Allah Yahweh aning-aning nirya talibuka, deice tam mikip weik ununye birye nyapsine. “Se anggun Niniwe mutuku nango, narye anggun pia malye weik ulamlum ning wenena ati, kanye imun weik ning deipnamsine! Winipmanto ara, ninye arye malye un kilapu, ‘Alye weik daknamakʼ tenen, sik malye-malye wininyak talak ara, tomobikirye, sik akilapu ongolamik baju, el si kain sarung, tonda rok ara, yuk nang mutuku nirya, din sukum arye kwiribuka erepdipnirye, sik orok ara dangabuka, akilapu sik kisok deice koupdongobikiba, yuk nang nirya arye, sik nong bananguk elilamak touk, narye anggunti, alye weik dakan ning arepnamsine. Sik kanye imun ning akunum arepnyopura, sik yuk-yuk mutuku deiyok nang babye disikiba, anggun alye weik dakalanamlume.
Nahum 2:13 - Eipomek13 Aning nirya ara, anggun moubuka kekeplulume! Ati, nara anggun mal olananye atonun unune. Nara, Allah Yahweh, aning-aning nirya, deice tam talibuka, Pia Mikip Weik Deiyoknye unune. Im deice yin talin malaikat nirya ara, sik weik deiyoknye unune. Naryuk, anggun Niniwe mutuku nang ati, nyapsine. Anggun ninye olbana ati, tuku deice menekuka balamle ning, el si kereta-kereta perang nirya ara, uku dongobukapnirye, kum kipdeipnamne. Winipnamne touk, anggun yin talin nang ara, mal olanak arye, yu parang ya arye, obuka sirya daknamsine. Anggun nirya ara, narye kum kipdeipnamne. Winipnyopura, anggunce minop talak, yuk mutuku nang ning yala-yala nirya, dopromlum ning nirya ara, narye tuba tamubuka, alubuka dopropnamne. Tonda, anggun Asyur mutuku nang arye wipdeiplum nang ati, “Otam mutuku unyak nang ati, ‘Nunce olyanamsiabe,’ nyapdeiplumba, ninye yupu nyalban nang nirya ara, pia kum kipdeipnyopura, sik yupu ton ninye nirya arye, tonap pia kum kekenamake.” Allah arye, sik Niniwe mutuku nang ati nyabukba, nabi Nahum birye, lak nyalbiyuk. Gade chapit la |
Nahum 2:13
33 Referans Kwoze
Anggun nirya moubuka kekepnululume! Anggun mutuku deiyok dam, weik luak ululum nang ati, narye wenebuka opnamsine. Aning atonun, anggun mutuku kon deice, weik pala keil deice ululum nang babye, narye wenebuka opnamsine. Min talak ara, anggunce, “Kume nunda, pia mikip weik unyaba ati, yuk nang arye yanuka, kum opsitinge. Tonda, ‘Nun mal olan nang yanuka opsicakʼ tenen, cang keil poka dobupe ning ara, yuk nang arye yanuka, ulubikirye, wekuka kum opsitinge,” nyabuka, maknya kintibuka kwalilamlum bukni, na Allah arye, anggun nirya ati, malye kipsinirye, wenebuka opnamsine.
Ati ara, ance Raja Hizkia biti, malye yupu nyapdeiplum ning ap, surat sekuka dopdeiplum deice arye, dipkoprob na Allah ati, malye yupu nyapdeipnulume. Tonda ance talima erebuka kwalina deice arye, ayupu ton nyapnulume. Nara, na kuda arye, kirikuka tuku deice ban ning deice buksirye, weik mutuku deice welepse. Libanon mutuku noutam babye, weik mutuku dup welepse. Libanon mutuku noutam ara, weik cang yo, kepyal yo wepse. Tonda, sik pia urasin teleb ubuk ning, sanobar yo wepse. Aninguk kum bukni, ‘Yuk mutuku nang arye, nun mutuku noutam, pia pera mutuku, kum binmanto mutuku,’ tenebik mutuku babye, na akunum binuka wekse. Tonda, Libanon mutuku pia teleb yo noutamak nirya ara, na akunum eibuka wekse.
