Mazmur 95:7 - Eipomek

⁷ Deiyok ara, talye ati kume. Nun ni koprop Allah elda, nun deiyoknye ulule. Nunda, el amu tamuk ulamepebuk, elce nunti, moubuka kalikisulule. Winipmanto ara, domba basam weina deiyok nang arye, sik domba basam moubuka kalikinmakirye, sik din ning ati, mutmuta maning telebak deibikirye, teleb ubuka weilamak touk, nun ni Allah arye, nun Israel yala ninye nirya ati, ‘Na tenena ninye’ tenen, melibuka kalikisulule.

Mazmur 95:7 Referans Kwoze

Ibrani 4:7

Aning ati ara, nun kele. Allah arye tenyamuk touk, tonok talak wibukabukce, atalak ati, “Asum,” nyabuka si dobuk. Asi nyabuka, “Asum,” nyabuk talak ara, sik Israel ninye malye ulamik talakuk kume. Aning ara, keting tamun yupa weik akunum upra balamuka ani, Allah arye, Daud sekamuk yupu deice arye nyabuk. Daud birye sekamuk yupu ara, arup akunum nyapmasin bukni, ayupu tonap nyapsine. Ayupu ara ani. ‘Asum ara, na Allah arye yukubsiniba, na yupu kekepnumunyopura, anggun apu yapu malye winilamik touk winina meme. Ara, lik upsilyeba, pi dobuka, ‘Diba kum tenenamabe,’ tenebuka, kum wininamlulume. Minop talak anggun apu yapu ara, lik ubukba, na Allah ati, ‘Nun like,’ tenyamnikce bataknike. Sik winilamik touk kum wininamlulume. Allah arye nyapdeiyamuk.’ (Mazmur 95:7-8)

Ibrani 3:15

Ati, arup nyapmasin touk, Mazmur sekamik yupu ton tenenamlume. Ayupu ara ani. ‘Asum ara, na Allah arye yukubsiniba, na yupu kekepnumunyopura, lik upsilyeba, pi dobuka, ‘Kum kekenamabe,’ tenebuka, kum wininamlulume. Minop talak anggun apu yapu ara, lik ubukba, na Allah ati, ‘Nun like,’ tenebuka bataklamnike. Anggun apu yapu malye winilamik touk, anggun wini talak diba tenelulum ninye arye, aning ton kum wininamlulume.’ (Mazmur 95:7-8)

Wahyu 3:20

Nara, anggun dam akunum yanmasine. Anggun aik buplan dam tiknirye, ‘Bublan kukeipnuniyak do?’ tenen, bisik lorum-lorum asunune. Yata nang do nirya, na yupu kekebikirye, sik buplan kukeipnicopura, na adiparyuk sik aik weknirye, sik ap, na ap dine dibuka neika unamabe.”

Mazmur 48:14

Tonda, anyasik noutam donyaka dana-dana tam, antanap dongobuka, domik cang keil poka ara, dipdelulume. Tonda, sik Yerusalem mutuku nang arye, ‘Nun mal olan nang arye, yanuka opsikcak’ tenen, domik keil aik nirya ara, moubuka eipmunce, dilbinamlulume. Aning nirya winipnamluma deiyok ara, ani. Ara, anggun asukum ululum nang arye, aminyan talak unamak mapu, anggunce deiplumba, deipdanin banamak mapu ati, aning nirya, laka nyanamlume.

1 Peterus 2:25

Minop talak ara, anggun nirya domba teleb bisik batakuka, malye bisik kwekdanin balamak touk ulalum bukni, wini talak ara, sik domba weilamak Deiyoknye damuk tamubuka yangalamak touk, akunum yanuka ululume. Ara, anggun kanye talima ap, kanye ap, melipsilirye, ‘Malye ubicak’ tenen, dilesilya Deiyoknye dam, akunum yanuka ululuma ati nyapsine.

Mazmur 74:1

Mazmur yupu mot sekenanye, el si Asaf birye, ayupu sekuk. Elce nyabuk yupu ara, ani. Se, nun ni koproba Allah, yata ati ance akunum bataksulumba, nun tuba ikin asa unyap do? Pia, bataknamsi ulum do na nio? Winipmanto ara, nun Israel ninye ara, ance weilyam domba basam atonun nang unyabe. Bukni, an yu pia weik upkiliba, nun Israel nang ati, tuba-tuba wanauk wininamsilam do?

