Aninguk kum bukni, sik Israel nang unyak mutuku noutam, ninye deiyok kibuka, taleamikce ulamik touk, tuba unyak deiyok nang babye, pia malye weik wininyake. Winipmanto, bai tam ulamle yu kam arye, ulamle ning obuka, si tobuka dilamle touk, unyake. Ara, sikce ‘Se, nunda yo bok pia weik ton doproptibnye’ tenen, malye winina ap, tilila yupu nyana ap, ninye ona ap, ikin ning dobuka, yuk nang nong deice delina ap, wininyaka deice arye, ubula dolokirye, bona talin nang unyake.
Mika 3:2 - Eipomek2 Anggunda, teleb arye diksukumuk ubuka winitum bukni, sikce diksukum kanye tenibuka, pil donyak nang ati, ‘Nun like’ tenen, yu weik usulule. Atonun, teleb winina babye, ‘Nun like’ tenen, batakalulume. Utenemuyopura, pia malye pil talibuka dolulume. Adeice arye winipmanto ara, na mapu koproba, Israel yala ninye nirya ati, anggunce kam tuba unmacebuk, anggun bol deice ning nirya kolulume. Atonun, sik yok deice ulamle bol nirya koplobuka, tup likuka dololulume. Gade chapit la |
Mika 3:2
32 Referans Kwoze
Yatanye do nirya, sik ninye deiyok nang arye, “Aning ara wininamlulume, aning ara kum wininamlulume,” nyalice yupu ati, ‘Ayupu ara nun like’ tenen, yaniltalamak nang ara, winilamice deice arye, dipkoprob pia malye winin nang ati erenyake. Ara, talye ati kume. Ninye neika teleb ubuka una ati, “Wininamlulume, aning ara ton pia unamlume,” nyabuka delinyak yupu ati, yaniltana uk unyak ninye ara, pia malye ninguk, talibuka unyak nang arye, wininyaka ati nyapne. Bukni yata ninye do nirya, ninye neika teleb ubuka una ati, “Wininamlulume, aning ara ton wininamlume,” nyabuka delinyak yupu ati kekebikirye, ayupu uk talibuka diksukumuk unyak ninye ara, wininyaka deice arye, wenena yupu yaniltana uk unyak nang ap, malye ning talibuka unyak nang ap ati, yupu sekenyake.
Bukni, mutuku sirya, im sirya nirya, unyak nang nirya ara, pia moubuka, teleb ton kum unyake. Allah arye nyasulul yupu nirya ara, akunum yaniltanauk wininyakce, yuk talye ninguk talibuka dobolbanyake. Tukwak mutuku unyak nang nirya ara, sik talima noutam nirya, pia malye weik ulule. Ninye kum winipting ning bukni, talye lukparabuka, pia malye ning wininyake. Tonoknye babye, teleb pia kum wininyake. Ninye nirya ara, malye ninguk tenebuka, winiyake.
Ura, anggunce, ‘Yuk ninye nirya ati, bico tenebuka melinamabe,’ nyabuka tenepce arye talye yupu nyabuka, kum wininamlum bukni, dipkoprop yuk ninye ati pia bico tenebuka melipnamlulume. Tonda, malye winin ning aning-aning nirya ati, ‘Aning ara pia nun like’ tenen, bataknamlume. Malye ning tonok babye talibuka kum unamlume. Teleb winin ning yala-yala nirya ati, aninguk talipmunce kanye deibuka diksukumuk unamlume.
Anggunda, yata deiyok ati, anggunce na mapu koproba ati ara, sik nong deice, kanye ikin ning deiplumce, ikin kililulum do? Tonda, anggunce na mapu koproba bukni, talye kankan nang, sik ning alubuka dololulumce, anggun urasin ara, tuku deice buta noutamuk singnilongolulum do? Nara Allah Yahweh, aning-aning nirya, eitam erebuka, mikip weiknye unune. Tonda, narye sik im deice unamak yin talin malaikat nirya ara, sik deiyoknye unune. Narye anggunti, ayupu akunum nyapsin ati, anggun nirya ara, dipkoprob wenepnamsine!”
