu nyapdongopsik.

Nehemia 2:19 Referans Kwoze

Nehemia 6:6

Asekne ning noutam ara, Sanbalat birye sekuka liamuk yupu ara ani. Amutuku noutam unyak ninye nirya arye, anggun Israel ninye ati nyasinyak yupu ara, na akunum kekenune. Na ka Gesyem birye, ‘Yo, sik aninye arye nyanyak yupu ara, dib nyanyake,’ nyapnuka ara, nyapnukine. Ara, an ap, an kwit capu sik Yahudi yala ninye ap, amutuku unyak ninye ati, yu kanye uk tenibuka ulyama anya arye, amutuku talina deiyok nang ati, ‘Obuka sirya daknamabe’ tenen, winipdenamsulume. Ati ara, Nehemia ap, el kwit capu nirya ap arye, ‘Nun mal olan nang arye, weik asik Yerusalem yanuka weksicak’ tenen, ‘Amutuku antanap dongobuka, cang keil poka donmake,’ nyakinyake. Aninguk kum bukni, ayupu ton nyakinyake. “Kume, Nehemia elda, ‘Israel yala nang, sik ninye deiyoknye unamne’ tenen, kintinipmale,” tenebuka nyakinyake. Tonda ayupu nyakinyake.

Markus 5:40

Nyabuk bukni, awekmek nang arye Yesus ati akutunmek. Akutunmekbuk, awekuka engenmek nang nirya ati, Yesus arye buru tam akunum dopkwetebukura, akilmu el li ap, el lin ap, Yesus ap, winilye nang el melibuka balamik nang ap, sikuk akilmu dipmokbuk deipmek aik wekik.

Ibrani 11:36

Malye nang arye, yuk diba tenelamik ninye ati, winilamik. Anang ati, nalibuka akutulamik. Ton nang ara, dobukapnarye, kama arye sik balye tam weika arye kulalamik. Ton nang dobuka, tapu koubukapnarye, wenena aik pum dongolamik.

Rasul 24:5

Nyabukce ayupu ton nyabuk. Anye bira Paulus ara, el malye ulya ara, akunum kel kibupe. Elda malye winilulnye ati ara, mutuku-mutuku nirya, el malye winiprabalamuka deice arye, Yahudi yala nang ninye weik bulyamikura, yu weik ulamukbuk, yupu nyaldalamikce, malye ulamik. Tonda, Yahudi yala nanguk bukni, urasin yuk kipdobikce malye nang ara, Nasarani nyanyak nang ara, el deiyoknye ulule.

Yohanes 19:12

Yesus arye ayupu nyabuk talak arye diprongobuka, atalak noutamak nirya ara, Pilatus ara ilil ubukba, ‘Yesus lopdeiptinye’ tenen, lo talak dipdeyuk bukni, sik Yahudi yala ninye deiyok nang arye weik arye nyabik. “Kume, ance anye bira Yesus lopdeipminyopura, Roma mutuku nirya talilul weik deiyoknye Kaisar arye, anti, ‘Anye bira na ka koprop,’ kum tenenamkile. Aning ara talye kum nyapkiyabe. Yatanye do nirya, ‘Nara, ninye deiyoknye,’ nyabuka, si ereldanyak ninye nirya ara, Roma mutuku weik ninye deiyok talibuka, ulul Kaisar ati, yanina atonun ninye unyake. Ati, ayupu atonun nyabuknye Yesus kum lopdeiptume,” nyabik.

Lukas 23:2

Anang nirya ara, ‘Pilatus arye Yesus opnusil’ tenen, minina yupu arye ayupu nyabik. “Yesus ara, el malye ulya deice arye, nun mutuku noutamak unyak ninye nirya eibikirye sik nirya malye wininamake. Elce malye winilisulule. Tonda, nunce Kaisar yo bok arilamap ning ara, ‘Aning kum wininamabe,’ nyabuka yupu sekeldongosulule. Tonda, Allah arye dopreipliba ninye weik lyeplirye, talinamle deiyoknye, ‘Mesias ara, na unune,’ Yesus arye nyalule. Mesias ara, Raja atonye unamle ati, ayupu nyasilya deice arye, ‘Nara, weik ninye deiyoknye, Raja atonunye unune,’ nyasulula anye arye, aning ara, pia malye.” Sik anang arye minina yupu deice arye nyabik.

Yeremia 20:8

Ance nyapnulum touk, “Aminyan talak ara, pia kanye imun ning, amutuku yanamle. Amutuku ulul ning nirya, yu nang arye uluplobikirye, kum kipdeipnamsiyake. Ikin weik unamsile,” nyanune. Asum-asum nirya, weik yupu arye, ayupu nyanun bukni, amutuku ninye arye, kum kekeninyake. Wininyakce, na nyanmanye ning ati, yu upliba ikin ning pia weik, na nong deice delininyake. Winibuka tuba-tuba nalibuka akutubuka, malye nyaninyake. Na ni Allah, Yahweh ance, “Ayupu nyapnamalyame,” nyapnulum yupu nyanune ati ara, nati malye nyanikirye, akutuninyake.

Mazmur 80:6

Winipmanto ara, ninye arye roti kwaning dobuka, sik mapu arelbalamak touk kibuka, Allah ance, nun an mapu ati, kanye imun ninguk arisiminyeba, pia engena uk unyabe. Nunda, engebuka asing maka deicuk unyabe.

Mazmur 79:4

Aning nirya ara, nun dana-dana tam unyak nang nirya ara, amutuku eipsikirye, “Se, sik Yerusalem mutuku ulamik nang ara, pia malye unmake,” nyabuka, malye yupu nyasinyake. Sik yuk mutuku nang arye, nunti, nalipsikirye, akutubuka malye yupu weik tonun nyasinyake.