Se, sik Niniwe mutuku noutam unyak nang nirya arye, talye minin yupu nyana ap, ninye weik tonun ona ap, yuk mutuku nang ning ubula alubuka dopromlumce, bona yuk-yuk ning nirya delilulum nang ara, na Allah Yahweh arye opnamsine. Anggunce, bona pia weik alubuka dopromlumce, delilamlum ning yala nirya ara, nukmanto kum ulule.
Ati ara, na Allah Yahweh, aning-aning nirya talibuka deice tam erebuka, pia mikip weik ununye birye, anggun Yerusalem mutuku ululum nang ati nyapsine. Nara, dipkoprob anggun mal olan nang atonun unamsine. Atonun unamna ati ara, yuk mutuku-mutuku sik dana-dana tam daunyak nang nirya dinmacak arye, narye anggun nong deice, pia ikin weik ning deipnamsina deice arye, anggunti weik tonun arye wenepnamsine.
Atalak ara, Asyur mutuku ninye deiyoknye, el si Sanherib birye kekenmok buk, yuk nang arye, lak nyabik. “Kume na ni, Etiopia mutukunye bukni, elda Mesir mutuku talibuka ninye deiyok ululnye, el si Tirhaka, elce an olyanamakile,” nyabik. Nyabikba, ayupu kekebuka ati, tuba tonap, ninye dopdeibukba, Raja Hizkia dam binuka yupu lak nyalbiyik.
Yosua birye, sik aninye nirya ati, Allah Yahweh arye nyapdeipmok touk, akunum winibuk. Winibukopura, Yosua birye el mal olan nang, sik ning kuda yan amu tam parang ya arye, milmil moubuka, akuda basam asukum batakukce, sik ninye olbana ati kereta ara, ninye buknarye olbalamik ning nirya ara, uku dongobuka, sirya dakuk.
Anggun Niniwe mutuku noutam ara, weik asik doplumce, ‘Nun mal olan nang yanuka opsicakʼ tenen, weik cang keil poka dolamlume. Winibuka doplum bukni, anggun mal olan nang yakirye, opnamsiak talak ara, anggun cang keil poka doplum ning, ulublopnamamake. Winipmanto ara, arah yo duk moubuka eklirye, minop sakliba ninye arye, ‘Aning dipnamapʼ tenen nang arye, arah yo lontokikiba, ayo duk sakliba dilamak touk, anggun mal olan nang arye yanuka, anggun cang keil poka babye, adiparyuk kanam arye, ulubuka bataknamake.
Allah arye, na Yeheskiel biti nyapnuk. “Anda ninye sirika arye deipkiknye, Mesek mutuku ap, Tubal mutuku ati, ninye deiyok kibuka, taleamuknye, el si Gog biti, ‘Kanye imun ning an dam upnamkile,’ binuka laka nyapnulyame. Tonda, Allah, el si Yahweh, aning-aning nirya talibuka, deice tam erebuka, Pia Mikip Weik Ululnye birye, nyapkile. ‘Na Allah Yahweh, an onanye akunum winipkine. Anda, Mesek mutuku ap, Tubal mutuku ap ati, ninye deiyok kibuka, taleamlumnye bira, narye anti wenebuka opnamkine!
Tonda, na Allah arye, anggun Edom tam, weik mutuku noutam ululum nang ati, na yu upniliba, sikti wenepnirye, ikin ning, anggun deice deipnamsine. Na Allah Yahweh arye, aning-aning nirya talibuka, deice tam erebuka, Pia Mikip Weik Deiyoknye ununye birye nyapsine. Nara, anggun mal olana atonunye unune. Se, anggunda bicoe! Anggun Edom mutuku noutam ululum nang ara, na taruk mikip, anggun tam kum kipdeipsinirye, wenebuka opnamsine. Opsinirye, kum kipdeipsiniba, anggun ululum mutuku ara, kum danamle. Oldemuk upnamlarya!