Nabi tonoknye, el si Hanani, birye deiamuknye Yehu, elce ninye deiyoknye Raja Yosafat dam nyalyayuk. Anabi arye nyabuk. “Na deiyoknye, anda yata wiripnalam do? Sik malye-malye ning talebuka unyak nang ati, yata deice arye, aning tenebikce nang ati melilyam do? Tonda, aning atonun, nun ni koproba Allah Yahweh ati, ‘Nun like, elda nun like,’ tenebikirye, kanye bokoltolye nang ati, sik anang ap, na ap, neika arye yuk mutuku nang ati, mal olanamabe. Anang melipnamne,’ tenelamlirye neika banmalum nang ara, yata ati do? Na deiyoknye, ance utenenmanilama deice arye, nun ni koproba Allah Yahweh arye, anti yu weik upliba, elce na deiyoknye anti wenepnamakile.
Elia adiparyuk Ahab unmokak Nabot wa win dam bayuk bukni, Ahab minop arye eipmokce, nyabuk. “Anda na oldananye atonun tenekunune. Anda na like. Bukni, nati enmanilam ning ara, akunum eipmanilame,” nyabuk. Nyabuk bukni, Elia biryopura, “Dipkoprop enmakina ani akunum eipkine. Ance apia malye ning winiminyeba, Allah el si Yahweh arye, ‘Aning ara na like, aning ara pia malye,’ tenepmakile. Amalye ning winipmalam ning ati, Allah el si Yahweh arye, ‘Ahab dam bimince, narye el wenena ati winipnamne ning ara, lak nyalbinulyame,’ nyapdeipmakila ati, nyapkine,” nyabuk.
Yuk nang nirya ati, bico tenebuka kum melinamake. Yuk nang arye malye usikce ning ati, ‘Dauplye’ tenen, luba kina kum arye, pia tenenauk unamake. Yuk nang arye, ton nang ati, ‘Malye nang, tenepnamak’ tenen, tilila yupu bukni, “Anang arye malye wininyak ning ara, ani,” nyabuka minilanauk unamake. Tonda anang arye, ‘Malye upnun do?’ tenen, kanye moubuka tenena pia kum arye, sik tenenyak ning nirya, talye parapkabuka wininamake. Sikce yuk nang ati, yu weik uplibuk, onauk unamake. Teleb un ning aning-aning nirya ati ara, ‘Nun lik’ tenen, batakanamake.
Allah arye amalye winin ning talibuka unyak ninye nirya ati nyalamuk. “Aninye atonun ninye nirya ara, weik arye wenebuka opnamne. Winipnyopura, na ap neika pia kum unamabe. Batakniba, sik yuk dadepnamake. Aninye ara, weik arye wenepnamne,” nyapdeiyamsuk yupu ara, akunum kel kiyamik bukni, ‘Aning ara pia mambule,’ tenena kum diparyuk, tuba-tuba talye luparabuka pia malyeuk wininyake. Winikirye, sikce pia malye winilamik touk, aninguk talibuka unyakce, malye ninye ati, sikce “Aning ara telebe uka,” nyabuka si dolakirye erelilanyake.
Nyabukba, sik Yahudi yala deiyok nang nirya arye tamubuka, weik yupu deice arye nyabik. “Kume, anye bira Yesus lobuka kum arepnumsilame. Barabas si nyalamaknye anyuk lopdeipsilyame,” nyabik. (Barabas nyalamiknye bira, Israel ninye arye, ‘Roma mutuku deiyok nang arye talisinyaka ara, nun lik’ tenen, oldalamik talak ara, Barabas el ap arye Roma deiyok nang ati oldalamikba, kum winipmanto kibuka ati, Barabas tomobuka wenena aik dongamik. Anya arye, Barabas nyabiknye bira, anye biti nyabik.)
Amutuku noutam weik asik talibuka unyak ninye deiyok nang ara, yu singa kus arye, weik yupu weik tonun nyaplirye, yuk kam ning obuka, dilamle touk, sik adeiyok nang arye, weik yupu nyabikirye, ‘Nunda yata ning ton, ubula doproptibye do?’ tenen, malye weik wininyake. Tonda, amutuku unyak nang malye winipdakiba, amutuku deiyok nang arye, ‘Sik malye winipdanmace ning ati, yupu bokeipnamabeʼ tenen, bulubikirye, yupu bokolina ati, deiyok nang ara, winipmanto unyake. Ara, bai tam yu ulamle kam, dina weik tonun pataplirye, aupmalye ning obuka diplirye, sirya daklamle touk, unyake. Tonda, ayu kam winiplirye, ‘Adin ara, kwal deipmanya ani, beren tam talak ton, tamubuka yanirye, dipnamne,’ pia kum tenelamle touk, amutuku yupu bokolina deiyok nang babye, adiparyuk yuk nang talinyak ning, alubuka dolonyake.