Ayub 30:1

Bukni wini talak ara, amutuku unyak wel nang arye, nati nalibuka akutunikyake. Min talak ara, narye sik ni yapu ati, dipdesirye, ‘Kume, sikda pia malye nang unyaka ati, sikda na domba basam wein dam ara, kam ap neika kum uptinge,’ tenelamse.

Nehemia 6:9

Na Nehemia birye utenepse ning ara ani. Sanbalat ap, el kayapu nang ap arye utenenyake. ‘Sik Israel ninye ara, nun yupu kekebikirye, ilil weik upliba, sik mikip ara, mitang asa ubicopura, apil donyak ning ara bataknamak’ tenen, winipdese. Bukni, narye aninye ati, ilil kum tenepse. Nun ni Allah ati moropsirye nyapse. “Na ni Allah ance nati mikip arepniminba, pil teleb ubuka donamne,” nyabuka moropse.

Nehemia 4:1

Yuk nang arye, “Israel nang ara, Yerusalem asik keil dikuka deibikce, poka tamubuka dopmake,” nyabikba, Sanbalat kekebukce, kanye talima pum tam ara, yu weik ubukba, malye kanye bobuk. Yu ubukura, “Israel nang anggunda apil kum doptume, anggunda talye nang uka,” nyabuka, nalinmokce, akutupsuke.

Nehemia 2:10

Bukni, Horon mutukunye, el si Sanbalat ap, tonda Amon mutuku yin taleamuka deiyoknye, el si ara Tobia ap, sik aning kekebuka ikin kanye bopdikce, ‘El yanmal deice arye, nun mutuku ning nirya yanuka alapnusiaka ati, yanmale. Yata deiyok ati, ‘Sik Israel ninye patalul ning melipnamap’ tenen, yanmak do? Aning ara nun like,’ tenepdik.

Matius 9:24

“Anggun weik arye malye nyanmalumce, ngalukuka kwelanmaluma ara, yata ati do? Anggunda, anyaik batakuka yukak bilulume. Akilmu ara kum dipmale. Talya mapmale,” nyabuk. Nyabuk bukni, anyaik wekuka unmek nang arye, akilmu akunum dipmoka ara, akunum kel kipmeka anya arye, anang arye Yesus ati akutunmek.

Nehemia 13:28

Tonda imam weik deiyoknye, el si Elyasib el mi Yoyada birye, Bed-Hor mutukunye, el si Sanbalat birye deiamuk kilmu dobuka anya arye, narye Yoyada biti, “Yerusalem mutuku noutam ara, pia kum unamlyame,” nyabuka yakse.

Mazmur 123:4

Yata karin talak arye, nun kanye talima noutam ara, ‘Se,’ tenen, lik weik akunum usulule. Se, yupa weik talak deice arye, ikinuk akunum ubupu ati, ara tuba kum winitibye na nio. Aning deiyok ara, ikin kum uplyeba, sik talye kanye bobuka, telebuk unyak nang arye, nunti, ‘Sikda malye nang unayake,’ tenesikirye, nyek-nyek nyabuka, malye yupu nyasinyake. Aning nirya ati, nunda akunum lik usulule. Diba, sik maknya kipdanuka, nun Israel nang ati, ‘Nun lik, anggunda mali nang uka,’ tenesikirye, malye yupu nyasinyak nang ati, nun akunum ‘Lik,’ tenenamabe na nio. Ati, ancuk, yanuka melipsilyame na nio.

Yeremia 41:10

Winibukura, Mispa mutuku tuba kam unmik nang ara, Ismael birye, sik nirya tomobukce, anang dobuka, ‘Amon yala nang arye unyak mutuku noutam bobinamneʼ tenen, anang bisik bobanmok. Elce, Amon yala nang ati unmik mutuku bobanmok nang ara, ani. Ara, Babel mutuku taleamuk ninye deiyoknye, el si Nebuzaradan birye, ‘Mispa mutuku kam tuba aunamak nang ara, Gedalya birye kaliknamleʼ tenen, Nebuzaradan el kilmapu ap, sik Mispa mutuku nang, atalak tuba unmik nang ap ati, “Gedalya, ance anang kaliknamlume,” nyapdeipmokba, elce talipmokba, tuba unmik nang ara, Netanya birye deiamuknye Ismael birye, sik anang nirya ara, bobuka, ‘Amon yala nang unyak mutuku tam binkunʼ tenen, Mispa mutuku batakuka, mek koubuka, otam biyuk.

Mazmur 80:7

Na nio ance, nunti ikin weik ning weik arepsimince, bataksulumba, nun unyap mutuku bukni, nun kayapu dana-dana tam, daunyak nang nirya arye, nunti, yep-yep abuka nalisinyake. Nun mal olan ninye arye, ‘Obuka daluptibye,’ tenesinyakce, kanye deibuka, akutusinyake.

Yesaya 36:5

Anda yata tenepmalam do? Ance, ‘Yuk mutuku nang ap, nun mutuku nang ap, nyalin yupu neika nyaptibya deice arye, tonok nang atonun kipdabirye, nun mal olan nang obuka, sirya daktibye,’ tenepmalam do? Talye yupu deice arye, ‘Winipnamabe,’ nyabuka, mikip kipdatumce, atalak arye, nun ap mal oldana deiyok kouptum do? Anda, yatanye birye, ‘Melipnamnile?’ teneptumce, na Asyur mutuku nang, na yupu ati malye kipnutumce, yanipnutum do?