Rasul 20:28

‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.

Mazmur 23:1

Allah el si Yahweh, elce nati, domba basam weilamak atonun, nati melibuka kalikinulule. Ati ara, yata patan ning do nirya, elce kalikuka melinilya deice arye, na patanilye touk, Allah arye nati pia arenamnile.

Ibrani 11:16

Bukni, aning ara pia kum winilamikbuk, ‘Nunda pia teleb mutuku, im deice mutuku binuka unamap’ tenen, weika arye patalamukba, kintinibuka dinauk ulamik. Aning ati ara, Allah arye aninye ati, pia teleb weik asik akunum kintinibuka ati, alye una kum diparyuk, “Aninye ara, na mapu kopropa unyake. Nara, sik Ni Kopropa Allah unune,” nyalule.

Ibrani 3:13

Allah ati, ‘Nun like’ tenen, urasin tamubuka kum bataknamlum bukni, teleb ning ara, nyapnusine. Atalak-atalak nirya, nunce, ‘Asum ani’ tenen, tuba nyaptibye talak noutamak nirya ara, talima kwa dibuka melilanamlulume. Ara, talye ati kume. Ara, anggun talima noutamak malye un ning tuba aupmalya arye, anggun talima tam usilya deice arye, malye un ninguk talibuka winipmunyak tenena ati nyapsine. Tonda, anggunce, amalye winin ning ati, ‘Deiyok ara, dauplye. Aning ara, malye kume, tenepmunyak’ tenen, nyapsine. Winibuka tenemunyopura, aminyan ara, utenepmunya deice arye, ‘Pi dobuka malye winibibyak’ tenen, anggun nirya arye talima kwa dipdanuka melipdamunce, kalekelanamlulume. Malye winin ning nirya ara, tilila ninguk ulula ati, aning talibuka umunyopura, anggun talima kat kipdeipnamsile. ‘Winipmunyak’ tenen, anggunce anggun bidamang ati, kalekelanamlulume nyapsine.

Matius 17:5

Peterus arye ayupu tuba nyanmok talak ara, sik amutuku dup unmek bukni, dua arye siktikmek mutuku nirya palibuka lelipdongobukura, adua kan-kan arye, Allah arye ayupu nyabuk. “Aunmalanye bira, na Mi Koprop ulula ati, elti, na kanye pia delinune. Anggun nirya ara el yupu pia moubuka kekenamlulume,” Allah arye nyabuk.

Mazmur 115:3

Nun kele. Nun ni koproba Allah ara, im deice ulirye, ‘Aning ara, winipnune,’ tenepmalye ning ara, adiparyuk, aninguk winilule.

Mazmur 79:13

Nun Israel yala nang nirya, ance ‘Na tenen nang,’ tenepmumce, wipdeiamsulum nang ara, an amu tamuk unyabe. Winipmanto ara, domba basam weina deiyok nang arye, sik domba basam weilamak touk, nunda, an amu tamuk unyabe. Ati, nun ona ati ninye nirya, sikti, obuka wenepminyopura, nunce anti, “Se, na nio, anda pia telebe nyabkiabe,” nyabuka, pia, tuba-tuba si erebuka kinamkiabe. Ara, atalak arye dipdongobuka, doyanamle talak ap, anoutam nirya ara, nun wini talak unamap Israel nang ap, nunce deibibiba, dadeipdanin banamak Israel nang ap arye, anti, “Se, nun ni Allah Yahweh ara, pia telebuk ululnye,” nyabuka, an siuk, pia erenamkiabe na nio.

Keluaran 15:2

Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe.

Yeremia 31:33

Bukni, sik malye winilamice ning ati, wenen ning akunum arepnyopura, aminyan talak, narye winiryuk nyalin yupu, sik Israel ninye dam nyapdeipnamne ning ara, atia. Minop talak narye, ‘Aning wininamlulume. Aning ara, kum wininamlume,’ nyabuka, yupu deice nyaiamse ning ara, aminyan talak ara, ayupu moubuka tenenyak, ninye ara, yuk-yuk sik talima noutamak deipniba, moubuka tenenamake. Minop talak ara, keil deice sekuka arepse bukni, aminyan talak ara, sik talima pum tam sekuka deipnamne. Winipnirye, nara sik ni koprop Allah unamne. Sikda, na mapu koprop pia aunamake.