Ati ara, na Allah ara, an mal olananye atonun unune. Tonda, Nil mek balamle mek nirya babye, na yu tenepsirye, wenepnamsine. Narye sikti, wenebuka oplopnirye, sirya daknyopura, aning nirya, kum kipdeipnamne. Mesir mutuku noutam aulul ning nirya ara, kum kipdeipnirye, obuka sice buklopnamne. Ninye ton, amutuku noutam kum unamake. Winipnyopura, ninye nirya arye, ‘Se, Allah Yahweh elda, aning-aning talibuka, deice tam erebuka, Pia Mikip Weik Deiyoknye ululeʼ tenen, nati biknamake. Dipkoprob Mesir mutuku wililonak, dana-dana tam arye noutam nirya ara, malye kipdeipnamne. Ara, pia dabu tam, arah utara Migdol mutuku uamukak arye dipdongobuka, anyapce ubuka dipdongobuka, iknapye tam, arah selatan, Aswan mutuku uamukak babye, tonda Sudan mutuku otam-atam noutam bokolona tam nirya ara, malye kipnirye, kum kipdeipniba, asik oldem upnamle.
“Allah el si Yahweh, aning-aning talibuka, deice tam erebuka, Pia Mikip Weik Deiyoknye birye, ayupu ton nyapkile. Ara, ninye deiyoknye Raja Mesir biti, ayupu binuka nyapnulyame,” nyapdeipmanile. An Firaun bira, an kanye talima noutam ara, utenelyame. ‘Kume, na mikip pia weiknye, ununa anya arye, weik laut mekwen pum tam ulamle mikip weik ning, Nil mek pum tam malamle yu weik buaya atonun, unune. Nara, aninguk tenebuka nyanune. ‘Kume, weik balamle mek, el si Nil mek ara, naryuk kwepdeipse. Na kanye delina ati, Nil mek kwepdeipse. Nil mek deiyoknye bira natia,’ nyabuka ance nyabuka, an talima erelalyame.
Tonda, na Allah Yahweh, aning-aning nirya talibuka, deice tam weik tonun erebuka, Pia Mikip Weik Deiyoknye birye, anyapkin yupu ara, ance, Sidon mutuku nang ati, nyapnulyame. Ara, Sik Sidon mutuku nang ara, nara sik mal olananye ununa anya arye, sikce biknuninyake. Sik dam yanukam laka kipnirye, sik wenena ning dobuka, sik nong deice deipnyopura, winipnamna deice arye, dipkoprob sikce biknikirye, ‘Se, Allah ara, dipkoprob aning-aning nirya ara, el mikip deice arye, talilula anya arye, elcuk ninye mutuku sirya, im sirya nirya, sik weik deiyoknye ulule. Tonda, amutuku unyak nang nirya arye, na mikip weik ununa ap, na malye una pia kumce, pia teleb leknye ununa ap ara, moubuka biknamake. Ara, narye sik dam kanye imun weik ning deipnamna deice arye, atalak arye biknamake.
Winibuka nyapluma ati, na Allah Yahweh arye, aning-aning nirya deice tam erebuka, mikip weik ununye birye, ayupu nyapne. Anggun Tirus mutuku ululum nang, anggunti na yu weik upmanil deice arye nyapsine. Anggunda, na on nang atonun ululuma ati, nyapsine. Laut mekwen deice ombak mikip weik yangalamle atonun arye, narye yuk mutuku nang ton, dobuka deipnyeba, anggun Tirus mutuku ululum nang nirya, warikil yanganamsiake. Sik anang yanganamaka ara, anggunti olyanganamsiake.
Se, anggun Babel mutuku nango, winipmanto ara, anggunda mutuku kon topsaklirye, mutuku sirya, im sirya nirya, sice bultakalamle touk ululume. Anggunce, tukwak mutuku noutam nirya, yuk-yuk mutuku nang, weik tonun akunum obuka, sirya daknamlume. Bukni, nara Allah Yahweh arye anggun deice yanipnamsine. Winipsinirye, anggun adiparyuk lipdopnamsine. Tonda bongop dongopsinirye, bataksiniba, uku arye dipsiliba, atu butbuta atonun upnamsile. Winipmanto ara, minop talak anggun Babel mutuku nang ara, weik tonun bukamuk mutuku ulamlum bukni, aminyan talak ara, weik uku arye mutuku kon Nirya dipliba, tokna pakuka saklirye, lu ulamle touk, na mikip weik deice arye, malye kipdeipsinirye, amu tamuk deipnamsine.