Tonda, Israel nang arye, domba arebikceba, sik deiyok nang arye, adomba basam kalimna dobuka, pia teleb ning meta ap, tup teleb ning ap, domba basam bola ap, ‘Baju wipnamapʼ tenen, domba potong alubuka dopropmunce, anggun baju ongon ninguk dobuka, baju wibukapmunce, ongopnamlume. Tonda, winipmunce, el adomba basam teleb kibuka nelamle ning ara, anggun dem obuka dilulume. Amalye ning nirya winilulum bukni, anggunda domba basam ati, yupu nyabuka, pia moubuka kum weimunce, din ning ton kum arelulume.
‘Allah arye bataksilyak’ tenen, kanye lamapdongobuka unyak ninye ara, Allah ati diba tenebuka, unyak nang ati, “Telebe,” nyabuka, si erelulnye bira, Allah un dam yatue. Tonda, anye birye, ‘Na ning ititipnyak,’ kum tenelul bukni, weilamlye touk winilule. Tonda, anye birye, sik malye-malye weik wininyak ninye ara, ‘Na like’ tenen, neika kum unyake.
Bukni, na Allah arye anggun Israel nang nirya ati nyapsine. Dipkoprob teleb uning kum bukni, anggunce sik isa si erena ati, moubuka taliplumce pil weik dolulum ning ara, eibuka bikisunun bukni, aning nirya ara, nong pia kum upnamle ning, talye ning talibuka ululume. Tonda, anggunce talibuka pil domunye nirya ara, deiyok ton kum upmala ati, aning nirya arye kum melipsitinge.
Ati ara, nara, erebuka pia deice tam, aning-aning nirya talinirye, mikip ninye deiyoknye Allah Yahweh unune. Ati, anggun amutuku ninye nirya ati, nyapsine. Diba, Yerusalem mutuku noutam, weik asik dolamik ara, weik besi yun makau atonun ulule. Bukni, winipmanto ara, abesi makau pum tam ara, tup atonun aupmal bukni, ara sik Israel yala nang ati kume. Amakau pum tam tuba aunmal tup atonun ara, anggun mince ninye weik obuka bataklamlum nang, sik tup atia. Ati, narye anggun nirya ara, amutuku arye yakuka dopkwepnyeba, pia pera mutuku binamlume!
Pia teleb domba basam tup kalipdoba, pia teleb ning ara, ayun mek makau pum tam dongopnamlume. Ara domba basam, yan tup kalipdoba ap, taruk tup kalipdoba ap, tonda yoka pia teleb ning ap, amek makau pum tam dongopnamlume. Adomba basam ara, malye ning kum bukni, anggunce weilulum domba kan-kan noutam arye, nong pia teleb ning wibuka deipnululume.
Bukni, Allah arye nyasulule. Kume, narye wipdeiamse ninye unyak bukni, sikce sik Ni Koproba na Allah ati, mandipna kanye bobikirye, ‘El yupu kum kekepnamabe’ tenen, yaniltaninyake. Israel ninye arye, sik kayapu ongonyak baju babye, ubula dolonyake. Sik kayapu nang arye, ‘Kume, sik Israel ninye arye nunti, telebuk wininamsiyake. Sikce nunti, kum olyanganamsiyake’ tenen, diba tenelamsik bukni, wini talak ara, talye unmace ninye ati, anggun mal olan nang nyabuka, warikil yangalulume. Winipmanto ara, mal olan dam binmaca ani, tamubuka yanganyak talak ara, sik baju nirya kwilikmalye ning ap, bental pakmalye ning ap, malye ning ap, diamuk ongobuka yanganyake. Aning atonun, anggun malye winimunye ninye arye, Allah elce wipdeiamuk ninye, sik baju ara, ubula dololulumba, malye-malye baju uk ongonyake.