Mazmur 100:3

Tonda, nun moubuka tenepnamnyabe. Allah el si Yahweh ululnye bira, Allah tonok ulule. Allah elcuk, nun tukwak mutuku ninye nirya kweipdeipsuk. Kwepdeipsukce, nun nirya ara, Allah el ninguk unyaba ati, elcuk moubuka talisulule. Domba deiyok nang arye, sik domba basam bobuka, mutmuta palamle mutuku, telebak deibikirye, kalikuka dilamak touk, Allah Yahweh arye, nunti, bico tenepsilirye, melibuka kalikisulule.

Keluaran 20:2

“Nara anggun ni koproba Allah, na si ara, Yahweh unune. Mesir mutuku ninye arye ikin pil dobuka, sik nong deice delilamsikba, kanye imun kibuka ulamlumak, Mesir mutuku noutamak arye dobuka boyanamsisinye bira, na unune,” nyabuk.

Yesaya 55:3

Se, na Allah arye wipdeiamse ninye nirya anggunda, na dam anyuk yamunce, na yupu moubuka kekenamlulume. Na dam yamunce, kekepnumunyopura, narye anggunti dipkoprob pia kam un ning arepsiniba, anggun dib kanye ara pia kam unamlume. Anggun apu koproba Raja Daud biti, ‘Bico tenepkinirye, pia melinamkine,’ nyapdeiamse ning ara, anggun Israel ninye ati bico unilya ati, batakna kumce, pia dipkoprob aninguk wininamsine. Awininamsin ning ara, min kum, kum danmanto ning pia aunamle. Kum bataknamsine.

Mazmur 67:6

Mutuku im sirya, mutuku sirya nirya, unyak ninye nirya arye, eibuka kel bikikirye, antibuk, pia si erenamkiyake. Winibuka sikce, “Se, nun ni Allah, pia teleb ulule,” nyabuka, ‘An tibuk si erenamkiyake’ tenen, moronyabe. Diba, im sirya, mutuku sirya nirya, unyak ninye arye, antibuk, “Nun ni Allah, elda pia telebuk ululnye,” nyabuka, an siuk erenamkiyake.

Amsal 8:6

Na nyanun yupu ara, moubuka kekenamlulume. Ara, talye ati kum nyapsine. Deiyok ara, narye nyasunun yupu ara, talye yupu kum nyaltakanun bukni, pia teleb yupu uk nyanuna ati ara, moubuka kekenamnululume. Narye nyasunun yupu nirya ara, pia diksukum kibuka winin ninguk nyanuna ati ara, anggun nirya arye, moubuka kekenamnululume.

1 Tawarikh 16:14

Allah el si Yahweh ara, nun ninye nirya, nun deiyoknye, nun ni Allah usulule. Allah arye, “Aning ara wininamlume, aning ara pia kum wininamlume. Teleb ning ara ani,” nyapdeiamsuk ning ap, tuba nyasulul ning ap, ayupu ara, tukwak mutuku noutam, mutuku sirya im sirya nirya unyak nang dam ara, pia daunamle. Sik nirya arye, aning nirya bikinyake.

Mika 7:14

Nabi Mika birye, Allah ati morobuk. Se, na ni Allah Yahweh, ance an mapu koproba, Israel ninye nirya ati, wibuka deiamlumce, an mapu atonun ulamupu. Ati, ance sikti, bico tenebuka, pia moubuka kalikinamlame. Winipmanto ara, domba basam weina deiyok nang arye, sik domba basam pia teleb kibuka kaliklamak touk, ance nunti, kalikuka melinamsilame. Ara, ‘Nun Israel ninye ara, pia bai mutuku noutam atonun unyap bukni, ance lyepsimince, pia telebak deipnamsilam’ tenen, moropkine. ‘Lyepsimince, nun unamap sukum ara, pia sukulamle tuku ubuk mutuku binuka, talibuka uptibye’ tenen, moropkine. Tonda minop talak, Allah ance pia teleb mutuku, Gilead mutuku ap, Basan mutuku ap, nun Israel ninye nun apu yapu ati areamlumba, ulamik mutuku atonun, pia telebak arepsiminyeba, ‘Pia teleb mutuku noutamak unamap’ tenen, moropkine. ‘Pia teleb mutuku arepsiminyeba, nun din ning ara, weika arye dobuka dinamap’ tenen, moropkine.