Tonda, anggun Babel mutuku ululum nang nirya ara, talima erepdanuka ulamlumce, kwalin nanguk ululuma ati, na Allah Yahweh arye, anggunti wenebuka opnamsine. Ati na Allah arye, anggunti wenepnamsin talak ara, akunum dam upmasile. Nara Allah Yahweh, aning-aning nirya talibuka, deice tam unirye, na tenenun ning nirya ara, dipkoprob unune. Nara im deice unyak yin talin malaikat nirya, sik deiyoknye ununa ati, nara Pia Mikip Weiknye unirye nyapmasina ati, aning nirya ara, dipkoprob nong kunupnamle!
Ara, sik Asyur mutuku nang arye, Yerusalem mutuku ulamik ninye, sik si erelamik Allah ati ara, malye yupu weik nyanmek. Ara, yuk-yuk mutuku nang, sik taruk arye, ninye urasin atonun kibuka, patung memebikirye, si erenyak ning ati, “Aning ara mikip kume, talye ning uka,” nyabuka, aning si yanibuka, malye yupu weik nyalamik atonun, Israel nang arye si erelamik Allah ati, amalye yupu nyanmekce nalinmek.
Atalak aryuk Asyur Mutuku yin talin nang, sik deiyoknye birye, awinilye nang ati nyabuk. Anggun deiyoknye Raja Hizkia biti anyapnusin yupu lak nyalbinulume. Ara, wini talak ara mikip weiknye, Asyur mutuku ninye deiyoknye Sanherib birye, nyapdeipmal yupu nyapnusine. Elce nyapdeipsile. “Anggunda teleb kanye bobuka, ikin kum diparyuk, ‘Asyur mutuku weiknye yanibibirye, aning winiptibye, aning ton winiptibye,’ teneluluma ara, yata deiyok ati, aning tenelulum do?
Asyur mutuku taleamuk ninye deiyoknye Sanherib birye, Lakis mutuku arye, el yin talin nang, sik weik deiyoknye ap, weik deiyok nang bitinye ap, dopdeibukba, anang winilye arye, Lahis mutuku ara batakuka, Yerusalem mutuku biyik. Elce dopdeibuk nang ara, ani. Ara, el yin talin nang, sik weik deiyoknye ap, Raja el weik aik pil dona deiyoknye ap, tonda, Raja el mek din kalikna deiyoknye ap, dopdeibuk. Anang nirya ara, Asyur mutuku yupu bobana deiyok nang ulamika ati, anang dopreibukba, sik anang arye, deiyok bikikba, Asyur mutuku yin talin nang pia weik arye, tabakuka Yerusalem mutuku biyik. Lakis mutuku arye, Yerusalem mutuku biyikopura, Raja Israel tam el si Hizkia dam biyik. Wekelbinukabikce, sik binuka doprobik lo ara, Yerusalem asik deice tam bukni, buru tam mekwen deiamuk ara, eitam mekwen dam biyik. Asukum arye, mek balamukba, Yerusalem mutuku mek binuka wekna ati, mek sekamik dam biyik. Aning ara, baju mek ilikina deiyoknye, el pil dolamikak lyu bisik ati, ‘Padang Tukang Penatu Bisik,’ nyalamik. Yerusalem asik mek kwelbana ati, mek wakamik ning ara, abisik dam ubuk.
Winibikce, bulubuka neika wekikopura, Allah Yahweh arye, Yosua biti nyabuk. “Sik ti, an ilil una pia meme,” nyabuk. “Ambusum ara, awinipmal touk winipnamle. Dipkoprob, na Allah arye, aninye nirya ara, na si deice arye, anang nirya opnyopura, anggun Israel nang ati arepnamasine. Anggunce, anang obuka sirya daknamalume. Tonda, sik bukikirye ninye olbanyak kuda ara, ‘Yuk tam ton sakuka bicakʼ tenen ati, akuda basam kutam, amu tam milmil bulupnamlulume. Tonda, kereta-kereta ninye olanamace talak, bukikirye banyak ning nirya ara, dobuka, uku dapmunyeba, uku arye dipnamlule,” nyabuk.