Aning ara, talye kum nyapne. Ayupu nong ara, ani. Minop talak ulamik ninye nirya ara, Allah arye nyapdeiamuk ninguk, diba tenelamikce, talibuka diksukumuk ulamik bukni, wini talak ara, aninye atonun, tonoknye babye kum ululume. Diksukum unyak ninye ara, akunum kum dayike. Ati, wini talak ara, diksukum winin ninye nirya ara, pia kum anya arye, el kwit birye el kwit biti, ‘Yata winiptinya deice arye optinye do?’ tenen, wena tapu webuka kaliklamak touk, winililanyake. Adeice arye amutuku noutam ara, malye winin ning akunum panaple.
Aning wininyaka deice arye, malye winin ninguk, kel kibikirye talinyake. Ara, ninye deiyok nang kibikirye, talibuka unyak ninye ap, malye winibikiba yupu lipsisikuka, bokolina deiyok nang ap, sik nirya arye, “Nun mapu anggun malye winipmalum nang ara, nunti, ‘Ninye opdeipsululume,’ nyabuka arin yo bok arepsilyame,” nyanyakba, Israel ninye arye, arenyakba, adeiyok nang arye dolonyake. Tonda ninye deiyok talibuka, unyak nang arye, ‘Nun tenepmap ning ara, adiparyuk doproptibye’ tenen, mikip arye nyanyakba, sik tenepmakce touk, dalubuka dolonyake. Winibikca deice arye, pia tuba-tuba malye yupu nyalanyake. Diksukum ubuka, ninye yupu kum bokolinyake.
Anggunda weik arye wenepnamsin ati, anggunda na bicoe. Anggunce dipkoprob pia malye wini ning ati, ‘Kume, aning winina ara, telebe,’ nyalulume. Anyapce, anggunce, dipkoprob teleb winin ning ati, ‘Kume, aning ara, pia malye ulule,’ nyabuka peterelulume. Tonda, pia malye unyak ning, kunukna ato ning aupmalibuk, anggunce, ‘Kume aning ara, dirina atonun ninguk ulule,’ nyabuka peterelulume. Tonda, dirina aupmalyebuk, anggunce, ‘Kume, aning ara, kunukna atonun ning ulule,’ nyabuka tilila yupu nyalulume. Atonun, anggunce, pia toh lelamle ning aupmalye babye, anggunce, ‘Kume, aning ara, sik ning ulule,’ nyalulume. Tonda, yu ning aupmalibuk, anggunce, ‘Kume, aning ara, toh lelamle ning ulule,’ nyabuka, tilila yupu nyalulume. Aning atonun nyalulum nang nirya ara, narye wenebuka opnamsine.
Allah arye nyabuk. Se, Samaria mutuku noutam umunye kilapu, kwalina weik kilapu ara, anggun nong kalimna ara, weik sapi basam nelamle touk ululume. Anggun mutuku si Basan mutuku kilapu ara, sapi basam kalimna weik ubuka nelamle touk, anggun babye nelulume. Anggunda, anggun akanye yapu ati nyalulume. ‘Anggun bimunce, anggur mek kanye wangalamak mek, pia yu ning boyasumunyeura, dinamabe,’ nyabuka, anggun akanye yapu ak, tuba-tuba morolulume. Tonda, talye bona utotoa talina kum nang ap, mikip kumce, mitang nang ap ati, aning-aning nirya, kum uamlye nang ati, weik arye patalye ninye nirya ap, ikin ning weik, sik nong deice delilulume. Tonda, sik bona utotoa talina kum ninye taleamice ning ara, ubula dolomunce, ikin pil dilulume.
Aning atouk, ‘Malye winin ning ara, nun like’ tenen, pia diksukumuk unamlume. Yata malye winin ning do nirya, malye ning nirya batakmunce, ‘Aning ara, nun like’ tenen, malye ning pia kum wininamlulume. Winibuka umunyopura, dinamlume. Winipmunyopura, nara, Allah Yahweh, Pia Mikip Weik Deiyoknye unirye, im deice unyak yin talin nang nirya talinunye bira, dipkoprob anggunti, melinamsine. Telebuk winimunyopura, narye minopce wenebuka kum opsinirye, tuba tamubuka, tonap bico tenepsinyopura, Yusup el yala ninye ati, teleb updeipnamsine. Ara, anggun apu koproba, Yusup birye deiamukba, dadeipdanin yangalamika ani, wini talak babye ululum Israel ninye ati, na Allah Yahweh arye anggunti, bico tenesipnirye, melinamsine.
Piblisite