“Yeremiao, anyapdeipkin yupu ara, ance Mesir mutuku tam, asik donyakak nyalbinulyame. Ara, Memfis mutuku ap, Mikdol mutuku ap, tonda Tahpanes mutuku ap, unyak nang ati, “Anggunda, kintinibuka deipmunyakarye, unamlume,” nyabuka, laka nyapnulyame. Ara, anggun ninye olana ati, talibuka ululum ning nirya ara, dobuka, anggun mutuku dana tam ati, domlumak ara, bikbik abuka binamlume. Deiyok ara, ani. Ara, Allah arye lo arepliba, yuk mutuku yu nang arye, anggun mutuku bukni, dana-dana tam unyak nang olyanamsiake! Winipsicopura, mal olana deice arye, anggun mutuku dana-dana tam unyak nang nirya, kum kipdeipnamake!
Ati ara, nara Allah Yahweh arye, deice tam erebuka, aning-aning nirya talibuka, pia mikip weik deiyoknye unirye, anggunti nyapsine. Anggunce, ‘Lengdar mapmana deice, Allah arye nyapsuka ara ani, ani,’ nyabuka, nyalulum ning ap, tonda, ‘Allah Yahweh arye, ayupu lak nyapsukba, anggunce sik dam lak nyapnyabe,’ nyabuka, tilila yupu nyalulum ning ati ara, narye anggun wenena ati, weik ikin ning ara, anggun dekena ati, anggun nong deice deipnamsine. Dipkoprob ning ara, narye ton, “Anggun yupu bobuka nyalbilulume,” kum nyapdeipsise bukni, yupu nyalulume! Ati ara, nara Allah Yahweh, pia deice tam erebuka, aning-aning nirya talibuka, pia mikip weik ununye birye, anggunti wenepnamsine. Naryuk, ayupu akunum nyapsine.
Tonda, sik Israel mutuku noutam unyak nang ati, ayupu nyapnulyame. “Na Allah Yahweh ara, wini talak anggun olana atonunye winipnusine. Winipmanto ara, na ninye on parang ya libukadeipse ning ara, kupdopnirye, talibuka malye ninguk, talibuka wininyak nang babye, pia diksukum wininyak nang babye, anggun nirya wenena ati, anggunda, oltaknauk upnamsine.
Bukni wini talak ara, Allah arye utenelule. ‘Kume, winipmanto ara, minop talak ara, amutuku noutam ulamuk yu singa kus, yim arye, el din ati, yuk kam ulamuk ning obuka dilamukce, el mapu ati, weik tonun ton arelamuk. Tonda, ayim singa kus arye, el kil singa kus ati, sik din ati, kam ning ton obuka arelamuk. El winipnopura, el malamuk aik pum tam, akam ning nirya ati, pia weik tonun obuka boyanopura, seknarye kalibuka delilamukba, kanye deibuka, neika dilamik. Aning atonun, anggun Niniwe mutuku ululum nang babye, yuk mutuku nang, weik tonun olamlume.
Yata ning do nirya, anggunce wininamlum ning nirya ara, talye-talye ninguk wininamlume. Deiyok ara, aning nirya winipnamaluma babye, anggun mal olan nang arye, yanuka opnamsiak talak ara, dipkoprob uku arye dibuka, sirya daklamle touk, upnamsiake. Tonda, aning kumopura, anggun mal olanamlum talak arye, anggun mal olan nang arye, anggun ninye ona ati, yu parang ya arye, opsikirye, sirya dakanamsiake. Anggun tam nang ara, weik tonun dipnamlume. Winipmanto ara, kwising arye, ninye wa wibuka kouamikce ning dilamlirye, sirya daklamle touk, anggun mal olan nang arye, anggun tam nang obuka, sirya dakanamsiake. Wini talak ara, anggun Niniwe mutuku nang ara, minop arye kwising nebuka weik ulamikiba, nukman kumto ulamak touk, unamlum bukni, aminyan talak ara, anggun mal olan nang arye, weik tonun obuka, sirya dakanamsiake.
Piblisite